1 Idao! dage Galesia bulu we bidi hani bage, dage homu kolesaga meni yai bage, eno dagede noma mu sobao. Polobadu ena dage dali bidibadi yaide, te sogo eno dagebolo te Jisas Krais aga te ni pedaide wadolama tama isąma, dago yali dwai sę sęgę sela sąwani po, te po eno dagebolo mu hania pusai dao. Tama te po odolama, tama Godigo gedude dage doloba pai we bidi pedalainogo eyu, dagego duga homu tigidali te poba mu muani. Tiali digi megi dagego homugo te Juda bagego bomo yai po wali paibao, te God agai dage doloba pai we bidi dao omainogo ebao. Dagego duga homu magi baso hasegelaliwe? Dego te homu bega sabo pobi olama, tama homu begelabo po dagebolo pusaliwe? 2 Tama dagego te Juda dabego bomo yai po wali pabo homu ebaso, eno dage te po me deli hanalu obao. Edao. Godigo Dwagi Yai Mobo Bidi aga dageba asai dao, polobadu. Tama aga dageba magi baso asaliwe? Dagego te bomo yai po bugagia wali pidu baso Godigo Mobo Bidi dageba asaliwe? Te menio. Dagego te Kraisde gesi dwagi yai po odama, tama te poba duga homu tigidali mubaso, te Godigo aga Mobo Bidi dagebolo mawai dao. 3 Tama Godigo Mobo Bidigo bomo dali dagego God wali pabo gagalali. Tama megi dagego homu eyu, ‘Te Godigo Mobo Bidigo bomo tagalama, tama dena bomo elama da te bomo yai po bugagia wali peyu, te tiwai bidiyu, tama dena kolesaga wiegi yai mu pedalaibao,’ dagego te homu eyu da, teda dage te homu kolesaga meni yai we bidi mu dao. 4 Tama homugo kone palao. Polobadu te Godigo Dwagi Yai Mobo Bidi aga dageba aselama, tama haniani dwagi yai sę dageba pedalai. Tama megi dagego te dwagi yai sę olo subigila sela sąwaibawe? Woo, eno homu dagego te tiwai egobeo. 5 Tama God agai aga Mobo Bidi dagebolo menama, tama agai dage tomode bidi noma sabo bomai sę ebo dao. Magi basowe? Dagego te bomo yai po bugagia wali pobaso agai te Mobo Bidi mabo dawe? Te menio. Dagego te Kraisde gesi dwagi yai po odama, tama te poba duga homu tigidali mubaso, te God agai dage dali te dwagi yai sę ebo dao. [Gag 15:6; Ro 4:3]

6 Te Godigo dagebolo yali dwagi yai sę, te tobage sę naga me agai te polobadu bidai bidi Abraham dali yai. Tama agai Abrahambolo te sę yalide augwaligo Godigo po bukude e po asęani, “Te Abraham agai Godigo wali po odama, tama agai aga homu tigidali te poba mubaso, tama Godigo gedude Abraham te doloba pai bidi mu pedalai,” augwaligo te po asęai. 7 Tama tibaso, dagego bugagia koneao, te Godigo wali po odoyu, te poba augwa homu tigidali mubo we bidi, augwali naga te Abraham aga hani we bidi mu dao. Te dagebolo te homu bega sabo po wali bage, augwaligo geda muyu te homu ebo da, ‘Abraham aga bulai wai dabe augwali da te aga hani we bidi mu dao,’ augwaligo te homu ebao. Tiali goli te mu menio. 8 Tama polobadu God agai koneai, nosali te Abrahamgo bulai wai ąǫ isiąwai we bidi meba augwaligo Godigo po odama, augwa homu tigidali te poba munama, tama Godigo augwaligo yali dwai dwai sę sela sąnama, tama agai augwali doloba pai we bidi dao waibao. Tama tibaso, polobadu, te sę pedalisiąbadi, Godigo te Abrahambolo te po wai, “Te eno nage dali wiegi yai sę eyu, tama tebogo nosali te tigidali haniani bidi hani dali wiegi yai sę me yaibao.” Godigo te po olama, tama bidi mego te po bukude asęani. [Gag 12:3] 9 Tama Abraham agai Godigo agabolo wali po odama, tama te poba aga homu sese mubaso, Godigo aga dali dwagi yai sę yai dao. Tama tiwai, niwai we bidi augwa homu sese Godigo wali poba mubaso, Godigo augwali dali dwagi yai sę ebo dao.

