Hipuru
Hipuru sawi one mahemakapukusa someane oyapo.
Hipuru sawi one Yu aporo Keresoa paosa aporo hinamoaki poparaka makesa sawi ayapo. Aporoamo meane, Hipuru me airapo. Aisamo maiya metakiramo Yu aporoane Hipuru aporo airapo. Asiamo Hipuru sawi one epamo popasarakapo. Popasa aporoane yano motosa sawi wo popasafapo.
Yasu hepene yapura hisiakipoko keremisi teti sewene su (37) faraka, Rome ame aporomo yunu weraka Yarusarame sitiane namo kakaro mokoatikisapo. Kotimo apeane soko mokoatikiraka, ekemo kisia apeane rukurakaritaesapo. Sereane faserepeasiraka, aporoamo Hipuru sawi one poparaka makesapo.
Yu aporo yakaimo namina makata watikisane mafahoasimo makata kakayia rukua paikia Kotiaki yaiya karaka risiapo. Aporomo makata watikisapoko, makata kakayia Kotiaki karane rukupateraka metakarisimo, Yasu kusuane ipu hemakapusuafapo. Asiasamo aporoamo sawi one poparaka makesapo.
Hipuru sawia some kepo parakuraka popasane oyapo.
1:1–2:18 Yasu Kotimo hokosa reane, namo kakaro kárapo. Yasumo hepene aporo yano motosane marokeraka e yano motosa namo kakaro kárapo.
3:1–4:13 Moseseane soko Yasumo yano motosa amo marokesapo.
4:14–7:28 Pirisiti aporoane soko Yasumo marokesapo.
8:1–9:28 Fana Kotimo Moseseyaki someaka masane kawe yumo Kotimo Yasuyaki someaka masa amo marokesapo.
10:1-39 Yasumo yapimo makata kakayiamo yapiane marokesapo. Aporomanomo watikisane Yasumo yapiamo namo kakaro mafaraka, makata watikisamo wakapuane soko mafanapo.
11:1-40 Aporo hinamomo Kotiaki himu hakásaraka hemakapusuane uyáka risiapo, aíyaka popasapo.
12:1-29 Isiapo soko Kotiaki himu hakásaraka hemakapusimo isuaki tarirakanapo.
13:1-19 Yasu Keresoaki himu hakásaraka hemakapukua Yasumo ainane kekemahoasimo somerakanapo.
13:20-25 Sawi one popasa aporoamo ayaparakanapo.
1
Kotimo hokosane namo kakaro kárane oyapo.
1 Wate fana maiya metamo soko, maiya metamo soko, maiya káramo porofete aporoaki Kotimo some karáka, kekepoaka some kape pusuapo. Some kape pusuane porofete aporomo kaikia, isiapo makasa kaua kekemaki ipu some kasapo. 2 Ayiáka some kasane yumo fahoko makeana maiya amo isuaki somehoasimo Kotimo ipi hokosaki some karakano, ipi hokosane hauaka wo pekea, isuaki some kasapo. Asiamo ipi hokosa aeyaka ipi Ata Kotimo hauaka one soko ti yapurane soko makata su kepo marekea faserepepesapo. Arirakano keseke makata su Kotimo ipi menane asekea rekeasimo epo murikimasane ipi hokosa ayapo.
3 Kotimo ipi faesane ipi hokosaki kasasamo e ipiane faeraka ho piakaeraka reapo. Koti ipi kárapo, aíyaka ipi hokosa Yasumo tarikia some kasapo. Kotimo ipi ainane ipi hokosamo soko hakása yineraka rakiraka reapo. Arirakano hauaka one soko ti yapurane soko makata su rakisiane siaraka risikiasimo, Kotimo hokosamo some wakapu amo asekea rekenapo. Aporo hinamo suamo himu watikisane mafaraka Koti hikumisia ereketaeraka risikiasimo e hákasa kusuapo. Kusuane maturikia taerakano hepene yapura hikia ipi fanaraka reasasamo ipi Unihae Koti hokono tumuru takua kakenapo.
Kotimo hokosa Yasumo hepene aporoane marokesane oyapo.
