60
Devitgo te da ola mayu yai. Agai te polobadu te Mesopotemiatǫde bidali bage, me Soba tǫde bidali bage, te Siria dabe dalihwįani sogo, te hani kone ma palali. Tama agai te bidi Joapte ma geasa asiyu, tama te Tamu Elalubo Tǫ Malude bidali, te Idom bidi dabe te 12,000 bidi ela muani, teba agai homu konema palama, te balia po asęai dao. Te 2 Samuel Dąį 8, me 1 Stori Dąį 18, tede elalubo po suao.
Bidigo te gedu haluasa po weyu, te Godigo augwali ma somainu yali
1 God, nago da tagalama,
tama da te hwįbode aiyaba
elalumainu sula tagalalio.
Nago dade wado homu elalu, tama nago te tiwai yali.
Tiali goli, megi te nage ma asiyu,
te da ma tau sagasao.
2 Nago dago tǫ mali emainu ilama,
tama nago te alumainu elama,
tama genuai tǫ dedage pedelalio.
Megi da, te tǫ mu dolainu ebao.
Tialima, nago ma dodolao.
3 Nago te sęgę hauwa te naga we bidi dabolo mawai.
Tama nago dabolo te wain ąį menama,
tumainu ebo tiwai yai.
Dago tulama, tama da te umuna pai mu pedelali.
4 Nago te wi pao po te nageba
lotu wabo we bidiba pusai,
te boi bidi dabego augwali dolidali weyu,
augwali wi pomainogo yali.
5 Da te nago bomogo ma sao,
magi baso meni, te nago da godolo mu ebo dao.
Tama tibaso, nago dago gedu haluasa po wabo odolama,
tama da te boi bidi dabego nogode ma sao.
6 God te aga wiegi yai bulude bidiyu,
tama aga te po wai dao,
“Te eno hwįbo boi bidi dabe aiyaba elaluama,
tama eno wiegi yai pemene mu yaibao.
Megi da, eno te Sekem bulu tǫ pedaibao,
tama te Sukot tǫ malu bulu pesagede me, tama eno
te ena we bidi dabeba dobawaibao.
7 Te Gileat tǫ pedaide bidibo we bidi
me, te Manase hani dabe me, te eno bage dao.
Te Efraim hani we bidi te eno kapago
nigai tobolu madi tiwai elalubao,
tama eno king te eno bage Judade munama,
elalubao.
8 Te eno te Moap dabe te eno sę yabo bidi
pedalumainu elama, tama eno te Idom dabe
te eno sę olo ebo bidi dabe nigilaibao,” wali.
“Te eno te Filistia dabe te hwįnama, aiyaba elalubaso,
tama eno homu pemene eyu,
tama i waibao,” po wai.
9 God, dego ena te Idomba odasa pogowe?
Tama dego ena te bomai obo elalubo
taunba odasa pogowe?
10 God, te nago da
te tudiba muani homu eba, agawe?
Nage te dago ami dabe dali pisąma eba, agawe?
11 Nago da tau sobaso,
tama dago te boi bidi dabe dali hwįaibao.
Magi baso meni, te bidi dabego naga da tau sobaso da,
te olo nai tiwai naga dao.
12 Tiali goli, te God da dali bidibaso da,
teda dago te hwįbode te boi bidi dabe elaibao.
Mu tama, Godigo te dago boi bidi dabe
aiyaba elaluaibao.