1 ኮይሮ ጫቆ ቃላዛን ፆሳስ ጎይኒዛ ዎጋይኔ ቢታ ቦላ ዲዛ ፆሳ ኬꬂ ዴስ። 2 ካሴ ናምዑ ኪፊሌራ ዲዛ ዱንካኔይ ጊጌቲ ዴስ። ኮይሮ ኪፊሌዛን ፆምፔ ዎꬂዛሶይኔ ፃራጴዛይ ቃሴ ኡኬꬂ ዴስ። ሄሳ ሄ ኪፊሌዚ ዱማ ኪፊሌ ጌቴቴስ። * ኬሳ 25፡31-40፤ 26፡1-30 3 ናምዓንꬆ ኪፊሌዚ ናምዓንꬆ ማጋላሻፔ ጉዬ ባጋራ ዲዛ ኪፊሌይ ኡባፌ ዱማ ጌቴቴስ። * ኬሳ 26፡31-33 4 ሄሳ ጊዶን ዎርቃፌ ኦሴቲዳ ኤፃኔ ጩዋሲዛ ቄሪ ሼልዔ ማላይኔ ዎርቃን ሜሼቲዳ ጫቆ ታቦታይ ዴስ። ሄ ታቦታይካ ኢዛ ጊዶን ማናይ ዲዛ ዎርቃ ሌማቴይ፥ ጪሊሊዳ ኣሮኔ ጉፌይኔ ጫቆ ቃላቲ ኢዛ ቦላ ፃፌቲዳ ሹቻ ማሴꬂ ዴስ። * ኬሳ 16፡33፤ 25፡10-16፤ 30፡1-6፤ ታይ 17፡8-10፤ ዛሬ 10፡3-5 5 ሄ ታቦታዛ ቦላ ዲዛ ናጋራፔ ማሮቴꬃ ካማዛ ቦላ ባ ቄፌራ ካሚዛ ቦንቾ ኩሩቤቲ ዴቴስ። ሃዒ ቃሴ ኑ ሄይታንታ ኢሳ ኢሳ ጊሽ ሻኪ ሻኪ ሃሳያናስ ዳንዳዮኮ። * ኬሳ 25፡18-22

6 ዉሪካ ሄሳꬆ ጊጌቲዳፔ ጉዬ ቄሴቲ ባ ኦሶ ፖላናስ ዱንካናስ ኮይሮ ኪፊሌ ጌሌቴስ። * ታይ 18፡2-6 7 ጊዲኮካ ኡባፌ ጊዶቲዛ ኪፊሌ ቄሴታ ሃላቃይ ፃላላ ጌሌስ። ሄሲካ ላይꬃን ኢሲቶ ፃላላ ጊዲሺን ኢዚ ባ ናጋራ ጊሺኔ ዴሬይ ኤሮንታ ኦꬂዳ ናጋራ ጊሽ ሺሺዛ ያርሾ ሱꬅ ኦይኮንታ ሙሌካ ጌሌና። * ሌዌ 16፡2-34 8 ኮይሮ ዱንካኔዚ ካሴ ዲዛ ዎዴ ጌዴ ኡባፌ ዱማ ጌቴቲዛሶ ኤፊዛ ኦጌይ ሄ ዎዴ ቆንጬ ጊዶንታይሳ ፂሎ ኣያናይ ቤሴስ። 9 ሄሲካ ሃይሳ ሃ ዎዴዛስ ሌሚሶ ጊዲሺን ካሴ ሺቂዛ ያርሾቲኔ ጮ ኢሜቲዛ ኢሞታቲ ኢሚዛይታ ዎዝና ሼምፒሳናሲኔ ሙሌ ጌሻናስ ዳንዳይቤቴና። 10 ሄይታንቲ ዉሪካ ኦራꬃ ዎጋይ ያና ጋካናስ ጮ ሜላ ዱና ሃሳያ ማላ። ቃሴካ ኢስቲ ሙሳ ጊሺኔ ኡሻ ጊሽ ቃሴካ ዱማ ዱማ ጌሾ ዎጋታ ፃላላ።

11 ጊዲኮካ ኪርስቶሲ ቡሮፔ ያናስ ዲዛ ሎዖ ሚሻታስ ቄሴታ ሃላቃ ጊዲዲ ቆንጪዴስ፤ ኢዚ ኢዛን ጌሊዳ ዱንካኔዚ ጊታኔ ጌሻ። ሄ ዱንካኔዚ ኣሳ ኩሼን ኦሴቶንታይሳኔ ሃይሳ ሃ ሜꬌቴꬃፌ ጊዴና። 12 ኢዚ ሄ ዱንካኔዛን ጌሊሼ ዴይሻታ ሱꬁኔ ዎፓኖ ቦራታ ሱꬅ ኤኪ ጌሊቤና። ጊዶ ኣቲን ኣስ ኣሻናስ ሜርናስ ባ ሱꬅ ኤኪዲ ኡባፌ ዱማ ጌቴቲዛ ኪፊሌ ሃራ ዎዴ ናምዓንꬆ ጌሎንታ ማላ ዉርሴꬃ ጌሎ ጌሊዴስ። 13 ኢስታስ ካሬ ባጋ ኣሳቴꬃይ ቱኒዳ ኣሳታ ቦላ ኣራጪዛ ዴይሻ ሱꬂኔ ዎፓኖ ቦራታ ሱꬂ ሄሳꬆካ ያርሾስ ፁጌቲዳ ኡሳ ቢዲንꬂ ኢስታ ጌሺዛይሳ ጊዲኮ፥ * ሌዌ 16፡15-16፤ ታይ 19፡9፥17-19 14 ሜርና ኣያናን ባና ዎሶይ ባይንዳ ያርሾ ኦꬂ ፆሳስ ሺሺዳ ኪርስቶሳ ሱꬂ ኑኒ ዴዖ ፆሳስ ጎይናናስ ሃይቄꬃ ኦሶፔ ኑና ኣይ ማላ ኣꬂ ጌሻንዴ?

