22
Wach mokor kuom Jerusalem
1 Ma e wach mokor kuom Holo mar Fweny:
Koro angʼo mathagou momiyo un duto uidho ewi udi,
2 Yaye in dala ma mahu opongʼo,
yaye dala maduongʼ ma koko gi mor kod ilo opongʼo?
Jogi mane otho ok noneg gi ligangla
to bende ne ok githo e lweny.
3 Jotendu duto oseringo kaachiel,
osemakgi ma ok oti gi gige lweny moro amora.
Un duto mane uringo ka wasigu ne pod ni mabor,
osemaku kanyakla moteru e twech.
4 Kuom mano ne awacho niya,
“Weyauru aweya mondo aywag malit.
Weuru hoya nikech jowa osetieki.”
5 Ruoth Nyasaye ma en Jehova Nyasaye Maratego
oseketo odiechieng mahu gi koko kod masira e Holo mar Fweny,
en odiechiengʼ mar muko ohinga
kendo nduru nowuog malit kochomo ewi gode.
6 Jo-Elam kawo aserni mag-gi,
kaachiel gi joriemb geche mag lweny gi farese;
to jo-Kir to nokawo kuodigi.
7 Holniu mabeyo opongʼ gi geche mag lweny,
kendo joidh farese osechielo rangeye mag dala maduongʼ.
8 Ruoth Nyasaye oselonyo mabor tekre Juda,
kendo e kindeno ne umanyo,
gige lweny manie Od Ruoth manie Bungu.
9 Ne uneno ka kuonde mangʼeny mar ohinga
mar Dala Maduongʼ mar Daudi omukore,
omiyo ne uchiko pi
odhi e soko mamwalo.
10 Ne gikwano ute mag Jerusalem
kendo ne gimukogi mondo olosgo ohinga motegno.
11 Ne gikunyo yawo e kind ohinga ariyogo
ne pi mawuok e soko machon,
to ne ok upenjo Jal mane olose,
kata miyo Jalno mane ochane luor.
12 To Ruoth Nyasaye ma en Jehova Nyasaye Maratego,
ne oluongou odiechiengno mondo uywagi kendo udengi,
ka upudho yie wiu kendo urwako pien gugru.
13 To kata kamano nitie mor kod ilo,
kaachiel gi yangʼo dhok kod rombe,
chamo ringʼo kod madho divai!
Giwacho niya, “We wachiem kendo wamethi
nikech kiny wanatho!”
14 Jehova Nyasaye Maratego osefwenyona ma kawinjo: “Richoni ok nopwodhi nyaka chop thou,” Ruoth Nyasaye ma en Jehova Nyasaye Maratego owacho.
15 Ma e gima Ruoth Nyasaye ma en Jehova Nyasaye Maratego wacho,
Dhi ir jakeno mar od ruoth miluongo
ni Shebna mondo iwachne niya,
16 En angʼo ma itimo ka,
kendo en ngʼa manomiyi thuolo mar kunyo buri ka,
momiyo iloso bur kama otingʼore,
kendo iloso kari maber mar yweyo e kind lwanda?
17 Bed motangʼ,
Jehova Nyasaye chiegni ngʼwasi mi owiti oko,
yaye in ngʼat maratego.
18 Obiro ngʼwasi motweyi matek
kendo owiti e piny malach mana ka mipira mowiti.
Kuno ema nithoe,
kendo kuno ema gecheni mag lweny mabeyo
nosikie in mikelo wichkuot ne od ruodhi.
19 Abiro goli e kari mar tich
kendo goli e loch mari.
20 E kindeno analuong jatichna Eliakim ma wuod Hilkia. 21 Anarwake gi law mar duongʼ kendo anatwe okanda e nungone mi anamiye loch mari. Enobed wuon joma odak Jerusalem kod Juda. 22 Anamiye rayaw mar od Daudi, ma gima oyawo ngʼato ok lor, to bende gima oloro onge ngʼama yawo. 23 Abiro gure motegno kendo mongirore ka sigingi kendo enobed e kom duongʼ ne od wuon mare. 24 Duongʼ duto ma joodgi noyudi ma gin, nyithinde gi nyikwaye, gige duto ma ok ogen, machalo kaka bakunde nyaka agulni duto nowuog kuome.
25 Jehova Nyasaye Maratego wacho niya, “E kindeno sigingi mane ogur motegno kendo mongirore biro pudhore, nongʼade mi olwar kendo gik moko duto mongʼaw kuome bende nolwar.” Jehova Nyasaye osewacho.