1-2 ꞊Dhɛ 'ö ꞊ya kë "dhʋ̈ 'ö yi do 'bha 'ka 'zü, kö‑ ‑bha ꞊klang ‑nu bha‑ mɛ "saɔplɛ 'ö‑ mɛ do‑ ‑kë Simɔ Piɛdhö 'ka, 'ö‑ mɛ do‑ ‑kë Toma 'ka 'ö 'wo‑ 'tɔ kpɔ Didimö bha waa‑ Natanaɛɛ 'ö go Kana, Gadhidhe ‑sɛ 'gü bha waa‑ Zebede gbö ‑nu, waa‑ ‑bha ꞊klang ‑nu bha‑ mɛ "wɛɛ ꞊plɛ ‑wo piʋ̈" ‑da sië "yitagbɛa 'wo‑ Tibedhiadö ‑yi ‑kë bha‑ ꞊bhaa, 'yö Yesu ‑yö ö ‑dɩ ‑zɔn 'zü ‑dee wo‑ ‑nu ‑dhɛ. ‑Kɔ 'ö ö ‑dɩ ‑zɔn 'ka ‑kaa ‑ga 'ö ya: 3 ‑A mɛ 'dhɛ 'wo‑ ‑dhɛ Simɔ Piɛdhö bha ꞊në‑ pö 'mɛ 'wo bha‑ ‑nu ‑dhɛ: «Maa 'dho "yi "piʋ̈.»

'Yö 'wo‑ pö 'pö‑ ‑dhɛ: «꞊Ya kë "dhʋ̈ kö yi ‑dho 'dho 'pö i ꞊keng‑.»

꞊Dhɛ 'ö‑ ‑nu ‑wʋ ꞊ya kë do, 'yö 'wo zun "kpɛnng 'wo dho 'wo ‑da "kplagɔnë do 'gü 'yö 'wo dho "yi ‑bha kë ‑dhɛ 'gü, "kɛɛ 'wii pë 'bha 'sü gbeng 'kö bha‑ 'gü. 4 ꞊Dhɛ 'ö ‑dhɛ ꞊ya ꞊kpaɔ, 'yö 'wo dho 'wo ‑kpan Yesu ‑bha "yi "kpʋng "dhiʋ̈ mü, "kɛɛ 'wii‑ dɔ. 5 'Yö‑ pö‑ ‑nu ‑dhɛ 'ö‑ pö: «N bhang ‑nu, 'yuʋ̈‑ ꞊në 'yaa ka ‑gɔ 'zü kö 'ka‑ ‑bhö ‑ee?» 'Yö wo‑ pö‑ ‑dhɛ: «꞊Iin.»

6 ꞊Dhɛ 'wo‑ pö "dhʋ̈ 'yö‑ pö‑ ‑nu ‑dhɛ: «‑Kaa "nuu bha‑ ‑zuö 'sa "kplagɔnë bha‑ ‑kɔ ‑së 'gü "pɛan bha‑ 'ka, ka ‑dho 'yuʋ̈‑ zë.

'Yö 'wo "nuu bha‑ ‑zuö ꞊dhɛ ‑kɔ 'ö‑ pö 'ka‑ ‑nu ‑dhɛ bha‑ 'dhö, 'yö‑ ‑nu faan 'yii ꞊mɔɔ‑ "gan ‑sü ‑bha 'yuʋ̈‑ 'ö gun‑ 'gü bha‑ ‑wɔn 'gü. 7 ꞊Dhɛ 'ö ꞊ya kë "dhʋ̈, 'yö‑ ‑bha ꞊klang ‑nu bha‑ mɛ 'dhɛ 'ö‑ ‑dhɔ gun‑ kë sië bha 'ö‑ pö Piɛdhö ‑dhɛ: «Piɛdhö, kwa Dëmɛ ꞊në bha!»

