1 Te kantri Seba kwin we, te polalubo wego Solomongo genuai nogi elalubo po odali. Tama tialima, te kwingo Solomonbolo bidi me deligo wei ponabo usu isąyabo hanalubo po hanalu wainogo asali, te Solomongo kolesaga usu sela suainogo. Kwingo Jerusalemba aga sę bidi dabe hauwa me kibu kamel sibi hauwa dali asali. Te kamel kibu dabego gol dabe hauwa mu tolasa asiyu, me wiegi yai denami ebo pauda dabe hauwa, me te genuai umabo monego abelabo wiegi yai masigi dabe dali sesali. Tama te kwin polo sabolagaselama, teda agai te bomai bidigo ponobo usu isąwai po hanalu wainu kone palali po dabe Solomonbolo hanalu wali. 2 Tama Solomongo agai hanalu wali po sese tama wei ponani. Te hanalu wali po Solomongo gegedabo me meni yai elaluali. Mu meni. 3 Kwingo Solomongo kolesaga me homu kolesaga po odali, tama me agai te kingo sę yani be me suali. 4 Tama kwingo Solomongo wiegi yai tubo nai dabe tigidali be posobo sogo tubo suali. Tama me agai suali, ofisa bidi dabe Solomon dali dualama, Solomon dali nai tubo suali. Tama agai kingo sę bidi dabe suyu, me augwaligo gudubo au doado bage dabe me agai suali. Tama me agai te wain ąį dobabo bidi dabe me augwaligo mubo au doado bage dabe me suali. Tama me agai te Solomon agai hani dali augwali Genuai Bidigo tempel be ugwa holiyu ebo wiegi yai kolesaga ebo me agai suali. Agai te wiegi yai sę dabe ebo sulama, tama aga noma guda pelama, tama aga po menia sali.

5 Tama nosali agai Solomonbolo e tama po wali, “Ena ena kantride bidiyu, nago ebo sę dabe po me nago wiegi yai homu kolesaga me kolesaga po eno odali. Tama eno megi koneani, te po te mu tama mu dao. 6 Hasia da eno te po mu dao homu yai menio. Tiali goli megi ena digi aselama, eno ena gedugo mu suali dao. Eno nage sulama, eno polo koneani, nago homu kolesaga me kolesaga te genuai mu dao, tama tego te gasa bidi dabego pedauwalidu odali po mu edelalio. 7 Te naga bidi dabe augwali tigidali sogo wiegi yai homu pemene iyu ebo dao. Tama me nage dali bidalubo te ofisa dabe augwali me tigidali sogo wiegi yai homu pemene ebo dao. Magi baso meni. Tigidali sogo augwaligo nago wiegi yai homu kolesagadu po augwaligo odobo dao. 8 Eno nago God Genuai Bidigo nogi ugwaba sobao. Agai nage dali wiegi yai homu nagame elama, tama agai nage aga we bidigo king bidimainu nigilali dao. Agai dage Israel dabe godolo genuai mu ebao. Tama agai homugo dage tigidali sogo bugagia bidimaina homu ebao. Tama tialima, agai nage king bidi sa muani dao, te naga te Israel dabe te wiegi yai doloba pai kolesagago tonalumainu te yali dao,” te kwin wego Solomonbolo te po wali.

9 Tialima Seba we kwingo te doado bage dabe te Solomonbolo manani. Agai agabolo gol hauwa mu mani, tama te golgo sęgę te 4 ton edelai. Tama me kwingo te wiegi yai mu dila pai masigi dabe me wiegi yai denami ebo pauda dabe agabolo mani. Kwingo Solomonbolo te wiegi yai denami ebo pauda hauwa mu mani, te pauda dabe te wiegi yai mu elama, gasa meba pauda dabego denami mu edelai dao. [Mt 12:42; Lu 11:31]

10 Te king Hiramgo sę bidi dabe me king Solomongo sę bidi dabe augwali te kantri Ofirba pelama, te gol, me gasa wiegi yai nigo name, me wiegi yai dila pai au yabo masigi dabe sigi pabo sę iduali. Tama augwaligo Solomon pageba sesedu geani. 11 Tialima Solomongo sę bidi dabebolo te ni name dabe selama, te Genuai Bidigo tempel be togobili me agai be togobili me geselao po wali. Tama me agai te ni name dabe selama, wiegi yai gita dabe me geselao po wali, te musik elebo bidi dabego nai dabe. Polobadu bidi dabego te kantri Judade augwaligo te tobage wiegi yai nai dabe me suai menio.

12 Tama me king Solomongo Seba kantri kwin webolo agai wiegi yai nai dabe hauwa mu mani. Te kwingo homu usu ilabo mu tama mani. Tama te nai dabe te king Solomongo te kwin webolo mani te nai dabego kwingo Solomon mani nai dabe edelama mu mani. Tama tialima kwin aga sę bidi dabe dali augwali augwa kantriba ma pali.

13 Tigidali kibu bede Solomongo 23 ton sęgę gol sabo dao. 14 Tama me agai te haniani bisnis sę ebo bidi dabede agai takis mone sabo dao. Tama me te Arebia king dabego me Israel distrik polalubo kiap dabe agabolo gol dabe silva dabe mayu ebo dao.

