8
I Jesus A Afafuna Paditam Annino Bawuwa Tulag
(2 Cor. 3:7-11)
1 Antuyawino baggaꞌneno sinapiꞌmi sikwayu, aneno afafuna paditama aggatuttud sino padiwanani Dios a Kapapatiyan sey langita makituray sikwana. 2 E ino agyananino passerbiyanna a afafuna padi ino gakkuruwa paddayawan ki Dios a inangwa i Dios, bakkannino inangweno tolayira siꞌin.
3 Amminira a afafuna padi sito lubag, nadotukanira a mangiwaꞌlat sino animalira onnu sino korwana iyaꞌdeno bafulundera ki Dios takesi mapakomanino liwaꞌda. Antu gafuna, ino afafuna paditam, wara kappenad iwaꞌlaꞌna ki Dios. 4 Udde bakkan sito lubaggino passerbiyanna, se nannud wara kepay sito lubag, ammena nad dama a masserbi si padi, se ino gakagakera i Levi ino nadotukana miwaꞌlat sino iyaꞌdeno tolayira gafu sino lintiyi Moises. 5 Udde ino passerbiyanda, kunnangke letratu onnu alinopelangino gakkuruwa ana sey langit. Ammutam inay, se wasin araꞌniyenna pataꞌdagganda Moisesino tolda a paddayawanda, netuni Dios sikwana si, “Lawarannuwa pataꞌdaggan, takesi mekunnengke sino nepaitak sikwam sin nagyananta sey kulud.”* 8:5 Exodo 25:40 6 Udde ino tarabafuwa netalakki Dios ki Jesus, nalawad amma sino tarabafuweno dadanira a padi sito lubag, se ino bawuwa netulagi Dios sino tolayira a itaꞌdaggi Jesus, nalawad amma sino dadana netulangnga. Se ino nekariyi Dios sino bawuwa tulangnga, nalawad amma sino nekarina siꞌin.
7 Nannud awana kurangngeno pitta a tulag, ammenan nad miyambabawuwi Dios si tulag. 8 Udde maammuwan si aneno kurangngenaya dadana tulag se amme makatumpalino tolayira. Gafu sino liwaꞌdera, binalawira i Dios e sinapiꞌna si,
“Sapitangku si dumaꞌnganeno awa mangwak si bawuwa tulag sino tolekira a gakagakera i Juda annino gakagakera kappayi Israel. 9 Iyawa bawuwa tulag, ammena mekunna sino dadana netulaggu sino gagginafurera sin nifuyutangku sikwara a nanaw sey Egipto, se ammera sinuntul inaya netulaggu sikwara, e antu gafuna, nepurekira. 10 Antuyawino bawuwa itulaggu sino gakagakera i Israel naso maddagguna aw. Imulakino lintiggu sino nakanda takesi angganda a kuruwan. E nu kunnenoy, ikkanaꞌngeno Diosda e iraneno tolek. 11 Ammeran nad manuldu sino kakkolaꞌdera annino kalubbunandera a massapit si ammuwanda naddi Dios, se ammurakun ammin, massiki ino kaabbafawanira a tolay andino kadodokkallanira a tolay. 12 Se pakomangkuneno liwaꞌdera, e ammekunna dandammannino narakkatta inangwara.”† 8:12 Jeremias 31:31-34
13 Ino nassapitani Dios si ananeno bawuwa tulag, antuweno nipakaammuwanna si dadaninnino pitta a netulangnga a awaninna serbina. E ammutam si ammina dadan, malana mawawan.