23
Yahudi rira dawan ra rovun Yesus nti verin Gubernur Pilatus
Matius 27:1-2,11-14; Markus 15:1-5; Yohanes 18:28-38
1 Nata tamata ovi rovu munuk sidovung dawan yai, rdiri munuk lahir ma rovun Yesus nti verin Pilatus.* 23:1 Msiꞌik Lukas 3:1 2 Ti ma raran Pilatus, na rmangadu Ia ma rfalak ne, “Ami amtuan roak tamata ini naꞌut i nlabir nala mami tamata ra. Ia nfalak teri tamata ra ma deka rbahir kulu verin Kaisar. Ia nfalak vali ne, Ia Raja i ntevut dida salasilan ra.” 3 Ba Pilatus norat Ia ne, “Yahudi rira raja verin Oa?” Yesus nfalak ne, “Oa kaꞌi fwalak roak yai.” 4 Pilatus nfalak verin Yahudi rira dawan mela falurut ra ovu tamata rivun avyai ne, “Yaꞌa wol utuan sala akataka naꞌa tamata ini.” 5 Naꞌuk ira rkiwal ilaꞌa ma rfalak ne, “Ia Ni afa ovi nair ra rsoru munuk roak tamata ovi rnaꞌa Yudea, bi tamata ra rotu vangoa-vanga. Ia nsiair lan naꞌa Galilea, beti nma naran wan ini.”† 23:5 Tafsiran ra rfalak ne, Yudea ihin a ne, tamata Yahudi ovi rnaꞌa propinsi Yudea, ovu wan liak vali naꞌa Israel.
Yesus ndiri raja Herodes wahan ralan a
6 Pilatus nrenar afa yai, ba norat ira ne, “Tamata ini ntali Galilea?” 7 Ti ma Pilatus nkaꞌa ne, Yesus ntali wan i raja Herodes nfareta a, na nsinir tamata ra ma rovun Yesus ti verin Herodes. Naꞌut inyai, na Herodes nanaꞌa vali Yerusalem. 8 Herodes nsiꞌik Yesus, na inan urun, tevek mnanat ilaꞌa roak nrenar watan tamata ra rfamalik Yesus, ovu inan ma nsiꞌik Ia. Ia inan vali ma nsiꞌik Yesus notu mujizat a. 9 Wean inyai bi norat afa rivun tali Yesus, naꞌuk Yesus wol nvalat akataka. 10 Yahudi rira dawan mela falurut ra ovu rira dawan ovi rair Musa ni inukun ra rnaꞌa vali inyai, ba rmangadu Yesus ovu rira vaivatul ovi aleman ra. 11 Ba Herodes ovu ni suldadu ra rfalak sian ovu rangrihi ma rworuk-rwak Yesus, beti rotu ma neluk ravit blawat i raja ra baꞌi roru a. Rotu munuk wean inyai, beti rovun ewal Ia ti verin Pilatus. 12 Lan ana Herodes ovu Pilatus rsisala rala, naꞌuk naꞌut amar yai, na irua rotu kida.
