5
Domba Yanan a nala Ivar lolin tali Ubu
1 Nata urea Ia i ndoku wan i Ubu nfareta a, na liman mela ntaha buku isa ma rlulung roak ia. Naꞌa buku lalulung yai ralan ovu murin a, na rtulis ma nngora lahir, ma rkeak ovu rtomak roak afa isa wean segel ifitu naꞌa. 2 Ba usiꞌik Ubu Ni sansinir isa i nangrebat urun nanaꞌa lanit ratan. Ia nafwak ma norat ne, “Iki veka ni vavaꞌat nmalola ma inovan ma nkamsat nala segel i naꞌa buku lalulung yai ma nvelar ia?” 3 Naꞌuk wol tamata isa vali naꞌa lanit ratan ovu lanit i vavan ini, ovu vali naꞌa letvava, ni vavaꞌat a nmalola ma inovan ma nvadil buku lalulung yai, ma nbas ihin a.
4 Ba ralang lalau urun ma uvakar ma dawan, tevek wol tamata isa vali bisma nvelar nala buku lalulung yai ma nbas ihin a. 5 Tali fareta dawan vutrua rahin ifaꞌat avyai, na isa nfalak verin yaꞌa ne, “Deka bwakar. Eka msiꞌik, tamata i rfanara vali Ia ne, Singa i ntali Yahudi rira arun dawan isa naran Yehuda. Ia ubun a nusin verin Raja Daud, ovu nangal nala roak afa ovi sian ra munuk, ma utun roak. Ba Ia saꞌi bisma nruvat nala segel ifitu ovu buku lalulung yai.”* 5:5 Singa yai nfaturu afwatan i neluk raja verin afwatan liak ra munuk. Msiꞌik Kejadian 49:8-10. Ayat avyai rfamalik Yehuda ubun nusin isa i mane nfareta wean singa, inyai Duilaꞌa Yesus, Raja i ntevut dida salasilan ra.
6 Nata usiꞌik Domba Yanan a ndir-ebang wan i Ubu ndoku ma nfareta. Afa ifaꞌat ovi rvaꞌat ma raling ma lolan watan ira yai, ovu fareta dawan avyai, rdir-lilit Ia. Domba Yanan yai felan a wean i rfedan roak Ia, naꞌuk nvaꞌat ewal. Ia Ni ungar ifitu, ovu matan ifitu vali. Matan ifitu yai ihin a ne, Ubu Ni Roh i rfanara ne, roh ifitu i nti nban-soru lanit i vavan munuk.† 5:6 Ungar ifitu yai rfaturu Domba Yanan Ni ngrebat. Matan ifitu nfaturu ne, a Ia nkaꞌa munuk afakataka. 7 Ba Domba Yanan yai nma ma nala buku lalulung yai tali Ubu liman mela a naꞌa wan i ndoku ma nfareta. 8 Naꞌut i beti nala buku lalulung yai, na afa ifaꞌat ovi rvaꞌat ma raling ma lolan watan ira yai ovu fareta dawan vutrua rahin ifaꞌat yai rsangatur naꞌa Domba Yanan yai wahan ralan a, ma raraning Ia. Ira munuk rtaha kecapi ovu ngusi masa sasan lokat ira. Ngusi avyai rngora ovu afa ovi rasnuri ma umarira voar lolin urun a, ma al nfaturu tamata ovi rorang Yesus rira falurut ra.
9 Ira rdedang dadedang ngorvaꞌan isa verin Domba Yanan yai, tevek ralang Ia, ma rfalak ne,
“Oa aꞌuk saꞌi Mu vavaꞌat nmalola, ba inovan
ma mala buku lalulung yai ovu mkamsat ni segel ra.
Tamata ra rfedan roak Oa ma laram a nvoat al mtevut tamata ra‡ 5:9 Yesus laran a nvoat al ntevut tamata ovi rorang Ia tali rira salasilan ra, ba reluk Ubu Ni tamata ra. tali rira salasilan ra, ma reluk Ubu Ni tamata ra.
