1 Junni firara tinanun deinunbi, Páblori piyanle Jesucrístobe penenaminlaca jasa tinue. Junto yalaca payitobi, jinayoe tito, Macedonia toca jinue. 2 Aman junni Macedóniase polenato, Jesucrístobe penenaminlaca tsara sonba tenca suwade jinaminue. Junsi griégolachi tobi fanue. 3-4 Junni peman pe fecári junte nenatobi, Siria toca barcochi jichinayoe tie. Junni in tsachila Páblobe Asia to fecári peaconpanaino jominlae: Beréabi nechi Sópater jominhe. Junsi Tesalónicabi nechi Aristárcobe Segúndobe jominlae. Junsi Dérbebi nechi Gayo jominhe. Junsi Asia to tsachila Tíquicobe Trófimobe jominlae. Aman yalanan, Timotéonan Páblobe pejano jominlae.

Junni jinola inasa israelítalari nosa tenpato, Pábloca toteno tenca calaquinue. Junni Páblori junca tenhito, Macedóniase necanan manjichinayoe tie yape yaca totelaquitusa. 5 Junni Páblobe labe necanan manjilainasanan, amicolari caquenan barcochi jito, Troas fecári tule jilainue. Junbi caquenan chiquilaca meralaranue. 6 Páblobe labe manan griégolachi tobi nechi loto, Filipos pueblo fecári nedechi jito, junte barcobi wilaiyoe casa ma poletobi. Junni mante maca barcochi jitobi, chiquilanan Tróabi felaiyoe. Junni junbi siete ma raminlayoe.

7 Junni tominco maca Jesucrístobe penenaminla layailaie Jesucrístoca tenca cato bibu pisuleto fichun. Junbi Páblori micarinaminhe. Aman ayuna nanchi jino joto, quitsa quepen fecári micariniquee. 8 Jamobi tamochi layaito, duque lanparin chuteto chuminlayoe. 9 Junnasanan manca moso Eutico tinun, bentanate chuminue. Junni Páblori wan fecári micarinasanan, Euticochi duque capiya janue. Junto Euticori catsonamin peman decan lowabi nechi darapatito puyanue. 10 Junni Páblori patito, puyacaca amanto tiliito, itsantie:

—Wepanatulajona! Sonnan joe tie.

11 Junni Pablo manlotobi, bibu pisuleto fitobi, ano filaquiyoe. Junsi tseino fecári micaritobi manjilaiyoe. 12 Junni Euticoca duque pansi joto sonca mantanjilaie.

13 Junni junbi nechi jito, chiquila Asón tinun puebloca barcochi jichinaminlayoe. Junni Páblori Asón fecári nedechi jichinayoe tie. Junbi barcobi manwíyanae tito jie. 14 Junni chiquilari Asonbi Páblobe mantulailaiyoe. Junni yanan barcobi pewito, Mitilene tinun pueblobi felaiyoe. 15-16 Junsi junbi nechinan barcochi jinato, ayuna nanchi Quío tinun pisase polelaiyoe. Junsi junhayuna nanchi Samos tinun pisabi felaiyoe. Aman Páblori Jerusalenca duque wewe jichi tinaminhe. Pode jotori, Pentecostés fiesta mate Jerusalenbi rano muquee tie. Jun tenchi Asia tobi nenano jola itoyoe tito, Efeso pueblobi wituminnan polenilaiyoe. Junsi Trogíliobi nasi jasaito, ayuna nanchi Mileto pueblo fecári jilaiyoe.

17 Junni Páblori Milétobi nechi Efeso pueblo fecári fiqui manherenue Jesucrístochi tsachila tala mantá tanla yachica jalaideque. 18 Junni yala jalainunsi, Pablo yalabe itsantinue:

—Nulari laca tsara miralarae tie. Asia toca casale janunle nechi nulabe seque chumin jomanyoe. 19 Fe joyoe tituto, nulaca duque laquirato, Miya Jesucrístobe seque mantaito nenamin jomanyoe tie. Israelítalari laca totechique duque tenfelainasanan, Diosibe seque mantainiinamanyoe. 20 Tiletiya, nulachi yabi o layainun yabi, nulaca micariniquimanyoe jeleratuto. Jera miintsan jonunca nulaca micaricayoe. 21 Israelítalacanan, israelita itonlacanan, jeralelaca micarimin jomanyoe tie. Diosichi ichun jutsa quinunca telaquepoto casan tala tenca mancalaquede! timin jomanyoe tie. Chiquilachi Miya Jesucrístobe cayailaide! timin jomanyoe tie. Tsanque jera micarimin jomanyoe.

