Chru HEBRƠ 7

Yàng Jêsu Sơ̆ng Melc̆isedek

1 Melc̆isedek ni la pơtau Salem, mơnih gơnuăr pơyă phơ̆n duh-dơlbăt Yàng Pô Lơngì Ngŏ Glòng Rơlau Abih, la mơnih hũ tơbiă rò Abraham sơ̆ng lơkơu lơngai-pơtuah tơ Abraham tŭ ñu tămngă pha-jai rơlau du pơtau gài mơrai wơ̆. 2 Abraham hũ mă sa pơ-ơnah sa-pluh mư̆ng abih tơgrơ̆ phơ̆n-bơna drơi hũ bloh pơyă tơ pơtau. Dơlhă biă, angăn mơta pơtau la “Melc̆isedek,” hũ mơblàng la “Pơtau Rĭng-Tơpă,” pơtau kŭng la pơtau Salem, hũ mơblàng la “Pơtau Rĭng-Lơngai.” 3 Pơtau 'buh hũ ama, 'buh hũ ame, 'buh hũ jơi-pơtiàn, 'buh hũ hơrơi đih apui, kŭng 'buh hũ hơrơi mơtai, bloh pơtau mơhiơ̆ yơu Anà Yàng Pô Lơngì; pơtau kừ ngă mơnih gơnuăr pơyă phơ̆n duh-dơlbăt rài pơdò rài.

4 Buơl adơi-ai sơnư̆ng c̆ơ bĕ, rùp-phŭn kơi-kŏ pàng-yau buơl gudrơi la Abraham hũ mă sa pơ-ơnah sa-pluh lăm abih tơgrơ̆ phơ̆n siàm drơi tămngă mă hũ bloh pơyă tơ pơtau, nư̆n pơtau prŏng-màng la thơu hơdùm! 5 Du anà-tơc̆o jơi-pơtiàn Lebi, yah aràng sơi đồ-mă hũ gơnuăr-bruă mơnih gơnuăr pơyă phơ̆n duh-dơlbăt, nư̆n kừ tui pơnuaĭ adăt hũ ngă-nìn lăm pơnuaĭ adăt-adia, hũ gơnuăr đồ-mă sa pơ-ơnah sa-pluh mư̆ng buơl làng, nư̆n la mư̆ng buơl adơi-ai drơi, yah buơl guñu kŭng mư̆ng Abraham bloh tơbiă. 6 Bloh pơtau ni, 'buh iơŭ la jơi-pơtiàn Lebi, kŭng đồ-mă sa pơ-ơnah sa-pluh mư̆ng Abraham sơ̆ng lơkơu lơngai-pơtuah tơ ñu la mơnih hũ đồ-mă pơnuaĭ đờm pơguăn. 7 Mơnih tăl ngŏ lơkơu lơngai-pơtuah tơ mơnih tăl ala, nư̆n la pơnuaĭ 'buh aràng sơi tăm-mơsau kơmlah jiơ̆ng. 8 Gah ni, du mơnih gơnuăr pơyă phơ̆n duh-dơlbăt đồ-mă sa pơ-ơnah sa-pluh la du mơnih bơhiàn păl mơtai; bloh gah dih, pơtau nư̆n hũ ngă grơh la dò hơdiŭ. 9 Hũ rơgơi đờm lài, Lebi la mơnih đồ-mă sa pơ-ơnah sa-pluh, kŭng kơyoa Abraham bloh pơyă sa pơ-ơnah sa-pluh, 10 kơyoa tŭ Melc̆isedek nau rò Abraham, nư̆n Lebi dò lăm hơtai-hơtiàn kơi-kŏ pàng-yau.

Gơnuăr-Bruă Pơyă Phơ̆n C̆ĕ-Pơyơ̆r Duh-Dơlbăt Pô Krist Prŏng-Màng Rơlau Arôn

11 Yah gơnừm tơ gơnuăr-bruă pơyă phơ̆n duh-dơlbăt mơnih Lebi bloh aràng hũ wĭl-tơ̆l (kơyoa buơl làng đồ-mă hũ pơnuaĭ adăt-adia tŭ dò tơ ala gơnuăr-bruă pơyă phơ̆n duh-dơlbăt), nư̆n kơđa hơgĕ c̆àng păl hũ sa gơnuăr pơyă phơ̆n duh-dơlbăt pơkơ̆n, mơhiơ̆ yơu Melc̆isedek, bloh 'buh tui tơrpuơl Arôn? 12 Gơnuăr-bruă pơyă phơ̆n duh-dơlbăt hũ pơsơlih nư̆n pơnuaĭ adăt-adia kŭng păl hũ pơsơlih. 13 Kơyoa Pô bloh du pơnuaĭ nư̆n đờm truh la mơnih mư̆ng sa jơi-pơtiàn pơkơ̆n, sơ̆ng lăm jơi-pơtiàn nư̆n ka hũ aràng sơi duh bruă tơ anih sơbàn duh-dơlbăt. 14 Kơyoa loh-làng la Yàng buơl gudrơi tơbiă mư̆ng jơi-pơtiàn Juđa, sa jơi-pơtiàn bloh Môise 'buh hũ đờm hơgĕ mư̆ng gơnuăr bruă pơyă phơ̆n duh-dơlbăt. 15 Pơnuaĭ ni 'brŏ loh-làng rơlau wơ̆, tŭ buơl gudrơi 'buh sa aràng mơnih gơnuăr pơyă phơ̆n duh-dơlbăt pơkơ̆n hũ rơwah-pồ, mơhiơ̆ yơu Melc̆isedek, 16 la mơnih gơnuăr pơyă phơ̆n duh-dơlbăt 'buh tui adăt-adia pơnuaĭ adăt-pơđăr jơi anà mơnih, bloh tui gơnăp-gơnuăr pơnuaĭ hơdiŭ 'buh tŭ lơi mơtai. 17 Kơyoa hũ pơnuaĭ ngă grơh tơ Pô lài:

