1-2 Te da tigidali te nabis buluba bugagia sabola silali. Tama te bulu page bidi dabe augwaligo dwagi yai kolesaga elama, da tau sali. Tama augwaligo dabolo te po wali, “Te e tamu ąį tomode elalubo bulu nogi Malta dao,” wali. Tama augwaligo moni sia nogwani. Te sogo tulubage be yali, da tigidali kedau mu yali, tama te siade da kedau tuali. 3 Te Pol agai dwasianu isi dabe sesa bilama, te isiba ulagasali. Te dwasianu ni me si tomode hasamani me deli bidali, agai sube. Tama te isigo hasamani tigide dabo si, tama te hasamani posoga palunama, Pol nogode gąų kelanani. Te tobage hasamanigo kelanai bidi polo isibo da. 4 Tama te sogo te bulu page bidi dabe augwaligo te hasamani Pol nogode walalubo sulama, augwali moni noma selama, augwa hasi tomode po umabo weyu, te po wali, “Te bidi agai gasa bidi elabo bidi dao,” te homu geda muani. “Tamu ąįgo aga elebe. Tiali goli, te god me deli, agai nogi Dwai Kolesaga Dodolobo god, agai homugo aga elainu yali, te hasamani bidi isibo nabi aga tigide munalubo hasamani gąų kelali,” te po wai. 5 Tiali goli Pol agai nogogo te dwai hasamani hogola sąnama, te hasamani isi tomoba tuloluali. Tama Pol tigide dene ebe, aga bugagia bidali. 6 Tama te bidi dabe augwaligo tonaluama, augwaligo aga te hasamanigo kelali madigi dabe delama, aga polo degasa pelama, isibowe naga suenu tonaluali. Tiali goli, augwaligo tonalubadi, bobobage sogo mu bidibadi, te Pol aga tigi dene ebe, tama aga isibe. Tama te we bidi augwaligo moni homu elama, augwa homu begelama, te po wali, “Te bidi aga god me deli dao,” wali.

7 Te bulu pąde te me badu tǫ deli elalubo, te tǫ te bidi me deli agai tǫ da. Tama te bidi te Malta tǫde bidibo we bidi augwa tobolu bidi deli da, te bidi nogi Publius. Tama te bidigo da agai beba odasa pelama, da agai bugagia nai ula mayu bidali. Tama da sela sogo aga dali bidali. 8 Tama te sogo te Publius aga aya moni gasi selama, bede pila mubo. Aga te gasi si sali, me haligadu kaneme yali, me tigide moni posolo yali. Tama Pol aga pelama, aga suali. Tama Polgo Godibolo po olama, agai nogo te gasi bidi toboluba muani. 9 Agai te gasi sela sąnama, ma dwagi yai bidali. Augwaligo Polgo te tibo sulama, te Malta tǫde bidibo gasi yai we bidi tigidali Pol pageba sisali. Tama Pol agai te gasi yai bidi gasi sela sąsą pela silama, augwali ma dwagi yai ilali. 10 Augwaligo dabolo dwagi yai kolesaga elama, haniani dwagi yai nai da olo mani. Tama nosali da pabode augwaligo tigidali nai dago habuge yali nai augwaligo selama, te moni gebaba munai.

11 Te hasia da te Malta tǫde bidibadi, polua sela silali. Tama nosali da te gasa moni gebaba holali. Te moni geba page bidi te Aleksandria be nanide bidali. Tama agai tibo god nogi koneama, te tibo god nogi te moni geba sip gesabi badu daganai elaluali, “Deli sogo ame nai ogwa si da,” te po wali. Tama te Malta tǫde bidu, te moni wali dabe, te moni tulubage me sia sabo tonalu tede bidali. Tama dago augwali taga pali.

12-13 Tama da te moni gebadu pelama, te moni be nani nogi Sirakyusba sabolama, tede sela sogo bidali. Tama da Sirakyus tagalama, moni gebadu ma palio olama, te bulu me nogi Regiumba sabolali. Tama do kigamu wali me da asali badu geba tudi badu asali. Tama tego da tau selama, da pidubadi, be me huliama, me sogo kigamu da bulu me nogi Puteoliba sabolali. 14 Tama te bulude Jisasgo po wali pabo we bidi tede bidalubo suali. Tama augwaligo da augwali dali bidao wali. Te po baso, da augwali dali Sarere deli bidali. Tama da, dago augwali taga pelama, tǫdu naga pidubadi, moni genuai hanu nogi Rom teba sabolali. 15 Da Romba sabalisiąbadi, Jisasgo po wali pabo we bidi augwaligo da asobo po odama, da tų tomoba augwaligo tiąba asali. Tama me badu digibulu bobenu gana aselawali, maket me nogi Apiusde dago suali. Tama me badu aselama, te bidigo osogo abelama pibo be sela elalubo digide dago suali. Pol agai Jisasgo po wali pabo we bidi suyu, Godibolo nage usu dao wali, tebogo aga homu dąų walobao, te homu yali.