22 Junni amanari Diosichi Tenca laca Jerusalenca jisa carinae tie. Junni lari miitoyoe ¿junbi niyaiichunancan? 23 Tsan josanan, pueblo cura Diosichi Tenca laca man cosari miisa carinae. Tsachila laca doto, seiton quilaquichunae tie. Nantari miitoyoe tie. 24 Tsanquinola josanan jeleratiyoe. Miya Jesucristo lachi mantaca cuwaca joe yape sen fiquica micarisa. Diosiri tsachilaca laquirato jutsaca piyarimin joequenan micarino joyoe. Jun fiquicari micarino pode jotori, puyanoca natiya jeleratiyoe tie.

25 Junsi Páblori Jesucrístochi tsachila tala mantá tanlabe cacuenta quinato itsantie:

—Aman nulachibi micarinato, Diosi mantananun tsachi bolonla niyan jonola jonunca jera micarito nenamanyoe tie. Junni amanale nechi nulari laca natiya manquiralaquituchunae tie. 26 Aman manquiraino itoto, nulabe amana tsarasica pato itsantino muquee tie. Diosi mocatiya casticaquinari, lachi culpa itochunae. Ya casticaiminchinan culpa jochunae tie. 27 La natiya jeleratuto, Diosi jera paca junca nulabe manpolariyoe.

28 Junni nulanan tencabe nenato, Miya Diosichi tsachilaca seque payito cuidailaina! tie. Miya Jesucrístochi tsachi bolonla jolajoe. Yachi asanchi yalachi jutsaca piyarica joe. Junni Diosichi Tenca nulachi mantá cuwaca joe yape yachi tsachilaca micarito cuidailaisa. Junni seque cuidailaina! tie. 29 La itonte seitonque palaque micariminla jalaichunae tiyoe tie. Papun lobo cuwenta joto, Jesucrístochi tsachilaca yucapiyarichique tenfelaichunae. 30 Nula talanan manca manca palaque micarimin ilaichunae tie yape Diosichi tsachila Jesucrístoca telaquepoto yalaca tennalarasa.

31 Junni lari peman wata fecári nulaca payito micarinamanyoe tie. Quepen, malon nula jeralelaca duque laquirato micarinamanyoe. Junni junca mantenhito, tencabe nenalarana! tie. 32 Junni aman Diosibe rocainayoe tie yape nulaca seque cuidaisa. Diosiri Jesucrístobe penenaminlaca sen suwamin joe tie yape yachi jolajosa. Junto inale Diosi yachi jerale tsachilachi tenchi nantanancari seque quichunae. Junni nulanan Diosichi fiquica jera meralaquinari, nulachi tenchinan tsanquenan seque quichunae tie. Diosichi fiquiri sen fiqui joe Diosi nulaca laquirayoeque. Nulari jun fiquica seque meralaquitori, sonban tenca ilaichunae tie.

33 Junni Pablo cacuenta quinato itsantie:

—Lari nulachite micarinato, uyanlachica natiya munaito quiratucayoe. Uyanlachi calaca o oroca o tsanpaca munaito quiratucayoe tie. 34 Nulari miralarae. La ticatiya munajanari, trabajaquito cala camin jomanyoe. Labe penenaminlachinan cato cuwayoe trabajaquito. 35 Miya Jesucristo itsantinue tie: Cuwamin tsachiri caminca fe pansi jochunae tinue tie. Junni jun fiquica tenca cato, podeituminlaca ayudainola joyoe tie. Yape nulanan tsanque ayudaino miilaisa, lanan jun tsanquenan podeituminlaca ayudaimin jomanyoe tie.

36 Junni Pablo tsanque cuenta quetobi, jeralela telenhito Diosibe rocailaiyoe. 37 Junni tsachilari duque warenato, Pábloca amanhito, motilatie tsanle manjinae tito. 38 Yalari Pábloca manquiranola itochunae tinun tenchi fécari duque laqui jominlanue. Junni Páblolabe barco fecári peaconpanaito manjilaie.