1 Sangallaw disinyan yagadowaa si Isa sang sambok na logar. Pagkatapos nan magdowaa, dyomood kanan yang sangka otaw na inindowan nan aw laong nan, “Kay Dato, indowi kami pagdowaa magonawa sang ininang ni Yahiya sang mga inindowan nan.”

2 Agaw yagalaong si Isa kanilan, “Kong magadowaa kamo, maynini yang pagalaong mayo,

5 Ansinyan yagalaong oman si Isa, “Sawpama aon sangka otaw kamayo na makadto sang baay ng amigo nan ng tungang gabi da aw magalaong yan, ‘Kay lomon, atagi ako ng toombok na pan. 6 Kay aon yamapit kanak na lomon sikun pa sang mawat, aw ni kaw, way pagkan nami sang baay.’ 7 Adon, sawpama motobag idtong amigo nan adto sa suud, ‘Ayaw da ako pagdistorbowa kay yamanirado da kami ng baay aw yokowang da kami ng mga anak ko. Di da ako makabangon sang pagatag kanmo.’ 8 Na, monono da yan adon? Awgaid pagalaong ko kamayo na maskin di gao yan magabangon sang pagatag kanan maskin sagaw magamigo silan, awgaid sabap ng wa akasipug yang amigo nan abay pa mangayo, magabangon da yan aw magaatag kanan ng kinaanglan nan.

9 “Agaw pagalaong ko kamayo, pagpangayo kamo kay atagan kamo, panganap kamo kay makakita kamo, aw pagtawag kamo kay apasuudun kamo. 10 Kay sino-sino yang amangayo atagan, aw sino-sino yang amanganap makakita sang pyapanganap nan, aw sino-sino yang magatawag apasuudun.

11 “Kamo na mga taganak, kong amangayo ng isda yang kamayo anak, atagan ba mayo ng bila? 12 Kong amangayo yan ng itlog, atagan ba mayo ng olaipan? 13 Na, kong kamo na maat na mga manosiya matigam mangatag ng madyaw na mga butang adto sang mga anak mayo, labi-labi da yang Tohan na Ama mayo adto sang sorga! Sang way dowa-dowa atag nan yang Nyawa ng Tohan sang maskin sino na amangayo kanan.”

14 Sangallaw disinyan pyapalogwa ni Isa yang saytan na pyagasabapan ng pagkaamang ng otaw na yosuudan nan. Na, paglogwa da ng saytan, yakapagtiyab da yang inyan na otaw. Aw yamangkatingaa yang mga otaw na yakakita sinyan. 15 Awgaid yang kadaigan yagalaong, “Si Bilsibol na pangoo ng mga saytan, yan yang yamatag kanan ng kabarakat pagpalogwa sang mga saytan.” 16 Yang kadaigan oman, karim nilan magtigi kang Isa. Agaw yamangayo silan kanan ng katingaan silbi tanda na syosogo yan ng Tohan.

17 Awgaid kyakatigaman ni Isa yang dumduman nilan, agaw yagalaong yan kanilan, “Kong managonay magtanam yang mga otaw sang sambok na pyagadatowan, sang di amadogay amasapad inyan na pyagadatowan. Aw kong magakabain-bain yang mga otaw sang sambok na pamilya, sang orian amabongkag inyan na pamilya. 18 Magonawa sinyan, kong mapagtanam si Iblis sang mga sakop nan na saytan aw magakabain-bain silan, sang di amadogay akawaan yan ng kapatot pagsogo kanilan aw amasapad da yang pyagadatowan nan. Yagalaong kamo na yagapalogwa ako sang mga saytan kay si Bilsibol* 11:18 Yang ngaan na Bilsibol sambok na ngaan ni Iblis. yang yamatag kanak ng kabarakat. 19 Na, kong bunna yang pyagalaong mayo, sino kadi yang yamatag ng kabarakat adto sang mga inindowan mayo pagpalogwa sang mga saytan? Na, silan da yang magalaong na yamasayup kamo. 20 Awgaid sang bunna-bunna yagapalogwa ako sang mga saytan sabap sang kabarakat ng Tohan. Aw yani yang tanda na dyomatung da adi kamayo yang pagdato ng Tohan.”

