1 Te sogo te we bidi dabe sisinagasobaso, tama te Livai dabego te Mosesgo bomai po augwaliba nedali. Tama augwaligo te bomai po nedali pode te tiwai po wali, te Amon dabe me Moap dabe te Godigo we bidi Israel hani tomoba me asogobeo wai. 2-3 Tama te Israel dabego te bomai po odali sogo, augwaligo te we bidi dabe sela sąwani, te augwa aya ma ida te bulu badu bidi te Israel hani isąwai bidi dao, tama augwaligo te augwali te Israel we bidi hanide bidimainu me ebeo. Te bomai pogo page te tiwai dao. Te Israel dabego te Isip tagalama asali sogo, te Amon dabe me Moap dabe augwaligo te nai me wę me augwali me mabeo. Tama te hanigo te profet Balam abelama, te Godigo Israel dabe dolomainu ebo po omainu yali. Tiali goli, Godigo Balamgo te po omainu me ilibeo. Menio. Balamgo te Godiba augwali wiegi yai bugagia ilabo po wai dao. [Nam 22:1-6; Bom 23:3-5]

4 Pris Eliasipgo te dago Godigo tempel be doado bage mubo habu tonaluai, tama aga te Amon hani bidi Tobiago hai namu dao. 5 Eliasipgo Tobia te genuai be habu me delide bidimainu ilali, augwaligo te ofa yabo wit sisinani madi nigilai, tama te wiegi yai denami pedalubo pauda hano elalubo digi, te Godigo bede sę ebo doado bage mubo madi, te we bidigo ofa te pris dabeba mabo me, te nai dabe me wain, me oliv wel, te we bidi dabego Godiba mabo te pesage habu me deli te nigilali. Godigo te nai dabe te Livai dabe, me te musik wabo bidi dabe, me te Godigo be tonalubo bidi, te augwaligo tuabo nai te nigilama, sa muai. 6 Ena Nehemia, ena te Jerusalemde bidisąbo sogo te sę pedelali, magi baso meni, ena te Persia tǫ pedaiba ma pelama, te sę ebo ripot po te king Artaserksisbolo magi pai. Te sogo aga te Babilonde king bididubadi, te 32 kibu be bidai. Nosali eno te kingba hanalu, ena te Jerusalemba ma pagawe obaso, tama agai ena pao olama, usu da wai. 7 Tama ena te Jerusalemba ma sabaligi pabo sogo, augwaligo enabolo te tiwai po wali, Eliasipgo te Tobiabolo te genuai be habu te Godigo tempel be obo tomode te mawai da po wali. Agai te yali kolesaga te dwai mu dao wai. 8 Tama eno wado po dwai mu olama, tama eno te Tobiago tigidali nai doado bage buluba sela sąwai. 9 Tama eno te pris dabe augwaliba olama, te be habu te augwa ebo kolesaga wali pelama, te Godigo gedude wiegi yai me pedalumainu ilao po wali. Tama eno augwaliba weyu, te Godigo bede sę yabo doado bage te nai tigidali selama, tama te ofa yabo wit, me te wiegi yai denami hano ilibo pauda selama, tama tigidali te be habuba ma muiąo wai dao.

10 Eno te tiwai me odali, te Livai dabe, me te Godigo bede musik elibo hani dabe, augwa te Jerusalem tagalama, te augwa tǫba ma pali, magi baso meni, te we bidi dabego augwali nai me masiąwai. [Bom 12:19] 11 Tama tibaso, eno te polalubo bidi dabeba wado po wabo sę ilama, tama eno augwaliba hanalu wali, “Magi baso dagego te Godigo be olodali elalumainu ilaliwe?” Tama eno te Livai dabe, me te Godigo bede musik wabo bidi hani ma odasa aselama, tama eno augwalibolo te sę ma hodolama yao po walio. 12 Tialima, tigidali Judago te wit, me wain, me oliv wel te bugai pedai me deli te ma gagalama, sela aselama, tama te Godigo nai doado bage mubo be habuba ma muai dao. [Mal 3:10] 13 Tama eno te pris Selemia, me te po page koneai bidi Sadok nigilali, me Pedaia, te Livai hani me deli, te be habu dabe tonalumainogo yali. Tama eno te augwali tau sabo bidi me deli nigilali, aga nogi te Hanan, te Sakurgo ogwa, tama te wąį nǫų Matania dao. Te gasa bidi dabego te po wali, te bidi dabego te doloba pai kolesaga mu ebaso, tama eno augwali nigilali. Augwaligo te augwa deli sę ebo abagi dabede te nai dobabo sę ebo kolesaga elalubo dao wali.

14 Tama God, eno homugo nago eno te yali tigidali sę te nago be tonaluali, me te lotu wabo dodolobo sę yali kolesaga, te nago homugo konemainu yai. Eno homugo te eno wiegi yai sę yali po te nago naga bukude sela sągio.

15 Te sogo eno suali, te meba Juda dabego te nedu du wain agalama, tama te Sabat side wain wę siyu nigali. Tama te gasa Juda dabego te wit nai, me wain, me te wain nedu du wai, me te ni kaya fik, me te gasa tobage nai dabe selama, te donki daiba munama, tama te Jerusalemba sela pabo sę yali. Tama te Sabat side te eno augwaliba bomai po wali, “Te side da wabo sogo te we bidi dabego te nai dabe abelimainu me ilamuo,” po wali. [Sai 20:8-10; Bom 5:12-14; Jer 17:21-22] 16 Te tamu ąį sesegede elalubo taun Tair bidi meba te Jerusalemba aselama bidai. Tama te Sabat side te hanigo te sųgų pis me gasa nai dabe te Jerusalemba sesali, te da we bidi dabego abelimainu yai. 17 Tialima, eno te Judade polaluali bidi dabeba wado po weyu, te tama po wali, “Odiąo. Dagego te dwai kolesaga mu ebao. Dagego te Sabat side dao wabo dolama, tama te olo side tiwai me deli pedalubao,” wali. 18 “Polobadu te wąį nǫų dabego te tobage kolesaga tiwai naga ebaso, tama te Godigo augwaliba dwai dene mayu, tama agai te taun dolali. Tama megi dagego te tobage kolesaga ebaso, tama Godigo da dali wado po mu odubo dao,” wali.

