Chru PƠH-TƠBIĂ PƠNUAĬ TƠRĐƠŬ 7

Du Mơnih Hơlŭn-Hơlă Yàng Pô Lơngì Hũ Tơ̆m 'Băng-Kì

1 Hơdơi bruă nư̆n, dơlhă 'buh pà aràng mơnih gơdrưh dò dơ̆ng tơ pà akiăng boh tơnah, apăn pà gah rơbù lăm boh tơnah wơ̆, tô 'buh hũ rơbù blùh tơ ngŏ lơ̆n-tơnah, tơ ngŏ ia-tơsì, halài tơ ngŏ phŭn kơyơu lơi. 2 Dơlhă kŭng 'buh sa aràng mơnih gơdrưh pơkơ̆n truh mư̆ng gah ia-hơrơi tơbiă, apăn 'băng-kì Yàng Pô Lơngì hơdiŭ mĭt-mĭt. Mơnih gơdrưh ni prŏng săp iơu pà aràng mơnih gơdrưh pơkơ̆n, la du mơnih gơdrưh hũ brơi gơnuăr tô ngă jơhà lơ̆n-tơnah sơ̆ng ia-tơsì, 3 sơ̆ng đờm lài: “Juơi ngă jơhà lơ̆n-tơnah, ia-tơsì sơ̆ng du phŭn kơyơu, tơ̆l truh tơ tŭ buơl gudrơi hũ tơ̆m 'băng-kì tơ ngŏ thơ̆i du mơnih hơlŭn-hơlă Yàng Pô Lơngì buơl gudrơi.” 4 Dơlhă mơhư̆ khà mơnih hũ tơ̆m 'băng-kì la: Sa rơtùh pà pluh pà rơbơu aràng.* Tơgrơ̆ mơnih hũ tơ̆m 'băng-kì truh mư̆ng du jơi-pơtiàn buơl làng Israel.

5 Lăm jơi-pơtiàn Juđa: Sa pluh dua rơbơu aràng hũ tơ̆m 'băng-kì;

Lăm jơi-pơtiàn Ruben: Sa pluh dua rơbơu aràng;

Lăm jơi-pơtiàn Gat: Sa pluh dua rơbơu aràng;

6 Lăm jơi-pơtiàn Aser: Sa pluh dua rơbơu aràng;

Lăm jơi-pơtiàn Neptali: Sa pluh dua rơbơu aràng;

Lăm jơi-pơtiàn Manase: Sa pluh dua rơbơu aràng;

7 Lăm jơi-pơtiàn Simeôn: Sa pluh dua rơbơu aràng;

Lăm jơi-pơtiàn Lebi: Sa pluh dua rơbơu aràng;

Lăm jơi-pơtiàn Issaka: Sa pluh dua rơbơu aràng;

8 Lăm jơi-pơtiàn Sabulôn: Sa pluh dua rơbơu aràng;

Lăm jơi-pơtiàn Jôsep: Sa pluh dua rơbơu aràng;

Lăm jơi-pơtiàn Benjamin: Sa pluh dua rơbơu aràng hũ tơ̆m 'băng-kì.

Tơrpuơl Mơnih Lô Hũ Dŏng-Pơklàh

9 Hơdơi tơgrơ̆ bruă nư̆n, dih, dơlhă 'buh hũ sa tơrpuơl mơnih lô biă, lô tơ̆l truh 'buh aràng sơi hũ rơgơi yàu jiơ̆ng, mư̆ng tơgrơ̆ lơgăr, tơgrơ̆ jơi-pơtiàn, tơgrơ̆ buơl làng, tơgrơ̆ ia đờm. Buơl guñu dò dơ̆ng tơ anaŭ sơbàn sơ̆ng tơ anaŭ Abo Anà, rùp c̆ù ào kò jruh, tơngàn apăn sơla guăl. 10 Buơl guñu prŏng săp driau: “Pơnuaĭ dŏng-pơklàh buơl gudrơi la kơyoa mư̆ng Yàng Pô Lơngì, Pô dò guh tơ ngŏ sơbàn, sơ̆ng kơyoa mư̆ng Abo Anà.” 11 Abih du mơnih gơdrưh dò dơ̆ng tòmdăr sơbàn, tòmdăr du mơnih gơnuăr-tha sơ̆ng pà Jơi-Phơ̆n Hơdiŭ, pơđih rùp tơ anaŭ sơbàn sơ̆ng c̆ĕ-dơlbăt Yàng Pô Lơngì. 12 Buơl guñu đờm lài: “Amen! Pơnuaĭ mơyòm-pơglòng, màng-kơc̆rà, jak-khờh, ưnjơmừn, màng-rơyŭ, gơnăp-gơnuăr sơ̆ng gơnuăr-pràn dò abih lăm Yàng Pô Lơngì buơl gudrơi rài pơdò rài 'buh luĭ. Amen!” 13 Sa aràng lăm du mơnih gơnuăr-tha đờm sơ̆ng dơlhă lài: “Du mơnih c̆ù ào kò jruh nư̆n la aràng sơi, sơ̆ng buơl guñu mư̆ng anih lơi truh?” 14 Dơlhă đờm lài: “Ơ yàng, yàng thơu.” Mơnih gơnuăr-tha nư̆n đờm sơ̆ng dơlhă: “Ni la du mơnih hũ tơbiă klàh mư̆ng pơnuaĭ gleh-glăr rŭng-rài prŏng, hũ boh goh sơ̆ng ngă pơsơc̆ih kò ào drơi lăm drah Abo Anà. 15 Kơyoa nư̆n, buơl guñu hũ dò dơ̆ng tơ anaŭ sơbàn Yàng Pô Lơngì, hơrơi mơlăm duh bruă lăm sàng duh-dơlbăt Pô; sơ̆ng Pô dò guh tơ ngŏ sơbàn rơŭ dò sơ̆ng buơl guñu mĭt-mĭt. 16 Buơl guñu rơŭ 'buh tŭ lơi lơpa sơ̆ng 'buh tŭ lơi mơhau tra; kŭng 'buh hũ ia-hơrơi, halài joa pơđiă kluơĭ lơi ngă jơhà truh buơl guñu. 17 Kơyoa Abo Anà dò tơkrah sơbàn rơŭ glăng-c̆ơ sơ̆ng ba buơl guñu truh tơ du c̆roh ia pơnuaĭ hơdiŭ. Yàng Pô Lơngì rơŭ uă abih ia-mơta tơ mơta buơl guñu.”

*7:4 7:4 144.000 aràng