1 Тунчи всаворэ онэ подлинэпэ и андярдэ Лэс кав Пилато. 2 Котэ онэ линэ тэ ужылисарэн Лэс:

— Амэ удикхле, со Вов змарэл чячюнэ дромэстар амарэ манушэн. И запхэнэл тэ потинэн налогоря лэ императорости, и пхэнэл, со Вов — Христосо, Тхагар.

3 Пилато пушля Исусос:

— Ту Тхагар иудеёско?

— Ту ежэно кадя пхэнэс, — пхэндя Исусо.

4 Тунчи Пилато пхэндя барэ рашаенди и манушэнди, савэ сас котэ:

— Мэ на аракхав нисаво ужылимос андэ Кадва Мануш.

5 Но онэ тэрдёнас пэ пэско, пхэнэнас:

— Вов ваздэл лэ манушэн, сар сытярэл пай всавори Иудея, лэ Галилеятар жыкай кадва тхан.

6 — Кадва Мануш — галилеянино? — пушля Пилато, сар ашундя када.

7 И ужангля, со Вов андай пхув, кай сас тхагар Иродо, бишалдя Лэс кав Иродо, саво сас андэ кола деса андо Иерусалимо. 8 Сар Иродо удикхля лэ Исусос, фартэ радосайля, колэсти со дэлмут камля тэ дикхэл Лэс. Тай бут ашундя пала Лэстэ и гындолас, со Исусо сикавэла важ лэсти варисави шпэра. 9 Вов пушэлас Лэстар бут со, нэ Исусо нисо на пхэнэлас лэсти. 10 Барэ рашая и сытяримаря Законостирэ тэрдёнас и фартэ ужылисарэнас Исусос. 11 О Иродо пэстирэ халавдэнца акушле и обсае Лэс, урявдэ пэр Лэстэ шукар йида и рисардэ палпалэ кав Пилато. 12 Андэ кодва дес Иродо и Пилато ашыле амала, а жы кола вряматар онэ сас вражымаря.

13 Тунчи Пилато стидя барэ рашаен, пхурэдэрэн раен и манушэн 14 и пхэндя лэнди:

— Тумэ андэ манди Калэс Манушэс, и пхэнэн, кай Вов ваздэл манушэн. И акэ, мэ допушлем Лэс англай тумэндэ, тай на аракхлем андэр Лэстэ нисаво ужылимос, андэ со тумэ Лэс ужылисарэн. 15 Иродо кадя ж на аракхля андэр Лэстэ нисаво ужылимос и бишалдя Лэс палпалэ амэндэ. Сар дикхэн, Вов на стердя нисо кацаво, пала со Лэс трэбуй тэ умарэ. 16-17 Мэ припхэнава, кай тэ марэн Лэс чюкняса, и тунчи отмукава Лэс.* 23.16-17 Андэ коисавэ гречески манускрипторя инке исин кацавэ лава: «Андэ кодья вряма кадя сас, со пэ свэнко вов трэбуй тэ отмэкэл екхэс манушэс андай барунаря».

18 Нэ всаворэ линэ тэ цыписавэн:

— Залэ Лэс! Отмук амэнди Варавас!

19 Варава бэшэлас андо баруно пала умаримос и пала кода, со ваздэлас манушэн андо форо. 20 Пилато жэ камэлас тэ отмэкэл Исусос и инке дэлас дума лэнца. 21 Нэ онэ цыписавэнас:

— Примар, примар Лэс кав трушул!

22 Пилато трито моло пхэндя лэнди:

— Со вырито Вов тердя? Мэ на аракхлем пала Лэстэ нисо, пала со Лэс трэбуй тэ умарэ. Мэ припхэнава, кай тэ марэн Лэс чюкнянца, и тунчи отмэкава Лэс.

23 Нэ мануша цыпимаса домардёнас пэско, кай Исусос тэ примарэн кав трушул. Тунчи онэ домардэпэ пэско. 24 Пилато сындосардя тэ терэл кадя, сар онэ камэнас. 25 Вов отмэкля, сар онэ мангэнас, колэс, ко сас андо баруно пала кода, со ваздэлас лэ манушэн и тердя умаримос. Ай лэ Исусос отдя андэ лэндирэ васта.