Pilatus nukun Yesus ma nmata
Matius 27:15-26; Markus 15:6-15; Yohanes 18:38—19:16
13 Pilatus nasdovu munuk Yahudi rira dawan mela falurut ra, ovu rira dawan ra, ovu vali tamata rivun, 14 beti nfalak verin ira ne, “Mia myovun roak tamata ini nma verin yaꞌa ma fyalak ne, Ia nlabir nala tamata ra. Mia kaꞌi msyiꞌik lahir i urus roak Ia, naꞌuk wol utuan Ni sala isa vali tali afa ovi myangadu ra.‡ 23:14 Tamata Yahudi avyai rfalak ne, Yesus nlabir nala rira tamata ra ma rangal Roma rira fareta. Msiꞌik vali ayat 2 naꞌa pasal ini. 15 Herodes vali wol ntuan afa sala avyai. Ba wean inyai bi nsinir roak ma rovun Ia nma verin yaꞌa. Ufalak urun ne, tamata ini wol Ni sala akataka, ba wol inovan ma ufaleka inukun matmatan verin Ia. 16 Ba yaꞌa veka ufareta ma rasveva Ia, beti ufatalik Ia.” [ 17 Lokat snoba Paskah, na Pilatus musti nfatalik tamata isa tali buꞌi ralan verin tamata ra.§ 23:17 Naskah mnanat rivun naꞌa vai Yunani wol rfadoku ayat ini. Lokat varat, na Yahudi ra rotu snoba Paskah ma rangnanang amar yai uburir-nusirira ra rdir-talik Mesir. Naꞌa amar yai vali, na Pilatus ni suldadu ra baꞌi rfatalik tamata isa i rtaha roak tali buꞌi ralan.] 18 Naꞌuk tamata rivun ovi rnaꞌa inyai rafwak ne, “Fwedan Ia! Fwatalik Barabas verin ami!” 19 Pilatus ni suldadu ra raꞌabuꞌi roak Barabas, tevek ia novu vali vangoa-vanga i naꞌa kota ralan a, ovu nsifedan. 20 Pilatus inan ma nfatalik Yesus, ba nangrihi fasa ewal verin tamata rivun avyai ovu vain dawan. 21 Naꞌuk rafwak ma rfalak ne, “Bwaku Ia naꞌa aa walwalur! Bwaku Ia naꞌa aa walwalur!”
22 Nata Pilatus nfalak fasa ewal verin ira ma fatelu roak ne, “Tamata ini Ni sala aka? Yaꞌa wol utuan lahir ne, notu sala ma inovan ma ukun Ia ma nmata. Ba veka ufareta ma rasveva Ia, beti ufatalik Ia.” 23 Naꞌuk ira rkiwal ilaꞌa ma rafwak ovu vair dawan, boma nfareta ma rbaku Yesus naꞌa aa walwalur. Ti nata uturira. 24 Ba Pilatus nfaleka inukun verin Yesus, boma nfakena tamata rivun avyai rira ininan a. 25 Ia norang rira ininan a ma nfatalik tamata i raꞌabuꞌi roak ia, velik ne notu vangoa-vanga ovu nsifedan. Naꞌuk ia nala Yesus verin tamata avyai ma rotu tia ma watan Ia, wean i ralarira rfalak a.
Roma rira suldadu ra rbaku Yesus naꞌa aa walwalur
Matius 27:32-44; Markus 15:21-32; Yohanes 19:17-27
26 Naꞌut i ira rovun Yesus, na rtaha vali Simon i ntali kota Kirene a. Ia beti naran Yerusalem. Ira rkiwal ia ma nvara Yesus Ni aa walwalur a ma norang Ia. 27 Tamata rivun ilaꞌa rorang Yesus. Tali tamata avyai, na vata boku rvakar ma rfaktanit Yesus. 28 Naꞌuk Yesus nfulak Ia ma nfalak verin ira ne, “Vata Yerusalem averi! Deka byakar Yaꞌa, naꞌuk byakar aꞌuk tenabira ra ovu yanabira ra! 29 Tevek ni amar a veka nma ma tamata ra rfalak ne, ‘Lolin urun verin vata ovi wol rbarlewan, ovu wol yanarira, ovu vali wol rsisusu!’
