6
Tamata ovi rtali Yesus Ni ahu wol rorang Ia
Matius 13:53-58; Lukas 4:16-30
1 Yesus ovu Ni tamata ovi rorang Ia rti talik wan yai, ma rti Ni ahu. 2 Naꞌut amar i Yahudi ra ryari ira, na Yesus nsiair naꞌa rira rahan falurut. Tamata rivun rarenar afa ovi nfalak ra, na rtalkaka. Ba rsiforat ira ne, “Ia nkaꞌa afa avyai tali inba? Ia Ni kakaꞌa ntali iki? Iki nala ngrebat ini verin Ia ma not-nala mujizat ra? 3 Ia tukan kayu Ia. Renan naran Maria ovu warin ra verin Yakobus, Yoses, Yudas ovu Simon. Uran ra rleal vali ini.” Tamata rivun avyai ralar sian Ia, ba rafena ma rorang Ia.
4 Yesus nfalak verin ira ne, “Tamata ra ralang nabi isa naꞌa wan inba watan, naꞌuk wol ralang ia naꞌa ni ahu, ovu naꞌa ni rahan teta, ovu ni tiniman ra wol ralang vali ia.”
5 Yesus wol notu mujizat naꞌa inyai, tevek wol rorang Ia. Naꞌuk nfadoku liman nanaꞌa tamata ifira watan ovi rira suhut ra, ma lolin ewal ira. 6 Yesus nabrian, tevek wol rorang Ia.
Yesus nala Ni ngrebat verin Ni tamata vutu rahin irua, ma nsinir ira ma ti rfamalik Ubu Ni Ivar Lolin
Matius 10:5-15; Lukas 9:1-6
Nata Yesus nban-lilit ahu ovi rnaꞌa wan yai, ma nsiair. 7 Naꞌut inyai, na Ia nasdovu Ni tamata vutu rahin irua ovi rorang Ia, beti nsinir ma raruan ira rti, ovu nala Ni ngrebat verin ira ma raling vatuk nait sian ra tali tamata ra. 8 Yesus nsurak ira ma nfalak ne, “Deka mtyaha afa rivun naꞌa bira banbanan, ba mtyaha watan bira takil ra. Deka mtyaha kesi, sadawan, ovu vali kubang. 9 Myaꞌadoru tatea ra naꞌa eabira ra, naꞌuk deka mtyaha ravit blawat, nlia tali isa.”
10 Ia ntafal ma nfalak verin ira ne, “Wean i miti rahan isa, na mnyaꞌa inyai, ti naran i mane miti talik wan yai. 11 Wean i tamata ovi rnaꞌa ahu isa wol rtorung ma mnyaꞌa inyai, ovu vali wol rarenar bira vaivatul ra, na byan-talik wan yai. Misnabar vatuk kyavu tali eabira ra, boma neluk faneak ne, Ubu veka nukun ira.”
12 Ba Yesus Ni tamata ovi rorang Ia rti rfamalik Ubu Ni Ivar Lolin verin tamata ra, boma rahil ma rtalik tali rira salasilan ra. 13 Ira raling vatuk nait sian rivun tali tamata ra. Raslofi vali ngul naꞌa tamata rivun ovi rira suhut ra, ma lolin ewal ira.
Herodes nanarin Yesus ne, Yohanes i nmata roak nvaꞌat ewal
Matius 14:1-12; Lukas 9:7-9
14 Raja Herodes* 6:14 Herodes yai naran Herodes Antipas. Herodes nfareta propinsi Galilea ovu propinsi Perea. Ia yaman a, naran Herodes Agung, inan ma nfedan Yesus naꞌut i kakoꞌu Ia (msiꞌik Matius 2:16-18). nrenar roak afa ovi Yesus notu ra, tevek tamata rivun rkaꞌa roak naran a. Tamata boku rfalak ne, “Yohanes i nbaptis tamata ra nvaꞌat ewal roak tali matmatan a, ba ia ni ngrebat ma not-nala mujizat ra.”
