Kalagan Roma 9

Yang Pagpili ng Tohan sang Bangsa Israil

1 Na adon, aon pagalaong ko kamayo, aw yani na pagalaong ko aag bunna. Saksi ko yang Almasi na di ako mamakak. Aw saksi ko oman yang Nyawa ng Tohan na mapoti yang pangatayan ko kong magalaong ako na 2 bali na kabugat ng ginawa ko aw di amawaa yang kasakit ng pangatayan ko 3 sabap sang mga kalomonan ko na magonawa ko na bangsa Israil na wa apangintoo sang Almasi. Kong mapakay pa gaid, ako da gao yang mapitas sang Almasi aw masiksa adto sang narka antak silan malowas. 4 Kay yang mga bangsa Israil* yang pipili ng Tohan na sakop nan. Silan yang tyatarima nan na mga anak nan aw pyapakitaan nan silan sang kanan kabarakat. Aon mga pyagapasadan na ininang ng Tohan adto kanilan aw yatagan nan silan ng kanan Hokoman. Pyapakatigam nan silan sang bunna na pamaagi ng pagibada aw madaig yang mga pasad nan kanilan. 5 Yang mga kaompowan nilan na magonawa ni Nabi Ibrahim, si Isahak aw si Yakob, barapantag na mga otaw sangaong ona. Aw maskin yang Almasi topo oman nilan pagkaotaw nan adi sang donya. Aw yan yang Tohan na yagadato sang kariko. Dait yan pojiun taman sa taman! Amin.

6 Na, maskin madaig yang mga bangsa Israil na wa apangintoo sang Almasi di yan karim ipasabot na wa otomana ng Tohan yang kanan pasad sang sakop nan. Kay dait natun katigaman na dili ng kariko ng mga topo ni Israil bunna na mga bangsa Israil, mana nan na sakop ng Tohan. 7 Aw dili ng kariko ng mga anak ni Nabi Ibrahim bunna na mga topo nan. Kay yagalaong yang Tohan kang Nabi Ibrahim, “Yang mga anak da gaid ni Isahak yang amadawat ko na mga topo mo.”† 8 Yang mana sinyan na di adawatun ng Tohan na mga anak nan yang kariko ng mga anak ni Nabi Ibrahim, kondi yang mga anak da gaid ni Isahak na yan yang anak ni Nabi Ibrahim na pyapasad kanan ng Tohan. Silan gaid yang bunna na mga topo ni Nabi Ibrahim. 9 Kay yani yang pasad ng Tohan kang Nabi Ibrahim, laong nan, “Magonawa sang pyaglaongan ko magabarik ako adi sonod na toig, aw sinyan na wakto kaotawan da si Sara ng anak na usug.”‡

10 Na adon, dili gaid ingidto yang yagapakita daw monono yang pagpili ng Tohan sang manosiya, awgaid mapayag da oman yan sang yamaitabo sang mga anak na kambal ni Ribika, na sambok da yang ama nilan na yan yang ompo natun na si Isahak. 11-12 Kay sang wakto na wa pa akaotaw yang dowangka isu aw waa pay ininang nilan na madyaw atawa maat, pyagalaong da si Ribika ng Tohan, laong nan, “Yang anak mo na mangod yang magapasonod sang magowang nan.”§ Yani na pyaglaongan ng Tohan yagapakita na yang pagpili nan sang manosiya dili sabap sang mga inang nilan, awgaid sabap sang pyagakahanda nan. 13 Yani oman yang mana sang yamakasorat sang Kitab na yagalaong, “Si Yakob kyakallinian ko, awgaid si Isaw tyataripundaan ko.”*

14 Na, kong maynan, makapaglaong ba kita na dili ng matorid yang ininang ng Tohan? Dili! 15 Kay maynini yang pyaglaongan ng Tohan kang Nabi Mosa, laong nan,

“Akallatan ko daw sino yang karim ko kallatan.

Aw akaloyan ko daw sino yang karim ko kaloyan.”†

16 Agaw, makita da natun na amadawat natun yang kadyawan ng Tohan dili sabap sang karim atawa sabap sang pagpaningkamot ta, awgaid sabap sang looy nan. 17 Kay yamakasorat oman sang Kitab na yagalaong yang Tohan sang soltan sang Misir, “Ininang ta kaw ng soltan antak sabap kanmo apakita ko yang kanak kabarakat aw antak apayapat sang kariko ng mga banwa adi sang donya daw sino ako.”‡ 18 Agaw, katigaman da natun na akaloyan ng Tohan daw sino yang karim nan kaloyan, aw apatigasun nan yang pangatayan ng otaw na karim nan patigasun.

19 Na, basin aon otaw ansan kamayo na magalaong kanak, “Kong maynan, nanga sa abasuun pa kita ng Tohan? Way sino-sino na makasopak sang karim nan!” 20 Awgaid yani yang tobag ko kanan. Sino kaw na magalalis kaw sang Tohan? Manosiya pa kaw gaid. Aon bay banga na yagalaong sang yagainang kanan, “Nanga sa maynini yang paginang mo kanak?”§ 21 Dili! Kay yang yagainang ng banga, yan yang makabuut daw ono yang inangun nan. Sikun sang sambok na masa ng lopa mapakay nan inangun yang dowangka klasi na banga, yang isa sang barapantag na paggamit, yang isa oman sang pangallaw-allaw na paggamit.

