13
1 Tama te king Jeroboamgo aga te alta saide dolaluyu, te ofa nai ulubo sę eyu, alta saide dolaluali, tama te Godigo sę ebo profet bidi me deli aga pageba sabolali. Te profet bidi te Juda hani bidi da, tama te Genuai Bidigo te agabolo “Te Juda tǫ tagalama, tama nage te Betel buluba asao,” wali. 2 Tama te Genuai Bidigo homugo te alta po elalubaso, tama te profet bidibolo te e tama po pusa mao po agabolo ola mani, “Alta sai, ena Genuai Bidi God da, eno nage dali po elalubao. Ogwa me deli, agai nogi e dao, Josaia, te ogwa aga te Devitgo hanidu pedelaibao,” wali. “Tama aga king bidi nigilama, bidibo sogo da, tama agai naga ugwadu te ofa nai ulubo pris bidi dabe selama, tama agai augwaligo augwa tigi te nage baude ugwadu daiba munama, tama augwali elama, isilaibao. Tama agai te isali bidi dabe dili selama, tama te ugwadu nage baude uluyu, tama nage tigidali meda mu ilaibao,” te po wali. [2 Kin 23:15-16] 3 Tama te profet bidigo te po wai, te agai po ma wadolama weyu, te tama po wali, “Megi tama, eno nagebolo wabo pode, te Genuai Bidigo te sę me deli yabo po pusali. Te Genuai Bidigo wali po te dolo mu wayabo homu emainu, te koneama dagalamainu te ola mabo sę gedugo sumainu yabo po wali. Tama te ofa nai ula mabo alta sai auluama, tama te aga pagede munalubo sisi dabe gelaibao,” te po wai.
4 Tama te king Jeroboam te alta saide dolalubadi yaide, te po tama wabo odali. Tialima, agai nogo hodolama, tama te profet bidiba nogo tų eyu, te po wali, tama po wali, “Te bidi pageabi yao,” wali. Tama tialima, te polo tama mu te king Jeroboamgo nogo tama mu dąų olama, tama dolaluali, tama agai nogo aiyaba me elalubo usu meni. 5 Tama me te alta sai me auluama, tama te sia sisi dabe te tǫba tulaluama, pesala sąyani, te Genuai Bidigo te profet bidigo pedauwalidu poba usu nigi soyu tama tiali.
6 Tama tialima, te king Jeroboamgo te profet bidibolo e tama po wali, “Eno homugo nago te Godibolo gedu haluasa po wao,” wali, “naga Genuai Bidi Godibolo wao, tama agai ena tau selama, tama eno nogo ma gesa somainao,” wali. Tama tialima, te profet bidigo te gedu haluasa po wabode te Godigo te king bidi nogo dwagi yai ma ilama, tama te kingo nogo te polobadu tiwai ma ilai.
7 Nosali king bidigo profet bidibolo e tama po wali, “Eno homugo nage te eno beba pelama, tama nage ena dali nai tugi paibao. Tama nage eno te wiegi yai nai me deli olo mawaibao,” te po wai.
8 Tiali goli, profet bidigo agabolo e tama po wali, “Tagalao,” wali. “Tialima, nago homugo te naga mone dabe me maiabo homu eyu da, teya si bugulama, te me badu pedai te ena maiabo homu yali goli, ena te nago beba me pelama, te e Betel bulude te nai me tuyu, ąį me tuyu egobeo,” wali. 9 “Magi baso meni, Genuai Bidigo te po wali, eno te dage dali te nai tuyu, tama te ąį tuyu, me te magi nai me siyu egio po wai. Tama me te ena asali tųdu ma begasa peyu, te ena buluba pogobeo. Menio. Ena gasa tųdu ma paibao,” wali. 10 Tialima, te profet bidi aga te Betel bulu tagalama, tama aga gasa tųdu wali pali. Aga te aga asali tųdu ma pabe.