30 Naꞌut inyai, na tamata ra veka rfalak verin vuar ra ne, ‘Fara mlyeka ma mtyaꞌi ami!’ Ovu rfalak vali verin sakvuar ra ne, ‘Mya ma myoving ami!’* 23:30 Tafsiran rivun rfalak ne, Yesus Ni maksud ne, tamata ra rira susa veka dawan ilaꞌa, ba inar watan ma vuar ra ovu sakvuar ra rtaꞌi ira ovu roving lahir ira, boma yarak a rmata. Boku vali rfalak ne, tamata ra wol rfonak nala ira tali susa ilaꞌa i veka nma, ba rera ma vuar ovu sakvuar ra rfonak teri ira tali susa yai. 31 Tevek rotu roak wean ini verin Yaꞌa i wol ning salasilan a, na ira veka rotu ma nlia verin mia, tamata ovi bira salasilan roak a. Yaꞌa weang aa i nvaꞌat obin ma yafu wol bisma nasnuri nala. Naꞌuk mia weabira aa ovi rangaran roak a ma yafu veka nasnuri munuk lahir!”† 23:31 Amfadoku ma dawan informasi tersirat naꞌa ayat ini, boma nlobang mia ma fyan-aran. Tafsiran ra etal dawan rira fikiran wean ini. 32 Ira rovun vali tamata ktufan irua ma veka rfakloꞌi ira ma rmata ovu Yesus.
33 Ti ma raran wan i naran “Kalkulun a”, na rbaku Yesus naꞌa aa walwalur. Ira rbaku vali tamata ktufan irua yai, ma isa naꞌa Ni lihir mela a, na isa vali naꞌa Ni lihir balit a. [ 34 Yesus nfalak ne, “Bapa, maꞌi vatuk rira salasilan yai, tevek wol rkaꞌa afa i rotu a.” Rotu munuk wean inyai, beti rotu undi ma rtanang Ni kadaravit ra.]‡ 23:34 Suldadu avyai rira salasilan yai, ihin a ne, rfedan Yesus. Naꞌa naskah mnanat boku naꞌa vai Yunani, na ayat ini nanaꞌa, naꞌuk boku wahal.
35 Tamata rivun ovi rdiri inyai ramunin Ia naꞌa aa walwalur a. Yahudi rira dawan ra rfalak sian Ia ne, “Ia notu ma lolin ewal tamata liak ma wol rmata. Ba wean i Ubu nfili Ia ma neluk Raja ma nsikat tamata ra tali rira salasilan ra, na tsiꞌik watan ne, nlobang tenan ma nangal nala Ni matmatan ma nvaꞌat te wahal!” 36 Roma rira suldadu ra rfalak sian vali Ia. Ira rala anggur i nakbia a verin Ia, 37 ma rfalak ne, “Wean i Oa meluk raja verin tamata Yahudi ra, na msuta tali aa walwalur yai, boma deka mwata!” 38 Rtulis vali vaivatul ra naꞌa aa walwalur, naꞌa Yesus ulun ratan a ne: “Yahudi rira Raja verin Ia.”
39 Tamata ktufan isa i rakloꞌi ia naꞌa aa walwalur yai nfalak sian Yesus ne, “Oa ini Raja i mtevut tamata ra rira salasilan ra? Eka mlobang tenam a ovu ami ma mangal nala matmatan a ma tvaꞌat!” 40 Naꞌuk tamata ktufan isa vali ntabu ia ma nfalak ne, “Oa wol bwobar Ubu? Ira rfaleka vali inukun matmatan verin oa wean watan Ia. 41 Inovan ma rukun itrua, tevek afa sian ovi totu ra. Naꞌuk tamata ini wol Ni sala akataka.” 42 Nata nfalak verin Yesus ne, “Naꞌut i veka mwa ma meluk Raja ma fwareta, na fara mungnanang vali yaꞌa.” 43 Ba Yesus nfalak verin ia ne, “Afa i ufalak verin oa ini, kena urun! Amar ini veka movu lahir Yaꞌa ma tnaꞌa Firdaus.”§ 23:43 Firdaus ihin a ne, lanit ratan
Yesus nmata naꞌa aa walwalur
Matius 27:45-46; Markus 15:33-41; Yohanes 19:28-30
44 Naꞌut inyai lera ndirlola, na deda fafyat nsoru munuk wan yai, ti naran jam itelu. 45 Maloli dawan amafal i nakloꞌi Yahudi rira Rahan Dawan Falurut ralan namadir lahir naꞌut irua.* 23:45 Wan isa naꞌa Yahudi rira Rahan Dawan Falurut ralan nmerat rahi lia munuk. Maloli dawan amafal yai nteri wan i nmerat rahi lia munuk yai tali wan liak ra naꞌa Rahan Dawan Falurut ralan. Yahudi rira Mela Falurut Ilaꞌa saꞌi bisma nti wan marmerat yai ralan a, varat isa fasa watan. Ia ntaha bibi isa laran ma al nakvanak Yahudi rira salasilan ra. Naꞌuk Yesus nmata ma laran a nvoat al nakvanak dida salasilan ra, ba wol tperlu afakataka roak. Wol tperlu roak bibi laran, te Mela Falurut Ilaꞌa, te maloli dawan amafal ma nteri ita tali Ubu wan i nleal a. Ia nleal roak lokat tamata inorang ralarira ra!
