Profet Maikago Buku
Hasia nedebo po
Te profet bidi Maikago agai po te Aisaiago po pusali tiwai side naga te po pusai dao. Tiali goli, Aisaia aga te Jerusalem bidi dao, tama agai te genuai bidi dabebolo po pusa mawai dao. Profet Maika aga te Juda dabego dwasianu hanu me delidu asai dao. Agai te we bidi dabebolo e tiwai po walai dao. Godigo augwalibolo dene mawaibao po walali. Magi baso meni, augwaligo Godiba tudi ola menama, tama augwaligo tigidali wiegi yai kolesaga dabe tagalai baso. Te Maikago wali profet po tomode te wiegi yai dąų wali promis po me badu me tomode elaluali. Agai e tama po wali, nosali Godigo aga we bidi dabe dali wiegi yai sę mu yaibao po wali. Agai Devitgo hani tomode bidi me deli sa munama, tama agai augwali wiegi yai kolesaga elama, augwali doloba pai kolesaga elama, tonaluaibao wali. Te Maikago po me deli te meba gasa profet bagego pusali po page po tiwai mu dao. Te po e tiwai dao: “Genuai Bidigo dabolo wiegi yai kolesaga po pusa mawai dao. Agai homugo dago te tiwai kolesaga wali pomainu homu yali. Dago doloba pai kolesaga wali pelama, tama gasa bidi dabe godolo mu yao. Tama dago dena homu kolesaga aiyaba elaluama, tama dena God dali homu deli elama bidao. Tama aga deli naga wali pao.” Te po te buku Maika, Dąį 6:8, tede te elalubao.
1
1 Te Jotan, Ahas, me Hesekia, te bidi deli deli te Judade king bida bida piduali sogo, Genuai Bidigo te po Maikabolo mawai, te taun Moreset bidi me deli dao. Genuai Bidigo Maikabolo te Samaria me Jerusalemde nosali pedelabo sę dabe po wai dao. [2 Kin 15:32-38; 16:1-20; 18:1-20:21; 2 Sto 27:1-7; 28:1-27; 29:1-32:33]
Godigo te Samaria me Jerusalemde dwai dene ilaibao wali po
2 Dage tigidali we bidi hani, te po odiąo.
Dage te tǫde bidibo bidi tigidali,
te Godigo poba olo muiyąo.
God Genuai Bidigo dage po tų ilaibao. Dagego odao.
Genuai Bidi aga be te dagalude bidiyu, te po walio.
3 Genuai Bidigo te aga wiegi yai bulu digi te tagalama,
te asabo homu ebao.
Aga dulama, te bulu du padode daidu bilagasaibao, wai.
4 Tama te bulu du dabe te aga sągą
dologode ąį tiwai pedelaibao,
te ula ebo nai kandel te ula eyu,
te aga ili te wę pedalubo tiwai yaibao.
Te bulu du dabe te odogo malu tǫ pesageba te gea paliyu,
te bulu dudu wę sąbo samanobo tiwai yaibao.
5 Te tigidali sę pedelaibao, magi baso meni,
te Israel dabego dwai sę eyu,
te Godigo po sela sąwani.
Te hagoma ebo kolesaga te Israelde elaluali,
te sę page dego dawe?
Te Samaria dabede naga dao.
Te Juda tibo godiba lotu po wali kolesaga,
te sę page dego dolai dawe?
Te page Jerusalem dabede naga elaluai dao.
6 Tialima, Genuai Bidigo te po wai,
“Te eno Samaria taun dolama,
te pepeli dilide te pobele bage du
holobo tiwai yaibao.
Tama te ni wain du kulubi bulubo pesage pedelaibao.
Te aga be dabe tigidali eno elama, dolaibao,” wali,
“tialima, eno te be dabego masigi kakali hogomu,
te odogo pesageba gea palaibao,” walio.
7 “Te eno te tibo god dabego noma haluama,
te siaba sąwaibao,” wai.
“Tialima, te god dabe te pobele bage hogomu pesage
holobo naga tiwai pedelaibao.
