1 Sino-sino yang yamangintoo na si Isa yang Almasi, yang pyapasad na manlolowas, yamabaoy yan ng anak ng Tohan. Na, sino-sino yang aon looy sang taganak, aon oman looy sang mga anak nan. 2 Agaw, makasigoro kita na aon looy natun sang mga anak ng Tohan na silan yang mga kalomonan natun kong dakowa yang Tohan sang kanatun pangatayan aw tyotoman natun yang mga sogowan nan. 3 Aw yani yang tanda na dakowa yang Tohan sang kanatun pangatayan kong tomanun natun yang mga sogowan nan. Aw yang mga sogowan nan dili ng mairap tomanun. 4 Kay yang kariko ng mga otaw na yamabaoy ng mga anak ng Tohan, amakatalo silan ng kaatan adi sang donya. Yan sagaw, sabap sang kanatun pagsarig kang Isa Almasi yamatalo da natun yang kaatan adi sang donya. 5 Na, sino kadi yang amakatalo sang kaatan adi sang donya? Yang otaw gaid na yamangintoo na si Isa yang Anak ng Tohan.

6 Na, yani si Isa yang yakani sining donya. Yagapasogbo yan aw yoboos yang kanan dogo nang yamatay yan adto sang kaoy. Aw pyapangimunnaan kanatun dili gaid sabap sang kanan pagpasogbo awgaid sabap sang pagboos oman ng kanan dogo na yan agaw yang Anak ng Tohan. Yang yagasaksi sang kabunnaan sinyan yang Nyawa ng Tohan, aw aag bunna yang pyaglaongan nan. 7 Adon, aon toongka saksi na yamangimunna makapantag kang Isa Almasi, 8 yang Nyawa ng Tohan, yang tobig aw yang dogo. Aw yagakaoyon yaning too. 9 Yamangintoo kita sang pagpangimunna ng otaw, awgaid labi pa na kasarigan yang pagpangimunna ng Tohan. Aw yani yang pyapangimunnaan ng Tohan na si Isa yang kanan Anak. 10 Agaw, sino-sino yang yamangintoo sang Anak ng Tohan, kyakatigaman nan sa suud ng kanan pangatayan na bunna yang pyagalaong ng Tohan. Sino-sino yang di mangintoo sang pyagalaong ng Tohan, maynang ininang nan yang Tohan na bakakun kay wa yan apangintoo sang pyapangimunnaan ng Tohan makapantag sang kanan Anak. 11 Aw yani yang pagpangimunna ng Tohan na yatagan nan kita ng kinabowi na way kataposan aw yani na kinabowi iyan sang kanan Anak. 12 Agaw, sino-sino yang yatarima sang Anak ng Tohan, kyakaonan ng kinabowi na way kataposan. Awgaid sino-sino yang wa magatarima sang Anak ng Tohan, waa ansan kanan yang kinabowi na way kataposan.

13 Na, syosorat ko yani kamayo na yamangintoo sang Anak ng Tohan antak mayo katigaman na aon kinabowi mayo na way kataposan. 14 Na, di da kita amalluk domood sang Tohan kay yamakasigoro kita na odungugun nan yang maskin ono na apangayoon natun na sobay sang karim nan. 15 Aw sabap ng kyakatigaman natun na odungugun nan yang kanatun pagpangayo, yamakasigoro oman kita na atagan nan kita sang pyapangayo natun.

16 Adon, kong aon kitaun mayo na lomon na yagainang ng dosa, awgaid idtong dosa di makadaa kanan sang kamatayun na magonawa ng pagbuag sang Tohan, dait na pagdowaan mayo yan antak amponon yan ng Tohan aw atagan oman yan ng kinabowi. Na, yan yang dait mayo inangun para sang lomon na yang dosa nan dili akasabapan ng kamatayun. Kay aon oman dosa na makadaa sang kamatayun.* 5:16 Yang karim ipasabot sang dosa na makadaa sang kamatayun na kong magpadayon yang otaw sang pagpakadosa, amainang ng matigas yang kanan pangatayan. Kong maynan, di da yan makapagtawbat aw di oman makatarikod sang pagpakadosa nan. Awgaid wa ako magalaong na dait pagdowaan yang lomon na maynidto yang dosa. 17 Yang kariko ng ininang na maat dosa. Awgaid aon mga dosa na di makadaa sang pyagalaong ko na kamatayun.

18 Na, kyakatigaman natun na yang kariko ng mga otaw na yamabaoy ng anak ng Tohan, di da magpadayon sang pagpakadosa. Byabantayan silan ni Isa Almasi na Anak ng Tohan, agaw di da silan amadaa ng Saytan na pyagasikunan ng kariko ng maat. 19 Yamatigam kita na sakop da kita ng Tohan. Awgaid yang kadaigan na mga otaw na kadodonya gaid, yamasakop ng Saytan. 20 Na, yamatigam oman kita na yakani sang donya yang Anak ng Tohan aw yatagan nan kita ng katigam antak kita matigam daw sino yang bunna na Tohan. Aw adon yagakasambok da kita sang bunna na Tohan kay yagakasambok kita sang kanan Anak na si Isa Almasi. Yan agaw yang bunna na Tohan aw yan yang makaatag ng kinabowi na way kataposan.

21 Mga anak ko, dait na way lain na pyapalabi mayo yatabiya yang Tohan.