3
Sadisa Siosa Dokonya Pepa Pyao Pyasakamaina Leamo Doko
1 “Sadisa siosa dokonya enjele kalyamo dokonya dapa lao pepa pyao pyasakamaipi: ‘Gotenya spirita kalange dutupapi, bui kalange dutupapi, dutupa minatae katenge akali dokome dapa lelyamo: Embanya kalai pingi dupa nambame kandenge. Emba kenge simupa kalyeno. Dopaka doko, angi emba kumapae kalyeno. 2 Embame kalai pipino dupa nambanya Gote dokonya enombanya pyoo etatae katamupa nambame kanja naelyona, emba palipae nasinya, mana epe embame nepalanya pilyino dupa andasoo kyeto tasetala kandao isoo katape. 3 Matyu 24:43-44; Luku 12:39-40; Rev 16:15Dopa petala, embame pii soo nyiino dupa masetala, wata-minao katao mona kapilyepe. Emba palipae seteno doko, masala naeyate gii mendenya pake nenge mende epengeli pyoo, namba emba katate dokonya ipato. 4 Dopaka doko, Sadisa siosa dokonya petenge endakali kuki mendatupanya yonge pee dupa kaimala pisala naelyamino. Dopa pilyamino endakali dokaita epe. Tenge dokonya, yonge pee kyeo lapae dupa petala namba-pipa tole paeyatama. 5 Eks 32:32-33; Sam 69:28; Matyu 10:32; Luku 12:8; Rev 20:12Koo pingi mana dupa ita minata endakali doko, baa yonge pee kyeo lapae dupa pyoo katata. Lete katapenge endakali dupanya kenge pyapae singi buku dokonya baanya kenge doko nambame kunao nepakamaiya naeyato. Nambanya Takange dokonya enombanyapi, baanya enjele dupanya enombanyapi, endakali doko nambanyana lao, nambame lao panato. 6 Spirita dokome siosa dupa pii lamailyamo dupa endakali kale katenge dupame sepengena’ ” lea.
Piladelepia Siosa Dokonya Pepa Pyao Pyasakamaina Leamo Doko
7 Jopo 12:14; Ais 22:22“Piladelepia siosa dokonya enjele kalyamo dokonya dapa lao pepa pyao pyasakamaipi: ‘Akali makande latae, kiningi pii lenge, Dapitanya kii doko minatae katenge dokome, kaita lumbilyamopa mendeme kapa pai laa naenge. Baame iki lumbilyamopa, mendeme kapa pai laa naenge akali dokome dapa lelyamo: 8 Embanya kalai pingi dupa nambame kandenge. Emba-kisa kyeto kuki siamoaka doko, nambanya pii doko embame wata-minatala, nambanya kenge doko yapae napii. Tenge dokonya, embanya enomba dokonya nambame kaita lumbanya setekelyo doko mendeme pai laa naeyata. 9 Ais 43:4; 49:23; 60:14Sepe! Satanenya lotuu anda dokonya petengema endakali dupame nyakama Juuna lelyaminoaka doko, dokaita angi Juu daa. Dupame sambo lelyamino. Embanya moko setate dosa, nambame dokaita ipao luma lakena latopa, nambame emba auu kaenge-lamo lao dokaitame kandatami. 10 Emba maka nakaeyape lao pii langio doko wata-minao katapino dokonya, isa yuu dakenya endakali dupa pitaka-kisa makande pingi gii mende ipatamopa, nambame emba kandao isoo katato. 11 Namba yapa ipanya pilyona, embanya kiŋi balu doko mendeme nyokonyala naekena lao, embame mana epe minilyino dupa minakondape pyoo minao katape. 12 Ais 62:2; 65:15; Rev 21:2Koo pingi mana dupa ita minata endakali doko, nambanya Gote dokonya anda nee nyetae dokonya baa pingina joo katena lato. Dokonya katao baa dee kamaka paa naeyata. Dokopa nambanya Gote dokonya kenge dokopi, nambanya Gote dokonya siti enenge kaiti-kisa katao lanao ipata Jerusalema dokonya kenge dokopi, nambanya kenge enenge dokopi, dutupa baa-kisa pyao katakamaito. 13 Spirita dokome siosa dupa pii lamailyamo dupa endakali kale katenge dupame sepengena’ ” lea.
Laodisia Siosa Dokonya Pepa Pyao Pyasakamaina Leamo Doko
14 Pro 8:22“Laodisia siosa dokonya enjele kalyamo dokonya dapa lao pepa pyao pyasakamaipi: ‘Goteme akali mende minatala tee pyao dupa pitaka pyoo injia dokome yakinala naeyao kiningi pii doko lao panenge. Akali dokome dapa lelyamo: 15 Embanya kalai pingi dupa nambame kandenge. Emba endaki kii napae joo nakatenge. Emba endaki itaita pipae joo nakatengeaka. Emba endaki kii napaepa, itaita pipaepa, dolaponya mende joo katapi laka lao nambame masilyo. 16 Dopaka doko, emba endaki itaita pipaepa, kii napaepa, dolaponya mende joo nakatenya, emba endaki kulapae joo katenge dokonya, nambanya nenge-kaitame emba sopokali joo talyinya pyale laanya pilyo. 17 Embame dapa lelyeno: “Namba dupa pitakame kapa patae, dopale mendeme daa jala naenge, namba kamongo kalyona” lelyeno. Dopaka doko, emba koeyapae, kondo pipae, tipya, lenge monda, yonge papata kalyeno doko masala naelyeno. 18 Dopa pipae kalyona lao masala naelyeno dokonya, nambame emba dapa langilyo: Emba kamongo kalyale, namba-kisa golo itateme yangao wasepae dupa sambao nyepe. Emba yonge papata katao elya kaelyeno doko endakali dupame nakandena lao yame pyatale, namba-kisa yonge pee kyeo lapae dupa sambao nyepe. Embanya lenge dolaponya matasini katatenopa auu pyoo kanjale, namba-kisa lenge matasini dupa sambao nyepeaka. 19 Pro 3:12; Ibru 12:6Nambame endakali auu kaelyo dupa pitaka pyalanya latala mana maiyoo tolasingi. Dopana, emba nee kaeyao mona kapilyepe. 20 Sepe! Namba anda kambu dokonya katapala gata-gata lao kalyo. Endakali mendeme nambanya pii doko sepala anda kaita doko lumbatamo doko, namba baanya andaka kolandatala, baa-pipa nee nao pititambanopa, baa namba-pipa nee nao pititambaka. 21 Koo pingi mana dupa nambame ita minateopa, nambanya Takangeme baanya kiŋi toko dokonya namba baa-pipa tole pitimbanana leali pyoo, koo pingi mana dupa ita minata endakali doko, baa nambanya kiŋi toko dokonya namba-pipa tole pitimbanana lato. 22 Spirita dokome siosa dupa pii lamailyamo dupa endakali kale katenge dupame sepengena,’ ” akali dokome lea.
3:3: Matyu 24:43-44; Luku 12:39-40; Rev 16:15
3:5: Eks 32:32-33; Sam 69:28; Matyu 10:32; Luku 12:8; Rev 20:12
3:7: Jopo 12:14; Ais 22:22
3:9: Ais 43:4; 49:23; 60:14
3:12: Ais 62:2; 65:15; Rev 21:2
3:14: Pro 8:22