1 Terang a valing averi! Mia deka fyikir ne, amfadawang ewal tenamami ra, te weamami tamata liak ovi rtaha surat i rotu ma al rfadawang ira, te rera surat tali mia ma fyamalik ira verin tamata ra. Ami wol weamami inyai. 2 Mia weabira surat i rtulis ma al rfadawang mami karya i amotu verin Ubu. Ni Roh a ntulis surat yai naꞌa ralamami ra, ovu bira vavaꞌat ra rfaturu ne, myorang Yesus. Mia weabira surat i tamata ra munuk rbas ma rkaꞌa mami karya ovi amotu ra. 3 Lyawan roak ne, bira vavaꞌat ra wean surat i ntali Kristus. Ia ntulis surat yai tali karya ovi amotu ra. Kristus wol nala tinta al ntulis surat yai, naꞌuk nala Ubu Ni Roh i nvaꞌat a, ma al ntulis. Ia wol ntulis naꞌa vatu ovi nglavar ra, naꞌuk ntulis naꞌa tamata ralarira ra.

4 Amfamalik mami karya verin mia wean inyai, tevek afa ovi Kristus nfalyawang roak verin ami naꞌa Ubu wahan ralan a. 5 Ami wol amfalak ne, amala mami ngrebat ma amot-nala munuk karya ini. Naꞌuk Ubu saꞌi nala ngrebat verin ami ma amot-nala Ni karya ra. 6 Ia nfangrebat vali ami, ba bisma ameluk tamata sansinir ma amfamalik Ni tnorung ngorvaꞌan. Ni tnorung ngorvaꞌan yai wol wean tnorung mnanat a, tevek tnorung ngorvaꞌan yai ntali Ubu Ni Roh, ovu wol rtulis naꞌa inukun ovi Ubu nala verin Musa. Inukun ovi rtulis roak yai rvua matmatan, tevek tamata ra wol bisma rot-orang munuk. Naꞌuk naꞌa Ubu Ni tnorung ngorvaꞌan a, na Ni Roh a nala vavaꞌat kakiwal verin tamata ra.* 3:6 Ubu Ni tnorung mnanat a wean ini: Musa ni inukun ovi ntulis roak rfareta tamata Yahudi ra naꞌa afa ovi musti rotu ra. Naꞌuk naꞌa Ubu Ni tnorung ngorvaꞌan a, na Ni Roh nangrihi naꞌa tamata iki watan ralan a ma norang Yesus. Msyiꞌik vali ayat liak ovi rfamalik Ubu Ni tnorung ngorvaꞌan naꞌa 1 Korintus 11:25, Ibrani 8:7-12, 10:16-17 ovu Yeremia 31:31-34, 32:39-40.

7-8 Lalan ana, Ubu ntulis Ni inukun ra naꞌa vatu nglavar irua. Inukun avyai rvua matmatan verin tamata ovi wol rot-orang. Velik ne wean inyai, naꞌuk naꞌut i Ubu nala Ni inukun avyai verin Musa, na vanan i nfitik nyadat a vanan naꞌa Musa wahan ralan. Tamata Israel ra wol bisma rsiꞌik ma mnanat Musa wahan a, velik ne Ubu vanan yai mane nlia roak naꞌa Musa wahan a. Lyawan urun ne, Ubu Ni tnorung ngorvaꞌan i Ni Roh nala a, nma roak ovu vanan i nfitik nyadat a ma vanan a nlia tali inukun mnanat avyai. 9 Tevek wean i Musa ni inukun ovi rotu ma tamata ra rmata, vanan a lyawan urun, na Ubu Ni tnorung ngorvaꞌan i notu ma dida vavaꞌat ra rmalola, vanan a lyawan lia tali inukun mnanat yai vanan a. 10 Musa ni inukun yai vanan a lyawan urun. Velik aba, fiang ini Ubu Ni tnorung ngorvaꞌan yai vanan a lyawan urun i lahir, ba inukun i notu ma tamata ra rmata yai wol fyawan lahir. 11 Tnorung mnanat i notu ma tamata ra rmata yai nma ovu vanan i lyawan urun a. Naꞌuk Ubu Ni tnorung ngorvaꞌan vanan a lyawan lia tali tnorung mnanat yai, tevek Ni tnorung ngorvaꞌan a nanaꞌa, nata ti wol ni wahan.

12 Ba amfakloꞌi aꞌuk mami vavaꞌat ra naꞌa Ubu Ni tnorung ngorvaꞌan yai, tevek amkaꞌa basil ne, Ni tnorung ngorvaꞌan yai nanaꞌa, nata ti wol ni wahan. Ba amabrahi urun ma amfamalik Ubu Ni Ivar Lolin a. 13 Ami wol weamami Musa, ma nkum-teri wahan a ovu maloli, boma tamata Israel ra deka rsiꞌik Duilaꞌa vanan i mane nlia roak tali wahan a.† 3:13 Musa nkum-teri wahan a tali tamata Israel ra. Paulus ovu ni kida naꞌa rira karya a wol rkum-teri akataka naꞌa afa ovi rair ra. Keluaran 34:29-35 14 Tamata Israel ra wean i rkum-teri rira fikiran ra ovu maloli ma rasmotak obin, nata ma naran amar ini, tevek wean i rbas Ubu Ni tnorung mnanat a, na wol rfan-aran. Kristus aꞌuk saꞌi bisma naling vatuk afa i wean maloli yai, wean i tamata ra rira vavaꞌat isa ovu Ia.‡ 3:14 Naꞌa ayat ini, na Paulus ntulis ne, “ma naran amar ini,” ihin a, amar i ntulis surat ini verin sidovung tamata ovi rorang Yesus naꞌa Korintus. 15 Ti naran amar ini, na wean i rbas Musa ni inukun ra, na afa yai nteri watan rira fikiran ra obin. 16 Naꞌuk wean i tamata isa norang roak Duilaꞌa, na Duilaꞌa veka naling vatuk afa i wean maloli yai tali ia. 17 Duilaꞌa wean lahir Ubu Ni Roh a. Ba wean i Ubu Ni Roh nleal raladida ra, na salasilan ra wol rfareta roak ita, ovu vali Musa ni inukun avyai wol rkeak roak ita.§ 3:17 Ubu wol naꞌi vatuk Musa ni inukun ra, naꞌuk inukun avyai wol rala vavaꞌat kakiwal. 18 Fiang ini tamata ovi rorang roak Kristus wol rkum-teri roak waharira ra ovu maloli. Ia notu ma raladida ra lyawan roak, tevek Duilaꞌa vanan i nfitik nyadat a. Wean inyai bi lokat amar, na Ubu Ni Roh a notu ma dida vavaꞌat ra ntafal ma wean Ia naꞌa vanan i nfitik nyadat a.