Chru JĂNG 18

PƠNUAĬ PƠĐÌ-PƠĐOA, PƠNUAĬ MƠTAI, SƠ̆NG PƠNUAĬ HƠDIŬ WƠ̆ YÀNG JÊSU

(Mư̆ng tăl 18:1 truh tăl 21:22)

Apùh Getsemane. Yàng Jêsu Kơđòng Aràng Mă

(Mathiơ 26:47-56; Mak 14:43-50; Luka 22:47-53)

1 Hơdơi tŭ iơu-lài, Yàng Jêsu nau sơ̆ng du mơnih tui-mơgru truh gah dih c̆roh ia Ketrôn. Tơ anih nư̆n hũ sa boh apùh, Pô sơ̆ng du mơnih tui-mơgru nau tơma lăm nư̆n. 2 Juđa, mơnih pơblơ̆-dră Pô, kŭng thơu anih ni, kơyoa Yàng Jêsu sơ̆ng du mơnih tui-mơgru jiăng pơtòm-pơjŭm gơŭ tơ anih ni. 3 Yơu nư̆n, Juđa ba sa tơrpuơl lĭng găm sơ̆ng du mơnih dò tơ ala gơnuăr du mơnih gơnuăr apăn-akŏ pơyă phơ̆n duh-dơlbăt sơ̆ng mơnih Pharisi, apăn apui đèng, apui sơnuh, sơ̆ng đào-sơdrà truh tơ anih nư̆n. 4 Yàng Jêsu thơu abih tơgrơ̆ bruă hơgĕ rơŭ tơbiă truh tơ drơi, nư̆n yàm truh bloh tơnia: “Buơl guhã duah aràng sơi?” 5 Buơl guñu đờm: “Duah Jêsu, mơnih Nasaret.” Yàng Jêsu đờm: “La rùp-phŭn Kơu ni!” Juđa, mơnih pơblơ̆-dră Pô kŭng dò dơ̆ng tơ anih nư̆n sơ̆ng buơl guñu rơi. 6 Tŭ Yàng Jêsu đờm: “La rùp-phŭn Kơu ni,” nư̆n buơl guñu gơdŭn wơ̆ sơ̆ng lơbuh tơ ala lơ̆n. 7 Pô tơnia buơl guñu sa amăng tra wơ̆: “Buơl guhã duah aràng sơi?” Buơl guñu đờm: “Duah Jêsu, mơnih Nasaret.” 8 Yàng Jêsu đờm: “Kơu hũ đờm sơ̆ng buơl guhã bơjơ, la rùp-phŭn Kơu ni. Yơu nư̆n, yah buơl guhã duah mă Kơu, nư̆n luơi bĕ du mơnih ni nau.” 9 Pơnuaĭ ni hũ tơbiă iơŭ yơu pơnuaĭ Pô hũ đờm: “Anà 'buh luơi lơhiă sa aràng mơnih lơi lăm du mơnih Ama hũ jào tơ Anà.”

10 Tŭ nư̆n, Simôn Pier hũ sa 'bĕ đào; Pier suă đào tơbiă, ngă mơnih hơlŭn-hơlă mơnih gơnuăr prŏng apăn-akŏ pơyă phơ̆n duh-dơlbăt, tă kloh tơnia gah hơnuă mơnih nư̆n. Mơnih hơlŭn-hơlă nư̆n angăn la Malc̆u. 11 Yàng Jêsu đờm sơ̆ng Pier: “C̆rò bĕ đào hã tơma lăm srŭm! C̆uàn bloh Ama hũ jào tơ Kơu, hơyơu Kơu 'buh mơñŭm ơu?”

Yàng Jêsu Tơ Anaŭ Anne. Pier Kơmlah 'Buh Thơu Yàng

(Mathiơ 26:59-75; Mak 14:55-72; Luka 22:55-71)

12 Tŭ nư̆n, buơl lĭng, mơnih apăn-akŏ buơl lĭng, găm sơ̆ng du mơnih dò tơ ala gơnuăr buơl làng Juđa mă Yàng Jêsu sơ̆ng c̆aŭ wơ̆. 13 Dơlhơu biă, buơl guñu ba Pô truh tơ Anne, kơyoa Anne la ama-tămhã Kaiphe. Kaiphe la mơnih gơnuăr prŏng apăn-akŏ pơyă phơ̆n duh-dơlbăt lăm thŭn nư̆n. 14 Rùp-phŭn Kaiphe la mơnih hũ đờm bơyai sơ̆ng mơnih Juđa lài: “Yah luơi sa aràng mơnih kŏng mơtai ala tơ abih buơl làng, nư̆n sơđaŭ kwơ rơlau.”

