Chru PƠH-TƠBIĂ PƠNUAĬ TƠRĐƠŬ 18

Pơnuaĭ Pơluĭ-Pơlơhiă 'Babilôn Prŏng

1 Hơdơi tơgrơ̆ pơnuaĭ nư̆n, dơlhă 'buh sa aràng mơnih gơdrưh pơkơ̆n hũ gơnăp-gơnuăr prŏng biă mư̆ng ngŏ lơngì trŭn. Abih boh tơnah hũ kơc̆rà sơrdah kơyoa pơnuaĭ màng-kơc̆rà mơnih gơdrưh nư̆n. 2 Mơnih gơdrưh iơu prŏng săp:

“Babilôn prŏng hũ jơrlơh-tơrlŭng bơjơ, hũ jơrlơh-tơrlŭng bơjơ!

Plơi-prŏng nư̆n hũ tơbiă jiơ̆ng anih dò du kơmlài-jĭnràk,

Sruh-lơbàng abih tơgrơ̆ kơmlài sơŭ-sơnoh,

Sơ̆ng tơgrơ̆ jơi c̆ĭm sơŭ-sơnoh bloh aràng kìr-mơbai.

3 Kơyoa abih tơgrơ̆ buơl làng hũ mơñŭm tơpai pơnuaĭ dri-sơnoh bŭng-pơkăl ñu,

Du pơtau lăm dun-ya hũ ngă glài dri-sơnoh sơ̆ng ñu,

Du mơnih akă-bơnia lăm dun-ya hũ gơnừm tơ phơ̆n-bơna dơlah-dơlài ñu bloh tơbiă jiơ̆ng mơda gơn-hư̆p.”

4 Bloh nư̆n dơlhă mơhư̆ sa săp pơkơ̆n truh mư̆ng ngŏ lơngì, đờm lài:

“Ơ buơl làng Kơu, tơbiă bĕ klàh mư̆ng 'Babilôn!

Tô buơl guhã 'buh hũ pơ-ơnah lăm tơgrơ̆ pơnuaĭ glài-sơnoh ñu,

Sơ̆ng tô buơl guhã klàh păl kŏng tơgrơ̆ pơnuaĭ rŭng-rài găm sơ̆ng ñu.

5 Kơyoa du glài-sơnoh ñu hũ rờng glòng truh tơ lơngì,

Sơ̆ng Yàng Pô Lơngì hũ sơdơ̆r truh tơgrơ̆ glài mơsak-jơhà ñu.

6 Ñu hũ ngă sơ̆ng buơl guhã hơyơu lơi, ngă bơ-yàr bĕ tơ ñu yơu nư̆n rơi,

Bơ-yàr bĕ tơ ñu dua amăng rơlau mư̆ng tơgrơ̆ bruă ñu hũ ngă,

Soài bĕ tơ ñu dua amăng rơlau c̆uàn bloh ñu hũ soài tơ mơnih pơkơ̆n.

7 Ñu hũ mơyòm-pơglòng rùp-phŭn drơi sơ̆ng hơdiŭ mơda gơn-hư̆p dơlah-dơlài kàr lơi,

Nư̆n ngă bĕ tơ ñu pơđì-pơđoa gleh-glăr sơ̆ng dơnuh-dơnà kàr nư̆n rơi.

Kơyoa ñu hũ đờm lăm hơtai-hơtiàn ñu lài:

‘Kơu dò guh yơu sa aràng mơnih pơtau-kơmơi!

Kơu 'buh iơŭ la kơmơi bơdrau,

Sơ̆ng kơu rơŭ 'buh tŭ lơi păl hia-c̆ŏ dơnuh-dơnà!’

8 Kơyoa nư̆n, mĭn lăm sa hơrơi, bloh tơgrơ̆ pơnuaĭ rŭng-rài rơŭ truh sơ̆ng ñu,

Nư̆n la pơnuaĭ mơtai lơhiă, pơnuaĭ dơnuh-dơnà, sơ̆ng pơnuaĭ ờ-lơpa.

