8
Jisasgo polalubo pris bidi sę dagalude te wiegi yai be mude sę ebo dao
1 Te dago te wabo po page mu, te po e dao: dago te tobage polalubo pris bidi elalubao, tama aga genuai nogi elalubaso, aga te dagalude te Polalubo Tuni Bidi Godigo dolo nogode dualaluyu megi bidibo dao. [Tib 110:1] 2 Agai te pris bidi sę te Godigo tedali wiegi yai mu bede sę ebao. Te nami ugwago nigali lotu be mu dao. Te bidi dabe augwaligo e tǫde te be me sę ebeo. Menio. Genuai Bidi Godigo naga te be aga bidibo digi sę yai dao.
3 Tigidali polalubo pris bidi augwali deli deli te augwaligo augwali sa munama tama te sęba muani, te augwali deli deligo te we bidi tobade te haniani nai dabe te Godibolo sela pelama ofa iligi pabo sę yai. Tama tibaso, dago polalubo pris bidi me agai ofa me deli elalumainao. 4 Aga e tǫde bidigi sogo da, te aga pris bidi munu me bidigi meni dao. Magi baso meni, te gasa pris bidi dabe e tǫde megi me bidalubao, tama augwaligo haniani nai te Godibolo te ofa ilama mayu ebo dao, te Juda dabego bomai pode wali po tiwai ebo dao. 5 Augwaligo pris sę te tǫde moni lotu bede ebo, te piksa noma naga ola mabo tiwai eyu, tama te wiegi yai sę mu da te dagalude elalubao. Te Godigo Mosesbolo wali po tiwai elama, te Mosesgo te polobadu lotu ugwa be sę yainogo ebo sogo tiwai po wai. Tama Godigo te po wai, “Nage dua dao, te nago te tigidali nai te eno nagebolo te bulu dude ola mani nai te noma tiwai mu usu nama nigao,” te po Mosesbolo wai dao. [Sai 25:40] 6 Tiali goli megi te Godigo Jisasbolo te pris bidi sę mawai dao, tama te mani sęgo te polobadu pris bidi dabe augwaligo yali sę te aiyaba elaluai. Magi baso meni, Jisas agai te God dali, te da we bidi dali, da si tomode te dąų wali po bugagia dodolai. Tama te dąų wali pogo te Godigo polobadu te Juda dabe dali dąų wali po te aiyaba elaluai. Magi baso meni, te gesi dąų wali po weyu tama te po dąų omainogo eyu, Godigo te we bidi bugagia mu tau saibao po wai. Tama te megi mani agai augwali tau saibao wali po, te gesi pogo te agai polobadu dąų wali tau sabo po te aiyaba elaluai.
Gesi dąų wali pogo te polobadu dąų wali po aiyaba elaluai
7 Te polobadu hasia dąų wali pogo aga sę tigidali bugagia egi sogo da, teda Godigo te gasa dąų wali te po me wagi menio. 8 Tiali goli Godigo te we bidi augwaligo sęgę po haninama agai te po wai,
“Eno te po obao, ‘Odao!
Nosali me sogo te eno augwali tau somainogo eyu,
dąų wabo gesi po te Israel hani augwali dali me,
te Juda hani augwali dali me dodolama, tama
dąų waibao.
9 Te megi e sogo te dąų wabo gesi po polobadu
eno te augwa wąį dabe dali dodolama dąų wali po
tiwai me ebeo. Menio.
Polobadu te eno augwali te Isip tǫ taga somainogo
te eno augwali nogo bugagia tulama soali sogo te
eno augwali tau sabo po dąų wai.
Tiali goli augwaligo eno augwalibolo mani dąų wali
po te pode augwaligo augwa homugo kęą pisiąma
tama te po wali me pabeo.
Tama tibaso, augwali eno tudiba munama tagalali,’ ”
Genuai Bidigo te po wai.
10 Tama Genuai Bidigo po ma wai, “Te tama tiali
sogo te hasia silali. Tama nosali eno gasa augwali
tau somainogo dąų wabo po augwalibolo mawaibao.
E tiwai yaibao. Te eno bomo yai po dabe tigidali te
eno augwaligo homu tomoba munama, tama eno
augwaligo homu kolesaga tomode te po asęaibao.
Tama ena augwaligo God bidiyu, tama augwali te
eno we bidi bidiyu yaibao.
11 Tama tigidali bidi deli deligo te augwa hani
bidi dabe me te augwa ama dabe bidi hasi augwali
ola mabo sę te me elalugobeo,
‘Nago te Genuai Bidi koneao,’ te po wagobeo.
Menio.
Te sogo te tigidali augwaligo ena bugagia koneyu,
te dwasianu wai pulubago me, te genuai bidi dali
augwaligo ena koneaibao.
12 Te eno olo tau sabo wiegi yai kolesaga augwali
dali eyu, tama eno augwaligo sęgę sela sąyu
yaibao.
Tama augwaligo sęgę dabe, te eno homugo koneama
me egobeo,” [Jer 31:31-34]
Genuai Bidigo te po wai dao. 13 Agai te augwali tau somainogo eyu, te gesi dąų wali pode tama obaso, agai te pogo te hasia dąų wali po te poloba badia pai ugwa tiwai yai dao. Tama te poloba nai te polobadu badia pai nai tiwai elama te monu dabe yai tiwai yali, te aga dwasianu sogo naga bidama, tama te nai tigidali tamadi sia sabo dao.