1 ኣማኖ ጌꬂ ኢሲ ሚሼ ሃናና ጊዲ ኑ ሲꬎንታ ዲሼ ቤዮንታ ሚሼካ ቤዪዳ ማላ ኤሮ ጊ ኤኮ። 2 ካሴ ኣዋቲ ጋላቴቲዳይ ሄሳ ማላ ኣማኖና።

3 ሃይሲ ሃ ኣላሜይ ፆሳ ቃላን ሜꬌቲዳይሳ ኑ ኣማኖን ኤሮስ። ሄሳꬆካ ኣይፌን ቤቲዛይሲ ሜꬌቲዳይ ቤቲዛ ሚሻፌ ጊዶንታይሳ ኑኒ ኤሮስ። * ሜꬌ 1፡1፤ ማዛ 33፡6-9፤ ዮሃ 1፡3

4 ኣቤሌይ ፆሳስ ቃዬሌ ያርሾፌ ኣꬊዛ ያርሾ ኣማኖን ሺሺዴስ። ፆሲ ኢዛ ያርሾዛ ጊሽ ሃሳዪሼ ኢዚ ኣማኖን ጌሽ ጊዲዳይሳ ማርካቲዴስ። ኢዚ ሃይቂንካ ኢዛ ኣማኖይ ሃዒ ጋካናስ ሃሳዬቴስ። * ሜꬌ 4፡3-10

5 ሄኖኬይ ሃይቆ ቤዮንታ ማላ ሃይሳ ኣላሜዛፔ ኣማኖን ኤኬቲዴስ። ፆሲ ኢዛ ኤኪዳ ጊሽ ኢዚ ቤቲቤና፤ ኤኬታናፔ ካሴቲዲ ኢዚ ፆሳ ኡፋይሲዳይሲ ዮቴቲዳ ጊሽ ኢዚ ኤኬቲዴስ። * ሜꬌ 5፡21-24 6 ቃሴካ ኣማኖይ ባይንዳ ዲሺን ፆሳ ኡፋይሳናስ ሙሌካ ዳንዳዬቴና። ጋሶይካ ፆሳኮ ሺቂዛዴይ ዉሪካ ፆሲ ጊዛይሳኔ ዎዝናፔ ኢዛ ኮዪዛይታስ ኢዚ ዋጋ ኢማናይሳ ኣማናናስ ቤሴስ።

7 ኖሄስ ፆሲ ቡሮ ኖሄይ ባ ኣይፌን ቤዮንታ ሚሻ ጊሽ ናጌታና ማላ ዮቲን ኖሄይ ፆሳ ባቢዲ ባሶ ኣሳ ኣሻናስ ኣማኖን ማርካቤ ኬፂዲ ኣላሜ ኣሳ ፒርዲሲዴስ፤ ኣማኖን ቤቲዛ ፂሎቴꬅ ላቲዛዴ ጊዲዴስ። * ሜꬌ 6፡13-22

8 ኣብራሃሜይ ባስ ላታ ቢታ ኤካናስ ፄይጌቲዳ ዎዴ ኣማኖን ኣዛዜቲዴስ። ኣዋ ቢዛኮኔ ኤሮንታ ኣጊኮካ ኤሮ ጊዲ ቢዴስ። * ሜꬌ 12፡1-5 9 ኣላጋ ቢታን ቤቴ ኣሳ ማላ ቡሮ ኔስ ኢሜታና ጌቴቲዳ ቢታን ኣማኖን ኡቲዴስ። ኢዛስ ኢሜቲዳ ሂዶታ ቃላ ኢዛራ ኢሲፌ ላታና ዪሳቃ ማላኔ ያቆቤ ማላ ዱንካኔን ዴዒዴስ። * ሜꬌ 35፡27 10 ጋሶይካ ሚና ዲዛሮ ፆሲ ኢዞ ቆፒ ሜꬊዳ ካታማዮ ኤካና ናጊዴስ።

11 ኣብራሃሜስ ዎዴይ ጌዴ ቢዳዴ ጊዲኮካ ሳራይካ ዬሎንታ ማካራ ጊዲኮካ ሂዶታ ኢስታስ ኢሚዳዴይ ኣማኔቲዳዴ ሂስቲ ፄሊዲ ኣማኖን ና ኣዋ ጊዳናስ ጋኪዴስ። * ሜꬌ 18፡11-14፤ 21፡2 12 ሄሳ ጊሽ ሃይሳ ሃይቂዳ ኣሳ ማላ ቆዴቲዳ ኢሲ ኣብራሃሜፔ ሳሎ ፆሊንቴ ማላኔ ኣባ ኣጬ ማላ ቆዳይ ባይንዳ ዳሮ ዜሬꬃይ ቤቲዴስ። * ሜꬌ 15፡5፤ 22፡17፤ 32፡12