10 Me ma, we bidi meba augwaligo te homu ebo dao, ‘Te dago te bomo yai po bugagia wali peyu, tama Godigo gedude da doloba pai we bidi pedalaibao.’ Tiali goli te tobage homu ebo we bidi augwalibolo Godigo dwai sęgę mena mena piduaibao. Magi baso meni. Te God agai wali po bukude te po me deli elalubao, e dao, “Niwai bidi aga te bomo yai po wali pabo bidi aga sesemane sogo te bukude asęani bomo yai po tigidali te gisiga wali pisąwai bidi, te bidibolo God agai dwai sęgę mena mena piduaibao,” te po asęani. Tama da we bidigo te bomo yai po tigidali gisiga wali pabo usubeo. [Bom 27:26] 11 Tama Godigo po bukude tobo me wai, “Niwai bidi aga homu kolesaga tigidali Godiba mubo bidi, Godigo agabolo nage doloba pai bidi da olama, te tobage bidi naga bida bida paibao,” te po te Godigo bukude elalubao. Tama tibaso, tede dago hania koneani, bidi me te bomo yai po wali pelama Godigo agabolo nage doloba pai bidi dao wagobeo. Te usubeo. [Hab 2:4] 12 Te bomo yai po wali pabo kolesaga me, te bidi aga homu kolesaga tigidali Godiba mubo sę me, te sę si tedali dao, tiwai si menio. Tama Godigo po bukude te po me elalubao, “Te bomo yai po tigidali mu wali pabo bidi, te bomo yai po me deli sela sąsiąwai bidi, te sę ebogo te bidi tau siyu, tama te bidi bidaibao,” te po te bukude augwaligo asęani. [Prs 18:5] 13 Tiali goli dago koneai, da te sę ebode usubeo, da te bomo yai po tigidali mu wali pisąwai bage dao. Tama tibaso, da te Godigo dabolo maiabo dwai sęgę dologode bidali. Tialima, Krais agai da ma abelama, tama megi da te dwai sęgę dologode bidibo menio. Tama agai da ma abelali sę e tiwai yali, agai te Godigo dabolo maiabo dwai sęgę aga tigide selama, tama aga digi isali. Tama Godigo po bukude te po me deli e dao, “Te augwaligo nide walali bidi te bidi te Godigo dwai sęgę maiabo bidi dao,” te po asęani. Tama augwaligo Krais eleyu, te ni pedaide walama, tama aga da tobade te Godigo dwai sęgę maiabo bidi aga pedalai. [Bom 21:23] 14 Agai te sę magi baso yaliwe? Te God agai te tama homu yai, te da tigidali Krais Jisas dali wadolama, tama te Godigo polobadu Abrahambolo dąų wali po te po te Juda hani isiąwai bagede mu pedalaibao, te God agai augwali tigidali dali dwagi yai sę mu yaibao, agai Abraham dali yali gilama tiwaibao. Tama te tiwai eyu, Godigo homugo da tigidali dena homu tigidali te Jisasba munama, tama God agai aga Dwagi Yai Mobo Bidi dabolo mawaibao po weyu dąų wali. Tama te po mu pedalainogo, Jisasgo te dwai sęgę da tobade sali. Tama tiyu, te dago Godigo Mobo Bidi sabo tų te tiwai megi elalubao.

15 Eno ama dedeo, megi eno te da tǫde bidibo bidigo ebo kolesagade dwasianu po waibao, dagego Godigo ebo kolesaga hania konemainogo ebao. Te bidi si augwaligo homu deli eyu, tama te homude te dąų wali po asęyu, te gasa bidi agai te augwali sigo dąų wali po sela sągobeo. Agai te poba gasa po ma wadologobeo. Tama te dąų wali po da te tǫde bidi dabego po naga digi, gasa bidigo te po sela sągobeo. Tama te tiwai me, te Godigo dąų wali po te gasa pogo munu me sela sągobeo, te usubeo. 16 Tama Godigo agai po dąų weyu, tama Abrahambolo te tobage po wai, “Eno nage dali, nago wąį me deli dali, te dage sibolo dwagi yai sę yaibao,” te po dąų weyu wali. Tama Godigo wali po bukude augwaligo te po asębeo, “nago wąį dabe,” te bidi hauwa badi wabo menio, te wąį bidi deli nagade Godigo agai dąų wali po wai dao, tama te wąį deli te Krais naga dao. [Gag 12:7] 17 Tama eno megi dagebolo wabo po page e dao, te Abraham dali nosali yabo dwagi yai sę po weyu, tama te po Godigo polobadu mu dąų wali. Tama tialigo da, te nosali asali bomo yai po tego te polobadu dąų wali po togogobeo. Te kibu be 430 silama, tama Godigo te bomo yai po mawai. Tama tibaso, te nosali asali bomo yai pogo te hasia wali dąų wali po aiyaba elaluama, tama te po hasegelama, te olo po tiwai pedalogobeo. [Sai 12:40] 18 Tama da te bomo yai po naga bugagia wali peyu, tama God agai da dali dwagi yai sę egi sogo da, teda agade agai dąų wali po wali peyu agai da dali dwagi yai sę egi menigi da. Tiali goli te menio. God agai ‘Eno Abraham dali dąų wali po polobadu obaso, tama megi eno aga dali dwagi yai sę yaibao’ te homu eyu, Godigo Abraham olo tau siyu, dwagi yai sę yai. Tama tibaso dago koneai, te Mosesgo sali bomo yai po tego te Godigo polobadu dąų wali po aiyaba elalugobeo.

