1 Me sogo deli Samuelgo Solbolo te tiwai po wai, “Te eno nage te Israel dabego king tiwai nigilama sa muani sogo, te Genuai Bidigo we bidi, te Genuai Bidigo digi enabolo te tama tia olama, tagala palali. Tama tialima, megi nago odao, [1 Sml 10:1] 2 te Tigidali Bomo Elalubo Genuai Bidigo po. Genuai Bidigo te Amalek dabeba dwai dene mawaibao po wali, magi baso meni, te dago wąį nǫų dabe te Isip tǫ tagalama asali sogo, te Amalek dabego dwai sę augwaliba yai dao. [Sai 17:8-14; Bom 25: 17-19] 3 Tama tiyu, nage te naga ami dabe dali pelama, tama te Amalek dabe dali hwįgi pelama, tama augwaligo doado bage tigidali dolama, tama tigidali bidi me, we me, ogwa me, wegi me, wai puluba me elibadi, tama tigidali bulmakau me, sipsip me, kamel me, donki me, te ela silao wali. Nago te deli munu me tagalamu dao,” Samuelgo Solbolo te po wai.

4 Solgo te po odali, tialima agai te ami bidi dabe i olama, te Telaim hanuba sisinani. Tama te Juda hani bidi 10,000 elaluali, tama te gasa Israel hani sibi dabego te 200,000 bidi elaluai. 5 Nosali Solgo te aga ami dabe selama, te Amalek dabego taun pąba pelama, tama augwali te polobadu wę soai digi tama megi te wę sula sai madi, te pesage me delide te geme duala selama bidaluai. 6 Te Amalek dabe pąde bidali Ken hani bageba te Solgo te tiwai po ola tolali, “Dagego te Amalek dabe taga peyu, te duga gasa pedai badu bidigi pao,” wai. “Tiyu, dago dage te Amalek dabe dali elabuo. Eno te duga wąį nǫų dabego te wiegi yai kolesaga te da Israel dabeba eyu, te dago wąį nǫų dabe te Isip tǫ taga soyu asali sogo te wiegi yai kolesaga yali, te homu kone palama obao, tama tiyu, eno dage me eligobeo,” Solgo te po ola tolali. Tialima, te Ken dabego odama, tama augwa te Amalek dabe taga peyu palio.

7 Tama Solgo hwįbo sę bomo mu ela pelama, tama te Amalek dabe aiyaba elaluali, te Havilago tǫde gagalasa pali, tama te tǫ wa pai bulu te Sur, te giliga pedalubo pedai badu, te Isip te badu usu nigi palio. 8 Tama agai te Agak nogo pageabi yali, te Amalek dabe augwa king bidi da. Tama te Israel dabego te gasa tigidali Amalek dabe ela muani. 9 Tiali goli, augwaligo te augwa king bidi Agak te elibeo, tama me augwaligo te wiegi yai nisai sipsip wai dabe me, nisai bulmakau wai dabe me, elisąwai, magi baso meni, augwaligo te hagela homu yai dao. Augwaligo te sipsip me bulmakau dabe te dwai yali te gasa tobage kibu sibi dabe naga te ela silali.

10 Tama Genuai Bidigo Samuelbolo te tiwai po wali, 11 “Odao. Solgo ena tudiba munama, tama eno po sela sąwanio. Tama tibaso, eno aga te king pedalumainu ilali tama eno tede homu dene mu ebao,” wali. Samuelgo te po odama, tama aga homu sęgę eyu, tama haliga dwai yali. Tama te sogo hulide Samuelgo te Genuai Bidiba hanalu, te olo tau sabo wiegi yai homu kolesaga te Solba emainu yali, tama be posobo side te agai gedu haluasa wali po te silagasu, gedu haluasa po walio.

12 Te kigamu mu Samuel hogodasa peyu, te Sol gegegi pali. Tiali goli, augwaligo agabolo weyu, Sol aga te taun Karmelba pelama, te aga hwįanide te genuai nogi tede sali te sa muyu, te masigi me deli dodoligi pali po wai. Aga te masigi dodolugulama, teda aga te Gilgalba pai. 13 Tialima, Samuel pelama, te Sol sugi pobadi, tama Solgo agabolo te tiwai siade da po wali, “Samuel, te Genuai Bidigo wiegi yai sę bugagia nageba emainao. Eno te Genuai Bidigo po wali pai dao,” wali.

14 Tiali goli, Samuelgo te po agabolo wai, “Mu da, agawe? Tama magi baso eno te bulmakau me sipsip dabe hwa wabo odobawe?”

15 Tama Solgo tama po wei ponani, “Te eno ami bidi dabego te Amalek dabede salio. Augwaligo te sipsip me bulmakau dabe ela muyu silali, tiali goli augwaligo te wiegi wiegi yai te dago Genuai Bidi Godiba ofa yainu sai dao,” wali.

16 Tialima, Samuelgo agabolo te po wai, “Sagia sao. Pedauwali panialuao. Tama eno nagebolo te Genuai Bidigo megi hulide enabolo wali po waibao,” wali.

Tama Solgo te po wai, “Te usu da, nago enabolo wao.”

17 Tialima, Samuelgo Solba te tiwai po wai, “Polobadu naga homugo nage te olo nai tiwai homu yali, tiali goli nage te da Israel hanigo polalubo tobolu bidi pedelali. Genuai Bidigo digi nage sa munama, tama nage te king bidi pedelai dao. 18 Tama agai nage tagala palobaso, te nago Amalek dabe dali hwįgi pali. Tama agai te po wai, ‘Nago hwį hwį pidu genama, tama te tigidali dwai bidi dabe ela silao,’ po wai. 19 Tiali goli, magi baso nago te Genuai Bidigo po wali pabewe? Magi baso dage udada pelama, te Amalek dabego doado bage sigi paliwe? Genuai Bidigo homude dagego te yali dwai kolesaga hagela mu yalio,” wali.