Bloh nư̆n apui gùh rơŭ hŭr 'bơ̆ng ñu,

Kơyoa Yàng, Pô c̆ahrơña ñu, la Yàng Pô Lơngì baŭ gơnuăr-pràn.”

9 Du pơtau lăm dun-ya, la du mơnih hũ ngă glài dri-sơnoh bŭng-pơkăl sơ̆ng hơdiŭ lăm pơnuaĭ mơda gơn-hư̆p dơlah-dơlài sơ̆ng ñu, rơŭ hia-c̆ŏ dơnuh-dơnà mư̆ng ñu, tŭ 'buh asă mư̆ng apui hŭr 'bơ̆ng ñu. 10 Du pơtau nư̆n rơŭ dò dơ̆ng mư̆ng atàh, kơyoa huơĭ kơđa tŭ 'buh ñu kŏng pơnuaĭ pơđì-pơđoa gleh-glăr, sơ̆ng đờm lài:

“Gleh-glăr dồn-să biă! Gleh-glăr dồn-să biă! Ơ Plơi-prŏng 'Babilôn,

La plơi prŏng pràn-kơjăp sơ̆ng mơda gơn-hư̆p dih!

Mĭn lăm sa jơ bloh pơnuaĭ c̆ahrơña hã hũ truh bơjơ!”

11 Du mơnih akă-bơnia lăm dun-ya kŭng hia-c̆ŏ sơ̆ng dơnuh-dơnà kơyoa ñu, kơyoa 'buh aràng sơi rơŭ blơi phơ̆n buơl guñu tra, 12 la du phơ̆n pơblơi-sơlih yơu mừh, priă, pơtơu c̆ơk-màng, pơtơu-màng mư̆ng c̆ŭng; bơ-yài kơbuă-lơmŭn, bơ-yài mơr-yah, bơ-yài pơteh lơ-ơu, bơ-yài ia mo mơr-yah; tơgrơ̆ mơta kơyơu 'bơu bơlhơu, tơgrơ̆ phơ̆n mư̆ng bla lơmàn, tơgrơ̆ phơ̆n sơ̆ng kơyơu c̆ơk-màng, sơ̆ng kòng, sơ̆ng pơsơi, sơ̆ng pơtơu bơnga mơtah, 13 kơđuh kwè, tơpŭng buh ơñiăm, tơpŭng-gơlhơu, thŭp, kơtă kơyơu 'bơu bơlhơu, tơpai, mơñà, tơpŭng bơdai-mi, bơdai-mi, lơmo, abo, aseh, rơdeh aseh, hơlŭn-hơlă sơ̆ng găm bơngă-joa aràng rơi. 14 Tơgrơ̆ boh bơngi bloh bơngă-joa hã eh-uăn hũ lơhiă abih bơjơ, tơgrơ̆ pơnuaĭ kơc̆rà-sơrdah màng-mơda nư̆n kŭng kŏng pơluĭ-pơlơhiă klàh mư̆ng hã, sơ̆ng aràng rơŭ 'buh tŭ lơi duah 'buh tra! 15 Du mơnih akă-bơnia pơblơi-sơlih du phơ̆n ni, nư̆n la du mơnih hũ ngă mơda gơnừm tơ 'Babilôn, rơŭ dò dơ̆ng đoh atàh kơyoa huơĭ tơ pơnuaĭ pơđì-pơđoa gleh-glăr ñu păl kŏng; buơl guñu rơŭ hia-c̆ŏ, dơnuh-dơnà, 16 bloh đờm lài: “Gleh-glăr dồn-să biă! Gleh-glăr dồn-să biă! Plơi prŏng dih. Plơi-prŏng hũ c̆ù tơ rùp drơi sơ̆ng bơ-yài kơbuă-lơmŭn, bơ-yài mơr-yah, bơ-yài mơr-yah kĕ, ngă mơkrư sơ̆ng mừh, pơtơu c̆ơk-màng, sơ̆ng pơtơu-màng mư̆ng c̆ŭng! 17 Kơyoa lăm mĭn sa jơ bloh pơnuaĭ mơda gơn-hư̆p prŏng ñu hũ kŏng pơluĭ-pơlơhiă abih.”