15 Simôn Pier sơ̆ng sa aràng mơnih tui-mơgru pơkơ̆n nau tui Yàng Jêsu. Kơyoa hũ mừng-thơu sơ̆ng mơnih gơnuăr prŏng apăn-akŏ pơyă phơ̆n duh-dơlbăt, nư̆n mơnih tui-mơgru ni tui Yàng Jêsu tơma truh 'blàng dơrlăm sàng-glăng mơnih gơnuăr prŏng apăn-akŏ pơyă phơ̆n duh-dơlbăt. 16 Bloh Pier nư̆n dò dơ̆ng tơ agàh jĕ bơh 'băng prŏng. Kơyoa nư̆n, mơnih tui-mơgru dih, la mơnih hũ mừng-thơu sơ̆ng mơnih gơnuăr prŏng apăn-akŏ pơyă phơ̆n duh-dơlbăt, tơbiă nau đờm sơ̆ng mơnih kơmơi kraŭ-khiă bơh 'băng prŏng, bloh nư̆n ba Pier tơma. 17 Mơnih kơmơi dò kraŭ-khiă bơh 'băng prŏng đờm sơ̆ng Pier: “'Buh iơŭ kơi kŭng la sa aràng lăm du mơnih tui-mơgru mơnih nư̆n ơu?” Pier đờm sơđồ: “'Buh iơŭ dơlhă ơu!” 18 Kơyoa glai mơrềt, nư̆n du mơnih hơlŭn-hơlă sơ̆ng du mơnih lĭng khiă-gàr c̆uh sa puk apui, bloh nư̆n dò dơ̆ng tòmdăr apui tô pơđau. Pier kŭng dò dơ̆ng tơ anih nư̆n, dò apui sơ̆ng buơl guñu rơi.

19 Mơnih gơnuăr prŏng apăn-akŏ pơyă phơ̆n duh-dơlbăt tơnia Yàng Jêsu mư̆ng du mơnih tui-mơgru Pô sơ̆ng mư̆ng du pơnuaĭ pơto-akhàn Pô. 20 Yàng Jêsu đờm: “Kơu hũ đờm loh-làng tơ anaŭ plơi-lơgăr. Kơu jiăng pơto-mơblàng lăm du sàng pơtòm, sàng duh-dơlbăt, la anih du mơnih Juđa pơgùm-pơtòm, Kơu 'buh đờm bơdơŭ tơrđơŭ pơnuaĭ hơgĕ. 21 Kơđa hơgĕ hã tơnia Kơu? Tơnia bĕ du mơnih hũ păng Kơu đờm. Rùp-phŭn buơl guñu thơu tơgrơ̆ pơnuaĭ Kơu hũ đờm.” 22 Tŭ Yàng Jêsu dò đờm yơu nư̆n, hũ sa aràng lăm tơrpuơl mơnih dò tơ ala gơnuăr buơl guñu hũ mơta anih nư̆n, mă tơngàn pah găn 'bò Pô, sơ̆ng đờm: “Hã khĭn đờm sơđồ yơu nư̆n sơ̆ng mơnih gơnuăr prŏng apăn-akŏ pơyă phơ̆n duh-dơlbăt?” 23 Yàng Jêsu đờm: “Yah Kơu đờm sŭng, pơto bĕ anih sŭng tơ Kơu c̆ơ; bloh yah Kơu đờm iơŭ, nư̆n kơđa hơgĕ hã ngă Kơu?” 24 Anne pơđăr ba bơnau Yàng Jêsu sơđaŭ dò c̆aŭ yơu nư̆n truh tơ Kaiphe, la mơnih gơnuăr prŏng apăn-akŏ pơyă phơ̆n duh-dơlbăt.

25 Tŭ Pier sơđaŭ dò dơ̆ng suơ apui tơ anih 'blàng agàh, nư̆n du mơnih dò dơ̆ng tơ anih nư̆n tơnia Pier: “Sơ-ai kŭng la sa aràng lăm du mơnih tui-mơgru kơi nư̆n rơi, iơŭ ơu?” Pier kơmlah sơ̆ng đờm: “'Buh iơŭ dơlhă ơu.” 26 Sa aràng lăm du mơnih hơlŭn-hơlă mơnih gơnuăr prŏng apăn-akŏ pơyă phơ̆n duh-dơlbăt, hũ gơŭ-găn sơ̆ng mơnih bloh Pier tă kloh tơnia, đờm: “Dơlhă sơdơ̆r, rùp-phŭn dơlhă hũ 'buh kơi lăm anih apùh găm sơ̆ng mơnih nư̆n rơi, iơŭ ơu?” 27 Pier đờm kơmlah sa amăng tra wơ̆; tŭ nư̆n mư hũ săp mơnŭ kơ-iòk.

