1 Dagego te ena Pol dali, Apolos dali, Pita dali te dade dagego homugo kone paluyu tama koneao, da te Kraisgo sę ebo bidi dabe tama Godigo te geme dualalubo po pusuyu tonalubo bidi dabe dao. 2 Tama te sę tonalubo sęde te tiwai bomai po elalubao: te sę ebo bidigo te sę idubadi aga te agabolo te sę mani bidi dali homugo kęą pai bidi bidao. 3 Tiali goli te dage, ma te bidi me deligo po tųgo te eno te sę ebo kolesaga dagalainogo da, teda eno homugo te magigo meni. Magi baso meni. Ena digi me te ena sę ebo kolesaga te me dagalabo menio. Tiali goli te usu dao, po meni. 4 Mu tama, te Godigo enabolo mani sę ebode eno homugo eno te sęde sǫą pabeo, bugagia yai dao. Tiali goli te eno tama tiwai po wabo usu me egobe: “Ena doloba pai bidi da,” te wagobeo. Te ena dagalobo sę ebo bidi te Genuai Bidigo sę naga dao. 5 Tama tibaso, te sogo me elalubadi, te dago Genuai Bidi asisąbadi dagego te gasa bidi mego ebo kolesaga dagaligio. Aga asama tama agai te we bidi augwaligo augwa homu tomode geme dualaluali po tigidali selama te ulaba muagasaibao. Tama tigidali bidigo homu kolesaga hania hanilaibao. Tama te sogo Godigo da tigidali deli deli bidi te dago yali sę osola sulama, tama te sę usu baso agai te sę yali bidigo nogi ugwaba saibao. Bidi deli deligo yali sę usu nama te aga nogi te tama naga ugwaba saibao.

6 Ama dedeo, eno homugo dage tau sabo homu elama, tama eno te ena dali Apolos da side te tamadi tama wali po wali. Dagego homugo da side homu koneama, tama te Godigo po bukude wali po tiwai gilama dolo wali peyu tama te po me boligio. Tama tiyu dagego hagoma eyu tama bidi me deligo nogi ugwaba siyu tama gasa bidi mego nogi aiyaba munu me elalugio. 7 Abagi, magi yaliwe? Dego nage genuai bidi muai dawe? Tama nago mena nai te Godide sisąwani nai elalubowe? Te mu tama nago te nai Godide saligo da, teda magi baso te nago naga nogi ugwaba siyu, te naga digi nage te nai page bidi da wainogo ebawe? Te hagoma ebo tagalao.

8 Awe, dagego homugo te dagego haliga pągąna palio! Dagego homugo te dage tigidali nai elalu tama dage usu yai elalubao. Te dagego da aiyaba elaluama, tama dage te gavman tuni bidi king tiwai pedalalio! Mu tama dawe? Woo, te duga homu naga dao. Eno homugo dage te tuni bidi king mu pedalomainao. Dage tama tigi sogo da, teda da me dage dali te tuni bidi dabego bomo elalugi da. 9 Magi baso meni, eno te homu yali: Godigo te da aga po sela pabo sę bidi da te nosali badu mubo bidi tiwai ilama bidibao. Da te po tų yali bidi dabe da olama tama da isimainu emainao wai. Tama augwaligo da tigidali te ensel dabe me te tǫde bidi dabe dali augwaligo gedude da elainu homu yali, te tigidaligo da dali gisugu mawainogo yali. 10 Te Kraisgo nogi ugwaba sainu, da te tǫde we bidigo gedude te kolesaga geda muyu te polobo bidi tiwai bidibo dao, tiali goli dage te Kraisgo kolesagade te kolesaga koneai bidi tiwai bidibao. Dage bomai we bidi mu bidimainogo eyu tama dago dena digi bomo meni yai bidi dabe ilali. Dage genuai wiegi yai nogi elalubao, tiali goli dago nogi meni yanio. 11 Polobadu me tama bidada asali te megi e sogoba me usu nagasali, da Godigo po sela pabo bidi dabe, da nai sili bidiyu, tama dago dogoni me wa peyu ąį nogone ebo, tama da badi ugwa naga elaluali. Augwaligo nogo tudi badu da eliyu ebo dao. Tama da bugagia dulalu bidabo pesage meni yai dao. 12 Dago dena nogogo digi masigi dena tigi tau sabo sę eyu dene mu ebo dao. Augwaligo dwai posobo po dabolo wabo, tiali goli dago augwali bugagia bidabo po naga augwaliba ponoyu ebo dao. Augwaligo dabolo dwai sę eyu, te dene mabo kolesaga ebo, tama augwaligo te tiwai sę eyu dago sula tagalama, te sęgę bugagia tolobo dao. [Tpi 18:3] 13 Augwaligo po dwai mu da dali weyu ebo dao, tiali goli dago homu nagame ilibo po dua digi augwaliba weyu ebo dao. Da te tigidali tǫ pedaide bidibo bagego gedude te dwai pobele bage tiwai mu gagawali. Da te tigidali bidigo gedude te nai ulubo genagide nai kagali te ąįgo sela sąbo meda yai nai tiwai dao. Da te tiwai bidali, te megi e sogoba usu nagasu te tiwai me bidibao.

14 Te ena dali Apolos da si hobedagia bidibadi dage bugagia te po asęanigo te dage hale eyu dwai bidimainu homu me ebeo. Menio. Eno wai puluba tiwai dage eno dwagi yai homu eyu godolo ebaso, tama eno dage homu tau sabo po ola momainu obao. 15 Te mu tama dage te Kraisgo kolesagade te dage bugagia tonalubo bidi te bidi sese umabo te 10,000 bidi elaluyu da, tagalao, te dagego aya hauwa me elalubeo. Menio. Te da Krais Jisas dali wadolobo kolesagade enaduba deli ena te dagego aya tiwai bidibao. Dage eno te Kraisde wiegi yai gesi po pusama, tama dagego te po odolama tama Krais wali pabo gagalali. Tede te dage eno wai puluba pedalali. 16 Tama tibaso, eno dage te eno kolesagade usu selama bilimainu tama dage eno hodolobo te usu dao, ena da dagego aya tiwai dao. 17 Tama tibaso, te kolesagade naga eno te bidi Timoti dageba tagala palali. Aga te eno ogwa tiwai da, tama eno aga godolo mu eyu aga ena dali te homugo kęą pai bidi dao. Te agai dagego homu ma hodoliyu, te eno Kraisgo kolesagade wali pabo sunumi wali pomainu homu hodolaibao. Eno te tigidali bulude te Godigo po wali pabo we bidi hani tigidaliba te kolesaga naga ola mabo dao.

18 Te dage tomode bidi meba augwaligo homugo te ena dageba asogobe homu eyu, tama augwali hagoma ebao. 19 Tiali goli menio. Te Genuai Bidigo homu usu yali da, teda ena dage bidiboba polo asaibao. Tama eno te hagoma ebo bidi dabego wabo po naga konegobeo, te augwaligo te Godigo sę yabo bomo me elalubowe ma meniwe, te me eno koneaibao. 20 Magi baso meni, te Godigo bidi deli tonalubo si, te bidigo ebo sęde naga dago God aga dali bidibo te konebo dao. Aga wabo pogo naga dago konegobeo. 21 Dagego mena kolesaga godolo ebowe? Te dagego homugo eno te dage dodolabo dono wąbi tolasa ena dageba asomainogowe? Ma, dagego homugo eno te dage dali dwagi yai homu eyu godolo ebo kolesaga me, te homu nagame ebo kolesaga elalubo te eno dageba sela asomainogo homu ebo dawe?