15 Naꞌuk tamata liak boku rfalak ne, “Ia ini nabi Elia.”† 6:15 Tamata Yahudi rfikir ne, nabi Elia yai veka nma lan ma naruk lingaꞌan verin Raja i nsikat tamata tali rira salasilan ra, ma rira vavaꞌat kakiwal.
Boku rfalak vali ne, “Yesus yai nabi Ia, wean nabi lalan ra.”
16 Herodes nrenar afa ovi tamata ra rfamalik yai, na nfalak ne, “Wahal, inyai Yohanes i usinir tamata ra ma rvangal ia nvaꞌat ewal roak!”
17-20 Herodes nala roak warin i Filipus awan a naran Herodias ma neluk awan, ba Yohanes nfalak lalawatan verin ia ne, “Wol bisma msifa ovu ia, tevek motu wean inyai, na mangal roak Ubu Ni inukun ra!”‡ 6:17-20 Yohanes ntab-teri Herodes, tevek afa i notu ovu warin i Filipus awan a nangal lahir afa ovi rtulis roak naꞌa Imamat 18:16 ovu 20:21. Ayat avyai rfalak ma tamata wol bis nala aꞌan-warin ra awarira ra.
Afa i Yohanes nfalak yai notu ma Herodias ntonan mane nfedan ia, naꞌuk wol not-nala, tevek Herodes nalang Yohanes ovu nkaꞌa ne, ni vavaꞌat a nmalola ovu wol ni salasilan lahir. Velik ne afa ovi Yohanes nfalak yai rotu ma Herodes ralan raruan, naꞌuk inan ma nrenar watan. Herodes nfalak ma rtaha Yohanes ma rkeak ia ma ti rfadoku ia naꞌa buꞌi ralan a. Notu wean inyai tevek awan a, naꞌuk nsinir tamata ovi rnaꞌa buꞌi ralan a ma rwanar Yohanes.
21 Ti nata Herodias ndav-nala roak lingaꞌan mane nfedan Yohanes. Naꞌut inyai, na Herodes notu ni snoba ma al nfangnanang ni amar vulan kena. Ia nasdovu munuk ni dawan fareta ra, dawan suldadu ra, ovu vali tamata dawan ra naꞌa propinsi Galilea. 22 Herodias yanan vata nti snoba ralan ma nsoꞌi-nsomar. Ba notu ma raja Herodes ovu ni mangun ra inar urun. Herodes nfalak verin vata mnelat yai ne, “Mera afaka watan tali yaꞌa, na veka ala verin oa!”
23 Ia nafwaba lahir verin vata yai ne, “Mera afaka watan tali yaꞌa, na veka ala verin oa, velik ne wang i ufareta ni lihir vali, veka ala watan verin oa.”
24 Ba vata yai nti murin ma norat renan ne, “Veka era afaka tali ia?”
Renan nfalak ne, “Mera Yohanes i nbaptis tamata ra, ulun a.”
25 Nata vata yai newal lahir ia ma ti nfalak verin Herodes ne, “Era ma fwadoku Yohanes i nbaptis tamata ra, ulun a, naꞌa binan dawan isa ma mala verin yaꞌa.”
26 Herodes nrenar afa i vata yai nfalak a, na ralan lalau urun, naꞌuk wol nalaꞌing nala roak afa i vata yai nera, tevek nafwaba roak ma ni mangun ra rarenar. 27 Ba Herodes nsinir lahir suldadu isa ma ti nfedan Yohanes, ma nala ulun a verin ia. Suldadu yai nti buꞌi ralan ma nvangal Yohanes ulun a. 28 Ia nfadoku Yohanes ulun a naꞌa binan dawan isa, beti rala verin vata mnelat yai, ma ntaha ti verin renan a. 29 Ti ma Yohanes ni tamata ovi rorang ia rarenar ne nmata roak, na rti ma rala tbunan a ma ti rfanuba naꞌa van isa ralan a.
