2 Te Jehoram te Jehosafatgo ogwa Juda dabego king, agai ama solo nogo a naga olama me badu nogo deli elaluali. Augwaligo nogi dabe e tama dao, Asaria, me Jehiel, me Sekaraia, me gasa Asaria, me Maikel, me Sefatia dao. 3 Jehosafat isisąbadi agai aga te ogomanibolo te gol dabe hauwa mu, me silva dabe, me te haniani nai te genuai monego abelali nai dabe me augwalibolo dobayali. Tama me agai augwali deli delibolo sę mani, te Juda bulude bomai obo elalubo taun tonalumai tagalali. Tiali goli Jehoram king pedelama agai pesage selama king nigilama bidimainu sa muani. Magi baso meni, Jehoram aga te agai gomunai ogwa dao. 4 Tama tialima Jehoram aga king pedelali, tama agai te kantri bomo elama tonalubo sogo agai ama solo me Juda bulude meba tobolu bidi dabe dali augwali elama isilali.

5 Jehoram aga king pedelali sogo agai kibu be 32 elaluali, tama aga Jerusalemde king bidibadi kibu be te 8 kibu be tama bidali. 6 Agai Israel dabego king Ahapgo wegi sai dao. Tialima aga te Ahapgo hanigo dwai kolesaga wali pali, me te meba Israel dabego king dabego kolesaga wali pali, tama agai Genuai Bidigo gedude dwai kolesaga yali. 7 Tiali goli Genuai Bidigo Devitgo hani me dolobeo. Magi baso meni, Genuai Bidi agai polobadu Devit dali dąų wali te po koneama tiali, tama me ma agai te po me dąų wayu te Devitgo wąį hani bidi dabe naga king pedaliyu yaibao wali. Tama tiyu da, te po digi wabo tiwai te Devitgo lam sula sogobeo wali. [1 Kin 11:36]

8 Te Jehoram aga Juda dabego king bidali sogo, te Idom dabe augwaligo Jehoramgo po sela sąnama, tama augwali Juda dabego king dologode bidibeo. Augwaligo augwa tonaluabo king augwa digi sa muani. [Gag 27:40] 9 Tama tialima, Jehoramgo te karisde dolaluama hwįbo ami bidi dabe selama, tama augwali Idom dabe dali hwįainu pali. Augwali pelama saboligi pabode, te Idom dabe augwali aselama, tama augwali bagua sagaselama, tama augwali dali boi hwįainogo yali. Tiali goli te hulide te Jehoram aga te karis tonalubo bidi dabe dali augwaligo bomo elama hwįnama tama wi sana pali. 10 Tiali goli Juda dabego Idom dabe aiyaba elalubeo, tama te Idom dabego augwa digi augwali kantri tonaluali, te augwaligo augwa digi tonalubo sę megi tama me ebao. Tama te sogo naga te taun Lipna hanigo we bidi me po sela sąnama tobolu tali nigali, tama augwali Juda dabe dologode munu me ma bidibeo. Te po page e dao. Jehoramgo aga Genuai Bidi aga wąį dabego Godiba tudi ola mani. 11 Tama me ma Jehoramgo tibo godiba lotu wabo pesage dabe agai Juda dabego bulu dude dabe nigali. Tama tilama, agai te Juda hani we bidi kegeyu, me Jerusalem taun we bidi kegeyu elama, Genuai Bidi tudiba sąnama tama agai gedude sęgę sali.

12 Tialima te profet Elaijago pas me deli Jehorambolo toliyu e tama po walali, “Genuai Bidi, te naga wąį Devitgo God, agai po nage dali e tama wabo elalubao. Nago naga aya king Jehosafatgo wiegi yai kolesaga yali wali pabeo. Me naga wąį Asago wiegi yai kolesaga yali wali pabeo. Menio. 13 Nago Israel dabego dwai kolesaga wali peyu, tama nago Juda dabe me Jerusalem dabe kegelama, tama augwaligo God tudiba mani dao. Nago Ahap aga hani dali augwaligo te Israel hani dali kolesaga tiwai mu tama te yali dao. Tama me ma, nago naga ama solo mu elama isilai dao. Augwali wiegi yai bidi dabe mu, tama augwaligo kolesaga nago kolesaga mu edelai dao. 14 Tama tialima, Genuai Bidigo naga we bidi dene mayu, me naga wai puluba dabe me dene mayu, me naga we dabebolo me dene mayu yaibao. Tama me agai nago doado bage dabe me dolaibao. 15 Tama nage da, nage te dwai gasi me deli nago tabi tomode saibao, tama deli deli be posobo sogo te gasi genuai genuai iduaibao, tama nago tabi naga di bono badu gudaluboba usu naibao,” te Elaijago asęna tolali pas tomode te po wali.

16 Tama te sogo Genuai Bidigo te Filistia me Arebia te Sudan bulu pąde elalubo tǫ bidi dabe augwaligo Jehoram dali sębę emainu ilali. 17 Tama tialima, augwali kantri Judaba boi hwįagaselama, tama augwaligo te king Jehoramgo be tomode elaluali tigidali doado bage sese selasa pali. Tama me augwaligo agai we me agai ogwa dabe me selasa pali. Tiali goli augwaligo Joahas te Jehoramgo sabi ogwa sela pabe.

18 Tama te sę elama nosali Genuai Bidigo king Jehoramgo tabide gasi dwai mu pedelemainu ilali, tama te gasi silabo usu meni yai. 19 Tama te gasi elalubadi kibu be si pali. Tama Jehoramgo tabi aga di bonodu gudaluali, tama aga dene dwai mu selama tama aga isali. Tama te Juda we bidigo agai genuai nogi kone palainu moni isi me nogobeo. Te augwaligo aga wąį dabe isibode yali tiwai sę me ebeo.

20 Te Jehoram aga kibu be 32 elaluali te aga king pedelali sogo, tama aga Jerusalemde king bidibadi kibu be te 8 kibu be tama naga bidali. Te aga isali sogo te bidigo aga hobede me ebeo. Augwaligo aga Devitgo Taunde pubulali, tiali goli augwaligo aga te king dabego gų page mu pubalobeo.