1 Terang a valing averi, fiang ini, yaꞌa Paulus, inak ma mkyaꞌa urun yabi* 12:1 Yabi naꞌa pasal ini, ihin a naꞌa vai Mala karunia. ovi Ubu Ni Roh a nala roak verin mia. 2 Mia mingnanang ne, naꞌut i wol mkyaꞌa Ubu obin, na tamata ra rweang nala roak mia ma msyoak nulu walut ra. Walut avyai wol rangrihi nala, naꞌuk myorang watan ira. 3 Ba inak ma mkyaꞌa ne, wean i Ubu Ni Roh a nleal tamata isa, na ia wol mane near nfasoba Yesus. Wol tamata isa vali bisma nfalak ne, “Yesus yai Duilaꞌa Ia,” wean i Ubu Ni Roh a wol nanaꞌa ralan a.

4 Yabi ovi Ubu Ni Roh nala verin ita rsialing ira, naꞌuk rtali Roh isa watan, inyai Ubu Ni Roh. 5 Karya felarira rivun ma tkarya verin Duilaꞌa, naꞌuk Duilaꞌa i tkarya verin Ia yai, ikisa watan. 6 Karya verin Duilaꞌa yai felan a rivun, naꞌuk Ubu ikisa watan, ovu Ia saꞌi nala ngrebat verin tamata ra ma rot-nala karya avyai.

7 Ubu nala Ni Roh a ma nkarya naꞌa lokat tamata, boma ita dida munuk lolin a, ma isa nlobang isa. 8 Ubu Ni Roh a nala yabi verin tamata isa ma bis nangrihi ovu kakaꞌa dawan. Ubu Ni Roh nala yabi verin tamata isa vali ma nkaꞌa urun ma nfamalik afa ovi rtali Ubu. 9 Ubu Ni Roh a nala yabi verin tamata isa vali ma norang urun Ia, na verin tamata liak vali, Ni Roh nala yabi ma notu ma tamata ra lolin ewal ira tali rira suhut ra. 10 Ubu Ni Roh a nala yabi verin tamata isa vali ma notu mujizat, na verin tamata liak isa vali, Ni Roh a nala yabi ma bisma nrenar lahir tali Ubu ma ti nfamalik verin tamata ra. Ni Roh a nala yabi verin tamata liak isa vali ma bisma nkaꞌa nfili ne, ngrebat ini ntali Ubu Ni Roh a te wahal. Ni Roh a nala yabi verin tamata boku ma rangrihi vai ovi wol rkaꞌa ra. Ni Roh a nala yabi verin tamata boku vali ma rfalyawang vai avyai. 11 Naꞌuk Ubu Ni Roh ikisa watan, ovu kaꞌi notu munuk afa avyai. Ni Roh a nala yabi verin lokat tamata ma rira yabi ra rsialing ira, wean i Ni Roh a nfadoku roak a.

12 Terang a valing averi, ki ufalyawang afa ini verin mia. Tenadida ikisa watan, ba velik ne ikisa watan, naꞌuk ulud ra, arud ra, matad ra, nirud ra, limad ra, ovu vali ead ra rnaꞌa munuk tenadida ra. Ba velik ne rivun, naꞌuk tenadida ikisa watan. Ita munuk tamata ovi torang Kristus weadida vali inyai. Velik ne rivun ita, naꞌuk ita tnaꞌa watan sidovung isa, inyai Kristus tenan a. 13 Naꞌut i rbaptis ita, Ubu Ni Roh notu ma tnaꞌa roak sidovung isa watan. Velik ne Yahudi ita, te wol Yahudi ita, tamata sansinir te wol sansinir, wol akataka. Naꞌut i torang Kristus, na Ubu Ni Roh i ikisa watan yai, naꞌa lahir raladida ra munuk.

14 Terang a valing averi, eka tfikir naꞌa tamata isa tenan a. Naꞌa tenan a, na wol mane liman a watan, naꞌuk ulun a, arun a, matan a, nirun a, ovu vali afa ovi rnaꞌa tenan a munuk. 15 Wean i tamata isa ean a kaꞌi nfalak verin tenan a ne, “Yaꞌa wol eluk limam a, ba yaꞌa wol unaꞌa tenam a,” na inyai wol kena, tevek tamata ean nanaꞌa watan tamata tenan a. 16 Wean inyai vali ma tamata arun a kaꞌi nfalak verin tenan a ne, “Yaꞌa wol eluk tamata matam a, ba yaꞌa wol unaꞌa tenam a,” na inyai wol kena, tevek tamata arun nanaꞌa watan tamata tenan a. 17 Eka minovak! Wean i tamata isa tenan a munuk lahir neluk matan a, na arun a naꞌa inba ma bis nafrenar? Wean i tamata isa tenan a munuk lahir neluk arun ra, na nirun a naꞌa inba ma nfavoa? 18 Naꞌuk Ubu notu munuk roak tamata ulun a, matan a, arun a, nirun a, liman a, ovu vali ean a, ma rnaꞌa munuk tamata tenan a, wean lahir i ralan nfalak a. 19 Wean i felarira munuk wear isa watan, na wean inba ma tfalak ne, tamata tenan a? 20 Ba afa rivun naꞌa tenadida ra, naꞌuk tenadida ra ikisa watan.