꞊Dhɛ 'ö Simɔ ꞊yaa‑ ma ꞊dhɛ wo Dëmɛ ꞊në bha, 'yö sɔ ‑da ö ‑bha, 'yö ‑pö "yi bha‑ ꞊bhaa 'yö dho‑ ‑zian 'ka. 8 'Yö mɛ 'dhɛ 'wo to "yitagɔ 'gü bha 'wo ‑ya "nuu bha‑ "gan ‑sü ‑bha 'wo nu‑ 'ka "yi "kpʋng "dhiʋ̈, ‑a ‑gɛn ‑mü ꞊dhɛ 'ö gun "dhʋ̈ kö 'waa "yi "kpʋng 'ka ꞊gblɛɛn 'zü, kö ‑wo ꞊dhɛ ‑gɛn ‑yan këng do "sinma "dhiʋ̈ ‑dhɛ 'dhö, "kɛɛ kö "nuu bha ‑yö pa ‑sü 'ka 'yuʋ̈‑ 'ka ‑tɛtɛdhö. 9 ꞊Dhɛ 'ö ꞊wa 'go "yitagɔ 'gü ꞊wa zun "sia‑, 'wo dho ‑dhɛ ‑ga kö 'yuʋ̈‑ ꞊pia ‑sü ‑yö pɛng ꞊dhuu ‑ta kö 'bluu‑ ‑ya "sɔɔ mü. 10 'Yö Yesu ‑ya pö‑ ‑nu ‑dhɛ: «‑Ka nu 'yuʋ̈‑ 'ka‑ kun bha‑ 'bha 'ka!»

11 'Yö Simɔ Piɛdhö ‑yö ‑da "kplagɔ bha‑ 'gü 'yö "nuu bha‑ ‑gan 'ö nu‑ 'ka "sia‑, kö 'yuʋ̈‑ ‑ya pa ‑sü 'ka. 'Yuʋ̈‑ 'ö gun "nuu bha‑ 'gü bha‑ ꞊gban ‑da 'kwëë‑ ‑sü gun 'yuʋ̈‑ këng do ö ‑kɔ "sɔɔdhu waa‑ 'yuʋ̈‑ ‑yaaga. 'Sa ‑a 'bha 'yaa gun 'sɛɛnnë "kɛɛ yö ‑zë ꞊gban 'gü, "nuu bha‑ ga do ‑zian 'yii "kan. 12 'Yö Yesu ‑ya pö‑ ‑nu ‑dhɛ: «‑Ka nu kö 'ka pë ‑bhö!»

"Kɛɛ 'mɛ 'wo bha‑ mɛ do ‑zian 'yii ꞊mɔɔ‑ ‑bha kö ‑ya dhɛɛ" 'kpɔ ꞊dhɛ: «De ‑zë ‑mü i 'ka ‑zë wo ꞊zɔɔ?» ‑A ‑gɛn ‑mü ꞊dhɛ kö ‑wa 'wɔn ‑dɔ ꞊dhɛ wo Dëmɛ ‑mü. 13 ꞊Dhɛ 'ö ꞊ya kë "dhʋ̈ 'yö ꞊yɔɔn‑ ‑nu "sɔɔ 'yö 'bluu‑ bha‑ sü 'yö‑ nu‑ ‑nu ‑dhɛ waa‑ 'yuʋ̈‑ ꞊pia ‑sü bha‑ 'dhö.

14 'Go 'ö Yesu ‑ya wo ga 'gü bha‑ ‑bha ö ‑dɩ ‑zɔn ö ‑bha ꞊klang ‑nu ‑dhɛ ‑kɔ ‑yaaga ‑naa ꞊në gun bha.

15 ꞊Dhɛ 'ö ꞊wa wo bo pë ‑bhö ‑sü 'ka, 'yö‑ pö Piɛdhö ‑dhɛ: «Simɔ, Zan gbö, n ‑dhɔ ‑yö i ‑kë 'ö ‑ziö mɛ 'wo ya‑ ‑nu ‑ta "wɛ ‑ee?» 'Yö Piɛdhö ‑ya ‑yɔ bɔ‑ ‑gɔ 'ö‑ pö: «꞊Iin, n Dëmɛ, i‑ 'wɔn ‑dɔ ꞊dhɛ i ‑dhɔ ‑yö n ‑kë.»

