1 Te Seba tǫ pedai kantri polalubo we, te kwin wabo we, te kwingo te tama po odali, te Genuai Bidigo te Solomon bugagia wiegi yai ilama, tama te Solomongo genuai nogi elalubo po odali. Tama tiyu, te kwin we aselama, te Solomonba te gegeda pai hanalubo po meba, te Solomon aga usu sabo hanalubo po meba, te agaba hanalu wagasali. 2 Kwin te Jerusalemba asali, te aga sę bidi hauwa dali, te genuai hani kamel dali me asali. Te kamel dabego te gol hauwa mu me, te tobage pauda me, te wiegi yai denami ebo nai dabe me, te gasa sawi yai masigi dabe, te nai dabe sesali. Te kwin we sabolagaselama da, teda agai te hanaluabo homu yali po tigidali te Solomonba hanalu walio. 3 Tama Solomongo agai te hanalu wali po tigidali dolo mu wei ponani. Te hanalu wali po me deli te Solomongo me konesiąwai ebeo. Mu menio. 4 Kwingo te Solomongo koneani wiegi yai homu kolesaga tigidali po odali, tama me agai te kingo genuai be sę yani me suali. 5 Tama kwingo te wiegi yai nai hauwa te tigidali sogo Solomongo sabo suali, te agai ofisa dabe te Solomon dali deliba dualama nai tubo me suali. Tama agai te kingo sę bidi dabe me, te gasa sawi yai ugwa te augwa mubo suyu, te agai te wain wę dobabo bidi dabe me suali. Tama agai Solomongo te Genuai Bidigo tempel beba sela pabo kibu dabe me, te tigidali siaba ulama domainu ofa ebo me suai. Agai te wiegi yai nai dabe tigidali sulama, tama aga midigi mu elama, te aga po mu wabeo.

6 Tama nosali Solomonba agai te tiwai po wali, “Ena te ena bulu tǫ pedaide bidiyu, tama eno te nago ebo sę dabe po, me te nago koneani wiegi yai homu kolesagade po te eno odali. Tama megi da, eno koneani, te tigidali po te mu dao. 7 Hasia eno homugo te mu po da homu me ebeo. Tiali goli, megi da, ena aselama, te ena gedugo digi eno subao. Te mu tamao, te megi eno suali nai dabego te eno odali po te aiyaba elaluali. Te nago koneani wiegi yai homu kolesaga te umabo digi mu igulama, tama te nago mone me doado bage te hauwa mu elalubao,” po wali. 8 “Te nago bidi dabego te wiegi yai homu pemene ebadi bogo dao. Tama naga dali te bidalubo ofisa dabego, augwaligo me te wiegi yai homu pemene ebo homu ebao, magi baso meni, sesemane sogo augwaligo te nago koneani wiegi yai homu kolesagade po te augwaligo odobao. 9 Eno te Genuai Bidi te nago God nogi ugwaba sobao. Agai bugai homu nageba ebaso, te nage Israel king pedalumainu ilali. Agai dage Israel te wei ebo homu umabo mu elama, tama agai te godolo eyu, wei ebo homu te me siligobeo. Tama tialima, agai nage te king pedalumainogo ilama, te nago te po tų odobo sę dolo mu naga eyu, tama te Israel dabe te wiegi yai doloba pai kolesagago tonalumainu yali dao,” te Seba kwin wego te po wai.

10 Tialima, te Seba kwingo te gol hauwa te Solomonba mani, tama te golgo sęgęgo te 4 ton aiyaba elaluali. Tama kwingo te tobage nai pauda dabe te wiegi yai denami ebo nai me, te gasa wiegi yai masigi dabe me mani. Te pauda dabe te hauwa mu tamao. Tama nosali te sogo te tobage denami ebo pauda hauwa te Israel bulu tǫ tomoba me asobeo. [Mt 12:42; Lk 11:31]

11 Te Hiram kingo sip dabe te Ofir tǫ pedaiba pelama, te gol hauwa me, te tobage wiegi yai ni nami me deli te hauwa badi, te gasa wiegi yai masigi me hauwa selama, tama augwaligo te Israelba selasa asali. 12 Tialima, Solomongo te sę bidi dabebolo te wiegi yai ni sao po olama, tama te Genuai Bidigo tempel be au ilabo nai me, te aga be au ilabo nai me nigibadi yali. Tama me agai augwalibolo te wiegi yai ni selama, te gita dabe nigao po wali, te bidi dabego te musik weyu elimainu yali. Tama te sogo nosali te bidi dabego te tobage wiegi yai ni hauwa te Israel tǫ pedaide me susiąwai.

13 King Solomongo te wiegi yai nai hauwa te Seba kwinba mani, te kwingo wei homu ebo te usu nubo sę yali. Tama me te Solomongo digi te gasa wiegi yai nai hauwa te agabolo mawai. Tialima, nosali te kwin aga sę bidi dabe dali te augwa bulu tǫ pedaiba ma palio.