21 Ba wean inyai, na tamata matan a wol bisma nfalak verin liman a ne, “Yaꞌa wol ukamlabir oa,” ovu vali tamata ulun a wol bisma nfalak verin ean a ne, “Yaꞌa wol ukamlabir oa.” 22 Nlia tali inyai, na tamata ra rfikir ne, afa boku naꞌa tamata tenan a wol rangrebat ovu wol kaꞌi rkamlabir ira. Velik aba, ita musti tsiꞌik ma lolin afa avyai. 23 Ba naꞌa tenadida ra, na afa ovi tfikir ne, wol fyawarira, na ita musti talang urun ira. Naꞌa tenadida ra vali, afa ovi tamata wol bisma rsiꞌik, na ita musti tateri ma lolin afa avyai. 24 Afa ovi tsiꞌik lolin roak naꞌa tenadida ra, na deka tfikir ma tfaloling ira, tevek lolin roak. Naꞌuk Ubu notu roak ma nfadoku afa ovi tamata rsiꞌik, na lolin roak, ovu vali afa ovi tanovak ne, wol kaꞌi talang ira naꞌa tenadida ra, na tsiꞌik ma lolin ovu talang urun ira. 25 Ubu notu wean inyai, boma deka tsiduk tenadida ini, naꞌuk wean i afa ovi rnaꞌa tenadida ra rsialing ira, na musti isa nlobang isa. 26 Ba wean i afa ovi rnaꞌa tenadida ra, isa nfarnuang wawaꞌuk, na afa ovi rnaꞌa tenadida ra munuk rfarnuang vali wawaꞌuk. Wean i tamata ra ralang afa isa tali tenadida ra, na afa ovi rnaꞌa tenadida ra munuk rovu vali ma inarira lolin.

27 Ba terang a valing averi! Mia munuk Kristus tenan a, ovu vali lokat mia myeluk Kristus liman a, ean a, matan a, arun a, ba afakataka rnaꞌa munuk Kristus tenan a.† 12:27 Tamata ovi rorang Yesus rira sidovung wean lahir Kristus tenan. Lokat tamata ovi rorang Yesus rira yabi ovu karya ra munuk rnaꞌa, naꞌuk rsialing ira. 28 Ubu nfadoku roak naꞌa tamata ovi rorang Yesus rira sidovung a ma tamata rira karya ra rsialing ira. Ia nfadoku lan lalean ma tamata boku rnaꞌa rasul, beti nfadoku ma tamata boku rnaꞌa nabi, beti nfadoku vali ma tamata boku rair Ubu Ni vaivatul ra. Nata, Ia nfadoku vali roak ma tamata boku rira ngrebat ma rotu mujizat, na boku vali bis rotu ma tamata ra lolin ewal ira tali rira suhut ra. Ia nfadoku ma tamata boku vali baꞌi rlobang aꞌuk tamata kasian ra, boku rban-ulu verin tamata ovi rorang Yesus rira sidovung a, ovu nfadoku vali ma tamata boku rira ngrebat ma rangrihi vai ovi wol rkaꞌa ra. 29-30 Tamata ra munuk wol mane rotu rasul, nabi, te tamata ovi rkaꞌa ma rair Ubu Ni vaivatul ra. Ba deka minovak ne, ira munuk rira ngrebat ma rotu mujizat, te rotu ma tamata ra lolin ewal ira tali rira suhut ra, te rangrihi ma rala vai ovi wol rkaꞌa ra, te bisma rfalyawang nala vai ovi tamata ra wol rkaꞌa. 31 Ba wean inyai, na mia veka inabira urun ma bira vali yabi ovi rlobang urun terabir-valibira ra.

Naꞌuk yaꞌa mane ufaturu verin mia naꞌa lingaꞌan i lolin rahi lia munuk yabi avyai.