46 Nata Yesus nafwak ovu vain dawan ne, “Bapa, ala munuk Ning vavaꞌat a ma ufadoku naꞌa limam ralan a.” Ti ma nfalak munuk wean inyai, na nan a nakbosal vali. 47 Naꞌut i dawan i nfareta Roma rira suldadu ra nsiꞌik afa avyai, na nfadawang lahir Ubu ma nfalak ne, “Kena urun, tamata ini Ni vavaꞌat nmalola!” 48 Tamata rivun ovi rma ma ramunin, rsiꞌik vali afa avyai, ba rewal ira ma naꞌa rira banbanan obin, na kaꞌi rfefik buburira ra.† 23:48 Tamata Yahudi rfefik buburira al rfaturu ne, rahil urun i lahir. 49 Tamata ovi rkaꞌa Yesus, ovu vata ovi rkaꞌa vali Ia ma rorang Ia tali Galilea, rdiri watan raroa ma rsiꞌik afa avyai munuk.
Yusuf i ntali ahu Arimatea nala Yesus tenan ma nfanuba Ia naꞌa van matmatan isa ralan a
Matius 27:57-61; Markus 15:42-47; Yohanes 19:38-42
50-51 Tamata isa naran Yusuf ntali ahu Arimatea naꞌa propinsi Yudea. Ia tamata lolin ia ovu ni vavaꞌat nmalola, ovu vali nanaban ma Ubu nfareta tamata ra wean lahir Raja. Velik ne ia ndoku vali Yahudi rira sidovung dawan a, naꞌuk wol ntorung ma rfasala Yesus ma rala Ia verin fareta Roma a. 52 Ia nti ma ntuan Pilatus ma nera Yesus tenan a. 53 Nata, ia nfasuka Yesus tenan tali aa walwalur, ma nkuma Ia ovu maloli ngangiar, beti ti nfanuba Yesus tenan a naꞌa vatu i rtivan roak ia ma wean van, naꞌuk wol rfadoku matmatan ra naꞌa obin.‡ 23:53 Tamata kaꞌi ra baꞌi rbahir tamata ra ma rtivan vatu ma wean van, boma rfadoku matmatan ra naꞌa. Ira baꞌi rotu wean inyai naꞌa sakvuar ni vavaꞌal a.
54 Amar yai amar i Yahudi ra rasusan warira ma rsaꞌa amar i mane ryari ira, tevek lokat amar yai ni ovan, na ira ryari roak ira.§ 23:54 Naꞌa amar i Yahudi ra rasusan warira yai, ihin a naꞌa vai Mala ne, hari Jumat. Lokat Jumat, na rasusan rira afamtahan ovu afa liak ra, boma mulai naꞌa Jumat ni ovan, na ryari roak ira. 55 Vata ovi rorang Yesus tali Galilea rorang vali Yusuf, ti ma rsiꞌik van i rfanuba Yesus. Ira rsiꞌik vali i wean inba ma rfanuba Yesus tenan a naꞌa van yai. 56 Nata rewal ira rti Yerusalem ma rasusan ngul ovi voarira lolin, ovu voan ngul lolin i rfanara ia ne mur, ma veka raslofi naꞌa Yesus tenan a. Naꞌa amar i Yahudi ra ryari ira, na ira wol rkarya, ma rot-orang Musa ni inukun ra.
