1 Dagego ena te Judia tǫde bidibo bage tau sabo masigide po hanalu wali. Megi eno te po wei ponoyu, dagego te sisinama Godigo we bidi augwalibolo mawainogo ebo masigi po wabo elalubao. Te sę yabo sunumi eno te Galesia moni tǫde bidibo Godigo po odobo we bidi hani dabe augwalibolo ola mani, tama dagego me te tiwai gilama yao. [Ro 15:25-26] 2 Te tigidali Sande dage tigidali deli deligo te hasia Sarere sę elama sali mone tede homugo koneama, tama te bugulama tama me badu te duga bede bugagia munalumainao, te tiwai saboao. Tama nosali ena sabolobode, teda dagego augwali maiabo mone gegebo sę me egobeo. 3 Nosali ena dage bidibo digi sabolobode, teda duga digi te mone sela pabo bidi meba nogo tų elama, dagego te tau sabo masigi dabe te moni hanu Jerusalemba sela pomainogo yaibao. Tama dagego pas dabe asęnama, tama augwalibolo menama, tama augwali teba tagala palaibao. 4 Tama ena me ena pabo homu ebaso da, teda augwali ena dali hodobo paibao.

5 Eno tede sę me elalubaso, eno e bulu Efesus tagalama tama hasia ena te Masedonia moni tǫ pedai teba paibao. Te moni tǫ tomodu biliyu, tama tede eno sę silibo si, tama ena dage bidibo madi pedalaibao. [Tpi 19:21] 6 Tama sabolama, tama ena dwasianu sogo te dage dali bidabo homu ebao. Ena kuna konebe, te ena dage dali bidibadi te moni kedau ebo silibo sogoba usu nagasaibao homu yai. Tama nosali ena gasa buluba sę egi paibao, te mena bulu te megi eno konebeo. Tialima ena gasa buluba painogo ebode, teda dagego te pabo sunumiba ena odasa pelama, tama tau siyu tagaligi pagameo. 7 Ena megi te Masedonia tǫba pobadi ena dageba asigi sogo da, teda ena dage dali dwasianu sogo naga bidibo usigi da. Te ena hagelabo. Dago Genuai Bidigo usu da po obaso da, te ena Masedonia tǫde elalubo sę silama tama dageba asama, tama ena dwasianu bobage sogo dage dali bidabo homu ebao.

8 Tiali goli ena e Efesus bulude bidibadi te Juda dabego moni nai tubo sogo nogi Pentikos pedalobo sogoba usu nagasomainu homu ebo dao. 9 Magi baso meni, Godigo eno sunumi dalobaso, tama eno te we bidi hauwa te Godigo po wali pomainogo tau sabo sę genuai elalubao. Tama ena dali boi bidi homu ebo bidi dabe me hauwa ede elalubao.

10 Te nosali Timoti dage bidibo madiba pedalobo si da, teda dagego bugagia tonalu te aga dage tomode wi isąyu homu nagame elama dua digi bidimainao. Magi baso meni, agai Genuai Bidigo sę eyu, te eno digi ebo sę tiwai ebo bidi dao. 11 Tama tibaso, bidi me badugo aga te olo nai tiwai bidi da homu eyu, tama aga tudiba me munamuo. Menio. Dagego aga homu nagame ilama, tama nosali aga te enaba asabo sunumiba bugagia tagalagaselama, tama aga ena pageba asomainogo yao. Eno te ama dede meba dali aga asobo tonaluaibao.

12 Tama dago ama Apolos, te agade po te tiwai dao: te hauwa sogo eno po agabolo bomo elama weyu, te aga ama dede dali augwaligo dage suagasomainogo po wai dao. Tiali goli aga pabo hagela homu mu yai. Nosali, te aga pabo sogo suali usu ebaso da, teda aga dageba sabolagasaibao.

13 Dagego bugagia tonaluyu, tama te Kraisde konealubo pode bomo elama bugagia dolaluao. Dage bidi mu sesemane sogo bidiyu, tama bomo elama bidaloao. 14 Tigidali sę dagego ebo, dagego dwagi yai homu te Godibolo me te we bidi dabe augwali dali eyu, tama dagego duga sę tigidali iduao.

15 Ama dedeo, dagego te bidi Stefanas dali aga hani dali koneani, augwali te gasa Akaia tǫ pedai hani bidi dabe augwaligo Godigo po wali pabo gagalisąbadi te augwalibolo polasa te Godigo po wali pabo hani we bidi pedalama tama megi bidibao. Tama augwa digi homugo augwaligo te Godigo po odobo we bidi augwali tau sabo sę salio. Eno homugo dage te tobage we bidi augwali 16 dologode bidimainogo homu ebao, tama tigidali bidi dabego augwali tau selama, tama te sęde sę bomo elama ebo dao. 17 Tama Stefanas me Fortunatus badi te Akaikus, te bage augwali ena bidibo madi asali, tama eno homu wiegi yai pemene yalio. Magi baso meni, dagego ena tau somainogo eyu eba asabo te usu isąbaso, tama augwali selago dage hasegelama, tama augwali ena bidibo madi asai dao. 18 Augwaligo ena homu me, tama dage homu me nagame ilali. Tama tiyu dagego te tobage tiwai bidi dabe augwali nogi ugwaba sao.

19 Te moni tǫ pedai Esiade te Godigo po odobo we bidi augwaligo te giligade dao po dagebolo obao. Te Akwila de aga we Prisila dali, te Godigo po odobo we bidi te augwali sigo beba sisinibo bage, augwaligo dage dali dwagi yai homu eyu, dagebolo te Genuai Bidigo nogide siade dao po hauwa obao. [Tpi 18:2] 20 Tama tigidali Efesusde bidibo ama dedego siade dao po dagebolo wali. Te da Godigo we bidigo kolesagade, dage tigidali deli deligo te ama dedebolo wiegi yai homu eyu augwali nogo mayąo.

21 Ena Pol da, te ena digi eno nogogo te siade da po asęna dagebolo tolobao. 22 Bidi me deli aga homugo te dago Genuai Bidi Krais dali dwagi yai homu ebo hagela homu eyu da, te bidi agabolo dwai sę pedalomainao. Genuai Bidi, nage asao!

23 Te eno homugo te Genuai Bidi Jisasgo olo tau sabo wiegi yai kolesaga te dage dali bidao.

24 Te Krais Jisasgo yali sęde te da tigidali hodobo deliba wadoloyu bidibo dao. Tama tiyu, eno dage dali dwagi yai homu eyu godolo eyu bidibao.