Yesus notu mujizat ma nfamela roti ovu ian ra al nfaꞌan tamata rivun ilima
Matius 14:13-21; Lukas 9:10-17; Yohanes 6:1-14
30 Yesus Ni tamata ovi lan nsinir ira ma rti rfamalik Ubu Ni vaivatul ra rewal ira ma ti rtuan Ia.§ 6:30 Yesus Ni tamata ovi nsinir ira ovu rorang Ia naꞌa ini, nfaturu Ni tamata vutu rahin irua ovi reluk rasul ra. Ira rfamalik munuk afa ovi rotu ra, ovu vali rira afa ovi rair ra verin Ia. 31 Yesus nfalak verin ira ne, “Mya ma did tinemun tati wan lean vu isa ma myari kedan mia.” Ia nfalak wean ini, tevek tamata ra rma ma rtuan lalawatan ira, ma wol rafnaꞌan ovu wol rot-nala akataka vali. 32 Ba aksa ira ravul kumal rti wan lean vu isa. 33 Tamata rivun rarea ira rti, na ref nala ira, ma tamata avyai rtali ahu munuk naꞌa wan yai rafla watan rahu raa ma raran lan, beti Yesus ovu Ni tamata ra raran. 34 Ti ma Yesus nsuta tali kumal ma nda, na nsiꞌik tamata rivun avyai. Ia nfaturu Ni silobang verin ira, tevek ira wean domba ovi wol duarira. Nata nair afa rivun verin ira.
35 Lera nakduvul ma laflofan roak, ba Yesus Ni tamata ovi rorang Ia rma rtuan Ia ma rfalak ne, “Wol tamata rleal wan lean vu ini, ovu vali lera sian roak, 36 ba msinir ira ma rti ahu ovi sarseri ma rfaha afamtahan ma raꞌan.”
37 Naꞌuk Ia nfalak verin ira ne, “Mia musti fyaꞌan ira!”
Ira rfalak verin Ia ne, “Ba ami musti amfaha roti fyawan dinar* 6:37 Kubang dinar ratut irua sama ovu tamata ni kadi naꞌa vulan iwalu. ratut irua ma amfaꞌan tamata rivun ovi?”
38 Ba Ia norat ira ne, “Bira roti ifira? Eka miti ma msyiꞌik.”
Ira rti ma rsiꞌik, ma rewal ira ma rfalak ne, “Roti ilima ovu ian irua.”
39 Yesus nsinir tamata avyai munuk ma rotu rira sidovung ma rdoku ngrova yanat ratarira ra. 40 Ba tamata rivun avyai rdoku naꞌa sidovung ra, ma tali sidovung avyai, na boku tamata vatvutun lamliman, boku vali ratratut sasan.
41 Yesus nala roti ilima ovu ian irua yai, beti ntadata nrata lanit ma nfalak fara weninyai verin Ubu. Ia notu munuk wean inyai, beti nvisul roti avyai ma nala verin Ni tamata ovi rorang Ia, boma rti rsiduk verin tamata rivun avyai. Nvisul vali ian irua yai ma rsiduk verin tamata ra munuk. 42 Ira rir tinemun rafnaꞌan ma evurira ra rveda munuk roak, 43 beti Yesus Ni tamata ovi rorang Ia rasdovuk munuk roti teran ovu ian teran avyai naꞌa ahir vutu rahin irua rngora. 44 Tali tamata ovi raꞌan roti ovu ian avyai, brana ra watan rivun ilima.† 6:44 Naꞌa wan yai rarekan watan brana ra rivun ilima. Wol rarekan vata ovu kasikoꞌu ra obin.