'Yö‑ pö‑ ‑dhɛ: «‑Ɛɛ, ꞊dhɛ 'ö "dhʋ̈ ‑bhö i ‑zʋ 'to ('mɛ 'wo bɔ n 'ka 'wo ꞊dhɛ) ma ‑tuʋ̈ ‑nu 'dhö bha‑ ‑nu "piʋ̈!»

16 'Yö 'go mü 'zü 'ö‑ dhɛɛ" ꞊plɛ ‑naa kpɔ 'ö‑ pö: «Simɔ Zan gbö, n ‑dhɔ ‑yö i ‑kë ‑ee?» 'Yö Piɛdhö ‑ya pö‑ ‑dhɛ: «꞊Iin, n Dëmɛ, ‑a 'wɔn ‑yö i "yaan ꞊dhɛ i ‑dhɔ ‑yö n ‑kë.» 'Yö Yesu ‑ya pö‑ ‑dhɛ: «‑Ɛɛ, ꞊dhɛ 'ö "dhʋ̈ ‑bhö i ‑zʋ 'to ('mɛ 'wo bɔ n 'ka 'wo ꞊dhɛ) ma ‑tuʋ̈ ‑nu 'dhö bha‑ ‑nu "piʋ̈!»

17 'Yö 'go mü 'ö‑ dhɛɛ" ‑yaaga ‑naa kpɔ 'zü 'ö‑ pö: «Simɔ, Zan gbö, i‑ ‑pö n ‑dhɔ ‑yö i ‑kë ꞊dedewo "wɛ ‑ee?»

'Yö Piɛdhö ‑yö ö wëë 'gü ‑siö ‑a dhɛɛ" ‑yaaga ‑naa 'ö Yesu ‑ya kpɔ bha‑ ‑wɔn 'gü. 'Yö‑ ‑yɔ bɔ‑ ‑gɔ 'ö‑ pö: «'Aa, n Dëmɛ, bhi 'ö bhi ‑zë 'i 'wɔn ꞊gban ‑wɔn ꞊gban dɔ ya, 'bhaa‑ 'wɔn dɔ ꞊në wo ꞊dhɛ i ‑dhɔ ‑yö n ‑kë ‑ee?»

Yesu ‑ya ‑pö ‑dhɛ yö ꞊në‑ ‑wɔn 'gü: «꞊Dhɛ 'ö "dhʋ̈ kö ‑bhö ma ‑tuʋ̈ ‑nu "dhiʋ̈ gba!» 18 'Yö ö ‑wʋ ‑ta ‑yɔ 'ö‑ pö: «Piɛdhö, a‑ ‑pö i ‑dhɛ, tɛan‑ ꞊dede 'ka ꞊dhɛ: 'Ö gun kö i 'në "gbɔng 'ka, 'wɔn 'ö ‑dhi i ‑dhɛ ꞊në 'i gun‑ kë sië, 'ö 'i dho ‑dhɛ 'ö ‑dhi i ‑dhɛ ‑a 'gü ꞊dhɛ ‑kɔ 'ö ‑dhi i ‑dhɛ ‑a 'dhö, "kɛɛ 'bha kë zii yi 'ö‑ 'ka, i ‑dho i ‑gbe wang ꞊në‑ "pʋ, 'yö mɛ "wɛɛ ‑yö dho i 'ka ‑dhɛ 'ö‑ ‑dhɔ 'yaa i ‑bha bha‑ 'gü.