Te monu dabe bidigo te Juda profet te ili po ola mani po da
11 Tama te tiali sogo, te Betelde te monu dabe profet bidi me deli bidali. Tama aga ogwa dabe asama, agabolo te Juda profet bidi asama, te sogo te Betel bulude yali po dabe agabolo pusali. Tama nosali aga te ogwago te Juda hani profet bidigo te king Jeroboambolo wali po agabolo wali. 12 Tama tialima, te augwa aya monugo augwalibolo e tama po hanalu wali, “Te profet bidi te mena tųdu pabo sualiwe?” Te profet bidi pali tų te aga ogomanigo suai, tama teyu, te augwaligo te augwa ayabolo pusali. 13 Tialima, tama agai augwalibolo e tama po wali, “Dage pelama, te eno donkiba te eno dugabo satel ugwa mugi pao,” wali. Augwaligo tama tibo si, aga te donki kibude dugula siyu, tama aga pali. 14 Tama te monu dabe profet aga te Juda profet bidi pali tųdu aga wali pali, tama nosali agai suali, ma te Juda profet bidi te ni me deli dologode dugulalubo suali, te ni nogi kali. Tama te monu dabe profet bidigo te Juda profetbolo e tama po hanalu wali, “Nage te Juda bulu taga solama, asali profet bidi da, agawe?” Tama te profetgo te po wali, “Awe, te ena tama dao,” wali.
15 Tialima tama, te monu dabe profet bidigo agabolo e tama po wali, “Eno homugo nage eno beba asama, tama ena dali nai tuagasao,” wali. 16 Tiali goli, te Juda profet bidigo agabolo e tama po wali, “Ena nage dali nago beba ma geasa pabo usu egobeo,” wali. “Tama eno nai me, ąį me, e bulu pedaide me tugobeo,” wali. 17 “Magi baso meni, Genuai Bidigo te enabolo te po wai, te bulu pedai badu te nai me tugio, te ąį me tugio po wai dao, me te ena asali tųdu ma begasa soagio po wai. Tama ena ena buluba peyu, ena gasa tųdu paibao,” wali.
18 Tialima, te monu dabe profet bidigo te agabolo e tama po wali, “Ena me te nage tiwai bidi profet bidi dao,” wali. “Tama Genuai Bidigo sę ebo ensel bidi me deli asama, enabolo e tama po wagasali, ena nage ma pelama, nage oda sigi pelama, tama eno nage ma odasa, eno beba pelama, te me badu nai dabe nage mayu, tama me te nage tuabo ąį me mayu yao po wai.” Tiali goli, te monu dabe profet bidigo agabolo ili po ola mani. 19 Tama te Juda hanigo profet bidigo te po odama, tama aga te monu dabe profet bidigo beba pelama, tama te nai tuyu, te ąį tuyu, tama yali. 20 Augwali si te tebol saide tugulaluali, tialima te monu dabe profet bidibolo te Genuai Bidigo po me deli ola mani. 21 Tama te monu dabe profet bidigo moni po dągą mu weyu, e tama po te Juda profet bidibolo ola mani, “God Genuai Bidigo e tama po wali, nago agai wali po sela sąnama, nago agai wali po tų wali pabe. Meni. 22 Nage te eba ma begasa asama, tama te nai tuyu, tama te ąį tuyu yali. Agai te habu selali bulude nago nai dabe tuali. Tama teyu, nage ede isaibao, tama augwaligo te nage naga hani pubalobo gų pagede te nago tigi pubalogobeo,” te po wai.
23 Te Juda hani profet bidi nai tula silali, tama te monu dabe profet bidigo aga te kibu donki dodolama, tama te Juda profet bidi dugulama, pomainu sula tagalali. 24 Tama aga pabo sogo, tama te bulu uni yowi laion me deli asama, tama aga ela muani. Tama agai tigi te tųde munalubo suali, tama aga te donki kibu me te aga tigi munalubo madigi sesegede dolaluyu, bidibo susali, tama te bulu uni yowi laion me te aga tigi munalubo sesegede te pąde dolalubo suali. 25 Tama nosali me badu bidi dabe augwali te tųdu peyu, tama augwaligo suali, te bidi tigi te tųde munalubo suali, tama te bulu uni yowi laion me te bidi tigi munalubo pąde dolalubo susali. Tama tialima, augwali pelama, te Betel buluba pelama, tama te we bidi dabebolo wagi pali, te bidi tigi munalubo suali po augwalibolo pusigi pali.