4 Yasu ipi Kotimo hokosasamo ipi yano motosane ipi Ata Kotimo makárasapo. Arirakano hepene aporoane Kotimo aporo raipa risiasamo yano motosane. Kotimo makarasafapo. Asiamo iane Yasumo marokeraka hurutapisiapo. 5 Marokesa kepoane oyapo. Kotimo sawia poparaka ipi hokosane unihaehoasimo murikimaka makararaka someraka, “Né nōmo hokosapo. Pipu nómo ní Ata ane anopo.” (Buk Song 2:7)
Aíyaka somesane Kotimo hepene aporoane makararaka somesare? Wae. Hepene aporoaki Kotimo aíyaka somesafapo. Asiamo Kotimo someraka, “Ipi Atane anopo. Nōmo hokosane épo.” (2 Samuel 7:14)
Aíyaka hepene aporoane Kotimo makararaka somesafapo. Ipi hokosa Yasuane makararaka somesapo.
6 Arirakano Kotimo ipi hokosa hakása yine hauaka wo pusiesapo. Pusiesa maiya amo Kotimo hepene aporoaki someraka, “Hepene aporo reo, repo nōmo hokosane kekerehoanie.” Aíyaka Kotimo somesapo. (Lo 32:43)
7 Arirakano hepene aporoane Kotimo ipipoko raiparaka rakisimo someraka, “Ipu anoane somehoko puraka atifo apera ayiáka i perapo. Ipu anopoko rakiraka ira rufiana ayiáka ayiakakosapo.” (Buk Song 104:4)
8 Aíyaka hepene aporoane Kotimo somesa nine ipi hokosa Yasuaki someraka,
“Kotio,* Yasu ipi Kotipo. maiya suamo né yaiya unihaeaka rekeakosapo. Nómo aporomano asekea areane nómo kakaro ereketaeraka asekea rekenapo.
9 Makata kotesa ereketae susuane nómo seseraka reke, somemane mamosorane soko ereketae some koaretaenane soko makata watikisa aina suane nómo hisinapo. Kotio, nómo ní Ata Koti amo né unihaeraka rekeasimo murikimaka he wera né kaua rekemarekea né maseserakanapo. Hepene aporo ane soko, hauaka wo aporo unihaeaka risiane soko, nómo marokerakano Koti amo néaki kára maseserakanapo.” Aiyaka Kotimo somerakano popahoareapo. (Buk Song 45:6-7)
10 Asiamo Kotimo ipi hokosa Yasuane makata meta soko someraka,
“Unihaeo, Kepomaresa maiya amo nómo hemakapukua somesa aeyaka hauaka one faserepesapo. Ti yapurane soko nómo hokonomo rakisiapo. 11 Asiamo keseke hauaka one soko ti yapurane soko makata one su fahokosapo. Asiamo makata ane su faraka né kakaro yaiya rekeakosapo. Pasu patéana ayiáka makata one su ayiáka patéhokosapo. 12 Pasu mawerona ayiáka hauaka one soko ti yapurane soko ayiáka mawerohokosapo. Pasu paté metakarira ayiáka, hauaka one soko ti yapurane soko patéane ayiáka metakariakosapo. Metakarikia pasu kawe amara ayiáka hauaka one kawe meta haku faserepekea, arirakano ti yapurane soko ti kawe haku meta faserepeakosapo. Asiane yumo né area yaiya keseke soko ne yaiya rekeakosapo. Nómo maiyane kakaro fahokosafapo.” Aíyaka Kotimo Yasuane somerakano popahoareapo. (Buk Song 102:25-27)
13 Arirakano Kotimo makata meta Yasuaki someraka, “Né ano hokono tumuru takua kayae. Kakeno nómo yunuane nōmo hurutapiakosapo.” Aíyaka somerakano Kotimo sawia popahoareapo. (Buk Song 110:1)
Aisa ayiáka, hepene aporoane Kotimo makararaka somesare? Wae. Hepene aporoane aíyaka somesafapo. 14 Arirakano hepene aporoane yakapare? Iane hopo. Ipu Kotipoko rakirapo. Arirakano Kotiyaki yaiya risikiakosa aporo hinamoane ararehoasimo Kotimo iane pusierapo.