Yesus nbana naꞌa wear ratan naꞌa danau Galilea
Matius 14:22-33; Yohanes 6:16-21
45 Yesus nsinir lahir Ni tamata ovi rorang Ia ma ravul kumal yai, ma ula ira rti ahu Betsaida naꞌa danau Galilea ni lihir a. Ia nanaꞌa wan yai obin ma nsinir tamata rivun avyai ma rewal ira. 46 Ti ma tamata rivun avyai rsilyaha, beti Yesus nvaꞌal vuar ma naflurut. 47 Ti ma ovan roak, na Ni tamata ra rnaꞌa kumal yai ma rti raran roak danau ni fruan a, na aksa Ia naꞌa da obin. 48 Yesus nsiꞌik ira rvahi ma nawar ira, tevek nait a dawan nangal ira. Kaꞌa bi nfadaꞌing amar roak, beti Yesus nbana naꞌa wear ratan ma norang ira, ovu notu mane nbana lia ira. 49 Naꞌuk ti ma rarea Ia nbana naꞌa wear ratan, na rnarin ne nitu ngran Ia, ba rafwak, 50 tevek ira munuk rarea Ia ovu rbobar urun i lahir. Naꞌuk Ia nfalak lahir verin ira ne, “Ralabira ra deka kakoꞌu, tevek ini Yaꞌa, ba deka byobar!”
51 Yesus nrata kumal yai ma ntuan ira, na nait ntalik lahir. Ira rabrian munuk, 52 tevek wol rkaꞌa Yesus Ni dawan obin. Velik ne rsiꞌik roak Ia nfamela roti ovu ian ra, naꞌuk ralarira rasmotak watan.
Yesus notu ma lolin ewal tamata rivun tali rira suhut ra
Matius 14:34-36
53 Ira ravul kumal yai ma retal nala roak danau Galilea, ma rda raran ngur tavun i rfanara ia ne Genesaret, ma rfalau rira kumal a. 54 Rsuta tali kumal yai, na brian munuk, tamata ra ref-nala lahir Yesus. 55 Ba tamata ra rban-lilit lahir wan yai, ma rfaivar verin tamata ra ne, Yesus nanaꞌa wan yai. Nata, tamata ovi wol rira suhut ra rvara ovi rira suhut ra naꞌa rira dari ra, ma rti wan inba watan ovi rarenar ne, Yesus nanaꞌa. 56 Naꞌa wan inba watan Yesus nma, naꞌa ahu te kota te wan liak, ira rovun tamata ovi rira suhut ra rti wan i rfedi-rfaha afa naꞌa. Nata tamata ovi rira suhut ra rvakar al rera verin Ia ne, “Fara mtorung ma amkena watan mu ravit a blawat ni wahan a.” Ba tamata ovi rkena Ia, lolin munuk ira.
*6:14 6:14 Herodes yai naran Herodes Antipas. Herodes nfareta propinsi Galilea ovu propinsi Perea. Ia yaman a, naran Herodes Agung, inan ma nfedan Yesus naꞌut i kakoꞌu Ia (msiꞌik Matius 2:16-18).
†6:15 6:15 Tamata Yahudi rfikir ne, nabi Elia yai veka nma lan ma naruk lingaꞌan verin Raja i nsikat tamata tali rira salasilan ra, ma rira vavaꞌat kakiwal.
‡6:17-20 6:17-20 Yohanes ntab-teri Herodes, tevek afa i notu ovu warin i Filipus awan a nangal lahir afa ovi rtulis roak naꞌa Imamat 18:16 ovu 20:21. Ayat avyai rfalak ma tamata wol bis nala aꞌan-warin ra awarira ra.
§6:30 6:30 Yesus Ni tamata ovi nsinir ira ovu rorang Ia naꞌa ini, nfaturu Ni tamata vutu rahin irua ovi reluk rasul ra.
*6:37 6:37 Kubang dinar ratut irua sama ovu tamata ni kadi naꞌa vulan iwalu.
†6:44 6:44 Naꞌa wan yai rarekan watan brana ra rivun ilima. Wol rarekan vata ovu kasikoꞌu ra obin.