Chru PƠH-TƠBIĂ PƠNUAĬ TƠRĐƠŬ 11

Dua Aràng Mơnih Ngă Grơh

1 Tŭ nư̆n hũ mơnih brơi tơ dơlhă sa 'bĕ gai pơrbo mơhiơ̆ yơu gai kồn, sơ̆ng pơđăr dơlhă lài: “Tơgồ dơ̆ng bĕ, dŭ sàng duh-dơlbăt Yàng Pô Lơngì, sơbàn duh-dơlbăt, sơ̆ng yàu tơgrơ̆ mơnih duh-dơlbăt lăm nư̆n. 2 Bloh 'blàng agàh sàng duh-dơlbăt nư̆n luơi sơgah, juơi dŭ. Kơyoa anih nư̆n hũ jào tơ buơl làng agàh, sơ̆ng buơl guñu rơŭ juă c̆ơ 'buh sơ̆p tơ plơi-prŏng sơc̆ih-sri lăm pà pluh dua blàn. 3 Kơu rơŭ brơi dua aràng mơnih ngă grơh Kơu, c̆ù ào blơu kơtăl tô ràng-tơbiă pơnuaĭ dơnuh-dơnà, sơ̆ng đờm hwơ̆r lăm sa rơbơu dua rơtùh năm-pluh hơrơi.”

4 Dua aràng mơnih ngă grơh nư̆n la dua phŭn ôlibe sơ̆ng dua 'bĕ tơkai apui đèng dò dơ̆ng tơ anaŭ Yàng lơ̆n-tơnah. 5 Yah aràng sơi khiăng ngă jơhà dua aràng mơnih ni, nư̆n apui tơbiă mư̆ng kàng buơl guñu rơŭ hŭr 'bơ̆ng du mơnih mơbai-tămdră sơ̆ng buơl guñu. Aràng sơi khiăng ngă jơhà buơl guñu nư̆n rơŭ păl kŏng pơmơtai yơu nư̆n. 6 Buơl guñu hũ gơnuăr kơdrơ̆ lơngì wơ̆, tô hơjàn 'buh hŏ trŭn tơ ala lơ̆n lăm du hơrơi buơl guñu đờm hwơ̆r. Buơl guñu kŭng hũ gơnuăr ngă ia tơbiă jiơ̆ng drah, sơ̆ng angui tơgrơ̆ pơnuaĭ gleh-glăr mơtai-lơhiă ngă jơhà tơ lơ̆n-tơnah hơdùm amăng kŭng jiơ̆ng abih, tui hơtai buơl guñu khiăng.

7 Tŭ buơl guñu hũ ngă wĭl-tơ̆l gơnuăr-bruă ngă grơh, nư̆n jơi-phơ̆n pà gah tơkai mư̆ng rơhồng-dơrlăm 'buh luĭ rơŭ đì tămngă sơ̆ng buơl guñu. Jơi-phơ̆n pà gah tơkai nư̆n rơŭ tămngă pha-jai rơlau buơl guñu sơ̆ng pơmơtai buơl guñu. 8 Rùp-atơu buơl guñu rơŭ đih lăm jơlàn-rơya plơi prŏng, nư̆n la anih Yàng buơl guñu hũ kŏng pơ̆ng tơ kơyơu pơkăl. Plơi-prŏng nư̆n angăn tui gah bơngă la Sôđôm sơ̆ng Ejiptơ. 9 Mơnih mư̆ng tơgrơ̆ buơl làng, tơgrơ̆ jơi-pơtiàn, tơgrơ̆ ia đờm, tơgrơ̆ lơgăr, rơŭ truh c̆ơ rùp-atơu buơl guñu lăm klơu hơrơi mơtưh, sơ̆ng guñu rơŭ 'buh brơi dơ̆r du rùp atơu nư̆n lăm kŭt. 10 Du buơl làng hơdiŭ lăm dun-ya rơŭ sờh-sài biă kơyoa dua aràng mơnih nư̆n mơtai. Buơl guñu rơŭ 'bơ̆ng mơñŭm sờh-sài sơ̆ng pơyoa phơ̆n sèu tơ gơŭ, kơyoa dua aràng mơnih gơnuăr-hwơ̆r ni hũ ngă gleh-glăr lô tơ du buơl làng lăm dun-ya.

