19
Ayubu anaamba Mkomboliwe a moyo
1 Ndipho Ayubu achijibu achiamba,
2 “Dze, mundanigayisa,
na kunivundza na maneno hadi rini?
3 Mkanibera tsona na tsona,
tamuona waibu kunihendera mai?
4 Hata ikale náhenda kosa,
ro kosa nasala naro mwenye.
5 Mwimwi munadziona mu bora kuriko mimi,
munahumira mateso niphahago chinyume changu.
6 Manyani kukala Mlungu akanihendera makosa,
na kunigbwira na nyavuye.
7 Dzagbwe nakota kululu, ‘Nkahenderwa fujo!’ ela taphana anijibuye,
dzagbwe nakota kululu niterywe, ela taphana haki bii.
8 Iye akayiikira sandzu njira yangu ili nisiweze kutsupa,
na kuhenda njira zangu zikale jiza.
9 Akahenda nguma yangu yiuke,
na kunivula chiremba changu.
10 Akanivundza pande zosi, nami nkasira,
naye akazula kuluphiro rangu dza muhi.
11 Tsukizize zikaaka dza moho chinyume changu,
na kuniolanga dza mmwenga wa maaduige.
12 Majeshige garedza phamwenga,
ganatengeza njira ya kpwedza kpwangu,
na kuchita kambi kuzunguluka hema rangu.
13 Akaika enehu kure nami,
na animanyao akanitenga tsetsetse.
14 Atu angu akaniricha,
na asena angu akaniyala.
15 Ajeni angu akaniyala,
na atumishi angu achetu ananiona avi ni mjeni,
ananiika sawa na atu akuhenda kpwedza.
16 Namuiha muhendadzi-kazi wangu ela kanijibu,
dzagbwe namʼbembeleza.
17 Pumuzi zangu zinamnukira lovu mkpwazangu,
nami ni tsukizo kpwa enehu enye.
18 Ninaberwa hata ni anache adide,
nchiunuka ananisengenya.
19 Asena angu osi a kurya na kuusa akanitsukirirwa,
nriokala naamendza, akanitsamalala.
20 Mifupha yangu ikagbwirana na ngozi yangu,
nkatiya ela che bado phadide nifwe.
21 Nionerani mbazi, nionerani mbazi, mwi asena angu,
mana Mlungu akaniguta na mkpwonowe.
22 Mbona munanigayisa dza vyo Mlungu anigayisavyo?
Kpwa utu wani tamtosheka na mwiri wangu?
23 Kalapho maneno gangu gangeandikpwa,
yani gangeandikpwa chitabuni!
24 Kalapho gangeandikpwa na kalamu ya chuma na risasi
au gangetsongbwa mwambani hata kare na kare!
25 Mana namanya mkomboli wangu a moyo,
na kukala pho mwisho andaima dzulu ya tsi.
26 Na bada ya ngozi yangu kubanangbwa vivi,
hata nchikala kpwenye mwiri uhu nindamuona Mlungu na matso gangu.
27 Mimi nindamuona
na matso gangu gandamlola, naye si wanjina.
Moyo wangu unamgodzera kpwa hamu!
28 Ela mwi munaamba, ‘Hundamgbwayisadze!
Mana chandzo cha gaga ni ye mwenye.’
29 Phahi ogophani upanga,
mana tsukizi zinareha kutiywa adabu kpwa upanga,
ili umanye kukala kuna uamuli.”