16 Te da Rom tomoba sabalobo si, gavman tobolu bidi dabego Pol agaduba bidabo pesage osogo abelama, bidimainu yali. Tiali goli, tigidali sogo enesigi bidi deligo tonaluali, Pol wi pidali weyu tiali.

17 Te bidi Pol aga Romde sela sogo bidama, Romde bidibo Juda hani tobolu bidi dabe “Dage ena pageba asiąo,” Pol agai te po wali. Tama augwali aselama, Polgo te po wali, “Abagi dede, polobadu ena Jerusalemde bidai dao. Tama dago hani dali eno dwai sę me yai menio. Tama dago nǫųgo po me sela sąwai menio. Tiwai goli, te pode ena kalabus yai dao, Jerusalemde. Tama augwaligo ena Rom gavman genuai bidi pageba ena po tų emainu sela pao wali. 18 Tama Rom gavman genuai bidigo enabolo te yali sę po augwaligo odalio. Tama Rom gavman genuai bidigo eno magi sę me, ena isabo sę me yai sube, te po wali. Augwaligo homugo ena buluba tagala palainu yai digi. 19 Tiali goli, Juda bagego ena kalabus emaina olama, bomo mu yalio. Ena te Juda dabego nogode dią pabo tų me meni yani. Tama tibaso, eno te po wai, ‘Ena Rom gavman genuai bidi Sisar pageba tagala paliąo, agai ena po tų ela momainu,’ wali. Tiali goli, ena te Juda bagego po tų ela mawainu eba asai menio. 20 Tama tibaso, eno dage megi asomainu hanalu obao. Magi baso menio. Enade augwaligo yali sę dagego me konemainu obao. Megi dagego e konemainu, ena e aligabo bonogo ena nogo si megi augwaligo kęai dao, kalabus bidi ebo ąǫ yalio. Magi basowe? Eno homugo te da Israel bage tonalubo bidi te Godigo dabolo nosali mawaibao, tama te sogo pedalobo eno tonaluyu bidibo dao. Tama tibaso, augwaligo ena kalabus mawai dao,” te po wai.

21 Te Juda dabe mego Polbolo te po wai, “Te Juda bidi dabe augwaligo nagede po pusumainu dabolo pas me tolobe. Be bidi me Jerusalem badu asama, nagede dwai po me pusagasobe. 22 Tiali goli, bidi hauwa mu me badu asama, dabolo tama pusalio, te Jisasgo po wali pabo bage da mu hagela ebo po pusali. Tiali, Jisasgo hanigo ebo homu kolesaga dago sueo,” te po wali. 23 Tama augwaligo Polgo wabo po ma odomainu, dua yabo bodolu me muani. Tama we bidi hauwa mu Polgo bodolu mani digi asali. Pol agai te Godigo homugo we bidi tonalubo sę po augwalibolo pusali. Tama Pol agai Mosesgo polobadu asęani po dabe me, polobadu Godigo po sela bilali bagego asęani po dabe me, pusa mani, te po dali daganama pusali, te augwaligo Jisasde po mu daba homu emainu. Tama te po pusubo kigamu mu gagalama, pio muba sabolali. 24 Tama we bidi me badu augwaligo Polgo wali po mu dao homu yali goli, meba we bidigo te mu da homu ebe. 25 Tama augwaligo po hauwa dogia pali. Tiyu augwaligo haliga digi deli ebe. Tama tibaso, Pol agai po me deli pusali, “God agai Dwagi Yai Mobo Bidi agai te Godigo po sela bilali profet bidi nogi Aisaia te bidibolo po me deli olama, tolalio, dagego nǫų mu dabebolo. Te po dageba me dolo te wabose,” te po wali. 26 “Godigo Aisaiabolo te po pusa wali,

28 “Tama te po dage dolo mu te waliao. Tiali, dagego koneao. Tama Godigo da we bidi sela pabo tų po tama te Israel hani isąwai we bidibolo tolai yali. Tama te po augwaligo mu odaibao,” Pol agai te po wai. 29 Tama tilama, Polgo te po silama, augwa pebelayu, konila bomonama mu ela pali.

30 Te kibu be si Rom bulude agai osogo abelai bede bidali. Tama aga te bidibo bede mone gego aga digi abeleduali. Tama aga pageba te we bidi hauwa asobaso, dwagi yai homu yali. 31 Tama agai Godigo homugo we bidi tonalubo sę po te we bidibolo pusa mani. Tama agai te Genuai Bidi Jisas Kraisgo po pusa mayu, aga hale me ebe. Tama agai te po pusubadi, bidi mego ‘Nago te wabo po tagalao,’ te po wagasobe, bidi mego habu selebe.