22 Magonawa sinyan yang ininang ng Tohan. Karim gao nan apakita yang kanan kabarakat aw kadaman sang mga otaw na yagapakadosa, awgaid pyagasabaran mona nan yang kaatan nilan maskin dait silan siksaun. 23 Ininang yani ng Tohan kay karim oman nan apakita yang bali na kadyaw nan sang mga otaw na kyakallatan nan. Sikun pa sangaong ona pyagakahanda nan silan na amakasawit sang kanan kabantog adto sang sorga. 24 Na, kita-kamo yang mga otaw na pyagakahanda nan sinyan, aw pipili nan kita dili gaid sikun sang mga Yahodi kondi sikun oman sang mga dili ng Yahodi. 25 Magonawa yan sang pyaglaongan ng Tohan na syosorat ni Nabi Hosiyas, laong nan,

“Yang mga otaw na sangaon dili ng sakop ko, atarimaun da ko na sakop ko.

Aw yang mga otaw na wa ko akallinii, atawagun da ko mga pasaya ko.”*

26 Yagalaong oman yang Tohan,

“Yang mga otaw na pyagalaong ko sangaon na dili silan ng sakop ko,

pagatawagun da silan na mga anak ng bowi na Tohan.”†

27 Awgaid makapantag sang mga bangsa Israil aon syosorat ni Nabi Isayas na yagalaong,

“Maskin magonawa sang bowangin sang baybay yang kadaig ng mga bangsa Israil,

tagbi gaid kanilan yang amalowas.

28 Kay madari da domatung yang wakto na hokoman da ng Tohan yang mga otaw adi sang donya.”‡

29 Aw aon oman pyagatagna ni Nabi Isayas sangaon na yagalaong,

“Kong wa otogoti ng Tohan na Labi na Mabarakat na aon pay yamabilin kanatun na mga Yahodi,

yamawaa da gao kita na magonawa sang mga otaw sang banwa ng Sodom aw Gomora.”§

Makapantag sang mga Yahodi na wa Apangintoo kang Isa Almasi

30 Na, ono da kowaw yang karim ko ipasabot sinyan? Yang karim ko ipasabot na yang mga dili ng Yahodi, maskin wa silan apaningkamot na amainang ng matorid, tyatarima silan ng Tohan na matorid sabap ng yamangintoo silan kang Isa Almasi. 31 Awgaid yang mga Yahodi na yamaningkamot na amainang ng matorid sabap sang pagpangagad sang Hokoman, wa silan atarimaa na matorid. 32 Nanga sa? Kay yamaningkamot silan na amainang ng matorid sabap sang madyaw na mga inang nilan, aw dili sabap sang pagpangintoo. Agaw yamalogso silan sang “bato na akalogsowan” na yan si Isa Almasi. Aw yamalogso silan kay wa silan apangintoo kanan. 33 Magonawa yan sang yamakasorat sang Kitab na yagalaong,

“Tanawa, adto sang syodad ng Siyon byubutang ko yang sambok na bato*

na yan yang akalogsowan ng mga otaw.

Awgaid sino-sino yang yamangintoo kanan, di akasipugan.”†

Roma
<
9
>

*9:4 9:4 Yang mga bangsa Israil yang mga katopo-topowan ni Yakob. Yang kanan ngaan kyakambiyowan ng Tohan sang ngaan na Israil. Pagkatapos san gyagamit yang ngaan na Israil sang tibok tribo atawa bangsa nilan. Tanawa sang Kitab Tawrat, Tagna Donya 32:28.

†9:7 9:7 Yani na ayatan yamakasorat sang Kitab Tawrat, Tagna Donya 21:12.

‡9:9 9:9 Yang anak na yamaotaw sabap sang pasad ng Tohan si Isahak. Tanawa sang Kitab Tawrat, Tagna Donya 18:10 aw 14.

§9:11-12 9:11-12 Yani na ayatan yamakasorat sang Kitab Tawrat, Tagna Donya 25:23.

*9:13 9:13 Yani na ayatan yamakasorat sang Kitab Tawrat, Nabi Malaki 1:2-3.

†9:15 9:15 Yani yang yamakasorat sang Kitab Tawrat, Pagpanaw 33:19.

‡9:17 9:17 Yani na ayatan yamakasorat sang Kitab Tawrat, Pagpanaw 9:16. Tanawa oman sang Kitab Tawrat, Yossa 2:10-11 aw 9:9.

§9:20 9:20 Yani na ayatan yamakasorat sang Kitab Tawrat, Nabi Isayas 29:16 aw 45:9.

*9:25 9:25 Yani na ayatan yamakasorat sang Kitab Tawrat, Nabi Hosiyas 2:23.

†9:26 9:26 Yani na ayatan yamakasorat sang Kitab Tawrat, Nabi Hosiyas 1:10.

‡9:28 9:28 Yani na ayatan yamakasorat sang Kitab Tawrat, Nabi Isayas 10:22-23.

§9:29 9:29 Yani na ayatan yamakasorat sang Kitab Tawrat, Nabi Isayas 1:9. Yang makapantag sang Sodom aw Gomora mabatya sang Kitab Tawrat, Tagna Donya 19:24-29.

*9:33 9:33 Yang bato pasombingay na pyaglaongan para kang Isa Almasi. Sino-sino yang amalogso sabap sini na bato, silan yang mga otaw na di amangintoo kanan.

†9:33 9:33 Yani na ayatan yamakasorat sang Kitab Tawrat, Nabi Isayas 8:14 aw 28:16.