19 Tama eno po bomo elama, te tiwai po wai. Te Sabat si te tigidali Sadede pedalubo sogo, augwaligo te taunba pabo obo sunumi paliąo, wali. Augwaligo te tiwai sę ebo te Sabat side dolo tiąo, te giliga ibaba dega sigi pabo sogo. Tama te sunumi dabe palialudubadi, te Sabat siligi pabo sogoba usu nao. Tama eno te ena sę bidi mebabolo olama, te sunumi augwaligo bugagia tonalu, tama te bidi dabego te Sabat side te taun tomoba te nai dabe sela asigio olama, paliąo po wai dao. 20 Te si sela sogo te bidi dabego te tobage nai te we bidi dabego abelimainogo sela aselama, tama augwali te taun obo sesege badu pelama, tama dago te sunumi dabo tonaluai dao. 21 Eno augwali sulama, tama augwaliba wado po te tiwai wali, “Magi baso dage te obo bulu badu bidagasaliwe? Tegoba, dage piąo. Te dage Sabat side ma asali da, teda eno dwai sę dageba yaibao.” Augwaligo te po odolama, te nosali Sabat side augwali ma asobeo. 22 Tama nosali eno te Livai dabeba walali, te augwa digi te Godigo gedude wiegi yai pedalabo kolesaga wali pali, tama augwali te wiegi yai elama da, teda augwali pelama, te obo sunumiba tonalugi pelama, te bidi dabego augwa te Sabat side bomai po wali bugagia pomainu yai, te Godigo bodolu side, tama te gasa bidi dabego te taun tomoba nai sela asigio wali.

God, nago te tigidali we bidi godolo mu elama, tama nago olo tau sabo wiegi yai kolesaga te augwaliba ebo dao. Tama tiyu, eno homugo nago eno te gasa wiegi yai kolesaga ebo me te homude koneama, tama nago te olo mu tau sabo wiegi yai kolesaga enaba yao.

23 Te sogo me eno te tiwai konea pali, te Juda bidi mebago te tǫ Asdot pedai we dabe, me Amon, me Moap we dabe sai. 24 Tama augwali hani wai mebago te Asdot dabego po koneani. Tama mebago te gasa po koneai. Tiali goli, augwaligo te da Juda dabego po konesiąwai dao. 25 Tama eno te bidi dabeba wado ilama, tama eno meba elama, tama mebago tobolu nisi guda sąwai. Tama eno te tiwai po augwaliba wali, “Dagego te dwai kolesaga ebaso, tama eno homugo Godigo dage dolainogo yaibao.” Tama eno te bidi dabego te Godigo nogide bomai po dąų walomainu ilali, te augwa dali, te augwa wai dabego me, te gasa bulu tǫ pedai we bidi hani dali we si ebo munu ma elamu dao po wai. [Sai 34:11-16; Bom 7:1-5] 26 Tama eno augwaliba te tiwai po wai, “Dagego te king Solomongo dwai kolesaga wali pali dao. Polobadu Godigo te king Solomon godolo elama, tama aga te tigidali Israel hanigo king pedalumainu ilali. Tama Solomongo te wiegi yai homu kolesaga koneama sali, tama te gasa bulu tǫ pedai king tigidaligo koneani homu kolesaga tigidali te agai aiyaba elaluali. Tiali goli, agai te bulu badu we dabe, te Israel hani isąwai we meba selama, tama augwaligo agai homu kolesaga hugiabi selama, tama agai te dwai sęgę yai dao. [2 Sml 12:24-25; 1 Kin 11:1-8] 27 Dago te dagego ebo te dwai kolesaga wali pelama, tama dago te bulu badu hani we dabe sobaso da, teda dago te Godigo po sela sąwaibao. Dagego homugo dago te tama tiwai emainogo eba, agawe?” wali.

28 Joiada aga te polalubo pris Eliasipgo ogwa. Tiali goli, te Joiadago ogwa me deligo te gasa bulu tǫ pedai we me salio. Te we te Senbalatgo wegi dao. Tama eno te Joiadago ogwa sela sąnama, tama eno aga te Jerusalemba bidimainogo me ebeo. [Neh 4:1] 29 Tama tialima, God, nago te pris dabego te yali dwai kolesaga homu koneao. Augwaligo te pris hani te nago gedude meda ilali. Tama nago te pris me Livai hani dabe dali dų walali bomo yai po te augwaligo dolalio.

30 Te kolesagade eno te bulu badu bage, te Israel hani isąwai bidi dabego te tigidali doado bage da tomode elaluali te sela sąwai. Tama eno te tigidali pris, me Livai hani deli deligo yabo sę dąį nigilali. 31 Tama te ofa ulabo sia sigi pabo we bidi meba eno sa muani, tama eno te sela asabo sogo bodolu muna muna pali. Tama eno augwaliba te po me weyu, te augwaligo gide polasa tau yali nai, me te polasa tau yali nedu du me selama, tama te ofa tiwai selasa asao po weyu, te sę dodolali. Tama te God, nago eno te yali kolesaga tigidali homu kone palama, tama nago enaba bugai homu ilao.