1 Kɛ̀ ti Yiɛ̀ nKuyie nní nsɔkɛ́ ku nɑ́ɑǹtì kɛ́bɛ́innɛ̀ Mɔyiisi kɛ dɔ̀: 2 Nɑ́kɛ́ Isidɑyɛɛribɛ kɛ tú:

Kòo nitipòkù pɛitɛ́ dɛnitidɑbirɛ ò sĩ̀ntɛmu kɛ́ntɔ kɛ́tuɔkɛnɛ̀ yɛwe yɛ̀yiekɛ̀, kɛ́ndònnɛ̀ ò ɔ̃ nyúɔ́ nkɛ dòmmɛ̀. 3 Diyiè niínnì yiè bɛ̀ɛ cɑ̃ntɛ́ dɛbirɛ. 4 Dɛ kó difɔ̃nkúò kòo mbɑɑ̀ yɛwe sipísìtɑ̃ɑ̃ti nɛ̀ yɛ̀tɑ̃ɑ̃ti kòo nɛ́ nɑ kɛ́wenkɛ. Dɛ kó yɛwe miɛkɛ ò bɑ́ɑ́ kɑ́ɑ́kɛ́ dɛ̀ɛ̀ cɑ̃̀ɑ̃́ nkɛ tú n kpɛrɛ, ò mɛ mbɑ́ɑ́ kɔtɛ n tɑummɛ̀ tou, kɛ́mbɑɑnɛ̀ dɛ kó yɛwe bo deèmɛ̀.

5 Kòò mɛ mpɛitɛ́ dɛnitipobirɛ ndɛ ò sĩ̀ntɛmu kɛ́ntɔ kɛ́tuɔkɛnɛ̀ semɛ́nnì bɛ̀dɛ́bɛ̀ kɛ́ndònnɛ̀ ò ɔ̃ nyúɔ́ nkɛ dòmmɛ̀. Dɛ kó difɔ̃nkúò kɛ́mbɑɑ yɛwe sipísìkuɔ̀ nɛ̀ yɛkuɔ̀ kòo nɛ́ nɑ kɛ́wenkɛ.

6 Kɛ̀ dɛ kó yɛwe pɛ̃ɛ̃tɛ́, kɛ̀ dɛnitidɑbirɛ ndɛ yoo dɛnitipobirɛ, wèe tɔní dipedɑbii dìì mɔ̀kɛ dibenni dìmɑ́ɑ̀, ò yó n kùɔ dì kɛ́tuɔ, kɛ́duɔ́ nyikuɔ́ nìùtì mɛtɑummɛ̀ tou bòrìnùù, kɛ́wɑɑ́nnɛ̀ dikpɛtinɔ́nkperi yoo tɛnɔ́nkpetɛ tɛ̀ɛ̀ yó ntú mɛwénkùmɛ̀ kpɛtɛ. 7 Kɛ̀ ikuɔ́ nìùtìi dɛ̀ nni mbɛnkɛ, kɛ́dɔɔ̀ mɛwénkùmɛ̀ kó ikuɔ́ kòo wenkɛ.

Ikuɔ́ ìì tukúnɛ̀ ìnyi onitipòkù wèè pɛitɛ́ dɛnitidɑbirɛ yoo dɛnitipobirɛ.

8 Kòò í nɑ kɛ bo pɛ́tɛ́ dipedɑbii wèe wɑɑ́ nyɛkpɛtinɔ́nkperɛ yɛ̀dɛ́ɛ̀ yoo sinɔ́nkpeé, kɛ̀ tɛ̀mɑ́ɑ̀ ntú bɛ̀ yó n féútɛ́ tɛ̀ kɛ́tuɔ, nkɛ̀ tɛtɛtɛ̀ ntú mɛwénkùmɛ̀ kpɛtɛ. Kɛ̀ ikuɔ́ nìùtìi ò dɔ̀ɔ̀ mɛwénkùmɛ̀ kó ikuɔ́ kòo nɑɑ́ nwèè nɔ̀ùtɛ̀ feitɛ́.