15 Solomongo po obaso aga sę bidi dabego 200 wąbi hwįbo sabele geselali. Tama augwaligo gol selama, te ni name ugwadu hagalu pali. Te deli deli sabelede ugwadu daganani golgo sęgę te 7 kilogram pąde yai gol mayu yali. 16 Tama augwaligo dwasianu hwįbo sabele te 300 geselali. Tama augwaligo gol selama, te sabele ugwadu daganabo gol me selama daganani. Te sabele dwasianude muani golgo sęgę te 4 kilogram sęgę pąde yai gol muani, te sabele deli deliba. Tama Solomongo pode te sę bidi dabego te sabele dabe selama, tama augwaligo te wiegi yai be nogi augwaligo Lebanon Ni Sili Be wabo be tomoba muani.

17 Tama Solomongo pode augwaligo genuai sia king deli geselali. Augwaligo wiegi yai gol siyu, me elefan kibugo moni kele dabe siyu elama, te sia king au ilali. 18-19 Te sia king bobobage ugwanu mu geselali, tama augwaligo te sia saiba holabo togobili ni nogo a naga olama, me badu nogo deli podilali. Tama augwaligo te 12 hasa laiongo piksa nigilama, deli deli togobili ni podilali te nide dodolo pali. Te deli deli togobili ni dage badu si tama te laion piksa si si naga dodolo pali. Augwaligo me me badu muyu, me me badu muyu yali. Tama augwaligo dwasianu nai me deli te sia noma gagawai me geselali, te kingo aga sągą te daiba mumainu. Augwaligo gol selama muani, te nai mesega somainogo, tama augwaligo te sia king sągąde kęnani. Te sia kingde te nogo muabo pesage si elaluali. Te nogo si manobo te pesage side augwaligo hasa laiongo piksa nigilama muani, te si te me me badu muyu, me me badu muyu yali. Te gasa me badu bulu king dabego te tobage sia king mu meni yai.

20 Te sę bidi dabe augwaligo gol selama, Solomongo ąį tuabo kapu nigali. Tama me te be nogi Lebanon Ni Sili Bede elaluali nai dabe augwaligo wiegi yai golgo naga geselali. Te Solomongo silva hauwa mu elalubo sogo augwaligo te po weyu yali, te silva te olo nai dao po olama, augwaligo te silvago wiegi yai nai dabe me geseliyu me ebeo.

21 Te king Hiramgo boskru dabego Solomongo genuai sip te kantri Tarsisba sela peyu ebo dao. Te Solomongo te sip dabe tagala palobo sogo da, augwali kibu be sela mu biliyu ebo dao. Tama augwaligo gol dabe, me silva dabe, me elefan kibugo kele dabe, me haniani hasa monki dabe sela asiyu ebo dao. Tama nosali augwali ma biligi peyu ebo dao.

22 King Solomongo mone hauwa elaluyu, me haniani wiegi yai nai dabe hauwa mu elaluyu yali. Tama me agai wiegi yai homu kolesaga me kolesaga hauwa mu elaluali. Agai gasa tigidali kantri king dabe edelai mu elaluali. 23 Te tigidali gasa kantri king dabego Solomon suagasiyu ebo dao. Te Godigo agabolo mani te wiegi yai homu kolesaga po odainogo asiyu yali. 24 Tigidali kibu bede augwali asiyu, augwaligo Solomon olo maiabo presen dali sesiyu asobo dao. Augwaligo wiegi yai nai dabe bidi dabego golgo me silvago geselai wiegi yai nai dabe sesiyu, me wiegi yai ugwa dabe, me ene dabe tama sesiyu yali, tama me wiegi yai denami ebo pauda me hos me donki me sesiyu yali.

25 Solomongo be habu dabe dwasianu hauwa mu geselai mu elaluali, te hos kibu dabe me hwįbo karis dabe muabo be habu. Te be habu dabe namba te 4,000 usu nama elaluali. Tama agai gasa 12,000 hos kibu meba elaluali, tama me badu aga dali Jerusalemde bidali, tama me badu te gasa meba hanu dabede tagalali, agai te augwali bidimainogo magi yali bulude tagalama tonalumainogo yali. [1 Kin 4:26]

26 King Solomongo te tigidali kantri king bidi dabe tonaluali, te moni pabo ąį nogi Yufretis gagalasa pelama, kantri Filistiadu pelama, kantri Isip dąį usu nigi pali. [Gag 15:18; 1 Kin 4:21] 27 Te Solomon aga king bidali sogo agai silva me wiegi yai ni bǫ hauwa te Jerusalemba sesali. Tama tiyu, te sogo silva hauwa mu elaluai dao, te olo masigi du tiwai elaluali. Tama te ni sida bǫ hauwa mu elaluali, te Israel bulu du dabede dwasianu olo ni elalubo tiwai elaluali. [Bom 17:17] 28 Solomongo aga hos dabe te kantri Musride siyu, me gasa kantri dabede siyu yali. * Te kantri nogi Musri da, te megi dago te gasa nogi te Isip wabo dao. [Bom 17:16]

29 Te Solomongo meba sę dabe yali po, te aga king pedelalidu gagalama, tama pelama, aga isaliba usu nagasali po te buku sela tomode asęna elalubao, te profet bidi Natango bukude, me profet Ahiya te taun Silo bidigo bukude, me Godigo profet Idobolo ola mani nai dabe po bukude elalubao. Te profet Idogo bukude te bidi Jeroboam te Nebatgo ogwago po me te elalubao. 30 Solomon aga Jerusalemde bididubadi, aga king te kibu be 40 bidama, agai te Israel hani tigidali tonaluali. 31 Tialima aga isibaso, augwaligo aga te Jerusalemde pubulali, te augwaligo Devitgo Taun Dao wabo madi. Tama aga ogwa Rehoboamgo agai king sę sali, tama aga king pedelali.