20 Tiali goli, Solgo Samuelba te tiwai po wei ponai, “Menio. Eno te Genuai Bidigo po wali palio. Tama ena pelama, te Amalek dabe dali hwįgi pali, te agai enabolo wali po gilama yali. Tama eno te Amalek we bidi tigidali elali. Tama eno te king Agak odasa asai dao. 21 Dago koneani, Genuai Bidigo aga da wali te kibu sa muna selama, tama agai dabolo weyu ela po wai. Tiali goli, te ami bidi dabego te wiegi wiegi yai kibu dabe naga te e Gilgalba odasa aselama, tama dago Genuai Bidi Godiba ofa eyu elaiba homu eyu odasa asai dao,” po wai.

22 Tiali goli, Samuelgo agabolo te po wali, “Genuai Bidigo dago mena kolesaga ebo godolo ebo dawe? Agai te tobage ofa ebo dabe naga godolo ebo dawe? Ma, te dago agai po wali pomainu homu ebo dawe? Odao. Te agai po wali pabo kolesaga te polasa yaibao. Tama te wiegi yai kibu dabe ofa ebo sę, te nosali badu naga yaibao. Te dago agai po odobo kolesaga te wiegi yai dao, tiali goli te omai sipsip ili siago deyu, tama ofa ilibo, te nosali badu naga yaibao. 23 Magi baso meni. Te Godigo po sela sąbo kolesaga tobage te dwai pobi wabo kolesaga tobage ebao, tama te God dali hagoma ebo kolesaga te tibo god wali pabo kolesaga tiwai ebao. Te tobage kolesaga ebo te dwai kolesaga mu dao. Nago te Genuai Bidigo po tudiba muani, tama tiyu agai nage tudi ola mayu, tama nage king munu me bidigobeo dao,” Samuelgo te po wali.

24 Tama Solgo te tiwai po wei ponani, “Awe. Eno dwai sę yalio, tama eno Genuai Bidigo po me, nago po me, sela sąwani. Ena te ena ami bidi dabede wi ebaso, tama eno augwaligo po wali pai dao. 25 Tiali goli, megi eno homugo te nago eno dwai sę sela sąnama tagalu, tama ena dali aselama, tama eno te Genuai Bidiba lotu waibao,” wali.

26 Tiali goli, Samuelgo Solba te tiwai po wali, “Ena nage dali me pogobeo, magi baso meni, nago te Genuai Bidigo po tudiba muani, tama tiyu agai nage tudiba muyu, tama nage te king munu ma bidigobeo,” wai.

27 Tialima, Samuel te baguasa soyu, painogo yali. Tiali goli, Solgo aga gemainu yali, tama tiyu agai te Samuelgo ugwa sabi badu tola sagasali, tama te ugwa pisila pai. 28 Tama Samuelgo te tebo sulama, tama Solbolo te tiwai po wali, “Te usu da, odao. Megi te Genuai Bidigo te king sę nagede elaluali te sela sąwani, tama nago te Israel dabe munu me tonalugobeo, te nago megi te ugwa pisila sąwani tiwai gilama ebao. Tama agai te gasa Israel bidi me deliba mawaibao. Aga te wiegi yai bidi te nage aiyaba elaluai dao. 29 Nago homugo Godigo te e po hasegelaiba te homu me elamuo. Mu menio. God, te da Israel dabego wiegi yai ula yai bomo agade elalubao, tama agai tibo po me wagobe, ma agai homu me hasegeligobeo. Menio. God te da bidi tiwai meni, tama tiyu agai wali po ma hasegeligobeo,” wali.

30 Tama Solgo po wei ponoyu, te tama po wali, “Mu da, eno dwai sę yalio. Tiali goli, te nage ena dali asobo homu usu eyu da, te eno dago Genuai Bidi Godiba lotu wagowe? Tama tiyu da, nago te tobolu bidi dabe me te gasa we bidi dabego te augwa homu ena bugagia ma konemainu ilao,” te po wai.

31 Tialima, Samuel te Sol dali pelama, tama Solgo te Genuai Bidiba lotu po walio.

32 Nosali Samuelgo augwaliba te po wali, “Te Agak odasa asao, te Amalek dabe augwa king bidi.” Agak te bugai haliga elasa asu, tama tiwai homu yali, ‘Te ena isigobe da,’ homu yai.

33 Tiali goli, Samuelgo te po wai, “Nago bidi hauwa elali, tama megi da, te bidi dabe augwa ida dabego wai meni. Tama tiyu, megi te nago ida me, te ida dabe tiwai gilama pedelaibao,” wali. Tama agai po olama, augwaligo te Agak ela munama, tama aga dwasianu dwasianu te Genuai Bidigo gedude te Gilgal alta pąde te dwasianu tologalio.

34 Tama nosali Samuel te Ramaba ma geasa peyu, tama te king Sol aga be te Gibeaba palio. 35 Tama Samuelgo te Sol gesabidi munu me ma susiąbadi, te aga isiboba usu nani, tiali goli agai te Solde homu kone palu, te aga haliga sęgę mu yalio. Tama Genuai Bidigo Sol te Israel king pedalumainu ilali sęde te aga homu dene mu yai dao.