1 Lahwi yah haꞌ iswiꞌ Comam Jesús, yel Comam istiꞌ haꞌ niman Jordán. Ayco Comam yalan̈ yip Comam Espíritu Santo yet isto Comam bey huneꞌ txꞌotxꞌ desierto. 2 Haꞌ tuꞌ ehayo Comam cawina tzꞌayic, maẍticꞌa xin waꞌi. Lahwi tuꞌ xin yoc naj matzwalil yilweno Comam yun̈e yanico ismul yuto caw xan̈ohcha Comam. 3 Yalni naj matzwalil tet Comam:

—Tato Iscꞌahol Comam Dios hawehi, hal tet huneꞌ chꞌen chꞌen tiꞌ meltzojabico chꞌen wahil, ẍi naj. 4 Istakꞌwican̈ Comam tet naj matzwalil tuꞌ xin:

—Yul Yum Comam Dios tzꞌibn̈ebilcanoj: “Maẍn̈etaj yu tzet chicolo yuxin ay cokꞌinal, to yupaxo Istzotiꞌ Comam,” ẍiayoj, ẍi Comam tet naj.

5 Lahwi tuꞌ xin, yilaxto Comam yu naj matzwalil bay caw nahat yecanocan̈, lembiln̈e xin isyeni naj sunilej txꞌotxꞌ nimeta con̈ob ay yul sat yiban̈kꞌinal tiꞌ yeb iskꞌalomal txꞌotxꞌ tet Comam. 6 Lahwi tuꞌ xin yalni naj matzwalil tet Comam:

—Chachwakꞌacojan yahawo sunil huntekꞌan txꞌotxꞌ con̈ob tiꞌ yeb yin̈ iskꞌalomal. Haꞌ huntekꞌan tiꞌ akꞌbilico yul inkꞌaban, yuxin chisje wakꞌnihan tet mac bay choche incꞌulan. 7 Ta chachay jahno insatajan, cat hawinayo haba wetan, chiwakꞌaꞌan sunil huntekꞌan tiꞌ tawet, cat yoccano hawu, ẍi naj matzwalil tet Comam. 8 Istakꞌwican̈ Comam Jesús tet naj matzwalil tuꞌ:

—Chal Comam Dios yul Yum hacaꞌ tiꞌ: “Han̈echꞌan wetan chu heyinayo heba, yuto heyahawil yeb heDiosalpaxo wehan, yeb han̈echꞌan wetan cheyije,” ẍiayoj, ẍi Comam tet naj.

9 Lahwi tuꞌ xin, yilaxto Comam yul con̈ob Jerusalén yu naj matzwalil. Yinahto naj Comam yin̈ iswiꞌ yatut Comam Dios, yalni naj:

Ta caw yeli Iscꞌahol Comam Dios hawehi, kꞌojayto haba bey tiꞌ, 10 yuto chal Comam Dios yul Yum:

12 Istakꞌwican̈ Comam tet naj:

—Yaj halbilpaxo yul Yum Comam Dios:

13 Yet yilni naj matzwalil ta matxa hunuxa tzet bay chu issubcha Comam Jesús yu naj, isbejnicano naj Comam hanicꞌ tiempohal.

14 Lahwi tuꞌ xin ismeltzopaxto Comam Jesús bey Galilea, ayco Comam yalan̈ yip Comam Espíritu Santo. Sunil yul ismajul Galilea tuꞌ pujnacan̈ yabelaxilo Comam. 15 Iscuyni Comam anma yul hunun con̈ob yul iscapilla ebnaj Israel, caw sunil anma halni cꞌulla tzotiꞌ yin̈ Comam.