19 Tialima, te po konila eyu, bidi mego te po enabolo waibao, “Te nago megi wali po te mu po weyu da, tama Godigo te dąų wali po hasia olama, tama agai te da Juda dabebolo te bomo yai po me magi baso nosali maniwe?” te po bidi mego ena hanalu waibao. Tama Godigo e homu eyu te bomo yai po mani, ‘Augwaligo augwa te eno bomo yai po bolobo sę hania konemainogo yaibao.’ Tama te bomo yai po mayu, Godigo e homu me yali, ‘Polobadu eno te Abraham aga wąį deli te bidi dali eno dwagi yai sę yaibao po dąų wali. Tama te bidi asisąbadi te bomo yai pogo sę elalubao, te aga asobo sogo usu nagasaibao. Tama te bidi asobo si te bomo yai pogo sę silaibao,’ Godigo te bomo yai pode te homu yai. Tama te homu eyu, God agai te bomo yai po mayu, te we bidigo nogoba dolo mubeo. Te menio. Agai te bomo yai po te aga sę ebo ensel bidi dabebolo menama, tama augwaligo te tomode bidali bidi Moses tebolo mani, te po te bidi Mosesgo dabolo pusa mani. 20 Te bomo yai po mabo sę te tiwai yali. Tiali goli te Godigo hasia polobadu dąų wali po tego te bomo yai po aiyaba elalubaso, God aga digi te dąų wali po te Abrahambolo pusali, te tomode bidibo bidibolo pusa mabeo.

21 Te bomo yai po dali, te Godigo we bidibolo dwagi yai sę yaibao dąų wali po dali, te po si augwa hasi boi bidi si tiwai dawe? Woo, te tiwai mu menio. Te po olamuo. Tama Godigo te bomo yai po me deli menama, tama te bomo yai pogo te we bidi Godigo gedude doloba pai we bidi egi sogo da, teda te we bidi tigidali augwali te bomo yai po wali pelama, augwali Godigo gedude doloba pai pedelali wagi da. 22 Tialima, te tobage bomo yai po elalubo menio. Tama te Godigo po bukude augwaligo te po asęani, “Te tigidali tǫde bidibo we bidi augwaligo Godigo bomo yai po boludubo dao. Tama te kolesaga ebogo augwali mu dagana selama, tama augwali te sę tomode kalabus bidi tiwai dao,” te po asęani. Tama te asęani po odama, tama dago koneani, te bomo yai po wali pabo tų te usubeo. Tama tibaso, te pabo tų me deli naga elalubao. Godigo polobadu te po wai, “Niwai we bidigo homu kolesaga Jisas Kraisde dąų wabo we bidi eno augwali dali te doloba pai bidi da waibao,” te po dąų wai. Tama da dena homu tigidali agaba muyu da, teda da doloba pai we bidi te Godigo gedude pedalaibao. 23 Tialima, te dena homu te Jisasba muabo sogo pedalisiąbadi, tama te bomo yai pogo da kalabus bidi tiwai dąų wali, te da dena homu Jisasba muabo tų pedalabo sogo tonalubadi bidai dao. 24 Tama tibaso, te Krais aga asisąbadi te bomo yai pogo da tonaluai dao. Magi baso meni. Te Krais aga aselama, tama dago dena homu tigidali agaba menama, tama Godigo da dali te doloba pai we bidi dao omainogo, da te bomo yai po dologode tonaluyu bidai dao. 25 Tialima, megi te dena homu Jisasba muabo sogo asaligo da, te da te bomo yai po dologode bidabo sogo sia sali dao.

26 Te dage tigidali bidigo Jisas Kraisde konealubo po dąų weyu, tama dagego te konealubo po dąų wabode te dage da Godigo wai puluba dao. 27 Tama dagego duga homu tigidali Kraisba munama tama baptais selama, tama dage aga dali wadolama tama bidibao. Tama bidiyu, bidi aga gudubo ugwa gudubo tiwai eyu, dagego Kraisgo digi homu kolesaga duga homude dąų walao, te dagego te homu kolesaga wali pomainogo tama yao. 28 Tama aga homu kolesaga siyu, tama dage Krais agai we bidi bidiyu, tama dage deli hani naga bidaligo da, teda dage haniani tedali tedali bage dao, te homu egio. Polobadu dage meba Juda hani we bidi bidai, meba Juda hani isiąwai bidi bidai. Meba nogi meni yai we bidi bidai, meba genuai nogi elalubo bidi bidai. Dage meba bidi, meba we dao. Tiali goli megi dage te haniani tedali tedali bidali kolesaga mu sila palio. Dage te Krais Jisasde wadolama, tama dage tigidali megi Jisasde we bidi hani deli naga mu bidibo dao. 29 Tama tiyu, dage Krais aga dali wadolama, tama dage agai hani we bidi bidibaso, te dage Abrahamgo wai me bidibao. Tama tibaso, te polobadu Godigo Abrahambolo sa muyu sagameo wali te hagea sali nai, te nai dagego sabo bidi dabe dao. Godigo dage ma dobola sai dao. [Ro 4:13]