13 ሄይቲ ዉሪካ ኢስታስ ኢሜቲዳ ሂዶታ ቃላ ዴሞንታ ባ ኣማኖን ናጊዳ ማላ ሃይቂዳ። ጊዲኮካ ኢስቲ ሃይሳ ቢታ ቦላ ኢማꬄኔ ቤቴ ኣስ ጊዲዳይሳ ኤሪዳ ጊሽ ሃሆን ዲሼ ቤዪዲ ኩሼን ኣꬂዳ ማላ ኡፋይሳን ኤኪዳ። * ሜꬌ 23፡4፤ 1ታር 29፡15፤ ማዛ 39፡12 14 ሄሳ ማላ ጊዛ ኣሳቲ ኢስታ ዴሬይ ኣዋኮኔ ባ ዴሬ ናጊዛይሳ ቆንጬን ቤሴቴስ። 15 ኢስቲ ባ ዬጊ ኬዚዳ ዴሬ ዛሪ ቆፒዛኮ ጉዬ ሲሚ ባና ዳንዳዬቴስ። 16 ሃዒ ሄሳፌ ኣꬊዛ ፑዴ ሳሎን ዲዛ ዴሬ ላሞቴቴስ። ሄሳ ጊሽ ፆሲ ኢስታስ ሳሎን ካታማ ጊጊሲዳ ጊሽ “ኢስታ ፃላ ፆሳ” ጌቴቲ ፄይጌታናስ ዬላቲቤና።

17 ፆሲ ኣብራሃሜይ ባ ናዛ ዪሳቃ ሹካና ማላ ፓጪን ኣብራሃሜይ ዪሳቃ ያርሻናስ ኣማኖን ሺሺዴስ። ፆሲ ኢዛስ ኢማና ጊዳይሳ ኢዚካ ባ ና ኢሲኔዛ ሹካናስ ጊጌቲዴስ። * ሜꬌ 22፡1-14 18 ሄሲካ ፆሲ ኢዛስ “ኔ ዜሬꬂ ዪሳቃ ባጋራ ፄይጌታና” ጊዳይሳ ማላ። * ሜꬌ 21፡12

19 ፆሲ ሃይቂዳዴ ዴንꬃናስ ዳንዳዪዛይሳ ኣብራሃሜይ ኣማኒዳ ጊሽ ዪሳቃካ ሃይቆፔ ዴንዲዳ ኣሳ ማላ ናምዓንꬆ ዴሚዴስ። 20 ዪሳቃይ ቡሮፔ ሃናናይሳ ቆፒ ኤኪዲ ያቆቤኔ ኤሳዌ ኣማኖን ኣንጂዴስ።

21 ያቆቤይ ሃይቃና ጊሽ ዮሴፌ ናይታ ኢሳ ኢሳ ኣማኖን ኣንጂዳይኔ ባ ጉፌ ቦላ ዳርቲ ኤቂዲ ጎይኒዳይ ኣማኖና። * ሜꬌ 47፡31፤ 48፡1-20

22 ዮሴፊ ሃይቃና ጊሽ ኢስራዔሌ ኣሳይ ጊብፄፔ ኬዛናይሳ ኢዚ ዮቲዳይኔ ባ ሜቄꬃ ጊሽ ኢስቲ ኣይ ኦꬃናኮኔ ኢስታ ኣዛዚዳይ ኣማኖና። * ሜꬌ 50፡24፥25፤ ኬሳ 13፡19

23 ሙሴይ ዬሌቲን ኢዛስ ማላይ ሎዖ ጊዲዳይሳ ቤዪዲ ኢዛ ዬሊዳይቲ ኢዛ ሄꬑ ኣጊና ጋካናስ ካዎዛ ኣዛዞ ባቦንታ ቆቲዳይ ኣማኖና። * ኬሳ 2፡2፤ 1፡22 24 ሙሴይ ዲጪ ጋኪዲ “ፓሮኔስ ናይ ና” ጌቴታናይሳ ኣማኖን ኢፂዴስ። * ኬሳ 2፡10-12 25 ጉꬃ ዎዴስ ናጋራን ቤቲዛ ኡፋይሳፌ ኣꬂዲ ፆሳ ኣሳራ ሜቶ ቤያናስ ዶሪዴስ። 26 ጊብፄ ዴሬን ዲዛ ሃሮፔ ቦላራ ኪርስቶሳ ጊሽ ዋዬ ኤኮይ ዳሮ ኣꬊዛ ሃሮ ጊዲዳይሳ ዩሺ ቆፒዴስ። ጋሶይካ ኢዚ ሲንꬃፌ ኤካናይሳ ቡሮ ሃሆን ቤዪዳ ጊሻሳ።

