1 Megi ena dage bidibo madi sela sogo wagisu te asainogo ebao. Tama asama, eno dage tomode po tų eyu, tama bidi me deli ma we me deli agai naga gasa we bidide po kisilibo te usu egobeo. Godigo po bukude elalubo po me deli wali peyu dago te po tų dodolaibao, te po e dao: “Te bidi si ma bidi sela te pedauwali deli poba muani wida, teda te po bomo elalubaso, tama te tobage pogo naga te po tų dodolobo usu yaibao,” te po asęani. [Bom 17:6; 19:15] 2 Te polobadu dwai sę yali we bidi dabe augwali me, te gasa bidi dabe dage tigidalibolo me, te ena si sogo wagisu dage dali bidagasali sogo te eno yabo kolesaga po dage dali wali. Tama megi me ena digibulu bidiyu, eno te tiwai po dagebolo ma obao: te ena dage bidibo madi ma asobo si, teda eno te dwai sę yai we bidi dabe augwali eno olo me gogologobeo, eno augwalibolo sęgę mawaibao. 3 Dagego enade e tiwai homu ebao, ‘Te Kraisgo Polgo pedauwalidu dabolo po wabo meni dawe, ma po wabo dawe?’ Te homu dagego enade yaligo da, teda dagego hania bugagia konemainogo eyu eno te bagebolo augwa sali sęgę mawaibao. Te Krais dage dali bomo kimi me isiyu me egobeo. Menio. Agai dagede sę bomo mu ebo dao. 4 Magi baso meni. Polobadu agai aga digi bomo meni yai bidi tiwai ilama tama bidibadi, tama augwaligo aga ni pedaide elali goli, Godigo bomogo megi aga bidibo ulade ma bideibao. Tama da aga dali wadolama, tama da me bomo meni yani tiwai bidibao. Tiali goli Godigo bomogo da aga dali bidibo ulade bidibao. Tama dago te bomo dage tomoba hanilaibao.

5 Dagego sesemane sogo duga digi duga homu usu sela suyu, te duga homu tigidali Kraisba munama agaba homu tialubowe, ma meni yani, te bugagia koneao. Duga digi duga dagalao. Te bidi Jisas Krais dagego homude bidibo te dagego konebewe? Te meni wida, teda dage usu selama, te usu niba kadu wabeo. 6 Tama eno homugo dagego konebo te Godigo sę ebode da te usu niba kadu waibao homu dagego ebo dao. 7 Tama Godigo dage tau siyu, tama dagego dwai kolesaga me deli isąmainogo eyu, dago agabolo hanalu wabo po wabo dao. Dago magi baso te tiwai ebo dawe? Te dage wiegi yai we bidi bidibaso, dago dena sę dage dali bugagia yali, te homu emainogo eyu, te dago Godibolo te po hanalu wabo dawe? Woo, te menio. Dena homugo te dagego doloba pai kolesaga yao. Tama tiyu, tama da dageba asama te duga ebo kolesagade po meni baso, tama dago dage dali po tų ebogo dena bomo ola mabo tų meni eyu da, te usu da, magigo meni. 8 Dagego koneani, dago te mu po aiyaba elaluainogo ebo usu me egobeo. Menio. Dago te mu po naga wabo sę tau sabo naga usu yaibao. Tama tiyu, dagego wiegi yai kolesaga naga eyu da, teda dago dage dali po me wagobeo. 9 Tama dago dage dali po tų isąyu tama tede Godigo da mani bomo waselabo tų meni baso, bidi mebago da bomo meni yai bage da te homu yaibao. Te usu da, po meni. Dagego dwai sę me isąyu tama Godigo po bugagia wali peyu tama tede bomo elalubaso, da wiegi yai homu pemene yaibao. Tama dago Godibolo sesemane sogo hanalu wabo po weyu, dago homugo agai dage tigidali dodolama tama dage agai po odobo bomai we bidi mu pedaloyu, agai we bidi mu naga bidaibao. 10 Megi ena digibulu bidiyu, tama eno te dagebolo po asęna tolali, te pagede naga dao: te ena dage dali bidagasobo sogo tama sesena pai bidi tiwai eyu, eno dage te dago Genuai Bidigo enabolo mani sę yabo bomogo eno dage selebo sę idalio. Agai dena yabo sęde te bomo dali, genuai nogi dali si dabolo mani, te dago dagego Kraisde homu tialubo kolesaga ebode dąų walomainogo yali. Te dage dolomainogo eyu agai te bomo dabolo mabeo.

11 Eno ama dedeo, megi eno po paliama, tama eno dage tao po obao. Dagego duga ebo kolesaga dodolama, tama Godigo po odobo bomai we bidi mu pedalobo kolesaga yao. Dagego eno dage tau sabo po odiąo. Dagego te deli tigi poai deli homu naga elama, nagame yai bidao. Tama God da, te we bidi dali dwagi yai homu eyu godolo kolesaga ebo dali, te homu nagame ilibo kolesaga ebo dali si ebo God, aga te dage dali bidaibao.

12 Te da Godigo we bidigo kolesagade, dage tigidali deli deligo te ama dede, abe dede dali wiegi yai homu elama augwali nogo mao. 13 Ede bidibo Godigo we bidi tigidali augwaligo dagebolo wiegi yai homu elama siade da po ola tolobao.

14 Eno homugo dago Genuai Bidi Jisas Kraisgo olo tau sabo wiegi yai kolesaga dali, tama Godigo dage dali dwagi yai homu eyu godolo ebo kolesaga dali, tama Tedali Mobo Bidi dage tigidaligo homude abagi tiwai bidibo kolesaga dali, te kolesaga sela dage tigidali dali hodobo mu bidao.