53
Te Devitgo asęani balia po me deli dao.
Te kolesaga geda mubo, me te dwai sę ebo bidi dabego kolesagade po wai
1 Te kolesaga meni yai
dwai sę ebo bidi dabego
augwa digi te tama po wabo dao,
“Te God me bidibeo,” wabo da.
Te bidi dabe te augwali bidi dwai naga dao.
Augwaligo kolesaga te dwai mu ebo dao.
Te bidi me deligo wiegi yai kolesaga me ebo menio.
Mu menio.
2 God te dagalude bidiyu,
te we bidi dabe bidalubo madi aiyaba tonalubo dao.
Agai te kolesaga koneai bidi me deli gegeyu,
te God gegebo sę ebowe naga suainu tebo dao.
3 Tiali goli, menio.
Tigidali mugo te sunumi tagalalio.
Tigidali te deli tobage tiwai naga elalubao,
augwali te dwai bidi dabe mu elalubao.
Te bidi me deligo wiegi yai kolesaga
me ebeo. Mu menio. [Ro 3:10-12]
4 Godigo te tama po wali,
“Te bidi dabego te dwai kolesaga ebao,
te augwaligo kolesaga koneai me
elalubo homu meni da, agawe?
Augwaligo te eno we bidi dabe
te augwaligo te bret tubo
tiwai gilama te mu silibao.
Tama augwaligo enaba gedu haluasa
po wabo menio,” wali.
5 Tiali goli, te augwali wi umabo mu yaibao.
Polobadu augwa te tiwai wi me ebeo.
Mu menio. Magi baso meni,
te Godigo dagego boi bidi tigidali silimainu yaibao.
Agai augwali ela munama,
tama agai augwaligo dili dabe są są paibao.
6 Eno homugo Godigo te Saion
bulu bidi me deli tagala palumainu elama,
te Israel dabe ma sagasomainu homu yai.
Nosali Godigo te aga bage tau selama,
tama augwali bugagia ma bidimainu yaibao,
teda te Israel hani augwali wiegi yai pemene yaibao.
Ae, te Jekop aga hani augwali bugai haliga mu yaibao.