1  Matyu 4:1-11; Make 1:12-13Jisasa-kisa Oli Spirita tumbateamopa, baa endaki Jodane yakinatala pilyia. Dokopa Spirita dokome baa laminao endakali napalenge yuu mendenya pea. 2 Endakali napalenge yuu dokonya Jisasa yuu gii 40 katea dutupanya Sataneme baa makande pia. Gii dutupanya Jisasa baa nee nanao katea. Gii dutupa eteamopa baa lopo kaeya. 3 Dokopa Sataneme baa lamaiyoo, “Emba Gote Ikiningi-tamo doko, embame kana silyamo dake breta jina laa” lea. 4  Diut 8:3Dopa leamopa Jisasame baanya pii yanu pyakamaiyoo, “ ‘Breta nenge dokonya-kaita iki endakali dupa saka nakatenge. Gotenya pii dupa pitakanya-kaita endakali dupa saka katengena’ lao pepa pyapae silyamona” lea. 5 Dokopa Sataneme baa laminao yuu manda ketae mendenya pupala, isa yuu dakenya kingdom dupa pitaka lee mendai kandena lea. 6-7 Kandena latala Sataneme Jisasa lamaiyoo, “Datupa isingi kyetopi, datupanya oapi epe muni andake pupengepi, dupa pitaka namba ditae. Nambame mende maitoo lao masoto doko maipenge. Dopana, emba luma lakapala namba mambo pyateno doko, dupa pitaka emba ditopa embanya jalapomona” lea. 8  Diut 6:13Dopa leamopa Jisasame baanya pii yanu pyakamaiyoo, “Gotenya pii dokonya dapa lao pepa pyapae silyamo: ‘Embanya Kamongo Gote doko embame mambo pyao, baanya iki kalai pyakamaiyoo katape’ lapae silyamona, Satane, embame namba yakinatala puu” lea. 9-11  Sam 91:11-12Dopa lateamopa, Sataneme baa laminao Jerusalema pupala, lotuu anda nee nyetae dokonya etete ketae dokonya katena lea. Dopa latala baame Jisasa lamaiyoo, “ ‘Goteme emba masetala, baanya enjele dupame emba isoo katena latana’ lao pepa pyapae silyamo. Pii mendenya apata dapa lao pepa pyapae silyamoaka: ‘Embanya mokopi mende kaname tukutame-latala, enjele dupame emba kopyoo nyetamina’ lapae silyamo. Dopana, emba Gote Ikiningi-tamo doko, ketae dakenya katao isa mangau laa” lea. 12  Diut 6:16Dopa leamopa Jisasame baanya pii yanu pyakamaiyoo, “ ‘Embanya Kamongo Gote doko embame makande napipi’ lapae silyamona” lea. 13 Dokopa Sataneme baanya makande dutupa pitaka pyoo etapala, gii epe mende ipatamopa dee makande pitona lao masetala, Sataneme Jisasa yakinatala pea.

14  Matyu 4:12-17; Make 1:14-15Dokopa Spirita dokome Jisasa kyeto maiyamopa, baa Galali pilyetala katea. Kateamopa, baanya lao pii lapae doko yuu makisa singi dupa pitakanya taeya. 15 Baame dokaitanya lotuu anda dupanya mana lamaiyamopa, endakali pitakame baa mambo piami.

