3
Iisa pakgig Muusa
1 Gem kol siŋtay, ɗo saan taar-an, diyon pikirriko ɗo Iisa Masi. Ka seener, ku kuuniy gee ku Buŋdi ho ŋa koliŋko a ku ɓaayiy goye ka samaaner. Diŋ gay, pakiroŋ ɗo Iisa Masi, ŋaar gay tabiriikar ka Buŋdi ho ŋaar ko *mee satkiner ka tatko ɗo imaan taat gi gaariyo. 2 Awalle, uudin taat Muusa ginit riy taat gaara kadar Buŋ nec amniyin̰ji ɗo geriy okin̰ji,* ‛ɗo geriy okin̰ji’ : Ger ka Buŋdi okin̰ji, anne-aŋ kaawa ɗo bi ka gee ku Buŋdi okin̰co ɗo wiktin ta nabi Muusa. Iisa oki gaar kadar Buŋ kaak diyig ɗo riyor-ak nec amniyin̰ji. 3 Ka seener, ar kaak ŋu jaaliig siŋ ku gem kaak pina gero pak ger meen̰ji, Iisa oki, ŋuu jaalin̰ siŋji kuwa pak Muusa. 4 Geray okin̰co gin gay pinin̰co. Kar ŋaar kaak pinig gamin okin̰co gay, ŋa meen̰ji Buŋ. 5 Muusa gay, ka seener, ŋaar nec a Buŋ yaa amniyin̰ji ar gay riyoy ɗo *ger ka Buŋdi okin̰ji. Riyoy-at ta gaare ɗo geemir kaaw taat Buŋ asiy kaawe neginda. 6 Kar Iisa Masi gay, ŋaar nec a Buŋ yaa amniyin̰ji ar Roŋ kaak goy ɗo kaay ka ger ka Buŋdi. Kar geriy-ak gay, ŋaar ginte, ya gi zeeɗa obe tirit ɗo imaante ho ɗo maan kaak gi eriyo. Maan kaak gi eriy-ak ɗeŋraate gi kaawiy bal kolaw ɗo uŋco ka geemir.
Jamiyne taat Buŋ bertu ɗo geen̰ji
7 Ɗo saan taar-an, uudin taat Ruwwin ta Buŋdi kaawiy aman :
« Ƴiriyta, ya ku cokiyaat gaaƴ ta Buŋdi,
8 dakoŋ tirin̰coɗo ɗeŋginko ar kaak aginiyko gintu
ɗo wiktin taat ŋu poociiga ho ŋu geciig ɗo goosiner.
9 Ka seener, Buŋ kaaw a ɗo menaw-ak,
aginiyko talig gamin okin̰co kuuk nu gintu
ɗo elgin kuuk orok pooɗ.
Kar iŋ taar-at oki, ŋu poocintu ho ŋu gecintu.
10 Ampaa ko, adir nigtu iŋ gee-aku ho nu kaawtu aman :
‟ Gee-aŋ, pikirrico jaga jagen di.
Ŋu bal ibinin̰ maan kaak nu eriy minninco. ”
11 Ansii ko, iŋ adir ka nige-ak, nu togiltu aman :
‟ Ŋu un̰jaaɗo tak-tak ɗo wer ka jamiyner
kaak nu siyiico ! ” »† Wer ka gase kaawor ɗo Soom 95.7-11.
12 Gem kol siŋtay, goyoŋ goɗom, paa waan minninko adiy yaa gine pondiko nam ŋa aaminiyɗo ho ŋaaji newse kop ɗo Buŋ kaak goy mento. 13 Kar gay, kun kawta, iskiguwoŋ ziŋkiko. Ansii kat, yoo waan minninko, rasiyɗo ziŋkay a zunuubinna yaa caaciyin̰ji ho kaay yaa gine bombo. Ginguwoŋ pa ɗo wiktin taat kaaw taat a « Ƴiriyta » goy tiya misa. 14 Ka seener, ya gi oba tirit yoo gaasuwa ɗo imaan taat gi gastu, ŋaar-ak, gi geen̰ji ku Iisa Masi ko.
15 Ansii ko, ŋu siirtu ɗo Kitamner aman :
« Ƴiriyta, ya ku cokiyaat gaaƴ ta Buŋdi,
dakoŋ tirin̰coɗo ɗeŋginko
ar kaak aginiyko pooctu kaawoy. »‡ Wer ka gase kaawor ɗo Soom 95.7-8.
16 Ŋaar-ak, ŋuur kuuk cokiyit gaaƴ-ata ho poocit kaawoy, ŋu kun̰ waa ? Ŋu gee okin̰co kuuk Muusa imiltu min darre ta Meser. 17 Ɗo elgin kuuk orok pooɗ, Buŋ, adiy nigtu-ak iŋ kun̰ waa ? Adiy nig iŋ ŋuur okin̰co kuuk gin zunuubinna ho mat ɗo goosiner. 18 Ɗo wiktin taat Buŋ togiltu aman : « Ŋu un̰jaaɗo tak-tak ɗo wer ka jamiyner-ak », ŋa togil ɗo kun̰ waa ? Ŋa togil ɗo ŋuur okin̰co kuuk poocit kaawoy. 19 Ansii ko, gi ibintu kadar gee-ak bal un̰je ɗo wer ka jamiyner-aka, asaan ŋu pooc aamniye ɗo Buŋdi.