26 Кала онэ андярэнас Лэс, линэ варисавэс Симонос Киринеятар, саво жалас пай мал, и тховдэ пэр лэстэ трушул, кай тэ андярэл палав Исусо. 27 Пала Лэстэ жанас бут мануша и жувля, савэ марэнас пэс андэ кулин и ровэнас пала Лэстэ. 28 Исусо обрисайля лэндэ и пхэндя:

— Щея Иерусалимостирэ, на ровэн пала Мандэ, нэ ровэн пала пэстэ и пала пэстирэ бэяцэ. 29 Авэла кацави вряма, кала авэна тэ пхэнэн: «Бахталэ бибэяцэндирэ, кола, савэ на бэяндэ бэяцэн и кола, савэ на праварэн чючяса!» 30 Тунчи мануша пхэнэна плаенди: «Пэрэн пэ амэндэ!» И холмонэнди: «Гаравэнтэ амэн!»

31 Сар жундэ дрэвоса терэн кацаво, тунчи со авэла шукэса?

32 Исусоса андярэнас дуен прахарэн по миримос. 33 Сар онэ авиле по тхан, саво акхарэлпэ Черэпо, котэ примардэ кав трушул Исусос и прахарен, екхэс пай право риг, ай аврэс пай авэр риг.

34 Исусо пхэндя:

— Дадэ! Эртисар лэн, онэ на жанэн, со терэн.

Халавдэ шонас жребиё тай розлэнас машкар пэстэ йида Исусостири.

35 Ай мануша тэрдёнас и дикхэнас. Пхурэдэра асанас Лэстар и пхэнэнас:

— Фэрисарэлас аврэн! Мэк акана фэрисарэл Ежэно Пэс, сар Вов Дэвлэско Вытидо — Христосо!

36 Халавдэ, кадя ж асанас Исусостар. Онэ поджанас и дэнас Лэсти уксусо 37 и пхэнэнас:

— Фэрисар Пэс, сар Ту Тхагар иудеёско!

38 Ай упрэ англав Исусо сас пистросардо: «Када Тхагар иудеёско».

39 Екх андай примардэ кав трушул прахари дэлас амрая Лэс и пхэнэлас:

— Со Ту, на Христосо? Фэрисар Пэс и амэн!

40 Авэр жэ прахари улэлас лэс и пхэнэлас:

— Чи ту на дарас Дэвлэстар? Ту кадя ж сындосардо по миримос. 41 Амэ туса пав чячимос прилас кода, со затердэ, ай Вов нисо вырито на тердя.

42 И вов пхэндя:

— Исусо, гындосар пала мандэ, сар авэса андо Пэско Тхагаримос!

43 И пхэндя лэсти Исусо:

— Чячимос пхэнав тути: адес авэса Манца андо раё.

44 Сар сас вряма пашэ дэшудуй чясоря десэстирэ, пай всавори пхув ашыля рят, и када сас жыкай трин чясоря. 45 Кхам пэрэашыля тэ пхабол, о паринд андо храмо росшындяпэ поепаш. 46 Исусо фартэ зацыписайля:

— Дадэ, андэ Тирэ васта Мэ отдав духо Мэрно!

И сар пхэндя када, Вов отдя пэско духо. 47 Кала пхурэдэр шэлэ халавдэнго вся када удикхля, лашардя лэ Дэвлэс и пхэндя:

— Кадва Мануш чячес сас жужо!

48 И всаворэ мануша, савэ стидэпэ тэ подикхэн пэ умаримос, удикхле, со сас, рисавэнас палпалэ и марэнас пэс андэ кулин. 49 Всаворэ, савэ жанэнас Исусос, и жувля, савэ жанас пала Лэстэ андай Галилея, тэрдёнас и дикхэнас дурал пала када.

50 Котэ сас лашо и жужо англав Дэл мануш, савэс акхарэнас Иосифо. Вов сас екх андай пхурэдэра синедрионо. 51 Нэ вов на подритярэлас лэндирэ лава и рындоря. Иосифо сас андай Аримафея, форо Иудейско, и ажутярэлас Тхагаримос Дэвлэско. 52 Кадва мануш авиля кав Пилато и мангля о тило лэ Исусоско. 53 Вов зля тило, тховдя андэ сани материя и тховдя Лэс андо склэпо, саво сас вымардо андэ баруно плай. Котэ инке никас на гаравэнас. 54 Када сас дес, кала гытонаспэ кай субота, и кадва дес поджалас. 55 Палав Иосифо жанас и жувля, савэ авиле лэ Исусоса андай Галилея. Онэ дикхле о склэпо и сар кордэ тховдэ тило Исусоско. 56 Сар онэ рисайле, гытосардэ мастина лашэ фаноса и духоря. Суботнё дес онэ отчиёнас пав запхэнимо.