19 Saan" ‑kɔ 'ö Piɛdhö dho saan"‑ 'ka kö‑ ga ‑kɔ ‑yö Atanna 'tɔ bhɔ bha ꞊në Yesu ‑ya to "dhiʋ̈ 'ö‑ dhiang zë "dhʋ̈ bha. ꞊Dhɛ 'ö ꞊ya bo‑ ‑pö "dhʋ̈ ‑sü 'ka 'yö‑ pö‑ ‑dhɛ: «‑Bhö nu 'kwa 'dho.»

20 ꞊Dhɛ 'ö ꞊wa ziö 'wo 'dho sië, Piɛdhö dho slëë‑ ö 'gü kö ‑yö ‑dhɛ ‑ga kö Yesu ‑bha ꞊klang ‑nu bha‑ mɛ 'dhɛ 'ö‑ ‑dhɔ gun‑ kë sië, 'ö kë ö ‑gɔ ‑wɔ ‑a ‑kuu ‑ta kö ‑wo pë ‑bhö sië 'ö‑ dhɛɛ" kpɔ 'ö‑ pö «N Dëmɛ, 'dee yöö ‑da i ‑dhɛ pë "piʋ̈ bha» ‑yö nu sië‑ ‑nu ꞊keng‑. 21 'Yö Yesu dhɛɛ" kpɔ 'ö‑ pö: «'Yö mɛ 'dhɛ 'kö nu sië ya ꞊wɛ, n Dëmɛ? Yö ‑zë ‑bha ga ‑kɔ ‑dho kë mü ꞊dhɛ?»

22 'Yö Yesu ‑ya ‑yɔ bɔ‑ ‑gɔ 'ö‑ pö: «‑A 'dhɛ 'kö bha 'yaa dɔ i ‑gɔ ‑dhɛ 'bha 'gü, ꞊ya ga n 'gü, ‑yö ‑mɔɔ ‑bha 'ö to "yaan 'ö zun‑ 'ka n "dhiʋ̈ yee kë ‑yi ‑bha. Bhi ‑zë ‑bhö nu ꞊zɔɔ kö 'kwa 'dho!»

23 ‑A pö 'ö Yesu ‑ya wo "dhʋ̈ bha 'yö‑ ‑wʋ ‑yö ꞊mɔɔ kwa dheebhang ‑nu kpö 'gü ꞊dhɛ ‑a ‑bha ꞊klangdhiʋ̈ 'dhɛ 'kö bha 'yii 'dho ga 'zü tongtongdhö. "Kɛɛ 'sa kö Yesu ‑zë 'yii‑ pö Piɛdhö ‑dhɛ ꞊dhɛ 'yii 'dho ga 'zü, ‑ya ‑pö ꞊naa 'kö 'zü ꞊ya 'to "yaan kö ‑yö zun‑ 'ka n nu yi ‑bha ꞊wɛ, yö ‑zë ‑yö ‑dɔ i ‑gɔ 'mɛ?»

24 ‑A ꞊klangdhiʋ̈ 'ö "dhʋ̈ bha ꞊në 'wɔn ‑nu bha‑ ‑gɛn dɔ 'yö‑ ‑bɛn zë bha. Yö ꞊në‑ ‑wɔn 'gü 'yö 'yi 'dhang bho‑ "dhiʋ̈ ꞊dhɛ 'wɔn 'ö‑ ‑gɛn dɔ bha tɛan‑ ‑mü.

25 'Wɔn 'ö Yesu ‑ya ‑kë ‑a ‑kpɛa 'yaa ‑mü ‑a 'dhɛ 'yi‑ ‑gɛn dɔ 'sëëdhɛ ya‑ 'gü ya‑ 'ka. ꞊Ya kë 'nu ꞊dhɛ 'wɔn ‑nu 'kö Yesu ‑ya ‑kë yi‑ ꞊gban ‑sü 'do 'do 'yi‑ ‑bɛn zë, ‑a 'sëëdhɛ ‑be 'yii 'dho ꞊mɔɔ "kpʋngtaadhɛ ‑todhʋ̈sü ‑zian 'gü.