Chru II KÔRINTÔ 6

1 Kơyoa la du mơnih hũ ngă bruă sơ̆ng Yàng Pô Lơngì, nư̆n buơl dơlhă yòng lơkơu kơkơi buơl adơi-ai: juơi ngă tơ pơnuaĭ anĭt-brơi-soh bloh buơl adơi-ai đồ-mă hũ mư̆ng Yàng Pô Lơngì tơbiă jiơ̆ng pơnuaĭ 'buh kwơ-màng. 2 Kơyoa Pô đờm lài:

“Kơu hũ păng pơnuaĭ hã lăm hơrơi-tŭ hơnàn-siàm,

Kơu hũ anĭt-dŏng hã lăm hơrơi dŏng-pơklàh.” *

Dih, tŭ ni la tŭ-hơrơi hơnàn-siàm; dih, tŭ ni la hơrơi dŏng-pơklàh!

Pôl Tơpă Sa Hơtai-Hơtiàn Lăm Tơgrơ̆ Pơnuaĭ Pơlòng-Ơñiai Mư̆ng Gơnuăr-Bruă Drơi

3 Buơl dơlhă 'buh ngă pơnuaĭ sơnĕ lơbuh tơ aràng sơi, tô gơnuăr-bruă drơi 'buh kơđòng aràng puaĭ 'buah. 4 Bloh lăm tơgrơ̆ mơta, buơl dơlhă mĭt ràng-tơbiă drơi la hơlŭn-hơlă Yàng Pô Lơngì, lăm pơnuaĭ kơjăp hơtai-hơtiàn kŏng ă-ư̆n, lăm tơgrơ̆ pơnuaĭ pơđì-pơđoa gleh-glăr, lăm tơgrơ̆ pơnuaĭ siơŭ kơđòng, lăm du tŭ sơnư̆ng kơ-ù, 5 lăm tơgrơ̆ amăng kŏng aràng pờng ngă, lăm tơgrơ̆ tŭ kŏng jàm-krơ̆, lăm tơgrơ̆ amăng aràng tơgồ ngă sơlŭng-sơlăng klùk-klờk, lăm du tŭ ngă bruă gleh-glăr, lăm du mơlăm 'buh hũ đih, lăm du hơrơi 'buh tơ̆l 'bơ̆ng, 6 lăm pơnuaĭ goh-sơc̆ih, lăm pơnuaĭ jak-thơu, lăm pơnuaĭ kŏng ă-ư̆n, lăm pơnuaĭ lơnguh-siàm, lăm Yàng Bơngă Sơc̆ih-Sri, lăm pơnuaĭ anĭt-rơnăm 'buh lơ̆r 'bơ̆r, 7 lăm tŭ pơto-akhàn pơnuaĭ-tơpă, sơ̆ng lăm gơnăp-gơnuăr Yàng Pô Lơngì. Buơl dơlhă angui pơnuaĭ rĭng-tơpă ngă phơ̆n tămngă lăm găm tơngàn gah hơnuă sơ̆ng tơngàn gah ơñiau; 8 tŭ màng-kơc̆rà kŭng yơu tŭ mơlơu alah; tŭ kŏng đờm pơtiơ̆ng jơhà kŭng yơu tŭ hũ đờm tiơ̆ng-mơyòm siàm. Buơl dơlhă kŏng aràng c̆ơ yơu la du mơnih lơ̆r pơ̆ng-gơla, bloh la mơnih tơpă-tơpe; 9 kŏng c̆ơ yơu du mơnih c̆rih 'buh hũ aràng sơi thơu, bloh la hũ lô mơnih thơu truh; kŏng c̆ơ yơu kơjĕ mơtai, bloh biă buơl dơlhă sơđaŭ hơdiŭ; c̆ơ yơu kŏng ngă glài, bloh 'buh kŏng pơmơtai; 10 c̆ơ yơu dơnuh-dơnà, bloh mĭt-mĭt sờh-sài; c̆ơ yơu siơŭ rơ'bah, bloh hũ ngă tơ lô mơnih tơbiă jiơ̆ng mơda gơn-hư̆p; c̆ơ yơu 'buh hũ hơgĕ, bloh hũ tơ̆l tơgrơ̆ mơta.

11 Ơ buơl adơi-ai mơnih Kôrintô, buơl dơlhă đờm tơpă hơtai-hơtiàn sơ̆ng buơl adơi-ai, hơtai-hơtiàn buơl dơlhă pơh lơnàng. 12 Hơtai-hơtiàn uơ̆n-rơnăm buơl dơlhă pioh tơ buơl adơi-ai 'buh tŭ lơi luĭ, bloh rùp-phŭn hơtai-hơtiàn buơl adơi-ai 'buh pơh lơnàng sơ̆ng buơl dơlhă. 13 Dơlhă đờm sơ̆ng buơl adơi-ai yơu đờm sơ̆ng du anà dơlhă: Ngă bĕ sơ̆ng buơl dơlhă yơu buơl dơlhă hũ ngă sơ̆ng buơl adơi-ai. Buơl adơi-ai kŭng pơh lơnàng bĕ hơtai-hơtiàn drơi sơ̆ng buơl dơlhă.

Pô Krist Sơ̆ng Belial

14 Juơi buh sa boh yơu găm sơ̆ng du mơnih 'buh păng-tui. Kơyoa pơnuaĭ rĭng-tơpă sơ̆ng pơnuaĭ mơsak-jơhà hũ pơgùm-pơgăp sơ̆ng gơŭ jiơ̆ng ơu? Pơnuaĭ sơrdah sơ̆ng pơnuaĭ kơnăm hũ hơlàr-rơgăm sơ̆ng gơŭ jiơ̆ng ơu? 15 Pô Krist sơ̆ng Belial, † hũ hơlàr-pơgăp sơ̆ng gơŭ jiơ̆ng ơu? Halài mơnih păng-tui Yàng hũ pơ-ơnah hơgĕ găm sơ̆ng mơnih 'buh păng-tui ơu? 16 Sàng duh-dơlbăt Yàng Pô Lơngì hũ nau rơgăm sơ̆ng du rơ̆p-ràk jiơ̆ng ơu? Kơyoa buơl gudrơi la sàng duh-dơlbăt Yàng Pô Lơngì hơdiŭ mĭt-mĭt, yơu rùp-phŭn Yàng Pô Lơngì hũ đờm:

“Kơu rơŭ hơdiŭ lăm buơl guñu sơ̆ng nau-mơrai tơkrah buơl guñu;

Kơu rơŭ ngă Yàng Pô Lơngì buơl guñu,

Sơ̆ng buơl guñu rơŭ ngă buơl làng Kơu.”‡

17 Kơyoa nư̆n, Yàng đờm:

“Tơbiă klàh bĕ mư̆ng tơkrah guñu,

Pơklah-krơi bĕ klàh mư̆ng guñu,

Juơi tŭp truh phơ̆n sơŭ-sơnoh,

Nư̆n Kơu rơŭ rò-lĕng buơl guhã. §

18 Kơu rơŭ ngă Ama buơl guhã,

Buơl guhã rơŭ ngă anà lơkơi, anà kơmơi Kơu.

Yàng Gơnăp-Gơnuăr Wĭl-Tơ̆l đờm yơu nư̆n.” *

*6:2 6:2 Êsai 49:8.

†6:15 6:15 Belial la sa mơta krơi kơmlài Satăn.

‡6:16 6:16 Tơbiă Mư̆ng Ejiptơ 29:45.

§6:17 6:17 Êsai 52:11.

*6:18 6:18 Ôse 1:10.