100
Godigo nogi ugwaba sabo tęąbi me deli dao
1 Tigidali tǫde we bidi,
dagego God dali dwagi yai homu elama,
tęąbi wao.
2 Dagego dwagi yai homu Genuai Bidi
dali eyu, lotu po waiyąo.
Dagego dwagi yai homu ebo tęąbi weyu,
tama aga pageba pao.
3 Dagego Genuai Bidi homugo konebo tagaligio,
aga deli te God mu dao.
Aga deligo da nigai, tama da aga we bidi dao.
Da agai we bidi, da agai te kibu sipsip tiwai dao.
4 Da agai dwagi yai be tomoba pelama,
agabolo puba hwi po olama, gedu haluasa po weyu,
aga nogi ugwaba sao.
Dago aga dali usu da olama, gedu haluasa po weyu,
tama agabolo genuai nogi mao.
5 Genuai Bidigo dwagi yai kolesaga naga ebo dao.
Sesemane sogo agai da godolo mu ebo dao.
Agai sesemane bidada pabo sogo mu po wabo
wali pabo dao. [1 Sto 16:34; 2 Sto 5:13; 7:3; Esr 3:11;
Tib 106:1; 107:1; 118:1; 136:1; Jer 33:11]