Apudok Shup Douk Shenekap Panam Eshesh Hibru Iri
Banenyi Baraen Um Enyudok Baraen Shenyem Nyanak Um Eshesh Hibru
1:1-3 Iruhin ananin baraen nyatogur nyanawereh yopugunum, um Iruhin ananin atun nuganin Jisas Krais douk nape abom namudok atin kabi Yain Iruhin um
1:4—2:18 Jisas neshagrakuk ihishmorim enselahos
3:1—4:13 Jisas neshagrakuk Moses
4:14—6:20 Jisas anan douk apakin Debeini pris douk nenek ofa um anan kanak um Iruhin
7:1-28 Jisas anan douk nape debeini pris abom neshagrakuk Melkisedek.
8:1—9:28 Jisas anan debeini pris douk nasuhw merik um enyudok Iruhin ananin namunyi baraen kontrak. Aria ananibor owishibor douk benek enyudok kontrak nyatogur dodogowin abom.
11:1—12:29 Sabaishi seiwok shenek bilip um Iruhin iri douk sheyabigap yopihi aih um apak mugipesheh.
13:1-25 Yopihi aih apak ta mugipesheh um munek Iruhin nunadudareh- umap.
1
Iruhin Ananin Nuganin Nanaki Nakripap Iruhin Ananin Baraen
1 Seiwok sabaibi nyutob, Iruhin nakrip amam profet douk hakripesh ananin baraen iri aria hanaki hakrip apakish popehesh yamehesh ananin baraen. Hakripeshen sabaihi sisigih yeh. 2 Aria douk ehudok hagiguk iri nyumneh, ananin baraen douk nakripi ananin Nuganin meyoh nanaki nakripapen. Aria douk, Iruhin douk nagraehan um ta nugrem ihishmori eneshenesh eshudok shuni arpesh shopunek. Seiwok baugos um, Iruhin nakrip ananin Nuganin aria nenek iruhw iri atap shani ihishmorim eneshenesh eshudok shani arpesh. 3 Anan douk neyabigap abom um agundok Iruhin dodogowin atun aria natrugun um. Anan douk nadukem Iruhin abom. Mutik anan um obi nyutob douk matik Iruhin abom. Anan douk napeum neyagwreh dodogowinyi baraen aria agudok nahobig gani iruhw utag iri ihishmorim eneshenesh eshudok shape dodog. Anan douk shan owishibor bakwrupuk apakish yoweishi inahos matogur yopup. Douk nataurumap namudok aria nato heven nakih nyeigur nyato iruhw nape yopunyi rogur ehahum anudok dodogowin atun abom iri Iruhin.
Jisas Douk Nyeigur Nyato Iruhw Uman Neshagrakuk Iruhin Ananish Enselahos Abom
4 Iruhin ananin Nuganin douk natogur dedeben atun neshagrakuk eshesh enselahos douk sharahaen um Iruhin ananin baraen iri. Um maresh? Agundok Iruhin nahwaran Nuganin um douk neshagrakuk abom agundok nahwar eshesh enselahos um. 5 Seiwok, Iruhin madae nukrip enen atin ensel namudok uwe, uwok. Nakrip ananin Nuganin atun. Nakripan namudok nakri,
“Nyak douk eikin Nuganin.
Doukih eik yawereh baraen um agundok eik yape nyakin Yain um.”
Shopunek anabik douk nakripan nakri,
“Eik ta itogur ananin Yain, aria anan ta nutogur eikin Nuganin.”
6 Aria shopunek, abudok nyutob Iruhin nakri nishopoki ananin narik iri Nuganin nubuhi agundok atap obi nyutob, anan douk nakri,
“Ihishmorim eikish enselahos ta shunek lotuman
shutuk ananin nyeigur nyuto iruhw.”
7 Aria eshesh enselahos, Iruhin douk neyagwreh-umesh enyudok nakri,
“Eik yenek enselahos um shunekume mour shunaki shunak kabi uhwin nyahur um
o kabi nyih purareh hanu hato dodogowih atih um.”
8 Aria Ananin Nuganin Iruhin douk nakripan namudok nakri,
“Iruhin, Nyak ta nyupe um nyupe Debeinyi namudok atin ihih nyumneh.
Nyasuhw yopihi aih aria ta nyupe Debeini king
um ihishmorim eneshenesh eshudok shuni arpesh shupe wosik.
9 Nyak urkum munawasham abom um yopihi aih
aria yoweihi douk nyakri uwok-umeh abom.
Namudok aria eik nyakin Iruhin yatrin nyape Debeini abom um
ihishmorim eshudok douk nyak nyani eshesh pape atugun iri.
Eik douk yenekesh-umen namudok aria yeneken nyanadudareh nyariguk abom.”
10 Shopunek Iruhin nakripan nakri,
“Debeini, seiwok watak baugos um nyak kanak nyakwarum agundok atap.
Iruhw utag douk shopunek nyakwu nyakis wis nyenekag.
11 Iruhw atap aria eneshenesh eshudok
ta burukworesh shunak shuwishuk, aria nyak uwok.
Ta nyupe abom namudok atin.
Iruhw atap aria ihishmorim eneshenesh eshudok ta yowesh kabi rupeh yoweh um.
12 Yoweh aria nyak ta nyudareshuk kabi shadaresh anah debeihi rupah um.
Ta shunak shuwishuk kabi shawaruk yoweihi rupeh
aria shor namuhi um.
Aria nyak kanak ta nyupe abom namudok atin ihih nyumneh.”
13 Shopunek nakrip ananin Nuganin nakri,
“Nyak poe agundok eikin yopunyi rogur ehahum nyupe arigaha eik ibo nyakim horim hubuhuk hupe shakamum nyak.”
Enyudokmori baraen, Iruhin douk madae nukripesh atin uwe eshesh enselahos, uwok. 14 Namudok aria eshesh enselahos douk meishi? Eshesh douk mishish meyoh douk shenekuman mour Iruhin iri. Anan apa neshopokesh shanaki shataurum eshudok arpesh douk ta nuraesh aria shutanamori shuni anan shupe wosik abom iri.