1 Te Samuel aga monu dabe ebo sogo, agai aga ogwa si te Israel dabego polalubo tobolu bidi munama, bidali. 2 Te gomunai ogwa nogi Joel, te tomo ogwa nogi Abia. Tama augwali si te Berseba bulude bidiyu, tama te we bidi dabe po tų odama, tama augwaligo po dodoliyu bidalio. 3 Tiali goli, augwali sigo te augwa ayago kolesaga tiwai me wali pabeo. Menio. Augwali sigo te mone sabo homu godolo yai, tama augwali sigo te gasa bidigo homu bega sabo po odoyu, tama tede te mone siyu, tama augwali sigo te ebo kolesaga geda muyu, tama te po tų bugagia me dodolobeo. 4 Tama tibaso, te Israel polalubo tobolu bidi dabe deliba sisinama, tama pelama, Samuel te Rama hanude bidibo sugi pali. 5 Augwali teba sabolama, tama augwaligo Samuelbolo te tiwai po wai, “Odao. Nage monu dabe yai, tama nago ogwa sigo te nago yali wiegi yai kolesaga tiwai me wali pabeo. Tama teyu, dago homugo te nago bidi me deli nogo tų ilama, te da tonaluabo king bidi pedalumainu yaibao. Tama tiyu da, te da te gasa tǫ pedai bidi dabe tiwai pedalumainu homu ebao,” augwaligo te po wai.[Bom 17:14]

6 Tiali goli, Samuelgo te augwaligo hanalu wali pode wiegi yai homu godolo me isiąbaso, tama agai te Genuai Bidiba hanalu, te agabolo mena po walobowe naga te po hanalu wali. 7 Tama Genuai Bidigo agabolo te tiwai po wai, “Te we bidi dabego te tigidali sęde wali po odao,” wai. “Te nago homugo te augwaligo nage hagela homu ebaso, te nage sela sąyabo homu eyu me wabeo. Menio. Augwaligo homugo te ena augwa king bidi bidibo te hagela homu ebaso, tama teyu, augwaligo ena sela sąbao. 8 Bugagia odao. Te eno augwali te Isipde selama, odasa asali, te megiba usu nagasu, te augwaligo ena tudiba munama, tama te tibo god dabeba lotu wai. Tama megi me, te augwaligo nage tudiba mubao. 9 Tama teyu, eno homugo te nago augwaligo po wali pelama, tama augwa king bidi nigilao. Tiali goli, hasia bolo te nago te po augwaliba pusao, te kingo tigidali kolesaga augwaliba yabo po. Tama nago bomai po augwaliba mayu, te augwaligo hanalu wali sęde te homu bugagia kone palomainu yao,” wali.

10 Tialima, te king po agaba hanalu wali bidi dabe bidibo madi te Samuel pelama, tama te augwalibolo te Genuai Bidigo agabolo wali po tigidali augwalibolo wai. 11 Samuelgo te tiwai po augwalibolo wai, “Te dagego king bidi elalubo sogo, teda te kingo te tama sę dabe dageba yaibao. Agai te dagego ogwa dabe te ami bidi nigilaibao. Tama te hwįbo sogo meba te karisde dolalu hwįbadi, tama meba te hosde dualasa peyu, hwįaibao. Tama meba te king aga te karisdu gasaba me painu pabo sogode te asobode udada paibao. 12 Tama agai te bidi meba te 1,000 ami bidigo kepten polalubo bidi, me te 50 ami bidigo polalubo bidi tama nigilaibao. Tama agai te dagego wai mebago te agai gi bulabo tǫ elimainu eyu, tama mebago te agai gide inayu tau yali nai saibao. Tama mebago te hwįabo ene nigaibao, tama agai karisde peyu, hwįabo nai dabe me nigaibao. 13 Tama te kingo te dagego wegi dabe selama, tama augwaligo agai te denami ebo nai sanda nigiyu, tama mebago me te bret, me gasa nai dabe te agai bede ulaibao. 14 Tama agai te dagego wiegi wiegi yai gi nai me, wain gi me, oliv gi me selama, tama aga sę polalubo ofisa bidibolo mawaibao. 15 Tama dagego wit dabe, me wain wai dabe te nogo si wali, te me deli agaba mawaibao. Tama agai te nai dabe te aga sę ebo polalubo ofisa bidiba, me aga sę ebo bidi dabeba mawaibao. 16 Tama kingo te dagego sę ebo bidi dabe me sę ebo we dabe siyu, tama dagego wiegi yai gesi bidi dabe me, te dagego donki dabe me selama, te agai sę emainu yaibao. 17 Tama agai dagego te tigidali nogo si sipsip elalubaso, te me deli agai saibao. Tama agai dage te olo sę ebo bidi pedalubo tiwai ilaibao. 18 Nosali te king pedalubode tama te kolesaga dagebolo ebaso, teda te dagego te duga kingo ebo kolesagade te wado eyu, dagego God Genuai Bidiba po hauwa waibao. Tiali goli, duga digi te king nigilali, tama tibaso, Genuai Bidigo te dagego wabo po me odogobeo.” Samuelgo Genuai Bidigo te wali po sese te bidi dabebolo tama pusali.

19 Tiali goli, te bidi dabego te Samuelgo wabo po odisiąma, tama augwaligo agabolo te tama po wai, “Tagalao, dago homugo te nago king me deli nigilao,” wali. 20 “Da te gasa tǫ pedai badu ebo tiwai pedelama, tama dena kingo da tonalumainu yaibao. Tama agai te dago boi bidi dali hwįgi pabode, te polasa peyu, te dago ami bidi dabe tonalumainu yaibao,” wali.

21 Tialima, Samuelgo te we bidi dabego wabo po odama, tama agai Genuai Bidiba te po wagi pali. 22 Tama Genuai Bidigo Samuelbolo te tiwai po wai, “Tialima, nago augwa po wali pelama, tama augwa king bidi me deli nigilao.” Genuai Bidigo po ola silibo si, tama Samuel pelama, te Israel bidi dabebolo te tiwai po wai, “Dage tigidali te duga buluba ma geasa pelama, tama nosali te eno dage i ma waibao,” wai.