11 Bloh hơdơi klơu hơrơi mơtưh, joa hơdiŭ mư̆ng Yàng Pô Lơngì truh tơma lăm dua aràng buơl guñu, sơ̆ng buơl guñu dò dơ̆ng jiơ̆ng, ngă tơ du mơnih c̆ơ 'buh huơĭ-kìr biă-biài. 12 Dua aràng mơhư̆ sa săp prŏng mư̆ng ngŏ lơngì đờm sơ̆ng buơl guñu lài: “Đì bĕ tơ ngŏ ni!” Sơ̆ng buơl guñu hũ rò đì tơ ngŏ lơngì lăm puk hwăl, tơkrah tŭ du mơnih mơbai-tămdră sơ̆ng buơl guñu dò c̆ơ. 13 Lăm jơ nư̆n, hũ sa pơnuaĭ tơtuơ̆n-jơrlơh lơ̆n-tơnah prŏng biă; sa pơ-ơnah sa-pluh plơi-prŏng jơrlơh-tơrlŭng trŭn, tơjuh rơbơu aràng mơnih mơtai lăm pơnuaĭ tơtuơ̆n-jơrlơh lơ̆n-tơnah nư̆n, dò du mơnih pơkơ̆n nư̆n huơĭ-kơđa biă-biài sơ̆ng mơyòm-pơglòng Yàng Pô Lơngì tơ ngŏ lơngì.

14 Pơnuaĭ gleh-glăr mơtai-lơhiă amăng dua hũ rơlau; dih, pơnuaĭ gleh-glăr mơtai-lơhiă amăng klơu truh sơmăr mư.

Mơnih Gơdrưh Tơjuh Blùh Kơlwờk

15 Mơnih gơdrưh tơjuh blùh kơlwờk, nư̆n hũ săp prŏng mư̆ng ngŏ lơngì đờm lài:

“Du lơgăr lăm dun-ya ni tơbiă jiơ̆ng lơgăr Yàng buơl gudrơi,

Sơ̆ng Pơtau Krist Pô.

Pô rơŭ apăn-akŏ rài pơdò rài.”

16 Tŭ nư̆n dua pluh pà aràng mơnih gơnuăr-tha dò guh tơ ngŏ sơbàn drơi tơ anaŭ Yàng Pô Lơngì, pơđih rùp trŭn tơ ala lơ̆n, c̆ĕ-khoai Yàng Pô Lơngì, 17 sơ̆ng đờm lài:

“Khoai Yàng, la Yàng Pô Lơngì Gơnăp-Gơnuăr Wĭl-Tơ̆l, Pô Tŭ Ni Hũ Sơ̆ng Hũ Mư̆ng C̆ơmrừp Bơjơ,

Buơl anà ưnjơmừn Pô, kơyoa Pô hũ mă gơnăp-gơnuăr prŏng Pô bloh apăn akŏ.

18 Tơgrơ̆ buơl làng anok hơtai,

Bloh pơnuaĭ anok-anoa prŏng Pô hũ truh,

La jơ c̆ahrơña du mơnih mơtai,

Brơi phơ̆n mơyòm-brơi tơ du mơnih hơlŭn-hơlă Pô, la du mơnih gơnuăr-hwơ̆r, du mơnih sơc̆ih-sri,

Sơ̆ng du mơnih duh-huơĭ tơ angăn Pô,

Găm mơnih tìt mơnih prŏng,

Sơ̆ng pơluĭ-pơlơhiă du mơnih hũ pơluĭ-pơlơhiă boh tơnah.”

19 Sàng duh-dơlbăt Yàng Pô Lơngì tơ ngŏ lơngì pơh tơbiă, brơi 'buh Rờng Pơnuaĭ Pơguăn-Pơđoàn Pô gah dơrlăm, bloh nư̆n hũ du c̆ă-kơrla, săp dơnài-dơlờng, săp grơ̆m-kơtàl, tơtuơ̆n-jơrlơh lơ̆n-tơnah sơ̆ng hơjàn pơlia prŏng.