16 Lahwi tuꞌ xin, isto Comam Jesús bey con̈ob Nazaret bay chꞌibcan̈. Hayet istzꞌayical xewilal yocto Comam yul iscapilla ebnaj Israel hacaꞌticꞌa chu isbey Comam yin̈ hunun tzꞌayic xewilal. Yah lin̈no Comam bay chꞌoc lin̈no ebnaj ijbalon̈ chꞌilni Yum Comam Dios. 17 Yakꞌlax teꞌ hum tet Comam, teꞌ hum tzꞌibn̈ebilcano yu naj Isaías, huneꞌ ischejab Comam Dios yet payat. Isholnito Comam teꞌ xin, yilchalo yu Comam bay chal hacaꞌ tiꞌ:

20 Lahwi tuꞌ xin, ischulnipaxcanayo Comam Jesús teꞌ hum tuꞌ, yakꞌni Comam teꞌ tet naj ay ismunil yul iscapilla ebnaj Israel tuꞌ, yay tzꞌon̈no Comam. Sunil anma ayicto bey tuꞌ, occano tꞌan̈no yin̈ Comam. 21 Yichico Comam yalnilo tet anma hacaꞌ tiꞌ:

—Haꞌ yin̈ huneꞌ tzꞌayic tiꞌ, yin̈ hesat mayijcano isba tzet tzꞌibn̈ebilcano yin̈ teꞌ hum tiꞌ, ẍi Comam.

22 Wal xin sunil anma caw cꞌul istzotel yin̈ Comam Jesús. Caw cꞌayilo iscꞌul yuto cꞌulchꞌan istzoteli. Yichico anma yalni tet hunun:

—¡Yaj iscꞌahol naj José ye naj tiꞌ! ¿Tzet xin chu yalni naj hacaꞌ ti? ẍi ebnaj yin̈ Comam. 23 Yuxin yal Comam tet anma:

—Hex tiꞌ, ¿chimheyalaꞌ wetan yin̈ huneꞌ tzotiꞌ chal anma?: “Hach an̈tem anma, an̈tecano haba,” ẍi. Chimheyalpaxoj: “Jabehan̈ tzettaj ye tuꞌ hawatxꞌe bey Capernaum, yuxin watxꞌe huneꞌ tuꞌ yul hacon̈ob tiꞌ,” quexchimi wetan, ẍi Comam. 24 Yalnipaxo Comam:

—Yin̈ caw isyelal chiwalan teyet, machi huno ischejab Comam Dios xahan chiꞌillax yu yet con̈ob. 25 Naweti yin̈ istiempohal naj Elías, ischejab Comam Dios payat. Caw yicta yox habil machi yakꞌ n̈ab, yuxin hul huneꞌ niman wahil yiban̈ anma sunil. Yet huneꞌ tiempohal tuꞌ, tzetcꞌa ebix hunix jet Israelal, 26 yaj maẍtaj yin̈ ebix tuꞌ alaxti naj Elías colwal yu Comam wal xin han̈echꞌan yin̈ huneꞌ ix mach Israeloj, huneꞌ ix ay bey con̈ob Sarepta yul ismajul Sidón. 27 Nawepaxti yin̈ huneꞌxa ischejab Comam Dios chiyij Eliseo. Yin̈ istiempohal naj, tzetcꞌa jet con̈ob Israel tzabchati yu huneꞌ yabil chiyij lepra;* Huneꞌ yabil chiyij lepra tiꞌ, chikꞌato isnimanil anma yu yaj machi hunu ebnaj tuꞌ yakꞌ cawxo naj Eliseo. Han̈echꞌan huneꞌ naj mach Israeloj chiyij Naamán ay yul ismajul Siria, han̈echꞌan naj tuꞌ yakꞌ cawxo naj, ẍi Comam tet ebnaj.

28 Hayet yaben ebnaj ayicto yul capilla tuꞌ yin̈ tzet yal Comam, caw tit ishowal ebnaj. 29 Yah lin̈no ebnaj, yoc tzabno ebnaj yin̈ Comam, yinito ebnaj Comam yin̈ istxam con̈ob yin̈ iswiꞌ huneꞌ witz bay ayco con̈ob tuꞌ yu istennicanto ebnaj Comam sat huneꞌ pahaw yalni. 30 Yaj wal Comam Jesús palan̈ yecꞌto Comam xolbal ebnaj, isto Comam.

31 Lahwi tuꞌ xin, isto Comam Jesús yul con̈ob Capernaum yul ismajul Galilea. Iscuyni Comam anma yin̈ hunun tzꞌayic xewilal yul iscapilla ebnaj Israel. 32 Caw xin chicꞌay iscꞌul anma yaben iscuywa Comam, yuto caw haban isyenilo isba ta caw akꞌbil yip yu Comam Dios.