Abih tơgrơ̆ mơnih pô ahò, tơgrơ̆ mơnih thuai nau ahò, tơgrơ̆ mơnih ngă bruă lăm ahò, sơ̆ng tơgrơ̆ mơnih akă-bơnia pơblơi-sơlih lăm ia-tơsì, dò dơ̆ng c̆ơ mư̆ng atàh, 18 sơ̆ng tŭ 'buh asă mư̆ng apui 'bơ̆ng pơluĭ ñu, nư̆n buơl guñu driau đờm: “Hũ plơi-prŏng lơi pơc̆àu jiơ̆ng sơ̆ng plơi-prŏng ni ơu?” 19 Buơl guñu mă hơbơu lơ̆n pơ̆l lăm akŏ buơl guñu, bloh nư̆n driau kơmrào, hia-c̆ŏ, dơnuh-dơnà, bloh đờm: “Gleh-glăr dồn-să biă! Gleh-glăr dồn-să biă! Plơi prŏng ni, anih hũ ngă tơ abih tơgrơ̆ mơnih lơi hũ ahò nau lăm ia-tơsì tơbiă jiơ̆ng mơda gơn-hư̆p gơnừm tơ pơnuaĭ mơda gơn-hư̆p ñu, nư̆n bloh mĭn lăm sa jơ, hũ tơbiă jiơ̆ng sa anih jơhua ngơ̆t-ngòt!

20 Ơ lơngì, sờh-sài bĕ kơyoa bruă ñu, ơ du mơnih sơc̆ih-sri, du mơnih tơdi-tơdài, du mơnih gơnuăr-hwơ̆r kŭng sờh-sài bĕ; kơyoa Yàng Pô Lơngì hũ c̆ahrơña rĭng-tơpă tơ buơl guhã, tŭ Pô c̆ahrơña ngă-nìn ñu.”

21 Tŭ nư̆n, sa aràng mơnih gơdrưh pràn-khăng biă mă sa boh pơtơu yơu lơsŭng prŏng, prah trŭn lăm ia-tơsì, sơ̆ng đờm: “'Babilôn la plơi-prŏng kŭng rơŭ kŏng prah trŭn yơu nư̆n rơi, sơ̆ng rơŭ 'buh aràng sơi duah 'buh ñu tra. 22 'Buh aràng sơi dò mơhư̆ săp mơnih pĕ kơñi, săp mơnih pơđik adoh, săp mơnih ơyù tơliă, săp mơnih blùh kơlwờk lăm anih hã tra. Anih hã rơŭ 'buh duah 'buh sa aràng mơnih khờh ngă bruă lơi, yah bruă hơgĕ mơti, sơ̆ng săp lơsŭng xài bơdai kŭng rơŭ 'buh dò mơhư̆ tra. 23 Pơnuaĭ sơrdah apui-đèng rơŭ 'buh pơsàng sơrdah anih hã tra, săp mơnih mơrtơu-lơkơi sơ̆ng mơnih mơrtơu-kơmơi kŭng rơŭ 'buh dò mơhư̆ lăm anih hã. Kơyoa du mơnih akă-bơnia sơ̆ng hã la du mơnih prŏng-màng lăm lơ̆n, sơ̆ng kơyoa abih tơgrơ̆ lơgăr hũ kŏng pơnuaĭ kơmlài-kơmloh hã pơluơ pơ̆ng-gơla. 24 Sơ̆ng lăm plơi-prŏng ni, aràng hũ duah 'buh drah du mơnih gơnuăr-hwơ̆r, du mơnih sơc̆ih-sri, sơ̆ng tơgrơ̆ mơnih hũ kŏng pơmơtai lăm dun-ya.”