“Anà ngă mơnih gơnuăr pơyă phơ̆n duh-dơlbăt rài pơdò rài,

Yơu Melc̆isedek.” *

18 Yơu nư̆n, pơnuaĭ adăt-pơđăr dơlhơu thrơi kơyoa 'buh hũ gơnuăr sơ̆ng 'buh hũ kwơ-màng nư̆n hũ kơđòng klà luơi bơjơ. 19 Kơyoa pơnuaĭ adăt-adia 'buh rơgơi ngă tơ pơnuaĭ hơgĕ wĭl-tơ̆l jiơ̆ng. Bloh tŭ ni, buơl gudrơi hũ pơnuaĭ gơnừm-c̆àng siàm rơlau, sơ̆ng kơyoa pơnuaĭ gơnừm-c̆àng nư̆n buơl gudrơi hũ truh jĕ Yàng Pô Lơngì.

20 Pơnuaĭ pơsơlih nư̆n 'buh iơŭ la 'buh hũ pơnuaĭ tơpah-sri ngă-nìn. Du mơnih dih tŭ tơbiă jiơ̆ng mơnih gơnuăr pơyă phơ̆n duh-dơlbăt, nư̆n 'buh c̆àng pơnuaĭ tơpah-sri. 21 Bloh Yàng Jêsu tŭ tơbiă jiơ̆ng mơnih gơnuăr pơyă phơ̆n duh-dơlbăt, nư̆n hũ sa pơnuaĭ tơpah-sri mư̆ng Pơtau hũ đờm sơ̆ng Pô lài:

“Yàng hũ tơpah-sri, sơ̆ng rơŭ 'buh tŭ lơi pơsơlih hơtai Pô;

Anà la mơnih gơnuăr pơyă phơ̆n duh-dơlbăt rài pơdò rài.”

22 Kơyoa pơnuaĭ tơpah-sri nư̆n, Yàng Jêsu hũ tơbiă jiơ̆ng sa pơnuaĭ nìn-kơjăp tơ pơnuaĭ pơguăn-pơđoàn siàm rơlau.

23 Mư̆ng yau truh ni, hũ lô mơnih tơbiă jiơ̆ng mơnih gơnuăr pơyă phơ̆n duh-dơlbăt, kơyoa buơl guñu păl mơtai, nư̆n 'buh rơgơi kừ dò ngă gơnuăr-bruă mĭt jiơ̆ng. 24 Bloh Yàng Jêsu, kơyoa Pô dò hơdiŭ mĭt-mĭt rài pơdò rài, nư̆n gơnuăr-bruă mơnih gơnuăr pơyă phơ̆n duh-dơlbăt Pô dò mĭt-mĭt rài pơdò rài 'buh tŭ lơi pơsơlih. 25 Kơyoa nư̆n, Pô hũ rơgơi dŏng-pơklàh wĭl-tơ̆l tơgrơ̆ mơnih gơnừm tơ Pô bloh truh jĕ Yàng Pô Lơngì, kơyoa Pô dò hơdiŭ mĭt-mĭt tô iơu-lài ala tơ du mơnih nư̆n.

26 Biă yơu nư̆n, Pô la mơnih gơnuăr prŏng apăn-akŏ pơyă phơ̆n duh-dơlbăt bloh buơl gudrơi păl c̆àng: sơc̆ih-sri, 'buh hũ glài-sơnoh, 'buh sơŭ-sơnoh, pơklah krơi klàh mư̆ng du mơnih glài-sơnoh, hũ pồ-pơđì glòng rơlau tơ du tăl lơngì. 27 'Buh yơu du mơnih gơnuăr prŏng apăn-akŏ pơyă phơ̆n duh-dơlbăt pơkơ̆n, Pô 'buh c̆àng păl pơyă phơ̆n sì c̆ĕ-pơyơ̆r duh-dơlbăt yàu hơrơi, dơlhơu la kơyoa mư̆ng glài drơi, hơdơi la kơyoa mư̆ng glài buơl làng. Pô pơyă rùp-phŭn drơi ngă phơ̆n sì c̆ĕ-pơyơ̆r duh-dơlbăt sa amăng tơ̆l abih. 28 Kơyoa pơnuaĭ adăt-adia rơwah-pồ du mơnih sơđaŭ 'buh khăng-pràn ngă mơnih gơnuăr prŏng apăn-akŏ pơyă phơ̆n duh-dơlbăt; bloh pơnuaĭ tơpah-sri truh hơdơi pơnuaĭ adăt-adia nư̆n rơwah-pồ Anà, la Pô hũ wĭl-tơ̆l rài pơdò rài.

HEBRƠ
<
7
>

*7:17 7:17 Pơđik Adoh Mơyòm 110:4.