14 Te tigidali kibu bede Solomongo te 23 ton gol siyu yai. 15 Tama agai te tobage bisnis bidi dabede me te takis mone siyu yai. Tama te Arebia bulu kingo me, te Israel tǫ pedai dabede bidibo te polalubo kiap dagego me, te agaba mone mayu yai dao.

16 Solomongo po obaso, tama augwa te sę bidi dabego te hwįbo genuai sabele te 200 nigali. Tama augwa te gol selama, te sabele dabe haluali. Te deli deli ni sabele te golgo sęgę te pąde 7 kilogram tama. 17 Tama augwa te hwįabo dwasianu ni nami sabele te 300 nigali. Tama augwa te gol selama, te ni sabele dabe haluali. Te deli deli sabelede te golgo sęgę te pąde 2 kilogram tama. Tama Solomongo po obaso, tama te sę bidi dabego te tigidali sabele te nogi polali be, te Lebanon Genuai Ni Sili Be, te tomoba muani, te be au iliyu tama tiali.

18 Tama te Solomongo po obaso, tama augwaligo te genuai sia king me deli nigai. Tama augwaligo te wiegi yai gol me, te genuai hasa elefango moni kele dabe me selama, tama te sia sai au ilali. 19-20 Te ugwadu daide muabo sia king te augwaligo te agala sabo madi te me sela, me sela nigali, te siaba holabo digi nigilali. Tama augwaligo te boma pai uni hasa laiongo piksa te nogo si olama, sągągo si nigilama, tama te agala sabo madi dualali. Te agala sabo pesage deli delide te laion si elaluali, te me badu me elalu, te me badu me elalu yali. Tama te sia ugwadu tudi badu te baguasi elaluai. Tama te siade te nogo muabo pesage si elaluali. Te nogo muabo pesage pąde te augwa laiongo piksa si ma nigai, te me badu me elalu, me badu me elalu yali. Te gasa bulu tǫ pedai king dabego te tobage tiwai sia me elalubeo. 21 Te sę bidi dabego te gol selama, tama te Solomongo wę tubo kap dabe nigali. Tama te tigidali plet pou te Lebanon Genuai Ni Sili Bede munaluali, augwa te wiegi yai golgo naga nigai. Augwaligo te nai dabe me deli te silvago me nigibe, magi baso meni, te Solomon bidali sogo augwaligo homugo te silva te olo nai tiwai da homu yali. 22 Solomongo te genuai sip hauwa elaluali, tama te sip dabe te buluba pabo te Hiramgo sip dabe dali bilali. Te sip dabe te kibu be selade biliyu, te gol, me silva, me te elefan kele, me te haniani hasa monki dabe selama, tama augwaligo te Israelba selasa asali.

23 King Solomongo te gasa bulu tǫ pedai king dabe te doado bagego, me monego, me te koneani wiegi yai homu kolesagago te augwali gasa bulu king dabe te aiyaba mu elaluai dao. 24 Te tigidali bulu bidi dabe aselama, Solomon suagasu yali, te Godigo agabolo mani te koneani wiegi yai homu kolesaga te po odainu yai. 25 Te tigidali kibu bede te bidi dabe asiyu, tama tigidaligo te Solomonba wiegi yai homu eyu maiabo nai sesali. Augwaligo te bidi dabego te silvago me golgo nigai nai dabe sela asiyu, me augwaligo te wiegi yai ugwa dabe, me te hwįbo nai dabe sesali, tama te tobage pauda me te wiegi yai denami ebo nai, te hos dabe, me te donki dabe, te sela asiyu yai dao.

26 Te sesemane sogo Solomongo te hwįabo karis dabe, me te aga ami dabego hos dabe sabo sę yali. Tama agai te karis dabe me, te hos me, te hanu meba dabeba munama, te agai augwali tonalumainu sa muani hanuba te augwali muani, tama meba aga dali te Jerusalemde bidali. Agai te hwįbo karis te 1,400, me te hos 12,000 me tama elaluali. [1 Kin 4:26] 27 Te Solomon king bidali sogo, agai te silva me te bǫ ni hauwa te Jerusalemba sesali. Tama te sogo te silva hauwa mu elaluai, te olo masigi dabe tiwai elaluai. Tama te ni bǫ me hauwa elaluali, te olo ni dabe te Israelde te dwasianu bulu dude sai ni dabe tiwai elaluai dao. [Bom 17:17] 28 Solomongo te aga hos dabe te bulu Musri tǫde, me te Silisia tǫ pedaide salio. Agai te bisnis bidi dabe te Silisia tǫba te agai hos dabe abeligi pomainu tagala palai dao. [Bom 17:16] 29 Tama te bisnis bidi dabego te karis me, hos dabe me, te Musri bulude abelali. Te deli deli karis abelali mone te 6,000 kina, me te deli deli hosde te abelali mone, te 1,500 kina dao. Tama te bisnis bidi dabego te karis dabe, me te hos dabe selama, te Hit me Siria bulu king dabeba sela pelama, tama te king dabego abeliyu yai dao.