21 Ansinyan yagaatag oman si Isa kanilan ng opamaan,† 11:21 Yani na opamaan yagapakatigam na yang kabarakat ni Isa labaw pa kaysang kabarakat ni Iblis. laong nan, “Kong yang makusug na otaw na aon armas yang yagabantay sang kanan baay, way amaitabo sang mga bubutang nan. 22 Awgaid kong aon domatung na mas makusug pa kanan, amatalo da yan. Ansinyan akamangun da yang kyakasarigan nan na armas aw bain-bainun pa yang pyapangamang sikun sang kanan baay.”

23 Yagalaong oman si Isa, “Sino-sino yang di madapig kanak, mapaglaban kanak. Aw sino-sino yang di matabang kanak pagtipon, magapakaya-kaya.”

24 Yagalaong oman si Isa, “Aw mologwa yang saytan sikun sang otaw na yosuudan nan, magapanaw-panaw da yan sang mga banwa na way tobig kay amanganap ng akapagpatanaan nan. Aw way kikita nan, magalaong yan sang ginawa nan, ‘Mabarik da gaid ako sang dadaan na pyagauyaan ko.’ 25 Na, pagbarik nan makita nan na kyakalinisan da idtong pyagauyaan. 26 Ansinyan mapanaw da oman yan kay magadaa yan ng pito pa na saytan na labi pa na maat kay kanan aw mosuud silan sidtong otaw aw apaguyaan nilan. Na, sang orian mas maat pa yang kabutang sidtong otaw kaysang pirmiro.”

27 Paglaong sinyan ni Isa, aon sambok na bobay ansang kamangaotawan na yagalaong ng matanog, “Kadyaw ng ginawa sidtong bobay na yamanganak aw yagapasoso kanmo!”

28 Awgaid tyomobag si Isa, “Awgaid labaw pa yang kasowat sidtong yamaningug sang pyaglaongan ng Tohan aw apangagadan nan.”

29 Adon, sang wakto na yagakadaig da yang mga otaw, yagalaong si Isa, “Maat yang mga otaw adon na panahon. Karim gaid nilan makakita ng katingaan silbi tanda na syosogo ako ng Tohan, awgaid way apakita ko kanilan yatabiya sidtong katingaan na yamainang adto kang Nabi Yonos.‡ 11:29 Tanawa sang Kitab Tawrat, Nabi Yonos 1:17. 30 Kay magonawa kang Nabi Yonos na yamainang ng tanda sang mga taga Ninibe sangaon, amainang oman ako na Anak ng Manosiya ng tanda sang mga otaw adon na panahon. 31 Sang allaw ng paghokom magabangon yang soltana sang bangsa ng Siba upud sang mga otaw adon na panahon aw magalaong yan na dait kamo siksaun. Kay maskin mawat yang banwa nan kyomadto yan antak maningug sang pyaglaongan ni Soltan Solayman kay maum yang katigam nan.§ 11:31 Tanawa sang Kitab Tawrat, 1 Mga Dato 10:1-10. Na, pagalaongon ta kamo na ini adon yang labaw pa kang Soltan Solayman. 32 Sang allaw ng paghokom magabangon oman yang mga taga Ninibe upud sang mga otaw adon na panahon aw magalaong silan na dait kamo siksaun kay wa kamo magatawbat. Awgaid silan, yagatawbat silan sang mga dosa nilan pagdungug nilan sang pagosiyat ni Nabi Yonos.* 11:32 Tanawa sang Kitab Tawrat, Nabi Yonos 3:5. Na, pagalaongon ta kamo na ini adon yang labaw pa kang Nabi Yonos.”

33 Yagalaong oman si Isa, “Way otaw na magasuga ng ilawan antak tagoon nan atawa asangkoban nan ng gantangan, kondi ibutang nan sang tongtonganan kay antak makita yang siga sinyan pagsuud ng mga otaw sang baay. 34 Adon, yang kanmo mata maynang ilawan ng lawas mo. Kong madyaw yang mata mo, matinaw yang pananaw mo. Na, yang mana sinyan na maallag yang dumduman mo kay di kaw amasina kong iridskian yang kapagonawa mo. Awgaid kong dili ng madyaw yang mata mo,† 11:34 Yang opamaan sang mata na dili ng madyaw yang gogodanun na yamakasorat sang Kitab Injil, Matiyo 20:1-15. hanap yang pananaw mo. Na, yang mana sinyan na sabap sang pagkatokgawan mo iyan kaw sang kaduguuman. 35 Agaw, pagbantay kay basin yagadumdum kaw na maallag yang dumduman mo, awgaid maduguum sa kadi! 36 Awgaid kong kyakaallagan yang dumduman mo na waa day maduguum, maallag da yang kinabowi mo na maynang yaallagan kaw ng mabislaw na ilaw.”