16  Matyu 13:53-58; Make 6:1-6Dokopa Jisasa baa katao andea taono Nasarete dokonya epea. Ipupala baanya mana singili pyoo, Sambata gii dokonya lotuu andaka pupala, Gotenya pii dupa itaki pyao lamaiyanya toeya katea. 17 Dokopa propeta Aisaiyanya pii pepa pyapae dupa lakapae singi doko baa maiyaminopa, baame pepa yoko lakapae doko tata latala, pii pepa pyapae singi dake kutao kandatala itaki pyao lamaiya: 18-19  Ais 61:1-2“Kamongome wele kai lao nambanya aiyomba minani pyekea dokonya, Spirita doko namba-kisa kalyamo. Tenge dokonya, nambame endakali daa jepae dupa wai pii epe doko lamaita, mona kenda kaeyao katatami dupa tambo lasakamaita, endakali yandanya wakuu nyepala anjinya palyetae dupa mokao nyepa, lenge monda dupanya lenge auu pisakamaita, endakalimi kenda pisilyaminopa kendanya katengema dupa mokao nyepa, Kamongonya kondo kaenge ee kana doko dakena lao, lao panata pyaa puu leana” lao Jisasame itaki pyao lamaiya. 20 Lamaitala, pepa yoko doko lakapala, buku isingi doko maiya. Maitala peteamopa, endakali lotuu andaka dokonya peteami dupa pitakame baa iki lengeme kandatae siami. 21 Dokopa baame dokaita tee pyao lamaiyoo, “Nambame Gotenya pii pepa pyapae singi dokonya itaki pyao langipupa kaleme silyamino doko indupa angi jilyamona” lea. 22 Dopa leamopa, kondo kaenge dokonya lao baanya pii lea dupa walu lao sepala, dokaita pitakame baa lalyiami. Dopa petala nyakama-lapo laloo pyoo, “Akali dake Josepe ikiningi doko daape?” leami. 23 Dokopa baame dokaita lamaiyoo, “Kongali pii dake nyakamame namba langyamino: ‘Dokosa, embanya yaina doko emba tange mee jaa’ laamino. Dopa latala nyakamame namba langyoo, ‘Yuu Kapename dokonya kalai pilyino lapae simano dopale dupa embanya yuu dakenya pii’ laamino. 24  Jone 4:44Nambame nyakama kiningi langilyo: Propeta mende baanya yuu dokonya kalyamopa, endakali dupame baa auu kaeyao lanyala naengema. 25  1 Kiŋi 17:1Nambame nyakama kiningi langilyo: Wamba Ilaija katea gii dokopa, ee kana tepo-kisa, kana tokange kaiti doko pai latae kateamopa, aiyuu naepea. Dokopa yuu dupa pitakanya lopo andake mende sia. Gii dokopa, Israele yuu dokonya enda walyakae longo mendapu peteami. 26  1 Kiŋi 17:8-16Peteamiaka doko, Goteme Ilaija baa enda peteami dupanya mendenya pena laa naeya. Yuu Saidone dokonya taono Sarepata dokonya enda walyakae mende petea dokonya pena lea. 27  2 Kiŋi 5:1-14Propeta Elisa katea gii dokopa, Israele yuu dokonya endakali kopetali longo kateami dupanya mendenya kopetali doko auu pisakamaiya naeya. Siria tange akali Namane lenge dokonya kopetali doko iki auu pisakamaiyana” lea. 28 Dokopa lotuu andaka peteami endakali dupa pitakame pii dutupa sepala etete imbu kaeyami. 29 Imbu kaeyao sakatatala, Jisasa watao pyao dokaitanya taono doko yuu manda mendenya singi doko yakinatala, papatale mendenya Jisasa tuu lanya pyandalanya piami. 30 Dopa piaminopa, Jisasa baa endakali kambu dokonya kainanya kolanyetala pea.

31  Make 1:21-28Galali yuu dokonya Kapename siti dokonya Jisasa lanao pupala, Sambata gii dokonya endakali dupa mana lamaiyoo katea. 32  Matyu 7:28-29Baame pii kyeto dupame mana leamosa, endakali dupame sepala paka kaeyao walu leami. 33 Dokopa akali imambu koo paleta mende lotuu andaka dokonya petea dokome puu lao wii lao, 34 “Nasarete tange Jisasa, embame naima yakinatala puu. Emba Akali Gotenya Latae doko nambame kandengena, embame naima aipa pyaa epe? Embame naima koeyasala epepe?” lea. 35 Dokopa Jisasame baa pyalanya lao, “Embanya nenge-kaita lyokatala, akali dake yakinatala puu” lea. Dopa leamopa, imambu koo dokome akali doko koeyasala naenya, endakali kaina dupanya nyoo lombanya setapala baa yakinatala pea. 36 Dokopa endakali dupa pitaka paka kaeyao walu latala, nyakama-lapo laloo pyoo, “Pupu lapaepa, kyetopa dolapome imambu koo dupa pena lelyamopa, dokaitame endakali dupa yakinatala pengema-lamo doko, akali dakenya pii doko aipale mende laa-kanjemape?” leami. 37 Dokopa yuu dosa makisa singi dupa pitakanya Jisasanya lao pii doko lao taeyami.

38  Matyu 8:14-17; Make 1:29-34Dokopa Jisasa sakatatala, lotuu anda doko yakinatala, Saimonenya andaka pupala andakote kolandea. Andaka dokonya Saimonenya enda imange doko yonge etete itaita piamopa yaina sia. Dokopa Jisasame enda doko nisetepe lao baa tee leami. 39 Dopa leaminopa Jisasame enda doko yaina sia dosa katapala, yonge itaita pia doko mee jina leamopa, yaina doko mee jia. Mee julu piamopa, enda doko sakatatala, dokaita nee nyoo maiya.

40 Niki landa piamopa, endakali mendapuame yaina tata waka-wakame pyapae endakali longo mendapu laminao baa katea dokonya epeami. Dokopa Jisasame endakali yaina pyapae dupa pitaka-kisa kingi setapa piamopa, yaina dupa mee jeta pia. 41 Dopa piamopa, imambu koo mendapuame endakali dupanya longo yakinatala pao pituu, “Emba Gote Ikiningi Kraisa dokona” lao puu lao leami. Dokopa, imambu koo dupame baa Kraisa dokona lao kandengema dokonyana, dupame pii laa naena lao baame daa lea.

42  Make 1:35-39Yongama wamba, Jisasa baa yuu doko yakinatala, endakali napalenge yuu mendenya pea. Pateamopa, endakali kambu dupame Jisasa kutao kandatala, baa katea dokonya epeami. Ipupala, baa dokaita-pipa katamana latala minanjalanya piami. 43 Dopaka doko Jisasame dokaita lamaiyoo, “Gotenya kingdom dokonya wai pii epe doko taono waka dupa pitakanya apata lamaipenge. Tenge dokonyaka Goteme namba puu leana” lea. 44 Dopa latala baame Galali yuu dokonya lotuu anda dupanya wai pii epe doko lamaiyoo paeya.