Yàng Jêsu Tơ Anaŭ Pilat

(Mathiơ 27:1,2,11-14; Mak 15:1-5; Luka 23:1-5)

28 Ờm prŭ hơrơi nư̆n, buơl guñu ba bơnau Yàng Jêsu mư̆ng sàng Kaiphe truh tơ sàng-glăng Pilat, la kwăng apăn-akŏ du c̆àr lăm lơgăr. Rùp-phŭn buơl guñu 'buh tơma lăm sàng-glăng, tô klàh kơđòng sơŭ-sơnoh, sơ̆ng tô hũ 'bơ̆ng pơnuaĭ pơjŭm 'bơ̆ng Nau-Găn. 29 Kơyoa nư̆n, Pilat nau tơbiă tòm buơl guñu sơ̆ng tơnia: “Buơl guhã yă mơnih ni mư̆ng glài hơgĕ?” 30 Buơl guñu đờm sơđồ: “Yah mơnih ni 'buh iơŭ la mơnih ngă pơnuaĭ mơsak-jơhà, nư̆n buơl dơlhă 'buh jào ñu tơ mơnih kwăng ơu.” 31 Pilat đờm sơ̆ng buơl guñu: “Buơl guhã kừ ba ñu nau, sơ̆ng c̆ahrơña tui adăt-adia buơl guhã.” Mơnih Juđa đờm: “Buơl dơlhă 'buh hũ gơnuăr ngă nìn-glài pơmơtai aràng sơi ơu.” 32 Pơnuaĭ ni tơbiă iơŭ tơpă yơu pơnuaĭ Yàng Jêsu hũ đờm, tŭ đờm truh bruă Pô păl mơtai hơyơu lơi. 33 Pilat gài tơma wơ̆ lăm dơrlăm sàng-glăng, pơđăr mơnih ba Yàng Jêsu truh sơ̆ng tơnia Pô: “Hũ iơŭ hã la Pơtau buơl làng Juđa ơu?” 34 Yàng Jêsu đờm: “Mư̆ng hơtai rùp-phŭn kơi đờm pơnuaĭ nư̆n, halài hũ mơnih lơi pơkơ̆n đờm sơ̆ng kơi mư̆ng Kơu?” 35 Pilat đờm sơđồ: “Kơu hũ iơŭ la mơnih Juđa rơi? Buơl làng hã sơ̆ng du mơnih gơnuăr apăn-akŏ pơyă phơ̆n duh-dơlbăt hũ jào hã tơ kơu. Yơu nư̆n hã hũ ngă pơnuaĭ hơgĕ?” 36 Yàng Jêsu đờm: “Lơgăr Kơu 'buh găm sơ̆ng dun-ya ni. Yah lơgăr Kơu găm sơ̆ng dun-ya ni, nư̆n du mơnih tui Kơu hũ tămngă bơjơ, 'buh luơi Kơu kơđòng jào lăm tơngàn mơnih Juđa. Bloh lơgăr Kơu 'buh găm sơ̆ng dun-ya ni.” 37 Pilat đờm: “Yơu nư̆n hã la pơtau làh?” Yàng Jêsu đờm: “Iơŭ yơu pơnuaĭ đờm, Kơu la pơtau. Ni la pơnuaĭ phŭn kơđa hơgĕ Kơu hũ tơbiă rài, kơđa hơgĕ Kơu hũ truh lăm dun-ya: Nư̆n la tô ngă grơh tơ pơnuaĭ-tơpă. Aràng sơi găm sơ̆ng pơnuaĭ-tơpă nư̆n păng pơnuaĭ Kơu.” 38 Pilat tơnia Pô: “Pơnuaĭ-tơpă la hơgĕ?”

Hơdơi tŭ đờm yơu nư̆n, Pilat nau tơbiă tòm mơnih Juđa wơ̆, sơ̆ng đờm: “Kơu 'bu 'buh mơnih ni hũ glài hơgĕ ơu. 39 Bloh buơl guhã hũ adăt-lơđăp ni, kừ truh pơnuaĭ pơjŭm 'bơ̆ng Nau-Găn, nư̆n kơu toh-tơleh tơ buơl guhã sa aràng mơnih glài jàm. Yơu nư̆n, buơl guhã hũ khiăng kơu toh-tơleh pơtau buơl làng Juđa tơ buơl guhã ơu?” 40 Buơl guñu driau prŏng lài: “Juơi toh-tơleh ñu, bloh yòng toh-tơleh 'Baraba!” 'Baraba la sa aràng mơnih blơ̆. *

*18:40 18:40 Kŭng hũ bơ-àr wă: 'Baraba la mơnih kơđòng glài jàm kơyoa tơgồ tămdră-wơ̆ sơ̆ng gơnuăr apăn-akŏ ia-lơgăr sơ̆ng pơmơtai mơnih.