7
Mahendo mai ga atu a Iziraeli
1 Mimi nahenda ya bure tse! Sindaphaha rorosi.
Ni dza vira bada ya atu kukusanya matunda ga vuri,
bada ya atu kutsembwesa.
Taphana hata tsana ya zabibu
wala tini ya kuivwa ya kurya mimi nriye na ndzala sana.
2 Atu aaminifu kpwa Mlungu akauswa kpwenye tsi.
Takuna hata mmwenga achiyesala wa hinyo ahendao garigo sawa.
Atu osi anagodza kpwa hamu aphahe nafwasi ya kuolaga,
chila mmwenga anaindza myawe na nyavu.
3 Aho anaujuzi wa kuhenda mai.
Akulu analonda zawadi,
muamuli anavoya hongo
atu ario na uwezo nkuahenda aamuli aahende vira alondavyo
nao osi nkupanga njama phamwenga.
4 Hiye ariye mnono kahi yao ni dza muhi wa miya,
na ye aambwaye ana chadi cha kuhenda garigo sawa
ni mui kuriko chitsaka cha miya.
Wakati wa kutiywa adabu ukafika,
wakati uriohadzwa ni arindzio, yani manabii,
vivi nyo atu a phephi na kutatizika.
5 Usimuamini jiranio
wala usimkuluphire msenao wa phephi!
Dzimanyirire sana na maneno ugombago
hata kpwa hiye alalaye phako lavuni.
6 7:6 Mathayo 10:35–36; Luka 12:53Mana mwana mlume anabera ise,
mwanache wa chichetu anaunuka kumpinga nine,
na mkpwaza-mwana anaheha na nine-vyala,
maadui ga mutu ni atu a nyumbaye mwenye.
7 Ela mino ninamlola Mwenyezi Mlungu,
ndamgodza Mlungu muokoli wangu,
Mlungu wangu andasikira chiriro changu.
Mwenyezi Mlungu andativya atue
8 Usihererwe uwe adui wangu!
Dzagbwe nkagbwa ndaunuka tsona,
dzagbwe nsegere jizani,
Mwenyezi Mlungu andakala mwanga wangu.
9 Ni ndavumirira kutiywa adabu ni Mwenyezi Mlungu
kpwa sababu nkahenda dambi,
hadi ndiphonikanira na kunihendera haki.
Andanireha kuriko na mwanga nami ndaona wokofuwe.
10 Adui wangu ariyeniamba “Akuphi ye Mwenyezi Mlungu, Mlunguo?”
Andaona higa na agbwirwe ni haya.
Ndamuona na matso gangu ndivyogbwa,
na kuvyogbwa-vyogbwa photsi dza tope njirani.
Iziraeli kuuyizwa hali ya mwandzo
11 Wakati wa kudzenga kuta zenu u phephi!
Wakati hinyo miphaka yenu indaenjerezwa.
12 Wakati hinyo atu andakpwedza kpwako uwe Jerusalemu,
kpwa uphande wa mlairo wa dzuwa, andala Ashuru na muho Yufurati,
na uphande wa mwakani, andala Misiri,
na kula bahari hadi bahari, na kula mwango hadi mwango.
13 Ela tsi indakala Gandzo,
dza kutiywa adabu kpwa sababu ya mai arigohendera atu ariosagala himo.
14 Longoza atuo dza mrisa amanyiriravyo mifugo kuhumira fwimboye,
hinyo ario dza mifugo ya urisio.
Aho asegere tsakani machiyao,
kpwenye tsi ambayo taidzangbwerimwa,
ichiyozungulukpwa ni marisa manono.
Ariche akasagale tsi ya rutuba ya Bashani na Giliadi,
dza arivyohenda hipho mwandzo.
15 Mwenyezi Mlungu anaamba, “Ndakuonyesani vilinje
dza irivyokala wakati hura mriphokala munatuluka Misiri.”
16 Mataifa ganjina gandaona na gagbwirwe ni waibu
kpwa kukala gadziona gana mkpwotse
mbavi mkpwotse wao si chitu kpwa Mlungu.
Gandamaka na gabandike mafumba gao miromoni
na masikiro gao gasisikire.
17 Gandalamba vumbi dza nyoka,
dza mdudu wa kuambala na photsi.
Gandatuluka kula ngomeni mwao kuno ganakakama,
gandagalukira Mwenyezi Mlungu, Mlungu wehu kpwa kumuogopha,
gandakuogopha uwe Mwenyezi Mlungu.
18 Takuna Mlungu ariye dza uwe anayeswamehe dambi
na kusalola makosa ga atu a urisiwe ariosala kutiywa adabu.
Uwe kutsukirwa na ikakala ni bahi hata kare na kare,
ela unaonato kuhuonyesa mendzwa isiyosika.
19 Undahuonera tsona mbazi
dambi zehu undaziturya avi ukazivyoga vyoga photsi
na uyi wehu undautsupha kpwenye vivwa vya bahari.
20 Undakala muaminifu kpwa chivyazi cha Jakobo
na kumuonyesa mendzwa isiyosika chivyazi cha Burahimu,
dza urivyoalaga akare ehu hipho kare, kpwa kuhenda apa.