Chru MATHIƠ 28

Yàng Jêsu Hơdiŭ Wơ̆

(Mak 16:1-10; Luka 14:1-12; Jăng 20:1-10)

1 Hơdơi hơrơi sa'bat, la hơrơi c̆ơmrừp lăm sa tơjuh, tŭ sơđaŭ dò rìng-rìng ờm, Mari Mađơlen sơ̆ng Mari pơkơ̆n truh rơwăng c̆ơ kŭt. 2 Mơre-mơro hũ pơnuaĭ tơtuơ̆n-mơgơi lơ̆n tơnah pràn sơtăng biă; kơyoa sa aràng mơnih gơdrưh Yàng mư̆ng lơngì trŭn, truh plơ̆ boh pơtơu tơbiă, sơ̆ng dò guh tơ ngŏ. 3 'Bò mơta mơnih gơdrưh sơrdah mơhiơ̆ yơu c̆ă-kơrla, sơ̆ng ào pơtih yơu pơlia. 4 Du mơnih lĭng kraŭ-khiă huơĭ-kơđa biă, kơtơ̆ drơi sơ̆ng tơbiă jiơ̆ng yơu mơnih mơtai. 5 Bloh mơnih gơdrưh đờm sơ̆ng du mơnih kơmơi nư̆n lài: “Juơi huơĭ, kơyoa kơu thơu buơl guhã duah Yàng Jêsu, la Pô hũ kŏng pơ̆ng tơ kơyơu pơkăl. 6 Pô 'buh dò tơ anih ni ơu, Pô hơdiŭ wơ̆ bơjơ, yơu pơnuaĭ Pô hũ đờm. Truh bĕ c̆ơ anih Pô hũ đih. 7 Sơ̆ng nau sơmăr bĕ, đờm tơ du mơnih tui-mơgru Pô thơu lài Pô hũ mư̆ng mơnih mơtai hơdiŭ wơ̆ bơjơ. Ni, Pô nau tơ c̆àr Galile dơlhơu buơl guhã; tơ anih nư̆n buơl guhã rơŭ 'buh Pô. Nư̆n, kơu hũ đờm tơ buơl guhã bơjơ.”

8 Dua aràng mơnih kơmơi nư̆n tơmbah-tơmbàn tơbiă mư̆ng kŭt, găm huơĭ găm sờh-sài biă, đuaĭ nau akhàn pơthơu tơ du mơnih tui-mơgru Pô. 9 Ni, Yàng Jêsu tòm buơl guñu sơ̆ng đờm: “Siàm drơi buơl anà!” Buơl guñu truh jĕ, kwăr tơkai Pô, sơ̆ng c̆ĕ-dơlbăt Pô. 10 Yàng Jêsu đờm sơ̆ng buơl guñu: “Juơi huơĭ! Nau đờm bĕ tơ du adơi-ai Kơu thơu, tô buơl guñu truh tơ Galile, tơ anih nư̆n buơl guñu rơŭ 'buh Kơu.”

Pơnuaĭ Đờm Pơtiơ̆ng Lăm Plơi-Lơgăr

11 Lăm tŭ dua aràng mơnih kơmơi nư̆n nau jơlàn, nư̆n du mơnih lĭng kraŭ-khiă kŭt tơma lăm plơi-prŏng, đờm akhàn wơ̆ sơ̆ng du mơnih gơnuăr apăn-akŏ pơyă phơ̆n duh-dơlbăt thơu mư̆ng abih tơgrơ̆ bruă hũ tơbiă truh. 12 Hơdơi tŭ du mơnih gơnuăr apăn-akŏ pơyă phơ̆n duh-dơlbăt sơ̆ng du mơnih gơnuăr-tha hũ pơtòm tămbơyai sơ̆ng gơŭ, buơl guñu brơi tơ du mơnih lĭng lô priă, 13 sơ̆ng kơkơi pơđăr: “Buơl guhã păl đờm: ‘Glai mơlăm, lăm tŭ buơl dơlhă dò đih, du mơnih tui-mơgru ñu hũ truh sơ̆ng klĕ mă rùp-atơu ñu nau.’ 14 Yah bruă ni mơhư̆ truh tơnia kwăng apăn-akŏ du c̆àr lăm lơgăr, nư̆n buơl gudrơi rơŭ duah pơnuaĭ đờm mơblàng sơ̆ng kwăng, buơl guhã 'buh păl huơĭ kơ-ù pơnuaĭ hơgĕ.” 15 Yơu nư̆n, du mơnih lĭng đồ-mă priă sơ̆ng ngă tui iơŭ yơu pơnuaĭ hũ kơkơi pơđăr. Pơnuaĭ nư̆n hũ đờm pơtiơ̆ng lăm buơl làng Juđa tơ̆l truh tơ hơrơi ni.

Pơnuaĭ Yàng Jêsu Kơkơi-Pơđăr Du Mơnih Tui-Mơgru Pô Păl Ngă

(Mak 16:14-18; Luka 24:36-49; Jăng 20:19-23)

16 Sa-pluh sa aràng mơnih tui-mơgru nau truh tơ Galile, đì tơ ngŏ c̆ơ̆ bloh Yàng Jêsu hũ pơto tơ buơl guñu. 17 Tŭ 'buh Pô, buơl guñu c̆ĕ-khoai Pô; bloh hũ sa-sĭt mơnih sơđaŭ dò dră-drơ̆ng, 'buh sơnư̆ng lài nư̆n biă la Yàng Jêsu. 18 Yàng Jêsu truh jĕ, đờm sơ̆ng du mơnih tui-mơgru: “Abih tơgrơ̆ gơnuăr tơ ngŏ lơngì sơ̆ng tơ ala lơ̆n hũ jào tơ Kơu. 19 Yơu nư̆n, nau bĕ sơ̆ng ngă tơ abih tơgrơ̆ buơl làng tơbiă jiơ̆ng mơnih tui-mơgru Kơu; mă bĕ angăn Pô Yàng Ama, Pô Yàng Anà, sơ̆ng Yàng Bơngă Sơc̆ih-Sri bloh ngă 'baptem tơ buơl guñu, 20 sơ̆ng pơto buơl guñu păng-rơmiă ngă tui abih tơgrơ̆ pơnuaĭ Kơu hũ pơto tơ buơl guhã. Sơ̆ng ni, Kơu jiăng dò găm sơ̆ng buơl guhã tơ̆l truh tơ luĭ-dŭt rài.”