1 Eno ama dedeo, te Godigo Tedali Mobo Bidigo te haniani sę yabo homu kolesaga dabolo mabode, te dagego tede gisiga konesiąma bididali weyu eno tede dage homu dodolabo po me megi pusaibao. 2 Dagego koneanio, polobadu dagego te Godigo po odisąbadi, te sogo augwaligo haniani kolesaga ebogo dage te po meni yai tibo godiba kekasa pelama, tama dagego augwali wali naga piduai dao. 3 Tama tibaso, eno homugo dagego hania koneao, te Godigo Mobo Bidi te bidi me deli dali bidama tama agabolo po mobaso da, te bidigo te po me wagobeo, “Jisas hagamainao, agaba dwai sę pedalomainao,” te po munu me wagobeo. Me ma, te Tedali Mobo Bidi meni yani bidigo “Te Jisas da, te Genuai Bidi dao” po wabo te usu me egobeo.

4 Te Godigo Tedali Mobo Bidigo haniani sę yabo homu kolesaga dabolo olo mu mabo dao, tiali goli te Godigo Mobo Bidi deli naga elalubao. 5 Tama dago dena hasi haniani tau sabo sę ebo, tiali goli dago Genuai Bidi deli naga bidibao. 6 Te haniani tau sabo sę ebo homu kolesaga elalubo, tiali goli te God deligo naga te tigidali bidibolo bomo dali homu kolesaga dali si menama, tama augwaligo tigidali tau sabo sę ebo usu yaibao. 7 Te Tedali Mobo Bidigo aga bomo te tigidali we bidi deli delibolo pedalobo dao. Tama elama, tama augwali deli deligo te mani bomogo te Godigo po odobo we bidi hani tau sabo usu yaibao. 8 E tiwai dao. Te Godigo we bidi hani tomode te bidi me delibolo te Tedali Mobo Bidigo te we bidi dabebolo te Godigo wiegi yai homu kolesaga ola maiabo homu kolesaga agai olo mabo dao. Tama te gasa bidibolo te Tedali Mobo deligo naga te Godigo kolesaga te we bidi augwaligo bugagia konemainogo te po pusubo sę ebo homu kolesaga mabo dao. 9 Tama te Tedali Mobo Bidigo gasa bidi mebolo te bomo mayu, tama te bidigo Godiba aga homu tigidali mayu agaba tialubo kolesaga, te kolesaga bomo menama tama te bidigo homu si isiąbadi tama agai genuai sę ebo usu dao. Tama gasa bidi mebolo te haniani gasi yai we bidi dabe usu ilabo bomo te Tedali Mobo Bidi deligo naga mabo dao. 10 Tama gasa bidi mebolo te Tedali Mobo Bidigo te haniani bomai sę yabo bomo mabo dao. Tama gasa bidi mebolo te Godigo po pusabo kolesaga agai mabo dao. Tama mebolo te haniani dwai haubo noma bidi dali te dwagi yai noma bidi dali dagalabo kolesaga agai mabo dao. Tama gasa bidi mebolo te Godigo Mobo Bidigo te tǫde bidibo we bidigo homugo konesiąwai po wabo kolesaga mabo dao. Tama agai me te gasa bidi me delibolo te hasia bidigo wabo po begelabo kolesaga olo mabo dao. 11 Eno megi tama nedada pali haniani sę yabo homu kolesaga augwali tigidali te Godigo Mobo Bidi deligo naga te nigibo dao. Te aga homugo digi agai te gasa sę yabo kolesaga te gasa bidi me delibolo dobayu, tama gasa bidi mebolo te gasa sę yabo kolesaga mayu ebo dao. [Ro 12:6-8]

12 Te bidi Krais da te bidigo tigi me deli tiwai dao, tama te tigigo nogo sągą me, te haniani nai hauwa te elalubao. Tama te tigigo haniani gasagi gasagi yai nai hauwa elaluali goli, te tigi deli naga dao. 13 Tama da me te tiwai elalubao. Te da meba te Juda hani da, da meba te Juda hani bidi ąǫ isąwai bage dao, meba te masigi sisąbo olo sę ebo we bidi da, meba olo sę isiąwani we bidi dao. Tiali goli te Tedali Mobo Bidi delide naga da tigidali te baptais selama tama deli tigi poaį naga pedelali, tama Godigo te Tedali Mobo Bidi deli naga dabolo mawai dao. [Ro 12:4-5]