27 ካዎ ሃንቆስ ባቦንታ ኣማኖን ጊብፄ ዬጊ ኬዚዴስ። ቡሮ ቤቶንታይሳ ቤዪዛ ማላ ቆፒዲ ሄ ቆፋን ሚኒ ኤቂዴስ። 28 ባይራታ ዉርሲ ዎꬊዛይሲ ኢስራዔሌታ ባይራ ናይታ ዎꬎንታ ማላ ኣማኖን ፓዚጋኔ ሱꬃ ዉፄꬃ ዎጋ ዎꬂዴስ። * ኬሳ 12፡21-30

29 ኢስራዔሌ ኣሳይ ሜላ ቢታ ቦላ ሃሙቲዛ ማላ ዞዖ ኣባ ጊዶራ ኣማኖን ፒኒዴስ። ጊብፄ ኣሳይ ቃሴ ኢስታꬆ ሃናና ጊሽ ኣባን ሚቴቲዴስ። * ኬሳ 14፡21-31

30 ኢስራዔሌ ኣሳይ ኢያርኮ ጊምቤዛ ላፑን ቃማ ዩዪ ዩዪ ኣꬊዳፔ ጉዬ ጊምቤዛ ኣማኖን ላሊዴስ። * ኢያ 6፡12-21 31 ላይማን ኣቂዛ ኤራዓባ ዴሬ ፆሞሳና ዪዳይታ ሳሮን ሞካ ኤኪዳ ጊሽ ሃንኮ ኣዛዜቶንታ ኣሳራ ꬋዮንታ ኣማኖን ኣታዱስ። * ኢያ 2፡1-21፤ 6፡21-25

32 ሃይሳፌ ኣꬌꬅ ሃራ ኣይ ጋኔ? ጌዶኔ ጊሽ፥ ባራቄ ጊሽ፥ ሳምሶኔ ጊሽ፥ ዮፊታሄ ጊሽ፥ ዳዉቴ ጊሽ፥ ሳሜላ ጊሽ ቃሴ ናቤታ ጊሽ ታ ዮቶንታ ማላ ታስ ዎዴይ ዴና። * ዳና 6፡11-8፡32፤ 4፡6-5፡31፤ 13፡2-16፡31፤ 11፡1-12፡7፤ 1ሳሜ 16፡1፤ 1ካዎ 2፡11 33 ሄይታንቲ ኣማኖን ካዎታ ፆኒዳ፤ ሱሬ ፒርዳ ፒርዲዳ፤ ባስ ኢሜቲዳ ሂዶታ ቃላ ኤኪዳ፤ ጋሞታ ዱና ጎርዲዳ፤ * ዳኔ 6፡1-27 34 ታማ ዎልቃ ቶይሲዳ፤ ቃራ ማሻፌ ኬሲ ኤኪ ኣቲዳ፤ ዳቡራፔ ሚኒዳ፤ ኦላሶን ጎባታ ጊዲዳ፤ ኣላጋ ኣሳ ኦላ ጎዲዳ፤ * ዳኔ 3፡21-30 35 ማጫሳታስ ሃይቂዳይቲ ፓፂዳ፤ ባጋይቲ ቃሴ ሄሳፌ ኣꬊዛ ሃይቆፔ ዴንꬂ ዴማናስ ጊዲ ሃይቆፔ ኣቴꬂ ሌቂዲ ሃይቆስ ባና ኣꬂ ኢሚዳ፤ ዋዬፔ ኣታናስ ኮይቤቴና። * 1ካዎ 17፡17-24፤ 2ካዎ 4፡25-37 36 ኢሲ ኢሲ ኣሳቲ ኣሳን ካዔቲዳ፤ ጋራፌቲዳ፤ ባጋይቲ ቃሴ ቃሾ ኬꬂ ጌሊዳ። * 1ካዎ 22፡26-27፤ 2ታር 18፡25-26፤ ኤር 20፡2፤ 37፡15-16፤ 38፡6 37 ሹቻን ጫዴቲዳ፤ ማጋዜንካ ናምዑ ኬዚ ጳሊቄቲዳ፤ ማሻን ሹኬቲ ሃይቂዳ፤ ዋዬቲሼ፥ ጎዴቲሼኔ ዳቡርሼ ዶርሳ ኢቴኔ ዴይሻ ኢቴ ማይዒዲ ዋዬቲዳ። * 2ታር 24፡21 38 ሃ ኣላሜይ ኢስታስ ቤሶንታይሳ ጊዲዳ ጊሽ ባዞኒኔ ጌዜን ጎንጎሎኒኔ ኦላ ጊዶን ዋዬቲዳ።

39 ሄይታንታ ኡባታ ኣማኖ ጊሽ ማርካቲኮካ ኢስታፌ ኦኒካ ኢሜታና ጌቴቲዳ ሂዶታ ቃላ ጋኪዲ ኤኪዳዴይ ዴና። 40 ፆሲ ኑስ ሄሳፌ ኣꬊዛዝ ጊጊሲዳ ጊሽ ኑ ባይንዳ ኢስቲ ፃላላ ኩሜꬅ ጊዳና ዳንዳይቤቴና።