Te Samaria dabego te God tudiba munama,
tama augwa te tibo godiba lotu po wai,
te wego aga bidi tagalama,
te subigila penani ela bilibo tiwai yali.
Tialima, te meba hani aselama,
te Samaria aiyaba elaluama,
te Samaria dabego te dwai sę yalide sali doado bage
gasa tǫ kantriba sela pelama,
te doado bage te augwa tibo godiba
magi paibao,” wai.
8 Tialima, Maikago te po wali,
“Te sę dabe pedelaibao,
tama tiyu, ena te haliga hobede eyu, gela waibao.
Te eno sągą nadoba su me musiąma,
te eno dwai pisila pai nami ugwa naga
gudaibao,” wai.
“Te eno homu dene eyu gela wabo,
te yowigo goo wabo tiwai weyu,
te haliga homu dene elama,
te i wabo te ebigo dwai hwa wabo
gilama yaibao,” po wai.
9 “Magi baso meni, te Samaria dabego
keni pedela sabeo.
Tama pąde Juda dabe me te tobage keni saibao,” wali.
“Tama Jerusalem digi, te eno we bidi dabego pesage,
te dwasianu sogo naga tama te me dolaibao,” wai.
Te boi bidi dabe Jerusalem pąba asali
10 Dagego te Get dabebolo olamuo,
te dago boi bidi dabe,
te Godigo da dolali po wagimio.
Te augwaligo dage gela wabo
te augwaligo sumainu me elamuo.
Dage te Bet Leafra we bidi, * Te taun Bet Leafra dali, te gasa taun dabede wali po te ves 10-15 tede elalubao, augwali te Jerusalem pąde elaluali. Te boi bidi dabego te Jerusalemba hwįgi painu ebaso, augwali bolo polasa te taun dabeba pedaliyu yaibao.
dage te haliga sęgę mu elama,
gela weyu, te duga tigide pu muiyąo.
11 Dage te Safir we bidi, dage hale elama,
te pisila pai ugwa gudama,
te gasa tǫ kantriba te kalabus igi pabo tiwai yao.
Te Sanan dabe wi dwai mu elama,
te augwa taun tagalama,
te buluba me teda soagobeo.
Dagego te Betesel we bidi dabe gela wabo odobaso da,
te dagego koneagameo,
te badu te geme duala sigi pabo pesage me elalubeo.
12 Te Marot we bidi dabe haliga sęgę elama,
te bidi mebago augwali tau sagasobo
tonalueibao, magi baso meni,
te pąde Genuai Bidigo te Jerusalem dolaibao.
13 Dage te Lakis taun we bidi dabe,
dagego te karis dabe selama,
te udabo mu koneai hos dabeba gebelama,
te wi pomainao.
Magi baso meni,
dagego te Israel dabego dwai kolesaga ebo wali pali,
tialima dagego te Jerusalem tulalumainu yali dao.
14 Dage Juda dabe, dagego te taun Moreset Get
homu dene iyąo,
magi baso meni, te gasa hanigo selama,
te dagego taun da ma wagobeo.
Tama te Aksip we bidi dabego te Israel
king dabe tau me sogobeo.
15 Dage te Maresa we bidi,
te Genuai Bidigo dage te boi
bidi dabego nogoba munama,
te dagego taun augwaligo saibao.
Tama te Israel polaluali tobolu bidi dabe
te Adulam masigi ola beba
geme wi duala sigi peyu, ela paibao.
16 Te boi bidi dabego te dagego homu godolo mu ebo
wai dabe selama, te selasa paibao.
Tialima, te duga wai dabede homu dene ebo gela weyu,
tama te tobolu nisi tigidali poala sąnama,
te tobolu wane kikili ilao.
*1:10: Te taun Bet Leafra dali, te gasa taun dabede wali po te ves 10-15 tede elalubao, augwali te Jerusalem pąde elaluali. Te boi bidi dabego te Jerusalemba hwįgi painu ebaso, augwali bolo polasa te taun dabeba pedaliyu yaibao.