15 ሄሳ ጊሽ ፄይጌቲዳይቲ ኢስታስ ኢማና ጌቴቲዳ ሜርና ላታ ኤካና ማላ ኪርስቶሲ ኦራꬃ ጫቆስ ጋናቲዛዴ ጊዲዴስ። ኮይሮ ጫቆዛ ጋርሳን ዲዛ ዎዴ ኢስቲ ኦꬂዳ ናጋራፔ ጌያና ማላ ኢስታ ጊሽ ኢዚ ሃይቂዴስ።

16 ባዛይ ባዜቲዛይሳ ጊዲኮ ባዚዳዴ ሃይቆ ሻኪ ኤራናስ ቤሴስ። 17 ጋሶይካ ባዛይ ሚኒዛይ ባዚዳዴይ ሃይቂና። ባዚዳዴይ ፓፃ ዲሺን ባዛይ ኣይኮካ ኦꬄና።

18 ሄሳ ጊሽ ኮይሮ ጫቆ ቃላይ ሱꬂ ባይንዳ ሚኒቤና። 19 ሙሴይ ባ ኣዛዞ ዎጋ ዴራስ ዮቲ ሲሚዲ ዴይሻታ ሱꬂኔ ዎፓኖ ቦራታ ሱꬅ ሃꬃራ ኤኪዲ ዞዖ ዶርሳ ኢሲኬን ኤጬሬ ዉርጬ ማላ ሄሶጴ ጌቴቲዛ ሚꬃራ ኤኪዲ ባ ፃፊዳ ዎጋ ማፃፋ ቦላኒኔ ዴሬዛ ቦላ ዉፂዴስ። 20 “ኢንቴ ናጋና ማላ ኢንቴና ፆሲ ኣዛዚዳ ጫቆ ቃላ ሱꬃይ ሃይሳ” ጊዴስ። 21 ሄሳꬆካ ዱንካኔዛኔ ኢዛ ጊዶን ዲዛ ኦሶ ሚሻ ቦላ ኡባ ሱꬅ ዉፂዴስ። * ሌዌ 8፡15 22 ኣዳፌካ ጉꬃ ሚሻቲ ኣቲሺን ሃንኮ ዳሮ ሚሻይ ሱꬃን ጌያናስ ቤሲዛይሳ ዎጋይ ኣዛዜስ። ሱꬂ ጉኮንታ ዲሺን ማሮይ ባዋ። * ሌዌ 17፡11

23 ሄሳ ጊሽ ሳሎ ሚሻታስ ሌሚሶ ጊዲዳይቲ ሃይታንታን ጌያናይስ ኣቴና ሺን። ሳሎን ዲዛ ሚሻቲ ጊዲኮ ሃይሳፌካ ኣꬊዛ ያርሾን ጌያናስ ቤሴስ። 24 ኪርስቶሲ ቱሙ ዱንካኔይስ ሌሚሶኔ ኣሳ ኩሼን ኦሴቲዳ ፆሳ ኬꬄ ጌሊቤና፤ ጊዶ ኣቲን ሃዒ ኑ ጊሽ ፆሳ ሲንꬃን ቤታናስ ፑዴ ሳሎ ጌሊዴስ። 25 ቄሴታ ሃላቃይ ባ ሱꬅ ጊዶንታ ሱꬅ ኤኪዲ ላይꬃን ላይꬃን ኡባፌ ዱማ ኪፊሌ ጌሊዛይሳꬆ ኪርስቶሲ ባና ያርሻናስ ፑዴ ሳሎ ሺሬቲ ሺሬቲ ጌሊቤና። 26 ሄሳ ማላ ጊዲዛኮ ኪርስቶሲ ኣላሜይ ሜꬌቶሳፔ ሃ ሲሚን ዳሮ ዎዴ ሜቶ ኤካናስ ቤሴስ፤ ሃዒ ቃሴ ዎዴ ዉርሴꬃን ባና ያርሺዲ ናጋራ ዲጋናስ ዉርሴꬃስ ኢሲቶ ቆንጪዴስ።

27 ሄሳꬆካ ኣሲ ኢሲቶ ሃይቄስ፤ ሄሳፌ ካሊዲ ፒርዳ ሲንꬃን ኤቃናስ ጊጊ ኡቲዴስ። 28 ኪርስቶሲ ዳሮ ኣሳ ናጋራ ዲጋናስ ኢሲቶ ያርሼቲዴስ። ናምዓንꬆካ ኢዚ ቆንጫና፤ ሄሲ ኢዛ ናጊዛይታስ ኣቶቴꬂ ኤኪ ያናስ ኣቲን ናምዓንꬆ ዛሪ ናጋራ ቶካናስ ጊዴና። * ኢሳ 53፡12