14 Te bidigo tigide, te dago koneani, te tigi te deli badu naga me elalubeo. Menio. Te aga haniani sę yabo nai elalubo dao. 15 Te sągągo te tiwai po wagi sogo da, “Ena te nogo meni, tama tibaso ena te tigide me wadoalubeo,” te sągą aga togolama tedali agaduba elalueibao wabo digi, tagalao. Te meni. Aga te tigi badu naga me wadoalubo dao. 16 Tama ologo te po wagi sogo da, “Ena te gedu meni, tama tiyu ena te tigide me wadoalubeo,” te olo aga togolama tedali agaduba elalueiba wabo digi, tagalao. Te meni. Aga te tigi badu naga me wadoalubao. 17 Te tigi sesede te gedu naga elalugi sogo da, magi ilama te agai po odaibawe? Tama te tigi sese te olo naga elalubaso da, teda magi ilama agai te nai denami ebo odaibawe? Meni, te tiwai usu egobeo. 18 Tiali goli tigi te tiwai me elalugobeo. Menio. Godigo aga digi homu wali peyu, te tigi tigidali badu te haniani sę yabo nai deli deli muna muna pali, te aga digi godolo yainogo tiwai dao. 19 Tama tigi sese te deli sę yabo nai naga elalugi sogo da, teda te tigi mu te menade elaluaibawe? 20 Tiali goli te tiwai me egobeo. Menio. Te tigi badu haniani sę hauwa yabo nai elalubao, tiali goli te tigi deli naga elalubao.

21 Tama tibaso, gedugo te nogobolo te po wabo usu me egobe, “Te nogo, nage bidigi menigi sogo da, te enaduba deli ena bugagia bidigi dao.” Tama tobolugo me sągą bolo te po me wagobeo, “Te sągą, nage bidigi menigi sogo da, te enaduba deli digi ena bugagia bidigi dao,” te po wabo usu me egobeo. 22 Mu menio. Te tigi dabe badu dago te bomo meni homu yali, te me elalusiąwani da, teda te tigi bugagia me elalugobeo. Mu menio. 23 Tama te tigi dabe badu dago homugo augwali te dwasianu dwali homu yali, te dago augwali bugagia tonalubo dao. Tama te tigi wiegi yai isiąwani dabe badu, tede dago hale idali weyu, dago augwali te gudubo ugwago halua sabo dao. 24 Tiali goli te dago augwalide hale isąbo badu, te dago gudubo ugwago halua sabo menio. Tiali goli Godigo te tigi dabe tigidali te deli badu wadolai elalubao. Tama me badu augwali te nogi meni yai tiwai elaluali, teda agai augwalibolo te nogi ma mayu ebo dao. 25 Agai tama tiwai ebaso, te augwali tedali me pebeda pogobeo, menio, te tigidali deli deli badu te augwaligo augwa hasi te gasa badu te deli sę tiwai naga eyu bugagia tonalumainogo ebo dao. 26 Tama tiyu te tigi me badu pedai badu dene eyu da, te tigidali badu dwai bidaibao. Tama me deli badu te nogi sobaso da, te tigi tigidali badu augwaligo te aga dali wiegi yai homu yaibao.

27 Tialima dage da, da tigidali deliba wadolama, tama dage da te Kraisgo tigi tiwai dao. Tama dage deli deli te Kraisgo tigigo haniani sę yabo badu dabe dao. 28 Tama te Godigo po odobo we bidi hani tomode Godigo aga digi te sę dodolama, tama tigidali bidi te haniani sęba muani. Te hasia te po sela pabo bidi dabe nigilali, te si wali te Godigo po pusabo bidi dabe, te sela wali te agai po ola mabo tisa bidi dabe muani. Te dabe tudi badu nosali te bomo menama, te bomai sę ebo bidi dabe nigilali. Tama nosali ma te gasi yai bidi dabe usu ilibo bidi dabe elalubo, tama te we bidi dabe tau sabo bidi me, tama te haniani sę dabe tonaluabo bidi dabe muani, tama haniani homugo konesiąbo pogo po wabo bidi nigilai. [Ef 4:11] 29 Magi yaliwe? Te Godigo po odobo we bidi hani tomode te tigidali bidi te Godigo po sela pabo sę ebo bidi dabe bidibo dawe? Ma, tigidali te po pusabo bidi bidibawe? Ma, tigidali te po ola mabo tisa bidi bidibawe? Ma, tigidaligo te bomai sę ebo bomo elalubawe? 30 Ma, tigidaligo te gasi yai bidi dabe usu ma ilibo bomo te elalubo dawe? Ma, tigidaligo te haniani homugo konesiąbo pogo po wabo dawe? Ma, te tigidaligo te gasa bidigo wali po begelebo sę ebo usu egowe? Mu menio! 31 Tiali goli dagego bomo eyu tama godolo elama, te Godigo dabolo olo mabo agai we bidi hani tau sabo bomo tigidalide te polali nai sao.

Tama megi eno dagebolo te polalubo tų mu me deli te dagebolo ola maiabo homu ebao.