*23:1 23:1 Msiꞌik Lukas 3:1
†23:5 23:5 Tafsiran ra rfalak ne, Yudea ihin a ne, tamata Yahudi ovi rnaꞌa propinsi Yudea, ovu wan liak vali naꞌa Israel.
‡23:14 23:14 Tamata Yahudi avyai rfalak ne, Yesus nlabir nala rira tamata ra ma rangal Roma rira fareta. Msiꞌik vali ayat 2 naꞌa pasal ini.
§23:17 23:17 Naskah mnanat rivun naꞌa vai Yunani wol rfadoku ayat ini. Lokat varat, na Yahudi ra rotu snoba Paskah ma rangnanang amar yai uburir-nusirira ra rdir-talik Mesir. Naꞌa amar yai vali, na Pilatus ni suldadu ra baꞌi rfatalik tamata isa i rtaha roak tali buꞌi ralan.
*23:30 23:30 Tafsiran rivun rfalak ne, Yesus Ni maksud ne, tamata ra rira susa veka dawan ilaꞌa, ba inar watan ma vuar ra ovu sakvuar ra rtaꞌi ira ovu roving lahir ira, boma yarak a rmata. Boku vali rfalak ne, tamata ra wol rfonak nala ira tali susa ilaꞌa i veka nma, ba rera ma vuar ovu sakvuar ra rfonak teri ira tali susa yai.
†23:31 23:31 Amfadoku ma dawan informasi tersirat naꞌa ayat ini, boma nlobang mia ma fyan-aran. Tafsiran ra etal dawan rira fikiran wean ini.
‡23:34 23:34 Suldadu avyai rira salasilan yai, ihin a ne, rfedan Yesus. Naꞌa naskah mnanat boku naꞌa vai Yunani, na ayat ini nanaꞌa, naꞌuk boku wahal.
§23:43 23:43 Firdaus ihin a ne, lanit ratan
*23:45 23:45 Wan isa naꞌa Yahudi rira Rahan Dawan Falurut ralan nmerat rahi lia munuk. Maloli dawan amafal yai nteri wan i nmerat rahi lia munuk yai tali wan liak ra naꞌa Rahan Dawan Falurut ralan. Yahudi rira Mela Falurut Ilaꞌa saꞌi bisma nti wan marmerat yai ralan a, varat isa fasa watan. Ia ntaha bibi isa laran ma al nakvanak Yahudi rira salasilan ra. Naꞌuk Yesus nmata ma laran a nvoat al nakvanak dida salasilan ra, ba wol tperlu afakataka roak. Wol tperlu roak bibi laran, te Mela Falurut Ilaꞌa, te maloli dawan amafal ma nteri ita tali Ubu wan i nleal a. Ia nleal roak lokat tamata inorang ralarira ra!
†23:48 23:48 Tamata Yahudi rfefik buburira al rfaturu ne, rahil urun i lahir.
‡23:53 23:53 Tamata kaꞌi ra baꞌi rbahir tamata ra ma rtivan vatu ma wean van, boma rfadoku matmatan ra naꞌa. Ira baꞌi rotu wean inyai naꞌa sakvuar ni vavaꞌal a.
§23:54 23:54 Naꞌa amar i Yahudi ra rasusan warira yai, ihin a naꞌa vai Mala ne, hari Jumat. Lokat Jumat, na rasusan rira afamtahan ovu afa liak ra, boma mulai naꞌa Jumat ni ovan, na ryari roak ira.