33 Yul capilla tuꞌ ayicto huneꞌ naj ayco ischejab naj matzwalil yin̈, yah yaw naj yin̈ caw ip, yalni naj tet Comam:

34 —¿Tzet hawoc jin̈an̈ ach Jesús ah Nazaret? ¿Tom chaẍhul con̈hatan̈tzelojan̈ hawalni? Wohtajan mac anmahilach hach tiꞌ, machi nino istxꞌojal ayco tawin̈, ẍi naj tet Comam.

35 Iscachwa Comam yin̈ ischejab naj matzwalil tuꞌ:

—¡Cach hatiꞌ, elan̈ yin̈ naj! ẍi Comam.

Lahwi tuꞌ xin, iskꞌojlaxayo naj sat txꞌotxꞌ yu ischejab naj matzwalil sata sunil anma. Yel ischejab naj matzwalil yin̈ naj, yaj machi islahwilal naj oqui yet iskꞌojlaxayo naj. 36 Caw cꞌayilo iscꞌul sunil anma yilni, yalob tan̈en anma tet hunun:

—¿Tzet tzotiꞌal mayal naj tiꞌ? ¡Caw aycano yip istzotiꞌ naj! ¡Caw chiyijelax tzet chal naj, yet chalni naj ta chꞌel ischejab naj matzwalil yin̈ anma, yin̈ an̈e chꞌel ebnaj! ẍi anma yin̈ Comam.

37 Sunil yul ismajul huneꞌ con̈ob tuꞌ yeb ej ishoyanil, pujnacꞌo isbi ta ay yip Comam.

38 Hayet yelti Comam Jesús yul capilla tuꞌ, isto Comam yatut naj Simón. Caw ay kꞌaꞌ yin̈ ismiꞌ yixal naj, yuxin kꞌanlax tet Comam ta chakꞌ cawxo Comam ixnam. 39 Ishitzico Comam iscꞌatan̈ ixnam, yinilo Comam huneꞌ kꞌaꞌ tuꞌ yin̈ ixnam, iscawxican̈ ixnam. Hunepixto xin yahwano ixnam, iswatxꞌen ixnam tzet chislo Comam yeb iscuywom.

40 Hayet lan̈an isto tzꞌayic xin, sunil anma beycꞌo yakꞌaꞌcano isyawub tet Comam, tzitamlah yabilal ayco yin̈. Hayet chanayo Comam iskꞌab yiban̈ anma yaꞌay tuꞌ, cat iscawxicanocan̈. 41 Tzetcꞌa anma ayco ischejab naj matzwalil yin̈ cawxican̈, toxan̈e chꞌel yaw ebnaj yet chꞌelcano ebnaj yin̈ anma, chalni ebnaj hacaꞌ tiꞌ:

—Hach tiꞌ, Iscꞌahol Comam Dios hawehi, ẍi ebnaj.

Yaj cachlax ebnaj yu Comam. Machi chahlax tzotelo ebnaj yuto yohta ebnaj ta haꞌ Comam Jesús tuꞌ, haꞌ ton Comam Cristo, echmabil yul yu ebnaj Israel.

42 Hayet issajbilo hunxa tzꞌayic xin, isto Comam Jesús istxam con̈ob bay machi anma chꞌeqꞌui. Istopaxo anma saywal yin̈ Comam. Hayet yapni anma bay ay Comam tuꞌ xin, yelico yaw anma yin̈ Comam ta mach chito Comam hunuxa con̈ob. 43 Yalni Comam tet anma:

—Yilal wecꞌan walnocꞌojan Tzotiꞌ cꞌul yin̈ tzet chu yoc anma yul iskꞌab Comam Dios yul huntekꞌanxa con̈ob, yu huneꞌ tuꞌ yuxin Akꞌbilintijan, ẍi Comam.

44 Hac tuꞌ yu yecꞌ Comam iscuyno anma yulajla con̈ob yul hunun iscapilla ebnaj Israel.