1 Nosali Samuelgo Israel dabebolo te tiwai po wai, “Dagego odiąo. Eno te dagego enabolo hanalu wali sę tigidali yali, tama eno dageba te dage tonaluabo king bidi me deli mawai. 2 Tama agai ena bidali pesage hasegelama, tama dageba te wiegi yai sunumi ola mawaibao. Tiali goli, ena monu dabe elama, tama ena tobolu nisi te ili nisi yali, tama eno wai dabe te genuai, dage tiwai yalio. Ena te dagego polalubo bidi bidali, te ena gesi ogwa bidide bidada asali, te megi e sogoba usu nagasobao. 3 Dagego eno kolesaga bugagia koneani. Tiali goli, eno dwai sę me deli dageba yaibaso da, teda dagego megi ena te Genuai Bidigo gedude, me te agai sa muani king bidi gedude, te ena po tų iliąo. Te eno bidi me deligo bulmakau me donki te sai dawe? Ma, eno te bidi me deli tibo po ola mayu, tama agai doado bage me wi sai dawe? Ma, eno bidi me delide dwai sę ilaliwe? Te bidi me deligo enabolo te po tų ebo te homu bega sabo po weyu, mone mawai dawe? Eno te tiwai sę me deli yaibaso da, teda megi dagego enabolo te po obaso, tama eno te sę wei ponoyu, tama dodolaibao,” te po wai.

4 Tialima, te bidi dabego po wei ponoyu, te tiwai po wai, “Mu menio. Nago da ili po ola mayu, te nai me deli anoma eyu, ma dwai sę te dabolo me ebeo. Tama te bidi me deli nage homu bega somainu ebo po me wabeo,” wali.

5 Tama tialima, Samuelgo augwaliba te po wai, “Wiegi yai dao. Genuai Bidi dali king bidi agai sa muyu nigilali, te dagego wabo po augwali sigo odali, tama koneani, te dagego eno dwai sę yali me gegebeo.” Tama augwa te po wali, “Mu tama dao. Genuai Bidigo koneanio,” wali.

6 Tama Samuelgo po wadolama weyu, te tiwai po wai, “Awe, God Genuai Bidigo koneanio. Polobadu Genuai Bidigo naga te Moses de Aron si sa muyu nigilali, tama aga digi te duga wąį nǫų dabe te Isip tǫde selama, tama augwali odasa asai dao. [Sai 6:26] 7 Tialima, dagego olo bugagia munama odalubadi, tama eno dage te Genuai Bidi gedude po tų ilaibao. Eno dagebolo te po obao, te Genuai Bidigo bomai sę elama, te dage me ma siyu, te duga wąį nǫų dabe me ma sai dao. 8 Tama tiwai dao. Te wąį monu Jekop te aga we wai dabe dali te Isip tǫba pelama bidigi pali sogo, te Isip bulu bidi dabego te duga wąį nǫų dabeba dwai sę mu yali. Tama tibaso, te augwali tau somainu Genuai Bidiba gela wali, tama agai te Moses dali Aron si augwaliba tagala palali. Tama augwali sigo te wąį nǫų dabe te Isip tǫde selama, tama augwali odasa aselama, te tǫ pedaiba bidagasomainu yai dao,” wali. [Sai 2:23]

9 “Tiali goli, te we bidi augwaligo te dago Genuai Bidi te homugo gegeda palali. Tama tibaso, agai te Moap hani king bidi asomainu ilama, tama augwaliba te boi hwįagaselama, tama augwali aiyaba elaluali. Tama gasa sogo me agai te Sisera, te Hasor genuai taun ami bidi dabego polalubo kepten bidi asomainu ilali. Tama me sogo te Filistia dabe asali. [Tob 3:12; 4:2; 13:1] 10 Tama tiyu, te nǫų wąį dabego te Genuai Bidiba gedu haluasa po wabo bomonama weyu, te augwali tau somainu yali. Augwaligo agabolo te tiwai po wali, ‘Genuai Bidio, dago nage tudiba munama, tama dago te tibo god Balba me te Astarte dabeba lotu po weyu yali. Tama tiyu, dago sęgę salio. Megi dago nageba hanalu obao, te nago da te boi bidi dabego nogode ma dobola sobaso da, te dago nageba lotu weyu, tama nage deli naga wali asaibao,’ augwaligo te po wali. [Tob 10:10-15] 11 Tialima, Genuai Bidigo te augwaligo gedu haluasa po wabo odama, tama agai te Gideon, me Barak, me Jepta, me ena Samuel te augwali tau somainu tagala palali. Da tigidali deli deli dago te ma dobola selama, tama dage Israel dabe bugagia bidibao,” wali. [Tob 4:6; 7:1; 11:29; 1 Sml 3:20]