26 Te monu dabe profet bidigo te tama tiali po odama, tama agai e tama po wali, “Te da, te Juda hanigo profet bidi tigi tama dao,” wali. “Agai te Genuai Bidigo po sela sąyanigo da, tama te Genuai Bidigo te uni yowi laion tagala palama, tama te uni yowi asu, tama aga dolama, tama aga ela muanio, te Genuai Bidigo tama tiaibao wali po usu nigi soyu tama tiali,” te po wai. 27 Te tama tialima, te agai aga ogomanibolo agai e tama po augwalibolo wali, “Eno donki kibuba te dugabo satel ugwa saligi soao,” wali. Tama augwaligo tama tiali. 28 Tama aga te tųdu wali pobadi yaide, tama te aga tonono pobadi yaide, te profet bidi tigi tama te tų dilide munalubo suali. Tama agai subadi yaide, te aga donki kibu dali, te bulu uni yowi laion dali si, te aga tigi munalubo madigi pąde dolalubo suali. Te bulu uni yowigo te agai tigi mi me pedama tube, te agai te donki kibu tigide me te bulu uni yowigo kelama tube, bugagia tama dolalubo suali. 29 Tama te monu dabe profet bidigo te Juda profet bidi tigi selama, tama te aga kibu donki ugwadu te tudi dai badu munama, tama agai te Betel buluba ma selasa pali, tama aga hobede eyu, tama aga gela olama, tama te Juda hanigo profet bidi aga tigi pubulali. 30 Tama te monu dabe profet bidigo te Juda profet bidi tigi te aga hani pubalobo gų pagede te profet bidi tigi pubulali. Tama aga dali, te aga ogomani dali, tama augwaligo hobede genuai mu eyu, gela olama, tama augwaligo e tama po wali, “Hobede mu dao, dago ama. Hobede mu dao, dago ama dao,” tama po wali.
31 Tama augwaligo te profet bidigo tigi pubalobo sę silali, tama te monu dabe profet bidigo aga ogomanibolo e tama po wali, “Te ena isibo sogo, dagego te eno tigi te Godigo profet bidi pubulali gų page pąde te ena me isibo si da, ena me te deli gų pageba naga pubulao,” wali. 32 “Mu tamao, Genuai Bidigo te profet bidigo agai pedauwalidu te tigidali wali poba usu nigi paibao. Genuai Bidigo agai te Betel bulude elalubo ofa nai ulubo alta sai me dolama, tama me te agai te Samaria taun dabede elalubo lotu po wabo pesage me dodolo paibao,” te po wai.
Te king Jeroboamgo agai te sęgę sabo dwai kolesaga me tama edu gęani
33 Te king Jeroboam agai te augwaligo te tama sę pedalobo suali, tiali goli agai te meda yai te dwai sęgę sabo kolesaga me tagalu ebe. Meni. Tama agai te pris sę yabo bidi dabe dąį ilibo sę eyu, tama me te agai te lotu po wabo pesage nigali. Mena olo bidi te aga homugo te pris bidi nigainu homu yali, tialima te king Jeroboamgo aga te tama sę yabo dąį ilibo sę yali. 34 Te king Jeroboam dali, te aga hani dali, augwaligo te tama sęgę sabo dwai meda yai kolesaga me eyu gęani, tama augwaligo augwa te dwai kolesagago sęgę me sę edu gęani. Tama te tiali bagego da, Genuai Bidigo te king Jeroboamgo hani tigidali nosali mu dolali.