Tamata avyai rtali arun dawan ra munuk, negara ra munuk, bangsa ra munuk ovu vali rtali vai ovi rnaꞌa lanit ivavan a munuk.§ 5:9 Tamata ovi rdedang verin Domba Yanan a, ira veka rtali vai ovi tamata ra rala munuk, ovu vai avyai rsialing ira munuk. Msiꞌik vali 7:9, 11:9, 13:7, 14:6,
10 Oa motu ma ira wean mela falurut ovi rkarya verin Ubu naꞌa Mu fareta a.
Ira veka rfareta wean raja ra naꞌa lanit ivavan a.”
11 Nata usiꞌik ewal ovu urenar dadedang tali Ubu Ni sansinir ra tali lanit ratan, rivun ilaꞌa matan ma wol trekan nala. Ira munuk rdir-lilit wan i Ubu ndoku ma nfareta yai, ovu afa ifaꞌat ovi rvaꞌat ma raling ma lolan watan ira yai, ovu vali fareta dawan avyai. 12 Ubu Ni sansinir avyai rdedang ma vairira dawan urun ia, ma rfalak ne,
“Inovan ma amfadawang aꞌuk
Domba Yanan i rfedan roak Ia yai,
Amraning Ia, tevek Ni ngrebat a, Ni metan rivun,
Ni kakaꞌa dawan, ovu Ni fareta a.
Amfakaratat Ia, tevek Ni dawan a nrahi lia munuk
ovu amalang aꞌuk Ia.”
13 Yaꞌa urenar munuk tamata ra ovu afa ovi rvaꞌat naꞌa lanit ratan, ovu ovi rnaꞌa lanit i vavan a, ovu vali ovi rnaꞌa letvava. Urenar munuk vali afa ovi rnaꞌa tahat ralan a. Afa avyai munuk rfalak ne,
“Amdedang verin Ia i ndoku wan i Ubu ndoku ma nfareta a,
ovu Domba Yanan a.
Amfadawang ovu amraning Ia,
tevek amalang Ia.
Amfakaratat Ia, tevek Ni dawan a rahi lia munuk ovu Ni fareta a dawan lia munuk afakataka. Amfamalik Ia, nata ti wol ni wahan!”* 5:13 Afa avyai munuk, velik ne lolin te sian, ihin a ne, afakataka munuk raraning Domba Yanan a. Naꞌa lanit ratan, na nait sian ra wol bis rfonak ira, ba raraning vali Yesus.
14 Ba afa ifaꞌat ovi rvaꞌat ma raling ma lolan watan ira yai rfalak ne, “Kena urun!” Fareta dawan avyai munuk rsangatur vali ma raraning Ia.
*5:5 5:5 Singa yai nfaturu afwatan i neluk raja verin afwatan liak ra munuk. Msiꞌik Kejadian 49:8-10. Ayat avyai rfamalik Yehuda ubun nusin isa i mane nfareta wean singa, inyai Duilaꞌa Yesus, Raja i ntevut dida salasilan ra.
†5:6 5:6 Ungar ifitu yai rfaturu Domba Yanan Ni ngrebat. Matan ifitu nfaturu ne, a Ia nkaꞌa munuk afakataka.
‡5:9 5:9 Yesus laran a nvoat al ntevut tamata ovi rorang Ia tali rira salasilan ra, ba reluk Ubu Ni tamata ra.
§5:9 5:9 Tamata ovi rdedang verin Domba Yanan a, ira veka rtali vai ovi tamata ra rala munuk, ovu vai avyai rsialing ira munuk. Msiꞌik vali 7:9, 11:9, 13:7, 14:6,
*5:13 5:13 Afa avyai munuk, velik ne lolin te sian, ihin a ne, afakataka munuk raraning Domba Yanan a. Naꞌa lanit ratan, na nait sian ra wol bis rfonak ira, ba raraning vali Yesus.