12 “Tama te tigidali sogo God, dena Genuai Bidi naga, te dena king bidi bidai. Tiali goli, nosali dagego suali, te Nahas, te Amon dabego kingo, te dage dali boi hwįagasainu yali. Tama tibaso, te God dagego king bidi bidibo te dagego homugo hagela yali. Tama dagego enabolo po wagasu, te tiwai po wali, ‘Tagalao. Dago homugo te nago king bidi me deli nigilao,’ wai. [1 Sml 8:19] 13 Tialima, te e dao duga sa muani king bidi. Dagego te Genuai Bidiba te naide hanalu wali, tama Genuai Bidigo aga te dageba mani dao. 14 Tama dage dali, te duga king me, te dena Genuai Bidi God dologode bidao, tama dagego agaba lotu weyu, tama po odoyu, tama agai bomai po wali peyu, tama aga wali sesemane sogo pobaso da, teda te Godigo dage te bugagia mu bidabo pesage mawaibao. 15 Tiali goli, te dagego Genuai Bidigo po odobo hagela ebo homu elama, tama dagego hagoma eyu, tama agai bomai po bolobaso da, teda te Genuai Bidigo tigi dene ilabo sę dageba yaibao, te agai duga wąį nǫų dabeba yali sę tiwai dageba yaibao,” wali.

16 “Tialima, odiąo. Te dagego dwasianu tonalubo gana elama, tama dagego te genuai sę me deli te Genuai Bidigo digi te sę ebo suagameo. 17 Duga koneani, megi sogo te wit ininama tau yai togobo sogo elalubao, tama te tulubage ebo sogo me elalubeo. Tiali goli, megi eno gedu haluasa po obaso, te Genuai Bidigo dagalude te pǫdu te be kulukulu omainu ilama, tama tulubage tagala palaibao. Tama dagego te sę ebo sulama, tama dagego koneaibao, te dagego Genuai Bidiba hanalu, te dage king bidi me deli mao po wali sogo, te dage genuai sęgę salio,” Samuelgo te we bidi dabebolo te po wai.

18 Tialima, Samuelgo gedu haluasa po wali, te sogo bubugade naga Genuai Bidigo te dagalude pǫ kulukulu omainu ilama, tama tulubage tulali. Te bidi dabego sulama, tama augwali te Genuai Bidiba me Samuel dali me te wi dwai mu yalio. 19 Tama teyu, te we bidi dabego te tiwai po Samuelbolo wali, “Genuai bidio, dago homugo te nago gedu haluasa po te Godiba omainu homu ebao, te dago Genuai Bidibolo, tama agaba hanalu, te dabolo olo mu tau sabo wiegi yai homu kolesaga emainao, teda da isimainu me egobeo. Dago te dwai sę hauwa yali, tama megi dago koneani, dago te gasa sę me ma eyu, te dago nageba hanalu, te king me deli sa muyu nigilao po wali sogo, te sęgę me dago salio,” augwaligo te po wai.

20 Tiali goli, Samuelgo te tiwai po wei ponani, “Dage munu me wi elamuo. Mu tama, dagego te dwai kolesaga yali, tiali goli dagego te Genuai Bidi tudiba mumainu me igimio. Menio. Dagego aga wali mu peyu, tama dagego agai sę ebo bomonama yao. 21 Tama dagego te tibo god dabe wali me pelamuo. Augwali te olo nai naga elalu, tama augwaligo dage tau selama, te dage ma dobola sabo usu me egobeo. 22 Te Genuai Bidigo homugo naga te agai dage sa munama, te aga hani bage pedelali. Tama teyu, agai te aga genuai nogi me te aga dąų walali poba homu kone palama, tama agai dage tudiba me mugobeo. 23 Tiali goli, eno digi te eno gedu haluasa po sesemane sogo weyu, te dage tau sabo elalueibao. Ma, eno gedu haluasa po wabo tagaligi sogo da, eno dwai sę Genuai Bidiba igi dao. Te eno munu me egobeo. Tama eno dage te wiegi yai doloba pai kolesaga wali pomainu ola mawaibao. 24 Te Godigo dage tau siyu, te genuai sę dabe dageba yali te homu kone palama, tama dage aga dologode sesemane sogo bidiąo. Tama dagego aga wali mu peyu, tama dagego agai sę bomonama yao. 25 Tiali goli, dagego te dwai sę me idubadi gebaso da, teda Genuai Bidigo dage te duga king bidi dali dolaibao,” Samuelgo te po wai.