37 Pagkatapos ni Isa magindo, aon sambok na Parisi na yagaimbitar kanan antak koman adto kanilan. Agaw yamagad si Isa adto sang kanan baay aw imingkod sang pagpangan. 38 Adon, yamatingaa idtong Parisi pagkita nan na yakan si Isa na wa yan magapangonaw sobay sang batasan nilan na mga Yahodi.

39 Awgaid yagalaong kanan si Isa, “Kamo na mga Parisi, pyagalinisan mayo yang logwa gaid ng kamayo tasa aw plato, awgaid yang pangatayan mayo yamapono ng kaatan aw pagkatokgawan. 40 Mga sangu kadi kamo! Wa ba mayo akatigami na yang Tohan na yagainang ng kikita mo adi sa logwa, yan oman yang yagainang ng wa mo ikitaa adto sa suud? 41 Agaw, yang madyaw na inangun mayo na atagan mayo yang mga miskinan aw ansinyan amasotti da yang maskin ono na iyan kamayo.

42 “Labi na maat yang adatungan mayo na mga Parisi! Yagajakat kamo ng ikasampoo na bain maskin dakman ng kamayo anag na magonawa ng paminta, bawang aw pandan. Awgaid wa mayo inanga yang matorid aw wa oman mayo apakadakowaa yang Tohan sang kamayo pangatayan. Na, yan gao yang dait mayo inangun, awgaid ayaw oman mayo pagpasagdi yang kadaigan pa na mga sogowan.

43 “Labi na maat yang adatungan mayo na mga Parisi! Kay kong adto kamo sang pagsasambayangan, kallini mayo magingkod sang ingkodanan ng dakowa na mga otaw. Aw adto sang palengke, kallini mayo na asalamun kamo ng mga otaw.

44 “Labi na maat yang adatungan mayo kay magonawa kamo sang kobor na way tosanan. Kong kaginaan inyan ng mga otaw, wa silan akatigam na yamabatar da silan.”

45 Adon, aon sambok na alim ng Hokoman na yagalaong kang Isa, “Kay Goro, kong maynan yang pyaglaongan mo, maskin oman kami ininsolto mo.”

46 Tyomobag si Isa, “Na, kamo oman na mga alim ng Hokoman, labi na maat yang adatungan mayo! Kay pyapapusan mayo yang mga otaw ng mabugat na magonawa ng mga sogowan na mairap tomanun, awgaid di kamo matabang kanilan ng maskin tagbis.

47 “Labi na maat yang adatungan mayo! Kay yagainang kamo ng tadumanan ansang kobor ng mga nabi na pyapatay ng mga kaompowan mayo. 48 Sabap sining ininang mayo yagapakita kamo na yakaoyon kamo sang ininang ng kaompowan mayo. Kay silan yang yagapatay sang mga nabi, aw kamo yang yagapakadyaw sang kobor nilan. 49 Idto sagaw, pyapakita yang katigam ng Tohan nang yagalaong yan, ‘Apadaan ko silan ng mga nabi kipat sang mga magpapayapatay ng pyaglaongan ko. Awgaid yang kadaigan kanilan apatayun nilan aw yang kadaigan oman apakasikotan nilan.’ 50 Agaw, kamo na mga otaw adon na panahon, isiksaun kamo ng Tohan sabap sang pagpatay sang kariko ng mga nabi sikun pa sang pagbaoy ng donya. 51 Isiksaun kamo sabap sang pagpatay kang Habil sampay da sang pagpatay kang Sakariyas na pyapatay adto sang tunga ng pagsosonogan ng korban aw yang Baay ng Tohan. Na, pagalaong ko kamayo na yang siksa sang kariko sinyan madatung kamayo na mga otaw adon na panahon.

52 “Labi na maat yang adatungan mayo na mga alim ng Hokoman! Kay pyagalupunan mayo yang daan pasingadto sang Tohan antak yang mga otaw di matigam sang kabunnaan. Kamo mismo di magsonod sang daan ng kabunnaan aw yagababag pa kamo sang mga otaw na marim gao magpanaos sinyan.”

53 Pagpanaw ni Isa sikun sinyan na baay, yamadaman kanan yang mga Parisi aw yang mga magiindoway ng Hokoman. Yabay pa silan magosip kanan 54 kay karim nilan dakupun si Isa sang kanan pyaglaongan antak aon akapagoman nilan kanan.